Jɔɔŋ 18 - WƖA TENIŊ

Ba kɛŋ Yesu

¹ Yesu sɩ sʋl Wɩa dɛrɛ, ʋ dɩ ʋ harɩ-tooroo sii kieli fuonaa kʋbala baa yɩrɛ Kɩdɩrɔŋ. Lee kʋbala nɛ fa hɛ nɩmɛ ba chɔnsɛ olif tɩɩsɩŋ. Ŋɩɩ nɛ Yesu arɩ ʋ harɩ-tooroo jʋʋ lee-la.

² Ba fa vɛnɛ mʋmʋ lee-la nɛ, ŋɩɩ nɛ tɩɩ Judas, nɩɩ-la sɩ joŋu yallɛ, ma wuo jɩŋ nɩmɛ.

³ Ŋɩɩ nɛ Judas kɛŋ laalɩyuoroo dɔnsʋŋ arɩ nɩalɩŋ sɩɩ pɔ Wɩa dɩɩ-balɩŋ, Wɩɩsʋllɩ sɩpaalaaraa kʋhɩasɩŋ arɩ Farisii tɩŋŋaa dɩ ba mʋ kɛŋ Yesu. Ba mʋ lee-la Yesu sɩ hɛ. Ba fa kori chaanaa, kapɩlaa arɩ nyiniŋ arɩ ba ba-kɩaa nɛ.

⁴ Yesu jɩŋ wɩɩ-la kala fa sɩ jaŋ ŋaa ʋ lɛ nɛ. Ŋɩɩ nɛ ʋ mʋ chemba a pɩɛsɛba, “Kʋbɛɛ nɛ maa chɛ?”

⁵ Ŋɩɩ nɛ ba sɩ, “Yesu sɩ lɩɩ Nazarɛt nɛ la chɩchɛ.” Ŋɩɩ nɛ ʋ bʋla pɩba, “Mɩ nɛ ŋ-la.” Judas, nɩɩ-la fa sɩ jaŋ joŋu yallɛ, ʋ ma fa hɛ ba tʋɔŋ nɛ.

⁶ Yesu sɩ sɩ, “Mɩ nɛ ŋɩɩ,” ba mɩɩra yala mʋ harɩŋ a tuu tel.

⁷ Ŋɩɩ nɛ Yesu bɩra pɩɛsɛba, “Kʋbɛɛ nɛ maa chɛ?” Ba sɩ, “Yesu sɩ lɩɩ Nazarɛt.”

⁸ Yesu bʋla pɩba, “Mɩ laa sɩpaaŋ bʋla pɩma arɩ mɩ nɛ ŋ-la. Dɩ ma nɩɩ chɛmɛ, má leŋ mɩ harɩ-tooroo deemba-na viiri.”

⁹ (Ʋ bʋl ŋɩɩ dɩ wɩɩ-la ʋ fa sɩ bʋla, dɩ ʋ sɛnɛ ŋaa wʋtɩtɩɩ nɛ. Ʋ fa sɩ, “Nɩalɩŋ kala Wɩa sɩ lɩɩsa pɩmɛ, ba kʋŋkala bɩ lɛlɛ).”

¹⁰ Saamɔŋ Pɩɩta fa kori tokobiiŋ nɛ. Ŋɩɩ nɛ ʋ tʋʋrɛ a ta Wɩɩsʋllɩ sɩpaalaaraa kʋhɩaŋ dɩa tɩntɩnna nadiiŋ dɩgɩlɩŋ a keri. Tɩntɩnnʋ-la yɩrɩŋ nɛ fa Malɩkʋs.

¹¹ Ŋɩɩ nɛ Yesu bʋla pɩ Pɩɩta, “Joŋ ŋ tokobii-la hɛ ʋ pɛɛŋ lɛ. Ʋ bɩ maga dɩ mɩ na hɛɛ-la mɩ Nyɩmma sɩɩ chɛ dɩ mɩ na, koo?”

