Jɔɔŋ 1 - WƖA TENIŊ

Wɩɩ-la sɩ pɩ nɩaa mɩɩsɩŋ

¹ Ka dɩ Wɩa-na ŋaa dʋnɩa, wɩɩ-la fa hɛ nɩmɛ nɛ, ʋ fa hɛ Wɩa teeŋ nɛ. Ʋ dɩ Wɩa kala fa ŋaa kʋbala nɛ.

² Bumbuŋ kala nɛ ʋ fa hɛ Wɩa teeŋ.

³ Ʋ lɛ nɛ Wɩa to a ta kʋŋkala. Kʋŋkala tuo a hɛ dʋnɩa lɛ, dɩ ʋ dee bɩ ta.

⁴ Wɩɩ-la fa weye nɛ a kɛŋ pʋlʋmʋŋ kaa kʋ pɩ nɩaa.

⁵ Pʋlʋŋ-la chaanɛ birimiŋ tʋɔŋ, biriŋ-la bɩ pʋlʋŋ-la wuo tɔ.

⁶ Ŋɩɩ nɛ Wɩa tɩŋ ʋ tɩndaarʋ kʋbala baa yɩrɛ Jɔɔŋ.

⁷ Ʋ nɛ kɔ dɩ ʋ bʋl pʋlʋŋ-la wɩaa pɩ nɩaa. Ʋ ŋaa ŋɩɩ dɩ nʋʋkala wuo nɩɩ a to ʋ lɛ a laa pʋlʋŋ-la wɩaa dii.

⁸ Jɔɔŋ fa dee bɩ pʋlʋŋ-la ŋaa, ama ʋ ta kɔ dɩ ʋ bʋl pʋlʋŋ-la wɩaa nɛ a pɩ nɩaa.

⁹ Ŋɩɩ nɛ pʋlʋŋ-la tɩtɩa kʋ tuu dʋnɩa dɩ ʋ chaana hɛ nʋʋkala lɛ.

¹⁰ Ʋ fa hɛ dʋnɩa-la lɛ Wɩa sɩ to ʋ lɛ ta nɛ, ama dʋnɩa nɩaa bɩ ʋ jɩŋ.

¹¹ Ʋ kɔ ʋ tɩtɩa jáŋ, ama ʋ jáŋ nɩaa bɩ ʋ laa.

¹² Ama nɩaa dɔnsʋŋ-na laaʋ, a laa ʋ wɩaa dii. Ŋɩɩ nɛ ʋ pɩba wombiiŋ dɩ ba wuo ŋaa Wɩa biiriŋ.

¹³ Nɩaa deemba bɩ naga baala sɩ jɩŋ ʋ haala ba lʋl biiriŋ ŋɩɩ nɛ. Wɩa tɩtɩa nɛ ŋaa ba Nyɩmma.

¹⁴ Ŋɩɩ nɛ wɩɩ-la bɩrɩmɛ nuhuobiine a kʋ hɛ la tʋɔŋ. Ʋ fa hɛ la teeŋ a fɩfá la nenige woruŋ, a kɛŋ wʋtɩtɩɩ. La na ʋ tʋla. Tʋla deeŋ ʋ Nyɩmma Wɩa nɛ joŋo pʋ, arɩ ʋ nɛ ŋaa ʋ Bie kala.

¹⁵ Jɔɔŋ bʋl ʋ wɩaa pɩla. Wɩalɩŋ ʋ sɩ heele bʋl nɛ ŋ-la: “Nɩɩ-la sɩ jaŋ to mɩ harɩŋ kɔ, ʋ nɛ kɩɩmɛ, bɛɛ wɩaa ʋ hɛ nɩmɛ nɛ ka ba-na lʋlmɛ.”

¹⁶ Kʋ-la kala ʋ sɩ kɛnɛ, la ma na kpaalɩŋ ʋ tʋɔŋ nɛ. Ʋ yie fá la nenige aa pɛ la lɛ bʋa na-kala.

