Jɔɔŋ 3 - WƖA TENIŊ

Nikodemɔs cheŋ Yesu

¹ Baal kʋbala nɛ fa hɛ nɩmɛ, baa yɩrɛ Nikodemɔs. Ʋ fa ŋaa Juu tɩŋŋaa kʋhɩaŋ nɛ a hɛ Farisii tɩŋŋaa tʋɔŋ.

² Tɩtaŋ kʋbala ʋ sii kɔ Yesu teeŋ a bʋl, “Kʋhɩaŋ, la jɩma arɩ ŋ nɛ ŋaa Nɩɩ-la Wɩa sɩ ta dɩ ŋ dagɛ nɩaa. Nʋʋkala bɩ jaŋ wuo ŋaa wʋmagɩla-la ŋ sɩɩ ŋaa, see dɩ Wɩa pɛ tɩɩna lɛ.”

³ Ŋɩɩ nɛ Yesu bʋla pʋ, “Wʋtɩtɩɩ nɛ mɩ bʋlaa pɩŋ, nʋʋkala bɩ jaŋ wuo jʋʋ Wɩa kuorii-la tʋɔŋ, see dɩ ba wasa lʋl tɩɩna.”

⁴ Ŋɩɩ nɛ Nikodemɔs pɩɛsʋ, “Ɛɛ nɛ banɩhɩaŋ jaŋ wuo ŋaa dɩ ba bɩra wasa lʋlʋʋ? Ʋ jaŋ bɩra wuo jʋʋ ʋ naaŋ luoruŋ dɩ ʋ bɩra wasa lʋlʋʋ?”

⁵ Yesu bʋl, “Wʋtɩtɩɩ nɛ mɩ bʋlaa pɩŋ, nʋʋkala bɩ jaŋ wuo jʋʋ Wɩa kuorii-la tʋɔŋ, see dɩ Wɩa joŋ ʋ Dɩŋ-zɔmʋŋ hɛ tɩɩna lɛ, dɩ tɩɩna ma pɛ fo Wɩɩchʋɔlɛ lɩɩŋ.

⁶ Nuhuobiine yie lʋl nuhuobiine ʋ kɛŋ mɩɩsɩŋ nɛ tinteeŋ deeŋ lɛ. Wɩa ma yie joŋ ʋ Dɩŋ-zɔmʋŋ a hɛ nʋʋ lɛ ʋ kɛŋ mɩɩsɩŋ Wɩa teeŋ.

⁷ Sɩ́ leŋe dɩ ʋ ŋaa wʋkpuŋkpere ŋ lɛ mɩ sɩ bʋla pɩŋ arɩ ʋ maga dɩ ba wasa lʋlʋŋ.

⁸ Peliŋ yie lu mʋmʋ lee-na kala ʋ sɩ cho nɛ. Ŋ nɩnɩɩ ʋ dɔmɔ, ama ŋ bɩ jɩŋ lee-la ʋ sɩ lɩɩ kʋkɔ, koo lee-la ʋ sɩɩ mʋ. Ʋ saa nagɛ ŋɩɩ nɛ nʋʋkala Wɩa sɩ joŋ ʋ Dɩŋ-zɔmʋŋ hɛ lɛ.”

⁹ Ŋɩɩ nɛ Nikodemɔs pɩɛsɛ, “Ɛɛ nɛ wɩɩŋ deeŋ jaŋ wuo ŋaa?”

¹⁰ Ŋɩɩ nɛ Yesu bʋla pʋ, “Ŋ ŋaa kerichi-bal nɛ Iziral tinteeŋ lɛ, aŋ bɩ wɩɩŋ deeŋ bʋbʋɔŋ jɩŋ?

¹¹ Wʋtɩtɩɩ nɛ mɩ bʋlaa pɩŋ, la yie bʋl wɩɩ-la la sɩ jɩma nɛ, a bʋbʋl wɩɩ-la la sɩ na. Ama ma kʋŋkala bɩ chɛ dɩ ma sɛɩ wɩɩ-la la sɩ bʋla.

¹² Mɩ bʋl dʋnɩa wɩaa nɛ pɩpɩŋ, ka ŋ bɩ laa dii. Ɛɛ nɛ saa ŋ jaŋ wuo laa dii dɩ mɩ nɛ bʋl Wɩa-jaŋ wɩaa pɩŋ?

