Jɔɔŋ 10 - WƖA TENIŊ

Yesu sɩ ʋ nɛ ŋaa pie-daarɩ-zɔmʋŋ

¹ Ŋɩɩ nɛ Yesu magɛ namaga a bʋl, “Wʋtɩtɩɩ nɛ mɩ bʋlaa pɩma, nɩɩ-la kala sɩ bɩ boiŋ niiŋ to jʋʋ pie-dɩa, aŋ wule to kɛrɛ jʋʋ, ʋ tɩɩna ŋaa gaarʋ nɛ.

² Ama nɩɩ-la sɩ to pie-dɩa boiŋ niiŋ jʋʋ, ʋ nɛ ŋaa piese-la pie-daara.

³ Pie-dɩa bibenne yie suri pie-dɩa boiŋ niiŋ nɛ a pʋ. Piese-la ma jɩŋ ʋ yikoro. Ʋ yie yɩyɩrɛba kʋbala kʋbala, a laa ba sɩpaaŋ a kɛmba lɩɩ.

⁴ Dɩ ʋ nɛ kɛŋ ʋ piesee kala lɩɩ, ʋ yie laa ba sɩpaaŋ nɛ, ka piesee tuto ʋ harɩŋ, bɛɛ wɩaa ba jɩŋ ʋ yikoro nɛ.

⁵ Ba bɩ nʋhʋɔrʋ harɩŋ ka to, ba jaŋ mɩɩra fá ʋ harɩŋ, bɛɛ wɩaa ba bɩ ʋ yikoro jɩŋ.”

⁶ Yesu magɛ namaga deeŋ pɩba, ka ba bɩ wɩɩ-la ʋ sɩ bʋla pɩba bʋbʋɔŋ jɩŋ.

⁷ Ŋɩɩ nɛ Yesu bɩra bʋla pɩba, “Wʋtɩtɩɩ nɛ mɩ bʋlaa pɩma, mɩ nɛ ŋaa pie-dɩa-la boiŋ niiŋ.

⁸ Nɩalɩŋ kala sɩ laa sɩpaaŋ kɔ mɩ lɛ ŋaa gaara nɛ, piese-la ma bɩ ba wʋbʋlʋŋ lɛ to.

⁹ Mɩ nɛ ŋaa boi-la, nɩɩ-la kala sɩ to mɩ lɛ jʋʋ, mɩ jaŋ laaʋ ta. Mɩ jaŋ leŋ ba lɩɩ dii yaŋ aŋ mɩɩra kʋʋ jʋʋ.

¹⁰ Gaara-na yie kɔ dɩ ʋ gaa nɛ, a kpʋ, a chei kɩaa, ama mɩ-na kɔ dɩ nɩaa wuo kɛŋ mɩɩsɩŋ, dɩ ba tʋɔŋ tʋtɔrɛ woruŋ bʋa na-kala lɛ.”

¹¹ Yesu bɩra bʋl, “Mɩ nɛ ŋaa pie-daarɩ-zɔmʋŋ. Pie-daarɩ-zɔmʋŋ yie joŋ ʋ mɩɩsɩŋ yɔɔ sʋʋŋ nɛ ʋ piesee wɩaa.

¹² Ama nɩɩ-la sɩ bɩ piesee tɩɩ aŋ dɩdaa, ka ba titimu, ʋ nɛ yie na guŋguro dɩ ʋʋ kɔ, ʋ leŋ piese-la aŋ fá. Guŋguro-la kʋ kɛsɛ ba dɔnsʋŋ aŋ ŋaa dɔnsʋŋ pɩsɛ.

¹³ Ʋ yie fá, bɛɛ wɩaa ʋ daa piese-la, ka ba titimu nɛ. Ʋ sɩpaa kala tuo piese-la lɛ.

¹⁴ Mɩ nɛ ŋaa pie-daarɩ-zɔmʋŋ. Mɩ jɩŋ mɩ piesee, mɩ piesee ma jɩmmɛ.

¹⁵ Ŋɩɩ tɩtɩa nɛ mɩ Nyɩmma jɩmmɛ, mɩ ma jɩmʋ. Mɩ joŋ mɩ mɩɩsɩŋ yɔɔ sʋʋŋ mɩ piesee wɩaa.

