JOB 10 - WƖA TENIŊ

¹ Mɩ sɩ hɛ mɩ mɩɩsɩŋ lɛ bɩra bɩ bʋbʋɔ kɛnɛ mɩ teeŋ, ŋɩɩ wɩaa, mɩ jaŋ ŋmɛŋ ŋɩɩ kala mɩ sɩɩ chɛ. Mɩ jaŋ bʋl tʋɔ-chee-la sɩ faasa kɛmmɛ wɩaa.

² Mɩ jaŋ bʋla pɩ Wɩa: Sɩ́ cheeriŋ joŋo pɩmɛ, dagɛmɛ wɩɩ-la mɩ sɩ ŋaa chei.

³ Ʋ ŋaa wʋzɔŋ nɛ pɩŋ ŋ sɩɩ dɔgɩsɛmɛ a vɩa nɩɩ-la ŋ sɩ ŋaa? Ŋ tʋɔŋ tɔrɛ wʋbɔmɔ-la nɩbɔŋŋɔɔ sɩɩ ŋaa lɛɛ?

⁴ Ŋ kɛŋ nuhuobiine sɩaa nɛɛ? Ŋŋ na wɩaa arɩ nuhuobiine sɩɩ naba ŋɩɩ nɛɛ?

⁵ Ŋ tapʋlaa nagɛ ŋɩɩ nuhuobiine tapʋlaa sɩ naga nɛɛ? Ŋ jɩsɩŋ ma nagɛ nuhuobiine jɩsɩŋ nɛɛ?

⁶ Ŋ gbille na mɩ wʋcheelee, a chɛ na mɩ wʋbɔmʋŋ maa?

⁷ Ŋ jɩma mɩ bɩ wɩɩkala ŋaa cheyiŋ, a jɩŋ dɩ nʋʋkala ma bɩ jaŋ wuo laamɛ ta ŋ nɩsɩŋ lɛ.

⁸ Ŋ nɩsaa nɛ ŋ kaa ŋaamɛ. Ŋ saa jaŋ bɩra cheimi?

⁹ Liise mʋ yi arɩ chʋrʋŋ nɛ ŋ kaa mɛmɩ. Ŋ chɛ ŋ bɩra nɔmmɛ dɩ mɩ nagɛ hagɩlɩ-munuŋ nɛɛ?

¹⁰ Ŋ dee bɩ leŋe mɩ nyɩmma fɩɩrɩŋ jʋʋ mɩ naaŋ luoruŋ mɩ suomo waa nɩmɛɛ?

¹¹ Ŋ nɛ mɛmɩ, a ŋaa mɩ haŋgbelee arɩ poloo, a joŋ nampɩlɩŋ arɩ puruŋ tɔ.

¹² Ŋ nɛ pɩmɛ mɩɩsɩŋ, aŋ dagɛ ŋɩɩ ŋ sɩ chomi, a bemmi woruŋ mɩ mɩɩsɩŋ kala lɛ.

¹³ Ama, wɩɩŋ deeŋ nɛ ŋ joŋo hɛ ŋ tʋɔŋ lɛ. Mɩ jɩma arɩ wɩɩŋ deeŋ fa hɛ ŋ nyuŋ lɛ nɛ:

¹⁴ Ŋ faa beŋ nɛ dɩ ŋ na arɩ mɩ jaŋ ŋaa wʋbɔŋ, dɩ ŋ vɩa dɩ ŋ joŋo chɛmɛ.

¹⁵ Dɩ mɩ nɛ laa cheeriŋ, wɩɩŋ puumi. Dɩ mɩ nɛ bɩ wɩɩ cheye ma, mɩ bɩ jaŋ wuo kɛŋ mɩ nyuŋ je, bɛɛ wɩaa hɩɩsɩŋ jʋʋmɛ nɛ, mɩ jʋʋ ta mɩ wʋwalɩmaa lɛ.

¹⁶ Dɩ mɩ nɛ kɛŋ mɩ tɩtɩa je, ŋ yie nagɛ naachigiŋ nɛ a bagɩlɛmɛ ŋɩɩ a mʋ kɛmmɛ, a dagɛ ŋ dol bal-la mɩ lɛ.

¹⁷ Bʋa na-kala ŋ yie yuyuomi nɛ a chɩchɛ mɩ na hɛɛŋ, a leŋ ŋ baanɩŋ pʋŋa pɩpɛ mɩ lɛ. Bʋa na-kala ŋ yie chɩchɛ wombii-falɩɩ nɛ ŋ sɩ jaŋ to cheimi.

¹⁸ Bɛɛ nɛ tɩɩ ŋ kɛmmɛ kʋ lɩɩ mɩ naaŋ luoruŋ tʋɔŋ? Mɩ fa cho dɩ mɩ sʋba nɛ, dɩ nʋʋkala bɩ mɩ na.

¹⁹ Ʋ fa jaŋ kpɩa dɩ ba nɛ fa paala bɩ mɩ lʋla koo mɩ fa yie lɩɩ luoruŋ tʋɔŋ a mʋ tuu bʋa.

²⁰ Tapʋlaa baŋmɛnɛ-la mɩ sɩ jaŋ hɛ mɩ mɩɩsɩŋ lɛ, ba dɛrɩŋ yie nɛ. Lemmi, dɩ mɩ nɩɩ sɩma mʋa,

²¹ aŋ-na mʋ lɛlɛɛ-jaŋ, lee-la nʋʋ sɩ bɩ jaŋ mʋ aŋ bɩra mɩɩrɛ. Lee-la sɩ kɛŋ birimiŋ arɩ tʋɔ-cheeŋ.

²² Tintee-la leriŋ sɩ bire lim, ŋ bɩ kʋŋkala wuo na, wɩɩkala ma vʋgɩmɛ nɩmɛ, ʋ pʋlʋmʋŋ ma paala nagɛ birimiŋ.”