Jɔɔŋ 9 - WƖA TENIŊ

Yesu vaarɛ baal-la ba sɩ lʋla dɩ ʋ nyʋlɩma

¹ Yesu sɩ joŋ wombiiŋ vɩvɛŋ, ʋ na baal kʋbala, ba lʋlʋ dɩ ʋ nyʋlɩma nɛ.

² Ŋɩɩ nɛ Yesu harɩ-tooroo pɩɛsʋ, “Kʋhɩaŋ, kʋbɛɛ wʋbɔŋŋɔɔ nɛ ŋaa baala deeŋ nyʋlɩmɛ? Baal-la wʋbɔŋŋɔɔ nɛ koo ʋ nyɩmma arɩ ʋ naaŋ wʋbɔŋŋɔɔ nɛ?”

³ Ŋɩɩ nɛ Yesu bʋla pɩba, “Baal-la nyʋlʋmʋŋ bɩ ʋ tɩtɩa lɛ koo ʋ nyɩmma arɩ ʋ naaŋ wʋbɔŋŋɔɔ lɛ lɩa. Ʋ nyʋlɩma dɩ nɩaa wuo na ŋɩɩ Wɩa dol-la sɩ wuo tɩŋ tɩntɩŋŋaa ʋ lɛ nɛ.

⁴ La sɩ na wombiiŋ, má leŋ dɩ la tɩŋ tɩntɩmɩɩ-la nɩɩ-la sɩ tɩmmɛ dɩ mɩ tɩŋ. Bʋa kʋbala jaŋ yi nʋʋkala bɩra bɩ jaŋ wuo tɩŋ tɩntɩmɩɩ-la.

⁵ Mɩ ha sɩ hɛ dʋnɩa lɛ ŋɩɩ, mɩ nɛ ŋaa dʋnɩa nɩaa pʋlʋmʋŋ.”

⁶ Yesu sɩ bʋl ŋɩɩ, ʋ tʋ nantʋɔrʋŋ bil tinteeŋ a kaa buu tɩarɩŋ, a paa taa baal-la sɩaa, aŋ bʋla pʋ,

⁷ “Sii tuu fuo kʋbala baa yɩrɛ Sɩlʋam (yɩrɩŋ deeŋ bʋbʋɔŋ nɛ ŋaa ‘mɩ tɩmʋ nɛ’) a sɔŋ ŋ sɩaa.” Ŋɩɩ nɛ baal-la sii tuu sɔŋ ʋ sɩaa fuo-la lɛ. Ʋ sɩaa suri, ʋ mɩɩra mʋ dɩa.

⁸ Ŋɩɩ nɛ ʋ pɛ-jʋʋraa arɩ nɩalɩŋ kala fa sɩ naʋ dɩ ʋʋ sʋl kɩaa, ba pɩpɩɛsɛ dɔŋɔ, “Baala deeŋ dee fa bɩ hɔnɔ sʋsʋl kɩaa ŋɩɩ?”

⁹ Dɔnsʋŋ sɩ ʋ nɛ, dɔnsʋŋ ma sɩ dɩ ʋ dee, ama ʋ ta nagʋ nɛ. Ŋɩɩ nɛ baal-la tɩtɩa bʋl, “Mɩ nɛ ŋɩɩ.”

¹⁰ Ba pɩɛsʋ, “Ɛɛ nɛ ŋ ŋaa ŋ sɩaa suri?”

¹¹ Ŋɩɩ nɛ baal-la bʋl, “Baal-la ba sɩɩ yɩrɛ Yesu nɛ buu tɩarɩŋ, a paa taa mɩ sɩaa lɛ, aŋ bʋla pɩmɛ dɩ mɩ tuu Sɩlʋam fuo-la a sɔŋ. Mɩ tuu sɔŋ, mɩ sɩaa suri.”

¹² Ŋɩɩ nɛ ba pɩɛsʋ, “Nɩɩ lɛ nɛ ʋ hɛ?” Baal-la bʋl, “Mɩ bɩ jɩŋ.”

Farisii tɩŋŋaa pɩɛsɛ nyʋlʋŋ-la ʋ vaarɩŋ wɩaa

¹³ Ŋɩɩ nɛ ba kɛŋ baal-la fa sɩ nyʋlɩma a kaa mʋ Farisii tɩŋŋaa teeŋ.

¹⁴ Tapʋlɩɩ-la Yesu sɩ buu tɩarɩŋ a taa baal-la sɩaa ba suri, ʋ ŋaa chɛ-wiesii-la chɛɛŋ nɛ.

¹⁵ Ŋɩɩ nɛ Farisii tɩmma-la pɩɛsɛ baal-la ŋɩɩ ʋ sɩ ŋaa ʋ sɩaa suri. Baal-la bʋla pɩba, “Ʋ ŋaa tɩarɩŋ nɛ taa mɩ sɩaa, mɩ sɔŋ, mɩ sɩaa suri.”

¹⁶ Ŋɩɩ nɛ Farisii tɩŋŋaa dɔnsʋŋ bʋl, “Wɩa dee bɩ baala deeŋ tɩma, bɛɛ wɩaa ʋ bɩ la chɛ-wiesii-la kɩsɩŋ lɛ ka to.” Ŋɩɩ nɛ dɔnsʋŋ ma sɩ, “Ɛɛ nɛ nʋʋ sɩ ŋaa wʋbɔŋ ŋaarʋ jaŋ wuo ŋaa wʋmagɩlaa deemba?” Ŋɩɩ nɛ ba kpaa balɩa.

¹⁷ Farisii tɩmma-la bɩra pɩɛsɛ baal-la, “Ʋ sɩ suri ŋ sɩaa ŋɩɩ, nɩbɛɛ nɛ ŋ bɩɩnɛ arɩ ʋ ŋaa?” Ŋɩɩ nɛ baal-la sɩ, “Ʋ ŋaa Wɩa wʋlaabʋllʋ nɛ.”

¹⁸ Ama Juu tɩŋŋaa kʋhɩasɩ-la sɩ, ba-na bɩ laa dii arɩ baal-la fa nyʋlɩma nɛ aŋ lɛɛlɛ nɩna ŋɩɩ, see dɩ ba yɩrɛ ʋ nyɩmma arɩ ʋ naaŋ.

¹⁹ Ŋɩɩ nɛ ba yɩrɛ baal-la nyɩmma arɩ ʋ naaŋ a pɩɛsɛba, “Ma bie nɛ ŋ-laa? Ma sɩ, ma lʋlʋ dɩ ʋ nyʋlɩma nɛɛ? Ɛɛ nɛ ʋ ŋaa a nɩna lɛɛlɛ?”

²⁰ Ŋɩɩ nɛ baal-la nyɩmma arɩ ʋ naaŋ bʋl, “La jɩma arɩ la bie nɛ ŋ-la. La jɩma la lʋlʋ ma dɩ ʋ nyʋlɩma nɛ.

²¹ Ama la bɩ jɩŋ ʋ sɩ ŋaa ŋɩɩ ʋ sɩaa suri, la bɩra bɩ jɩŋ nɩɩ-la ma sɩ ŋaa ʋ sɩaa suri. Má pɩɛsʋ, ʋ waa nɛ. Ʋ tɩtɩa jaŋ wuo bʋla pɩma.”

²² Baal-la nyɩmma arɩ ʋ naaŋ faa fá Juu tɩmma-la nɛ. Ŋɩɩ nɛ tɩɩ ba bʋl ŋɩɩ. Juu tɩmma-la fa sɩ dɩ nɩɩ-la kala sɩ bʋla arɩ Yesu nɛ ŋaa Kirisito, Nɩɩ-la Wɩa sɩ lɩɩsa, ba jaŋ kiru ba Wɩɩchʋɔlɛ dɩa lɛ.

²³ Ŋɩɩ nɛ tɩɩ ʋ naaŋ arɩ ʋ nyɩmma bʋl dɩ ʋ waa nɛ, dɩ ba pɩɛsʋ.

²⁴ Ŋɩɩ nɛ Farisii tɩmma-la bɩra yɩrɛ baal-la ba sɩ lʋla dɩ ʋ nyʋlɩma a bʋl, “La jɩma arɩ baala deeŋ ŋaa wʋbɔŋ ŋaarʋ nɛ. Wɩa sɩpaaŋ bʋl wʋtɩtɩɩ pɩla.”

²⁵ Baal-la sɩ, “Mɩ-na bɩ jɩŋ dɩ baal-la ŋaa wʋbɔŋ ŋaarʋ koo ʋ bɩ wʋbɔŋ ŋaarʋ ŋaa. Ama wɩɩ-la mɩ-na sɩ jɩma nɛ ŋ-la: Mɩ fa nyʋlɩma nɛ, ama lɛɛlɛ mɩ sɩaa suro nɛ.”

²⁶ Ŋɩɩ nɛ ba pɩɛsʋ, “Wʋbɛɛ nɛ ʋ ŋaa ŋ lɛ? Ɛɛ nɛ ʋ ŋaa a suri ŋ sɩaa?”

²⁷ Ŋɩɩ nɛ baal-la bʋla pɩba, “Mɩ laa sɩpaaŋ bʋla pɩma nɛ, ka ma bɩ jegile. Bɛɛ nɛ tɩɩ ma bɩra chɩchɛ dɩ ma nɩɩ? Maa chɛ dɩ ma ma ŋaa ʋ harɩ-tooroo nɛɛ?”

²⁸ Ŋɩɩ nɛ ba tʋʋsʋ woruŋ aŋ bʋl, “Ŋ nɛ ŋaa ʋ harɩ-tooro, ama la-na ŋaa Mosis harɩ-tooroo nɛ.

²⁹ La jɩma arɩ Wɩa fa bʋl wɩaa pɩ Mosis nɛ, ama baala deeŋ-na, la bɩ jɩŋ ʋ sɩ lɩɩ lee-la kala.”

³⁰ Ŋɩɩ nɛ baal-la bʋl, “Wʋkpuŋkpere nɛ ŋ-la. Ma bɩ jɩŋ lee-la ʋ sɩ lɩa, ama ʋ nɛ suri mɩ sɩaa.

³¹ La jɩma arɩ Wɩa bɩ wʋbɔŋ ŋaaraa wʋbʋlʋŋ ka jegili. Ʋʋ jegili nɩalɩŋ sɩɩ zilu nɛ aŋ pɛ ŋɩŋaa wɩalɩŋ ʋ sɩ cho.

³² Dʋnɩa sɩ suomo a kaa kɔ jɩnɩŋ, ma ha nɩa arɩ nʋʋ ba sɩ lʋla dɩ ʋ nyʋlɩma, dɩ nʋʋ suri ʋ sɩaa?

³³ Dɩ baala deeŋ nɛ bɩ Wɩa teeŋ lɩa, ʋ bɩ wɩɩŋ deeŋ wuo ŋaa.”

³⁴ Ŋɩɩ nɛ ba bʋla pɩ baal-la, “Ba paala lʋlʋŋ dɩ ŋ ŋaa wʋbɔŋ ŋaarʋ nɛ, ka ŋ ma saa chɩchɛ dɩ ŋ dagɛla koo?” Ŋɩɩ nɛ ba kiru ta ʋ lɩɩ Wɩɩchʋɔlɛ dɩa-la lɛ.

Nɩɩ-la sɩ bɩ Wɩa Dɩŋ-zɔmʋŋ kɛnɛ, ʋ nyʋlɩma nɛ

³⁵ Yesu sɩ nɩa dɩ ba kiri baal-la ta ʋ lɩɩ Wɩɩchʋɔlɛ dɩa-la tʋɔŋ, ʋ mʋ chɛ naʋ a pɩɛsʋ, “Ŋ laa Nuhuobiine Bie wɩaa dii nɛɛ?”

³⁶ Ŋɩɩ nɛ baal-la pɩɛsʋ, “Kʋbɛɛ nɛ ŋɩɩ? Dagɛmɛ tɩɩna dɩ mɩ laa ʋ wɩaa dii.”

³⁷ Ŋɩɩ nɛ Yesu bʋla pʋ, “Ŋ paala naʋ nɛ. Ʋ nɛ nɩɩ-la sɩɩ bʋl wɩaa ŋ teeŋ ŋɩɩ.”

³⁸ Ŋɩɩ nɛ baal-la tuu kpirimi Yesu sɩpaaŋ a chʋɔlʋ aŋ bʋl, “Mɩ Tɩɩna, mɩ laa ŋ wɩaa dii nɛ.”

³⁹ Ŋɩɩ nɛ Yesu bʋl, “Mɩ kɔ dʋnɩa dɩ mɩ ŋaa dɩ nɩalɩŋ sɩ nyʋlɩma sɩaa suri nɛ, ka dɩ mɩ ŋaa dɩ nɩalɩŋ sɩɩ na nyʋlɩmɛ.”

⁴⁰ Farisii tɩmma-la sɩ chɩŋ nɩmɛ a nɩɩ Yesu sɩ bʋl ŋɩɩ, ba pɩɛsʋ, “Ŋ bɩɩna la ma nyʋlɩma nɛɛ?”

⁴¹ Ŋɩɩ nɛ Yesu bʋla pɩba, “Dɩ ma nɛ fa nyʋlɩma a bɩ wʋtɩtɩɩ jɩŋ, ma fa bɩ wɩɩkala cheye. Ama lɛɛlɛ ma sɩ folo bʋl dɩ maa na nɛ a jɩŋ wʋtɩtɩɩ ŋ-la, ŋɩɩ-na ma cheeriŋ ha hɛ ma lɛ nɛ.”