¹⁶ Mɩ kɛŋ piesee dɔnsʋŋ ma, aŋ ka ba tuo piesee deemba tʋɔŋ. Mɩ jaŋ kɛŋ ba ma kaa kɔ. Ba ma jaŋ jɩŋ mɩ yikoro a kala ŋaa nɩbala piesee, ba pie-daara ma ŋaa kʋbala.

¹⁷ Mɩ joŋ mɩ mɩɩsɩŋ nɛ yɔɔ sʋʋŋ mɩ piesee wɩaa, ka dɩ mɩ bɩra laa. Ŋɩɩ nɛ tɩɩ mɩ Nyɩmma cho mɩ wɩaa ŋɩɩ.

¹⁸ Nʋʋkala dee bɩ leŋe mɩ joŋ mɩ mɩɩsɩŋ yɔɔ sʋʋŋ, mɩ tɩtɩa tʋɔtɔrʋŋ lɛ nɛ. Mɩ kɛŋ doluŋ dɩ mɩ joŋ mɩ mɩɩsɩŋ a yɔɔ sʋʋŋ, a bɩra kɛŋ doluŋ dɩ mɩ laa mɩ mɩɩsɩŋ ma. Wɩɩ-la mɩ Nyɩmma sɩ sɩ mɩ ŋaa nɛ ŋɩɩ.”

¹⁹ Yesu sɩ bʋl wɩaa deemba, Juu tɩmma-la bɩra kpaa balɩa.

²⁰ Ba jesiŋ sɩ, “Bɛɛ nɛ tɩɩ ma jijegili ʋ wɩaa? Jɩŋ-bɔŋŋɔɔ nɛ kɛnʋ ʋ nyɩnyaasɛ.”

²¹ Ba dɔnsʋŋ ma bʋl, “Nɩɩ-la jɩŋ-bɔŋŋɔɔ sɩ kɛnɛ bɩ wɩaa deemba wuo bʋl. Ʋ bɩra bɩ nyʋlɩmaa ma sɩaa wuo suri.”

Yesu bʋla arɩ ʋ nɛ ŋaa Wɩa Bie

²² Ŋɩɩ nɛ Juu tɩŋŋaa gbiele kʋbala yi dɩ ba gbieli Jerusalɛm lɛ. Bʋa deeŋ lɛ nɛ ba liliisi ba sɩ saa ba Wɩa dɩa dɛrɛ a joŋo pɩ Wɩa. Bʋa-la lɛ fa ŋaa waarɩŋ bʋa lɛ nɛ.

²³ Bʋa deeŋ lɛ nɛ Yesu vɩvɛŋ zawʋra-la tʋɔŋ ba sɩɩ yɩrɛ Solomoŋ zawʋra a hɛ Wɩa dɩɩ-bal-la lɛ.

²⁴ Ŋɩɩ nɛ Juu tɩŋŋaa gbaarʋ a pɩɛsʋ, “Ɛɛ nɛ ŋ chɛ ŋ kɛnla diene magɛ aŋ-na dagɛ nɩɩ-la ŋ sɩ ŋaa pɩla? Dɩ ŋ nɛ ŋaa Kirisito, Nɩɩ-la Wɩa sɩ lɩɩsa, chaasa bʋla pɩla.”

²⁵ Yesu bʋla pɩba, “Mɩ laa sɩpaaŋ bʋla pɩma nɛ, ka ma bɩ laa dii. Tɩntɩmɩɩ-la mɩ sɩɩ tɩŋ mɩ Nyɩmma doluŋ lɛ dagɛ nɩɩ-la mɩ sɩ ŋaa nɛ.

²⁶ Ama ma bɩ mɩ piesee ŋaa, ŋɩɩ nɛ tɩɩ ma bɩ mɩ wɩaa laa dii.

²⁷ Mɩ piesee nɩɩ mɩ yikoro nɛ, mɩ ma jɩmba, ba tuto mɩ harɩŋ.

²⁸ Ŋɩɩ nɛ mɩ pɩba mɩɩsɩ-la sɩ bɩ dɛrɛ, ba bɩ jaŋ kɔ dɩ ba sʋba. Nʋʋ ma saa bɩ jaŋ wuo kɛmba kaa laa mɩ nɩsɩŋ lɛ da.