¹³ Nʋʋkala ha bɩ Wɩa-jaŋ jɩla, see mɩ-na Nuhuobiine Bie sɩ lɩɩ nɩmɛ kʋ tuu.

¹⁴ Mosis fa sɩ hɛ gɩrɩ-bine tʋɔŋ, ʋ fa kɛŋ hɔɔŋ a libi dɩmɩŋ nɛ, a joŋo mɛrɛ daaŋ lɛ a kaa jee. Ŋɩɩ tɩtɩa nɛ ba jaŋ kpaasɛ mɩ-na Nuhuobiine Bie ma daaŋ lɛ a kaa jee,

¹⁵ dɩ nʋʋkala sɩ laa mɩ wɩaa dii wuo kɛŋ mɩɩsɩ-la sɩ bɩ dɛrɛ.

¹⁶ Wɩa cho dʋnɩa nɩaa a mʋ kieli, ŋɩɩ nɛ tɩɩ ʋ joŋ ʋ Bii-bala a pɩla, dɩ nɩɩ-la kala sɩ laa ʋ wɩaa dii, ŋ bɩ jaŋ lɛl, ama ŋ jaŋ kɛŋ mɩɩsɩ-la sɩ bɩ dɛrɛ.

¹⁷ Wɩa bɩ ʋ Bie ta dɩ ʋ kʋ tuu laa dʋnɩa nɩaa wɩaa jɩŋ, ama dɩ ʋ laa dʋnɩa nɩaa ta.

¹⁸ Nʋʋ na-kala sɩ laa Yesu wɩaa dii, ʋ bɩ jaŋ dii ʋ tɩɩna sarɩya a joŋ cheeriŋ pʋ, ama nɩɩ-la kala sɩ bɩ ʋ wɩaa laa dii, ʋ paala dii ʋ tɩɩna sarɩya a joŋ cheeriŋ pʋ nɛ, bɛɛ wɩaa ʋ bɩ Wɩa Bii-bala-la wɩaa laa dii.

¹⁹ Wɩɩ-la sɩ tɩɩ Wɩa dii dʋnɩa nɩaa sarɩya a joŋ cheeriŋ pɩba nɛ ŋ-la: Pʋlʋmʋŋ kʋ tuu dʋnɩa nɛ, ama nɩaa cho birimiŋ nɛ a kɩɩ pʋlʋŋ-la, bɛɛ wɩaa baa ŋaa wʋbɔŋŋɔɔ nɛ.

²⁰ Nʋʋ na-kala sɩɩ ŋaa wʋbɔŋŋɔɔ bɩ pʋlʋmʋŋ cho, ʋ bɩ pʋlʋmʋŋ tʋɔŋ lɩɩ, bɛɛ wɩaa ʋ bɩ chɛ dɩ ʋ wʋbɔmɔ-la lɩɩ pʋlʋmʋŋ.

²¹ Ama nʋʋ na-kala sɩɩ ŋaa wʋzɔŋŋɔɔ cho pʋlʋmʋŋ a yie lɩlɩɩ pʋlʋmʋŋ tʋɔŋ, dɩ nɩaa wuo na arɩ ʋʋ ŋaa wʋzɔmɔ-la Wɩa doluŋ lɛ nɛ.”

Jɔɔŋ cheŋ Yesu

²² Ŋɩɩ harɩŋ nɛ Yesu arɩ ʋ harɩ-tooroo lɩɩ Jerusalɛm lɛ aŋ ha hɛ Judiya tinteeŋ lɛ a dieni mʋa nɩmɛ aa fo nɩaa Wɩɩchʋɔlɛ lɩɩŋ.

²³ Jɔɔŋ ma fa hɛ lee kʋbala baa yɩrɛ Aanɔŋ lɛ nɛ a kpagɛ Salɩm aa fo nɩaa Wɩɩchʋɔlɛ lɩɩŋ, bɛɛ wɩaa lɩɩŋ fa yʋga kɩŋkɛŋ nɩmɛ. Nɩaa mʋmʋ ʋ teeŋ bʋa kala ʋ fufoba Wɩɩchʋɔlɛ lɩɩŋ.

²⁴ (Bʋa-la lɛ dɩ ba ha bɩ Jɔɔŋ kaa tɔ dɩa.)