¹⁷ Wɩa to Mosis lɛ nɛ a bil wombie-la sɩ maga la tuto pɩla. Ama Yesu Kirisito lɛ nɛ Wɩa to a fá la nenige, a dagɛla wʋtɩtɩɩ.

¹⁸ Nʋʋkala ha bɩ Wɩa na. Ʋ dɩ ʋ Bii-bala-la sɩ ŋaa kʋbala a hɔŋ ʋ sɛmɛ nɛ dagɛla ʋ wɩaa.

Jɔɔŋ bʋla arɩ ʋ dee bɩ Kirisito ŋaa

¹⁹ Juu tɩŋŋaa fa sɩ hɛ Jerusalɛm lɛ tɩŋ Wɩɩsʋllɩ sɩpaalaaraa arɩ Levi doho nɩaa, ba kɔ Jɔɔŋ teeŋ a pɩɛsʋ, “Kʋbɛɛ nɛ ŋ ŋaa?”

²⁰ Ŋɩɩ nɛ Jɔɔŋ bɩ wɩaa nyɩa aŋ chaasa bʋl arɩ ʋ dee Kirisito, nɩɩ-la Wɩa sɩ lɩɩsa.

²¹ Ŋɩɩ nɛ ba bɩra pɩɛsʋ, “Kʋbɛɛ nɛ saa ŋ ŋaa? Ŋ nɛ ŋaa Ɩlaaja?” Ʋ bʋl, “Mɩ dee.” Ŋɩɩ nɛ ba bɩra pɩɛsʋ, “Ŋ nɛ ŋaa Wɩa wʋlaabʋllʋ-la la sɩɩ gbɛrʋ?” Ʋ bɩra bʋl, “Aɩ.”

²² Ŋɩɩ nɛ ba bɩra pɩɛsʋ, “Kʋbɛɛ nɛ saa ŋ ŋaa? Ʋ maga dɩ ŋ dagɛla, dɩ la mʋ bʋla pɩ nɩalɩŋ sɩ tɩnla. Wʋbɛɛ nɛ ŋ bʋl a tɩgɛ ŋ tɩtɩa lɛ?”

²³ Ŋɩɩ nɛ Jɔɔŋ bʋl, “Mɩ nɛ ŋaa yikoro-la sɩ hɛ tintee-hɩlɩŋ lɛ a heelee bʋl, ‘Má wasɛ wombiiŋ dɩ ʋ tʋʋlɛ a pɩ La Tɩɩna.’ Ŋ-la nɛ Wɩa wʋlaabʋlla Azaaya fa bʋl dɩ ma ŋaa.”

²⁴ Nɩalɩŋ fa sɩ kʋ pɩɛsɛ Jɔɔŋ wɩaa deemba, Farisii tɩŋŋaa nɛ fa tɩmba.

²⁵ Ŋɩɩ nɛ ba bɩra pɩɛsɛ Jɔɔŋ, “Ŋ dee bɩ Kirisito ŋaa, Nɩɩ-la Wɩa sɩ lɩɩsa, ŋ dee bɩ Ɩlaaja ma ŋaa, ŋ bɩra bɩ Wɩa wʋlaabʋllʋ ma ŋaa. Bɛɛ nɛ saa tɩɩ ŋ fufo nɩaa Wɩɩchʋɔlɛ lɩɩŋ?”

²⁶ Ŋɩɩ nɛ Jɔɔŋ bʋl, “Mɩ sɩɩ fo nɩaa Wɩɩchʋɔlɛ lɩɩŋ, lɩɩŋ dʋndʋŋa nɛ mɩ kaa fufoba, ama nʋʋ dɔŋ nɛ hɛ ma tʋɔŋ, ka ma bɩ ʋ jɩŋ.

²⁷ Ʋ nɛ to mɩ harɩŋ kɔ. Mɩ paala bɩ maga dɩ mɩ kɛŋ ʋ nɛntɛŋŋɛɛ ŋmɛsɩŋ ma kaa puri.”