²⁹ Mɩ Nyɩmma-la sɩ jomba pɩmɛ, ʋ nɛ kɩɩ kʋŋkala. Nʋʋkala bɩ jaŋ wuo kɛmba kaa laa mɩ Nyɩmma-la nɩsɩŋ lɛ.

³⁰ Mɩ dɩ mɩ Nyɩmma kala ŋaa kʋbala nɛ.”

³¹ Yesu sɩ bʋl ŋɩɩ, Juu tɩmma-la bɩra paa tabɩaa dɩ ba yagʋ.

³² Ŋɩɩ nɛ Yesu bʋla pɩba, “Mɩ ŋaa wʋzɔŋŋɔɔ yʋgɛ nɛ ma sɩpaaŋ dɩ ma na. Mɩ Nyɩmma nɛ pɩmɛ doluŋ mɩɩ ŋaa. Ba kʋbɛɛ wɩaa nɛ tɩɩ maa chɛ dɩ ma yagɛmɛ?”

³³ Juu tɩmma-la ma mɩɩra bʋl, “La bɩ chɛ dɩ la yagɩŋ a tɩŋ ŋ sɩ ŋaa wʋzɔmɔ-la wɩaa, ama ŋ ŋaa nuhuobiiŋ nɛ aŋ kɛŋ ŋ tɩtɩa a kaa bɩrɩmɛ Wɩa, a tʋtʋʋsɛ Wɩa joŋŋoo. Ŋɩɩ nɛ tɩɩ.”

³⁴ Ŋɩɩ nɛ Yesu bʋla pɩba, “Wɩa teniŋ tʋɔŋ sɛmɛ dɔŋɔ ba ŋmʋnsa a bʋl dɩ la nagɛ Wɩa nɛ.

³⁵ La jɩma wɩalɩŋ Wɩa teniŋ sɩ bʋla ŋaa wʋtɩtɩɩba nɛ, a kaa mʋ wuu. Wɩa bʋl wɩɩŋ deeŋ pɩ nɩalɩŋ ba sɩ ŋmʋnsɛ Wɩa teniŋ pa nɛ.

³⁶ Wɩa nɛ lɩɩsɛmɛ a tɩmmɛ mɩ kʋ tuu dʋnɩa, ɛɛ nɛ saa ma jaŋ bʋl mɩɩ tʋʋsɛ Wɩa joŋŋoo nɛ mɩ sɩ sɩ mɩ ŋaa Wɩa Bii nɛ?

³⁷ Dɩ mɩ nɛ bɩ mɩ Nyɩmma tɩntɩŋŋaa ka tɩŋ, má sɩ́ mɩ wɩaa laa dii.

³⁸ Ama dɩ mɩ nɩɩ tɩŋ mɩ Nyɩmma tɩntɩŋŋaa, má laa mɩ wɩaa dii a tɩŋ tɩntɩmɩɩ-la mɩ sɩɩ tɩŋ wɩaa, arɩ ma sɩ́ bɩ wɩalɩŋ mɩ sɩ bʋla pɩma laa dii kala. Ŋɩɩ lɛ nɛ ma jaŋ wuo to jɩŋ a laa dii arɩ mɩ Nyɩmma hɛ mɩ lɛ nɛ, mɩ ma hɛ ʋ lɛ.”

³⁹ Ʋ sɩ bʋl ŋɩɩ, ba bɩra chɩchɛ dɩ ba kɛnʋ, ʋ fori ba nɩsɩŋ lɛ.

⁴⁰ Ŋɩɩ nɛ Yesu bɩra mɩɩra mʋ kieli Jɔdaŋ fuoŋ, a mʋ lee-la Jɔɔŋ fa sɩɩ fo nɩaa Wɩɩchʋɔlɛ lɩɩŋ a hɛ nɩmɛ.

⁴¹ Nɩaa yʋga a kɔ ʋ teeŋ. Ba sɩ dɩ Jɔɔŋ fa bɩ wʋmagɩl kala ŋaa, ama wɩalɩŋ kala ʋ fa sɩ bʋla a tɩgɛ baala deeŋ lɛ ŋaa wʋtɩtɩɩ nɛ.

⁴² Nɩaa fa yʋga a laa ʋ wɩaa dii lee-la.