²⁵ Ŋɩɩ nɛ Jɔɔŋ harɩ-tooroo dɔnsʋŋ arɩ Juu tɩɩna kʋbala kɛŋ lɩɩŋ sɔmʋŋ wɩaa kaa lɩlɛrɛ.

²⁶ Ba mʋ Jɔɔŋ teeŋ a pɩɛsʋ, “La kʋhɩaŋ, ŋ liisi baal-la fa sɩ hɛ Jɔdaŋ fuo-la sɛmɛ dɔŋɔ wɩaa nɛ, nɩɩ-la wɩaa ŋ sɩ bʋla? Lɛɛlɛ ʋ maa fo nɩaa Wɩɩchʋɔlɛ lɩɩŋ nɛ, nɩaa kala mʋmʋ ʋ teeŋ.”

²⁷ Ŋɩɩ nɛ Jɔɔŋ bʋl, “Nʋʋkala bɩ jaŋ wuo kɛŋ kʋŋkala, see dɩ Wɩa joŋo pʋ.

²⁸ Ma tɩtɩa hɛ nɩmɛ nɛ, ka mɩ bʋl arɩ mɩ dee bɩ Kirisito ŋaa, nɩɩ-la Wɩa sɩ lɩɩsa, ama Wɩa ta tɩmmɛ nɛ dɩ mɩ laa ʋ sɩpaaŋ.

²⁹ Ha-falɩŋ tɩɩna nɛ tɩɩ haala, ama dɩ ha-falɩŋ tɩɩna nandɔŋɔ nɛ chɩŋ nɩmɛ a jijegili wɩalɩŋ ba sɩɩ bʋl, ʋ tʋɔŋ yie tɔrɛ nɛ dɩ ʋ nɛ nɩɩ ha-falɩŋ tɩɩna-la yikoro. Ŋɩɩ tɩtɩa nɛ mɩ tʋɔŋ ma tɔrɛ woruŋ Yesu nyuŋ.

³⁰ Ʋ maga dɩ ʋ nɛ mɩɩra kʋ ŋaa nɩbalɩŋ, ka dɩ mɩ mɩɩra ŋaa nɩ-bie.”

Nɩɩ-la sɩ lɩɩ Wɩa-jaŋ

³¹ Nɩɩ-la sɩ lɩɩ Wɩa-jaŋ nɛ kɩɩ kʋŋkala. Nɩɩ-la sɩ lɩɩ tinteeŋ ŋaa tinteeŋ kʋŋ nɛ aa bʋl tinteeŋ wɩaa. Ama nɩɩ-la sɩ lɩɩ Wɩa-jaŋ nɛ kɩɩ kʋŋkala.

³² Ʋʋ bʋl wɩalɩŋ ʋ sɩ na aŋ nɩɩ ma nɛ, ama nʋʋkala bɩ ʋ niiŋ wɩaa sɛyɛ.

³³ Nɩɩ-la kala sɩ sɛɩ ʋ niiŋ wɩalɩŋ jɩma arɩ Wɩa hɛ nɩmɛ nɛ a kɛŋ wʋtɩtɩɩ.

³⁴ Mɩ-na Nɩɩ-la Wɩa sɩ tɩma, mɩɩ bʋl Wɩa niiŋ wɩaa nɛ, bɛɛ wɩaa Wɩa joŋ ʋ Dɩŋ-zɔmʋŋ doluŋ kala a pɩmɛ nɛ.

³⁵ Mɩ Nyɩmma Wɩa cho mɩ-na ʋ Bie, a joŋ ʋ doluŋ kala a hɛ mɩ nɩsɩŋ lɛ.

³⁶ Nɩɩ-la kala sɩ laa mɩ-na Wɩa Bie wɩaa dii, ʋ kɛŋ mɩɩsɩ-la sɩ bɩ dɛrɛ, ama nɩɩ-la kala sɩ bɩ mɩ-na Wɩa Bie wɩalɩŋ ka to, ʋ bɩ jaŋ kɔ dɩ ʋ kɛŋ mɩɩsɩ-la sɩ bɩ dɛrɛ, ama Wɩa jaŋ na baanɩŋ ʋ tɩɩna nyuŋ a kaa mʋ wuu.