Ba kɛŋ Yesu kaa mʋ Anas sɩpaaŋ

¹² Ŋɩɩ nɛ laalɩyuoroo arɩ ba kʋhɩaŋ arɩ nɩalɩŋ sɩɩ pɔ Wɩa dɩɩ-balɩŋ kɛŋ Yesu a vɔbʋ.

¹³ Ba laa sɩpaaŋ kɛnʋ kaa mʋ Anas teeŋ nɛ. Anas nɛ fa ŋaa Kayafas hɩɩlɩ-baala. Jɩna-la Kayafas nɛ fa ŋaa Wɩɩsʋllɩ sɩpaalaaraa kʋhɩaŋ.

¹⁴ Kayafas nɛ fa laa sɩpaaŋ bʋla pɩ Juu tɩŋŋaa arɩ nɩbala nɛ laa tinteeŋ nɩaa kala nyuŋ sʋʋ, ʋ nɛ kpɩa nɩ-daŋ sɩ sʋba.

Pɩɩta sɩ ʋ bɩ Yesu jɩŋ

¹⁵ Saamɔŋ Pɩɩta arɩ Yesu harɩ-tooroo dɔŋɔ to Yesu harɩŋ, a jʋʋ Wɩɩsʋllɩ sɩpaalaaraa kʋhɩaŋ kaala. Kʋhɩaŋ-la fa jɩŋ Yesu harɩ-tooro deeŋ nɛ, ŋɩɩ nɛ harɩ-tooru-la to Yesu harɩŋ a jʋʋ Wɩɩsʋllɩ sɩpaalaaraa kʋhɩaŋ-la kaala tʋɔŋ,

¹⁶ ka Pɩɩta chɩŋ jeeŋ harɩŋ boiŋ niiŋ. Ŋɩɩ nɛ Yesu harɩ-tooro-la dɔŋɔ, nɩɩ-la Wɩɩsʋllɩ sɩpaalaaraa kʋhɩaŋ sɩ jɩma, ʋ mɩɩra lɩɩ, a bʋla pɩ toli-bie kʋbala sɩ pɔ boi-la niiŋ dɩ ʋ leŋ dɩ Pɩɩta kʋ jʋʋ.

¹⁷ Ŋɩɩ nɛ tolo-la sɩ chɩŋ boi-la niiŋ pɩɛsɛ Pɩɩta, “Mɩ bɩɩna ŋ ma ŋaa baal-la harɩ-tooroo dɔŋɔ nɛɛ?” Ŋɩɩ nɛ Pɩɩta sɩ, “Aɩ, mɩ bɩ ʋ harɩ-tooru ŋaa.”

¹⁸ Dɩ waarɩŋ fa hɛ nɩmɛ. Ŋɩɩ nɛ dɩa-la tɩntɩnnɩ-hɩasɩŋ arɩ Wɩɩsʋllɩ sɩpaalaaraa kʋhɩaŋ tɩntɩnnɩbiisiŋ arɩ nɩalɩŋ sɩɩ pɔ Wɩa dɩɩ-bal-la hɛ nyiniŋ a chɩna golli aa wieni. Pɩɩta ma mʋ chɩŋ ba teeŋ aa wieni nyiŋ-la.

Wɩɩsʋllɩ sɩpaalaaraa kʋhɩaŋ pɩɛsɛ Yesu wɩaa

¹⁹ Ŋɩɩ nɛ Wɩɩsʋllɩ sɩpaalaaraa kʋhɩaŋ pɩɛsɛ Yesu wɩaa a tɩgɛ ʋ harɩ-tooroo lɛ arɩ wɩalɩŋ ʋ fa sɩɩ dagʋ.

²⁰ Yesu bʋl, “Wɩalɩŋ kala mɩ sɩ bʋla, mɩ yie chɩŋ nɩ-daŋ tʋɔŋ nɛ a bʋl. Mɩ yie chaasa chɩŋ Wɩɩchʋɔlɛ dɩɩsɩŋ tʋɔŋ nɛ arɩ Wɩa dɩɩ-balɩŋ tʋɔŋ, lee-la Juu tɩŋŋaa kala sɩ yie kʋ hilimi a bʋl. Mɩ ha bɩ wɩɩkala lʋara bʋl.

