Jɔɔŋ 15 - WƖA TENIŊ

Yesu nɛ ŋaa tɩɩ-tɩtɩɩ-la

¹ Ŋɩɩ nɛ Yesu bʋl, “Mɩ nɛ ŋaa tɩɩ-tɩtɩɩ-la. Mɩ Nyɩmma ma nagɛ nɩɩ-la sɩɩ beŋ tɩa-la nɛ.

² Naakel-la kala sɩ mɛrɛ tɩa-la lɛ aŋ bɩ nɛŋ, ʋ yie kere ta nɛ, naakel-la kala sɩɩ nɛŋ, ʋ yie buoro ta nɛ, ka dɩ ʋ wuo faasa nɛŋ woruŋ.

³ Ma paala bɩra bɩ disiniŋ kɛnɛ a tɩŋ wɩalɩŋ mɩ sɩ bʋla pɩma.

⁴ Má mɛrɛ mɩ lɛ dɩ mɩ ma mɛrɛ ma lɛ. Tɩa naakelee dʋndʋŋa bɩ jaŋ wuo nɛŋ, see dɩ ba mɛrɛ tɩa gentine lɛ. Ma ma bɩ jaŋ wuo ŋaa wɩɩkala, see dɩ ma mɛrɛ mɩ lɛ.”

⁵ Ŋɩɩ nɛ Yesu bɩra bʋl, “Mɩ nagɛ tɩa nɛ, ma ma nagɛ tɩa-la naakelee. Nɩɩ-la kala sɩ mɛrɛ mɩ lɛ, mɩ ma mɛrɛ tɩɩna lɛ, ʋ nɛ jaŋ wuo ŋaa wʋzɔŋŋɔɔ yʋgɛ, bɛɛ wɩaa dɩ ma nɛ bɩ mɩ lɛ mɛrɛ, ma bɩ jaŋ wuo ŋaa wɩɩkala.

⁶ Dɩ nʋʋ nɛ bɩ mɩ lɛ mɛrɛ, ba jaŋ joŋ tɩɩna yuo ta, a nagɛ ba sɩ yie keri tɩa naakelee ta ŋɩɩ ba hɩl, nɩaa paa a hɛ nyiniŋ lɛ ba dii.

⁷ Dɩ ma nɛ mɛrɛ mɩ lɛ, dɩ mɩ niiŋ wɩaa hɛ ma tʋɔŋ, kʋŋkala ma sɩ pɩɛsɛmɛ a chɩchɛ, mɩ jaŋ ŋaa pɩma.

⁸ Dɩ ma nɛ ŋaa wʋzɔŋŋɔɔ yʋgɛ, mɩ Nyɩmma yɩrɩŋ jaŋ yɩrɛ. Ŋɩɩ lɛ nɛ ma jaŋ wuo dagɛ arɩ ma ŋaa mɩ harɩ-tooroo nɛ.

⁹ Mɩ choma arɩ mɩ Nyɩmma sɩ chomi ŋɩɩ nɛ. Ŋɩɩ wɩaa, má mɛrɛ mɩ lɛ dɩ mɩ choma a kaa mʋ wuu.

¹⁰ Dɩ ma nɩɩ to mɩ niiŋ wɩaa, mɩ jaŋ choma, arɩ mɩ sɩɩ to mɩ Nyɩmma niiŋ wɩaa a mɛrɛ ʋ lɛ ʋ chomi ŋɩɩ.

¹¹ Mɩ bʋl wɩaa deemba pɩma dɩ ma kɛŋ tʋɔtɔrʋ-la mɩ sɩ joŋo pɩma nɛ. Ŋɩɩ nɛ ma tʋɔŋ jaŋ faasa tɔrɛ woruŋ a mʋ dɛrɛ.

¹² Wɩɩ-la mɩ sɩ bʋla pɩma dɩ maa ŋaa nɛ ŋ-la: Má cho dɔŋɔ arɩ mɩ sɩ choma ŋɩɩ.

¹³ Dɩ nʋʋ nɛ kɛŋ ʋ tɩtɩa hɛ dɔŋɔ dɩ ʋ joŋ ʋ mɩɩsɩŋ yɔɔ sʋʋŋ ʋ nandɔsʋŋ wɩaa, ʋ choba nɛ woruŋ. Nʋʋkala bɩ nɩɩ-la cho a magɛ nɩa deeŋ.

¹⁴ Dɩ ma nɩɩ ŋaa wɩalɩŋ mɩ sɩ bʋla pɩma dɩ maa ŋaa, ma jaŋ ŋaa mɩ nandɔnsʋŋ.

¹⁵ Mɩ bɩra bɩ jaŋ kɛmma kaa yɩrɛ mɩ tɩntɩnnaa, bɛɛ wɩaa tɩntɩnna bɩ wɩɩ-la ʋ kʋhɩaŋ sɩɩ ŋaa jɩŋ. Ama mɩ-na bʋl wɩalɩŋ kala mɩ Nyɩmma sɩ bʋla pɩmɛ pɩma nɛ. Ŋɩɩ nɛ tɩɩ mɩ kɛmma yɩyɩrɛ mɩ nandɔnsʋŋ.

¹⁶ Ma dee bɩ mɩ lɩɩsa, mɩ nɛ lɩɩsɛma. Mɩ nɛ lɩɩsɛma dɩ ma mʋ faasa ŋaa wʋzɔŋŋɔɔ, wʋzɔmɔ-la sɩ bɩ jaŋ lɛl. Dɩ ma nɩɩ ŋaa ŋɩɩ, mɩ Nyɩmma jaŋ pɩma kʋŋkala ma sɩ pɩɛsa chɩchɛ mɩ yɩrɩŋ lɛ.

¹⁷ Wɩɩ-la mɩ sɩ bʋla pɩma dɩ maa ŋaa nɛ ŋ-la: Má cho dɔŋɔ.

Yesu bʋl ŋɩɩ dʋnɩa nɩaa sɩ jaŋ bɛrɛ ʋ dɩ ʋ harɩ-tooroo

¹⁸ Dɩ dʋnɩa nɩaa nɛ bɛrɛma, ma jɩŋ arɩ ba laa sɩpaaŋ bɛrɛmɛ nɛ.

¹⁹ Dɩ ma nɛ fa ŋaa dʋnɩa nɩaa, dʋnɩa nɩaa fa jaŋ choma woruŋ, arɩ ba sɩ cho dɔŋɔ ŋɩɩ. Ama ma dɩ dʋnɩa nɩaa bɩ kʋbala ŋaa. Mɩ lɩɩsɛma dʋnɩa nɩaa tʋɔŋ nɛ. Ŋɩɩ nɛ tɩɩ ba bɛrɛma.

²⁰ Mɩ laa sɩpaaŋ bʋla pɩma arɩ tɩntɩnnʋ bɩ ʋ kʋhɩaŋ kɩɩ. Má liisi wɩɩŋ deeŋ. Ba sɩ dɔgɩsɛmɛ ŋɩɩ, ba jaŋ dɔgɩsɛ ma ma ŋɩɩ. Dɩ ba nɛ fa sɛɩ mɩ niiŋ wɩaa, ba fa jaŋ sɛɩ ma ma niiŋ wɩaa.

²¹ Ba jaŋ ŋaa wɩaa deemba kala a tɩŋ ma sɩɩ to mɩ harɩŋ wɩaa. Ba sɩ bɩ nɩɩ-la sɩ tɩmmɛ jɩŋ nɛ tɩɩ baa ŋaa ŋɩɩ.

²² Dɩ mɩ nɛ fa bɩ kʋ bʋl wɩaa pɩba, ba sɩ ŋaa wʋbɔmɔ-la kala, mɩ fa bɩ jaŋ wuo bʋl dɩ ba chei wɩɩkala. Ama mɩ sɩ folo kʋ bʋl wɩaa pɩba, ba bɩra bɩ jaŋ wuo bʋl arɩ ba bɩ wɩɩkala cheye.

²³ Nɩɩ-la sɩ bɛrɛmɛ, tɩɩna bɛrɛ mɩ Nyɩmma ma nɛ.

²⁴ Wɩalɩŋ kala mɩ sɩ ŋaa, nʋʋkala bɩ ba ŋaa. Dɩ mɩ nɛ fa bɩ ba ŋaa dɩ ba na, ba fa bɩ jaŋ chei wɩɩkala. Ama ba na ba kala nɛ aŋ ha bɛrɛ mɩ dɩ mɩ Nyɩmma kala.

²⁵ Ama wɩaa deemba kala ŋaa dɩ wɩalɩŋ kala ba sɩ ŋmʋnsa Wɩa teniŋ tʋɔŋ kʋ ŋaa wʋtɩtɩɩ nɛ. Ŋ-la nɛ ba ŋmʋnsɛ, ‘Mɩ bɩ wɩɩkala ŋaa chei, ka ba bɛrɛmɛ.’

²⁶ Ama mɩ jaŋ leŋ dɩ Wɩa Dɩŋ-zɔmʋŋ lɩɩ mɩ Nyɩmma teeŋ a kʋ tuu hɛ ma lɛ. Ʋ jaŋ pɛ ma lɛ a dagɛma wʋtɩtɩɩ. Ʋ nɛ jaŋ bʋl mɩ wɩaa pɩma.

²⁷ Ma ma jaŋ bʋl mɩ wɩaa pɩ nɩaa, bɛɛ wɩaa mɩ sɩ suomo dɩdagɛ nɩaa, mɩ dɩ ma kala nɩɩ to dɔŋɔ.