²⁸ Ba pɩɛsɛ Jɔɔŋ wɩaa deemba kala Bɛtanɩ lɛ nɛ, Jɔdaŋ fuo-la sɛmɛ dɔŋɔ, lee-la Jɔɔŋ fa sɩɩ fo nɩaa Wɩɩchʋɔlɛ lɩɩŋ.

Jɔɔŋ bʋl Wɩa Pie-bie wɩaa

²⁹ Ʋ taŋ sɩ pʋla, Jɔɔŋ na Yesu dɩ ʋ tʋʋlʋ kʋkɔ. Ʋ bʋl, “Má bee na, Wɩa Pie-bie-la nɛ ŋɩɩ. Ʋ nɛ laa dʋnɩa wʋbɔŋŋɔɔ ta.

³⁰ Baala deeŋ wɩaa nɛ mɩ faa bʋl ŋɩɩ, arɩ nʋʋ nɛ jaŋ kɔ mɩ harɩŋ. Ʋ nɛ kɩɩmɛ, ʋ hɛ nɩmɛ nɛ ka ba-na lʋlmɛ.

³¹ Mɩ fa bɩ jɩŋ nɩɩ-la kala ʋ sɩ ŋaa. Ama mɩ ta kʋ fufo nɩaa Wɩɩchʋɔlɛ lɩɩŋ nɛ, dɩ Iziral tɩŋŋaa kʋ jɩmʋ.”

³² Wɩalɩŋ Jɔɔŋ sɩ bʋla pɩ nɩaa a tɩgɛ ʋ lɛ nɛ ŋ-la: “Mɩ na Wɩa Dɩŋ-zɔmʋŋ dɩ ʋ lɩɩ wɩa-nyuŋ a nagɛ kokomo, a kʋ tuu togili ʋ lɛ.

³³ Mɩ ma tɩtɩa fa bɩ ʋ jɩŋ. Ama Wɩa sɩ tɩmmɛ dɩ mɩ fo nɩaa Wɩɩchʋɔlɛ lɩɩŋ, ʋ nɛ bʋla pɩmɛ, ‘Ŋ jaŋ na mɩ Dɩŋ-zɔmʋŋ dɩ ʋ kʋ tuu a hɛ nʋʋ lɛ, tɩɩna nɛ jaŋ joŋ mɩ Dɩŋ-zɔŋ-la a hɛ nɩaa lɛ.’ ”

³⁴ Ŋɩɩ nɛ Jɔɔŋ bɩra bʋl, “Mɩ sɛnɛ naʋ nɛ, a bʋlaa pɩma arɩ ʋ nɛ ŋaa Wɩa Bie.”

Nɩalɩŋ sɩ laa sɩpaaŋ kʋ to Yesu harɩŋ

³⁵ Ʋ taŋ sɩ pʋla, Jɔɔŋ arɩ ʋ harɩ-tooroo balɩa bɩra chɩŋ lee-la,

³⁶ a na Yesu dɩ ʋʋ bal. Jɔɔŋ sɩ naʋ dɩ ʋʋ bal, ŋɩɩ nɛ ʋ bʋl, “Má bee na, Wɩa Pie-bie-la nɛ ŋ-la.”

³⁷ Ʋ harɩ-tooro-la balɩa nɩɩ ʋ sɩ bʋl wɩɩŋ deeŋ a to Yesu harɩŋ.

³⁸ Yesu mɩɩra daasɛ, dɩ baa to ʋ harɩŋ. Ʋ pɩɛsɛba, “Bɛɛ kʋŋ nɛ maa chɛ?” Ŋɩɩ nɛ ba ma pɩɛsʋ, “La kʋhɩaŋ, nɩɩ lɛ nɛ ŋ jʋjʋʋ?”

³⁹ Ŋɩɩ nɛ Yesu bʋla pɩba, “Má kʋ na lee-la mɩ sɩɩ jʋʋ.” Ba to ʋ harɩŋ a mʋ na lee-la ʋ sɩɩ jʋʋ. Bʋa-la lɛ ŋaa dɩdaanɩŋ nɛ. Ŋɩɩ nɛ ba hɛ ʋ teeŋ wɩɩ-kaanɩŋ tiire jʋʋ.

⁴⁰ Nɩalɩŋ balɩa fa sɩ nɩɩ wɩɩ-la Jɔɔŋ sɩ bʋla a to Yesu harɩŋ, dɔŋɔ yɩrɩŋ nɛ Anduru. Ʋ fa ŋaa Saamɔŋ Pɩɩta ŋaana nɛ.

⁴¹ Ŋɩɩ nɛ Anduru ma chɛ ʋ malɩma Saamɔŋ leriŋ, a bʋla pʋ, “La na Kirisito nɛ, nɩɩ-la Wɩa sɩ lɩɩsa.”

⁴² Ʋ kɛŋ Saamɔŋ kaa kɔ Yesu teeŋ. Ŋɩɩ nɛ Yesu benu aŋ bʋla pʋ, “Ŋ nɛ Jɔɔŋ bie Saamɔŋ. Ama lɛɛlɛ ba jaŋ yɩyɩrɩŋ Sefas.” Sefas arɩ Pɩɩta fa ŋaa yɩrɩ-bala nɛ, ʋ bʋbʋɔŋ nɛ bʋŋ.

Yesu yɩrɛ Fɩlɩp arɩ Natanɩal

⁴³ Ʋ taŋ sɩ pʋla, Yesu sii dɩ ʋ mʋ Galilii tinteeŋ. Ŋɩɩ nɛ ʋ na Fɩlɩp a bʋla pʋ, “Kʋ to mɩ harɩŋ.” Ŋɩɩ nɛ Fɩlɩp to ʋ harɩŋ.

⁴⁴ Fɩlɩp fa lɩɩ Bɛtɩsaada nɛ, taŋ-la Anduru arɩ Pɩɩta ma sɩ lɩa.

⁴⁵ Ŋɩɩ nɛ Fɩlɩp na Natanɩal a bʋla pʋ, “Nɩɩ-la wɩaa Mosis fa sɩ ŋmʋnsa wombie-la Wɩa sɩ bile dɩ la tuto tʋɔŋ, la naʋ nɛ. Wɩa wʋlaabʋllaa ma fa bʋl ʋ wɩaa nɛ. Ʋ nɛ Yesu, Josɛf nanʋala a lɩɩ Nazarɛt.”

⁴⁶ Ŋɩɩ nɛ Natanɩal pɩɛsʋ, “Ŋ ha na kʋzɔŋ dɩ ʋ lɩɩ taŋ-la ba sɩɩ yɩrɛ Nazarɛt?” Ŋɩɩ nɛ Fɩlɩp bʋla pʋ, “Kʋ na.”

⁴⁷ Yesu sɩ na Natanɩal dɩ ʋʋ kɔ ʋ teeŋ, ʋ bʋl, “Nɩa deeŋ ŋaa Iziral tɩɩna tɩtɩɩ nɛ. Ʋ kɛŋ wʋtɩtɩɩ.”

⁴⁸ Ŋɩɩ nɛ Natanɩal pɩɛsʋ, “Ɛɛ nɛ ŋ ŋaa jɩmmɛ?” Ŋɩɩ nɛ Yesu bʋla pʋ, “Mɩ naŋ nɛ ŋ sɩ hɔŋ tutogo bʋbʋɔŋ, ka Fɩlɩp-na yɩrɩŋ.”

⁴⁹ Ŋɩɩ nɛ Natanɩal bʋla pʋ, “Kʋhɩaŋ, ŋ nɛ ŋaa Wɩa Bie. Ŋ nɛ ŋaa Iziral tɩŋŋaa kuoro ma.”

⁵⁰ Ŋɩɩ nɛ Yesu pɩɛsʋ, “Mɩ sɩ bