JOB 1 - WƖA TENIŊ

¹ Baal kʋbala nɛ fa hɛ Us tinteeŋ lɛ, baa yɩrɛ Job. Baala deeŋ wɩaa tʋʋla nɛ woruŋ, ʋ bɩ wʋcheeli kala kɛnɛ. Ʋ faa fá Wɩa nɛ woruŋ a bɛrɛ wʋbɔŋŋɔɔ.

² Ʋ fa kɛŋ hambolibiisiŋ balɩpɛ nɛ, hantolibiisiŋ ma batori.

³ Ʋ fa kɛŋ piesee bʋɩ balɩpɛ nɛ, bʋntaŋŋaba ma bʋɩ batori, nɛ-pɛrɛɛ bʋbʋɔ-bugoo ma zɔɔ-banɔŋ, kakusuŋ ma zɔɔ-banɔŋ. Ʋ tɩntɩnnaa ma fa yʋgɛ woruŋ. Ʋ nɛ fa ŋaa kɩaa tɩɩna wɩɩpɔsʋŋ dɩɩrɩŋ nɩaa kala tʋɔŋ.

⁴ Ʋ hambolibiisiŋ tʋɔŋ kʋŋkala fa yie ŋaa kʋdiilee ba dii a gbieli a kpɩkpaa nɛ jɩna kala. Ba kʋŋkala nɛ ŋaa kʋdiile-la, ʋ yie yɩrɛ ʋ naambiiri-la arɩ ba dɩhaala-la batori nɛ ba kʋ pɛ ba lɛ ba dii kɩalɩŋ aŋ nyʋa kʋnyʋalaa.

⁵ Dɩ ba nɛ gbieli gbieli-la kʋŋkala dɛrɛ, Job yie yɩrɛba nɛ a pɩɩsɛ ba disiniŋ ta. Ʋ yie sii chʋchʋɔ-fɩɛla a ŋaa kʋnyɩgaa Wɩɩsʋlʋŋ a pɩ ba kʋŋkala. Ʋ yie ŋaa ŋɩɩ aŋ bɩɩnɛ ʋ tʋɔŋ lɛ a bʋl, “Kapo mɩ biiriŋ deemba kʋŋ ŋaa wʋbɔŋ a tʋʋsɛ Wɩa ʋ tʋɔŋ lɛ.” Job fa vɛnɛɛ ŋaa wɩɩŋ deeŋ nɛ bʋa na-kala.

Sɩtaanɩ sɩ magɩsɛ Job bumbuŋ

⁶ Tapʋlɩɩ kʋbala Wɩa tɩndaaraa kɛŋ ba tɩtɩa kɔ La TƖƖNA sɩpaaŋ, Sɩtaanɩ ma to ba harɩŋ a kɔ.

⁷ Ŋɩɩ nɛ La TƖƖNA pɩɛsɛ Sɩtaanɩ, “Nɩɩ nɛ ŋ lɩɩ kɔ daha?” Sɩtaanɩ bʋla pɩ La TƖƖNA, “Mɩ gɔllɔɔ baarɛ dʋnɩa lɛ nɛ.”

⁸ Ŋɩɩ nɛ La TƖƖNA pɩɛsʋ, “Ŋ na mɩ tɩntɩnna Job nɛɛ? Nʋʋkala tuo dʋnɩa lɛ a nagʋ. Ʋ wɩaa tʋʋla nɛ woruŋ, ʋ bɩ wʋcheeli kala kɛnɛ. Ʋʋ fá mɩ-na Wɩa nɛ woruŋ a bɩ chɛ dɩ ʋ sɩɩŋ na wʋbɔmʋŋ.”

⁹ Sɩtaanɩ ma bʋl, “Ŋ bɩɩna Job sɩɩ fáŋ ŋɩɩ ŋaa pɛɩ nɛɛ?

¹⁰ Ŋ pɔ ʋ dɩ ʋ dɩa nɩaa arɩ ba dʋa kala nɛ bʋa na-kala. Ŋ pɛ ʋ lɛ nɛ ʋ wɩɩkala wasɛ woruŋ, ŋ pʋ piesee arɩ pʋŋ-doho-na kala nɛ, ba jɛrɛ su tintee-la kala.

¹¹ Ama dɩ ŋ nɛ laa kɩaa deemba kala ʋ teeŋ, ʋ jaŋ bʋl wʋbɔŋŋɔɔ a tɩgɛ ŋ lɛ, ʋ bɩ jaŋ kaa faa.”

¹² Ŋɩɩ nɛ La TƖƖNA bʋla pɩ Sɩtaanɩ, “Ʋ zɔmɔ, mɩ joŋ kʋŋkala ʋ sɩ kɛnɛ a hɛ ŋ nɩsɩŋ lɛ nɛ. Ama pʋpɔ ŋ sɩ́ Job tɩtɩa wɩɩkala ŋaa.” Ŋɩɩ nɛ Sɩtaanɩ sii La TƖƖNA sɩpaaŋ.

¹³ Tapʋlɩɩ kʋbala, Job hambolibiisiŋ arɩ ʋ toloo dii kɩaa aŋ gbigbieli ba maalɩ-hɩaŋ dɩa lɛ,

¹⁴ ŋɩɩ nɛ nʋʋ kɛŋ tɩndaarɩŋ deeŋ kʋ pɩ Job, “Nɛ-pɛrɛ-la faa pɛrɛ nɛ, ka kakusu-la ma chɩna kpagɛba a didii kɩaa,

¹⁵ dɩ Saba tɩŋŋaa nɛ ŋɩɩ, a kʋ yuola a kɛsɛ ba kala kaa viiri. Ba kpʋ ŋ tɩntɩnnaa kala nɛ, mɩ dʋndʋŋa nɛ wuo foro fá a kɔ dɩ mɩ bʋla pɩŋ.”

¹⁶ Bʋa-la lɛ ʋ ha sɩɩ bʋl wɩaa, nʋʋ dɔŋ ma bɩra kʋ jʋʋ a bʋl, “Wɩa nyiniŋ lɩɩ wɩa-nyuŋ a kʋ tuu dii piese-la arɩ ŋ tɩntɩnnaa kala, mɩ dʋndʋŋa nɛ wuo foro fá a kɔ dɩ mɩ hɛ duoso pɩŋ.”

¹⁷ Bʋa-la lɛ ʋ ma ha sɩɩ bʋl wɩaa ŋɩɩ, nʋʋ dɔŋ ma bɩra kɔ a bʋl, “Babɩlɔŋ tɩŋŋaa laalɩyuoroo bugoo batori nɛ kɔ a kiri ŋ bʋntaŋŋaba-la kaa viiri. Ba kpʋ ŋ tɩntɩnnaa kala nɛ, mɩ dʋndʋŋa nɛ wuo foro fá a kɔ dɩ mɩ hɛ duoso pɩŋ.”

¹⁸ Bʋa-la lɛ ʋ ma ha sɩɩ bʋl wɩaa, ŋɩɩ nɛ nʋʋ dɔŋ ma bɩra kɔ a bʋl, “Ŋ hambolibiisiŋ arɩ ŋ toloo faa dii kɩaa nɛ aŋ nyʋnyʋa kɩaa a gbigbieli ba maalɩ-hɩaŋ dɩa lɛ,

¹⁹ dɩ pel-duo guu lɩɩ tintee-hɩlɩŋ dɩɩrɩŋ a kʋ yagɛ dɩa-la gʋnaa banɛsɛ kala lɛ, ʋ tuu tele tɔba, ba kala sʋʋ. Mɩ dʋndʋŋa nɛ wuo lɩɩ a kɔ dɩ mɩ hɛ duoso pɩŋ.”

²⁰ Job sɩ nɩɩ wɩaa deemba kala, ʋ sii kɛŋ ʋ gɛnnɩŋ kɩɛsɛ aŋ fʋŋ ʋ nyuŋ aa dagɛ tʋɔ-cheeŋ. Ŋɩɩ nɛ ʋ tuu tele chu tinteeŋ a chʋɔlɛ Wɩa

²¹ a bʋl, “Yarɩ-biree nɛ mɩ kaa lɩɩ mɩ naaŋ luoruŋ tʋɔŋ a kʋ lɩɩ, yarɩ-biree nɛ mɩ jaŋ mɩɩra kaa mʋ dɩ mɩ nɛ sʋba. La TƖƖNA nɛ pɩmɛ nɩaa arɩ kɩalɩŋ mɩ fa sɩ kɛnɛ aŋ bɩra kaa laa. Mɩ jaŋ dɛnnɛ La TƖƖNA.”

²² Wɩaa deemba kala lɛ, Job fa bɩ wʋbɔŋ kala ŋaa a joŋ cheeriŋ pɩ Wɩa.