²¹ Bɛɛ nɛ saa tɩɩ ŋ pɩɛsɛmɛ? Pɩɛsɛ nɩalɩŋ sɩ nɩɩ wɩalɩŋ mɩ sɩ bʋla. Ba jɩŋ wɩalɩŋ mɩ sɩ bʋla nɛ.”

²² Yesu sɩ bʋl wɩɩŋ deeŋ, tɩntɩnna-la dɔŋɔ fallɛ ʋ chaŋkpaŋɩŋ lɛ aŋ pɩɛsɛ, “Ŋ-la nɛ magɛ dɩ ŋ bʋl wɩaa Wɩɩsʋllɩ sɩpaalaaraa kʋhɩaŋ teeŋ?”

²³ Yesu bʋl, “Dɩ mɩ nɛ bʋl wɩɩ chei, ʋ maga dɩ ŋ bʋl dɩ nʋʋkala nɩɩ nɛ. Ama dɩ wʋtɩtɩɩ nɛ mɩ bʋl, bɛɛ nɛ tɩɩ ŋ fallɛmɛ?”

²⁴ Ŋɩɩ nɛ Anas leŋ ba kɛnʋ mʋ Wɩɩsʋllɩ sɩpaalaaraa kʋhɩaŋ Kayafas teeŋ, dɩ ba ha vɔbʋ.

Pɩɩta bɩra bʋla arɩ ʋ bɩ Yesu jɩŋ

²⁵ Bʋa deeŋ lɛ dɩ Pɩɩta ha chɩŋ kaala-la tʋɔŋ aa wieni nyiniŋ. Ŋɩɩ nɛ nɩalɩŋ dɔnsʋŋ pɩɛsʋ, “Mɩ bɩɩna ŋ ma ŋaa baala deeŋ harɩ-tooroo dɔŋɔ nɛɛ?” Pɩɩta bɩ sɛyɛ aŋ bʋl, “Aɩ, mɩ dee.”

²⁶ Ŋɩɩ nɛ Wɩɩsʋllɩ sɩpaalaaraa kʋhɩaŋ dɩa tɩntɩnnaa dɔŋɔ pɛ ʋ lɛ. Ʋ fa ŋaa nɩɩ-la Pɩɩta sɩ ta dɩgɩlɩŋ keri naambii nɛ. Ʋ pɩɛsʋ, “Mɩ fa bɩ ŋ dɩ baal-la na lee-la ba sɩ chɔnsɛ olif tɩɩsɩŋ?”

²⁷ Ŋɩɩ nɛ Pɩɩta bɩra bɩ sɛyɛ aŋ bʋl, “Aɩ, mɩ dee.” Ʋ bʋl ŋɩɩ dɛrɛ dɩ ji-bele yele.

Ba kɛŋ Yesu kaa mʋ Paalɩt teeŋ

²⁸ Chʋchʋɔ-fɩɛla ba kɛŋ Yesu lɩɩ Kayafas dɩa lɛ, a kɛnʋ kaa mʋ baal kʋbala dɩa baa yɩrɛ Paalɩt. Paalɩt nɛ fa hɔŋ Rom kuoru-balɩŋ nyuŋ lee-la. Juu tɩŋŋaa bɩ to jʋʋ. Ba bɩ chɛ dɩ ba ŋaa disiniŋ a chei ba kɩsɩŋ lɛ, aŋ wuo dii dɩɩsɩŋ kiele bal gbiele-la kʋdiilee.

²⁹ Ŋɩɩ nɛ Paalɩt kʋ lɩɩ ba teeŋ a pɩɛsɛba, “Bɛɛ nɛ ma sɩ baala deeŋ ŋaa chei?”

³⁰ Ŋɩɩ nɛ ba bʋla pʋ, “Dɩ ʋ nɛ fa bɩ wɩɩ ŋaa chei, la fa bɩ jaŋ kɛnʋ kaa kɔ ŋ teeŋ.”

³¹ Ŋɩɩ nɛ Paalɩt bʋla pɩba, “Má kɛnʋ kaa mʋ to ma tɩtɩa wombiiŋ lɛ a dii ʋ sarɩya.” Ŋɩɩ nɛ ba bʋla pʋ, “La bɩ wombiiŋ kɛnɛ dɩ la kpʋ nʋʋkala.”

³² Wɩɩŋ deeŋ ŋaa, dɩ ŋɩɩ Yesu fa sɩ daga arɩ ʋ jaŋ sʋʋ, sɛnɛ kʋ ŋaa wʋtɩtɩɩ nɛ.

³³ Paalɩt mɩɩra jʋʋ dɩa aŋ yɩrɛ Yesu a pɩɛsʋ, “Ŋ nɛ ŋaa Juu tɩŋŋaa kuoroo?”

³⁴ Ŋɩɩ nɛ Yesu pɩɛsʋ, “Ŋ tɩtɩa nɛ bʋl wɩɩŋ deeŋ koo nʋʋ nɛ bʋl ŋɩɩ pɩŋ a tɩgɛ mɩ lɛ?”

³⁵ Paalɩt bɩra bʋl, “Mɩ bɩ Juu tɩɩna ŋaa. Ŋ tɩtɩa nɩaa arɩ Wɩɩsʋllɩ sɩpaalaaraa kʋhɩasɩŋ nɛ joŋuŋ hɛ mɩ nɩsɩŋ lɛ. Wʋbɛɛ nɛ ŋ ŋaa?”

³⁶ Ŋɩɩ nɛ Yesu bʋl, “Mɩ kuoruŋ tuo dʋnɩa deeŋ lɛ. Dɩ mɩ kuoruŋ nɛ fa hɛ dʋnɩa deeŋ lɛ, mɩ nɩaa fa jaŋ yuo laamɛ dɩ Juu tɩŋŋaa sɩ́ mɩ wuo kɛŋ. Ama mɩ kuoruŋ tuo daha.”

³⁷ Ŋɩɩ nɛ Paalɩt pɩɛsʋ, “Ŋ saa ŋaa kuoru nɛ koo?” Ŋɩɩ nɛ Yesu bʋl, “Wɩɩ-la ŋ sɩ bʋla ŋaa wʋtɩtɩɩ nɛ. Ba paala lʋlmɛ dɩ mɩ ŋaa kuoru nɛ. Mɩ kʋ tuu dʋnɩa dɩ mɩ dagɛ nɩaa dɩ ba jɩŋ wʋtɩtɩɩ nɛ. Nɩɩ-la kala sɩ cho dɩ ʋ jɩŋ wʋtɩtɩɩ yie jegile nɩɩ mɩ teeŋ nɛ.”

³⁸ Ŋɩɩ nɛ Paalɩt pɩɛsʋ, “Wʋtɩtɩɩ nɛ bɛɛ?” Ŋɩɩ nɛ Paalɩt mɩɩra lɩɩ dɩ-jalɩŋ Juu tɩmma-la teeŋ a bʋla pɩba, “Mɩ bɩ wɩɩ-la baala deeŋ sɩ cheye na.

Ba bʋla arɩ ba jaŋ kpʋ Yesu

³⁹ Ama jɩna-na kala, dɩ dɩɩsɩŋ kiele bal gbiele-la nɛ yie, mɩ yie lɩɩsɛ nɩalɩŋ ba sɩ kaa tɔ dɩa dɔŋɔ nɛ pɩma. Ma saa chɛ dɩ mɩ lɩɩsɛ Juu tɩŋŋaa kuoru-la nɛ ta pɩmaa?”

⁴⁰ Ŋɩɩ nɛ ba kpɩa goŋ a bʋl, “Aɩ, nɩa deeŋ dee! Lɩɩsɛ Barabas ta. (Barabas fa ŋaa wʋhɛɛrʋ nɛ.)”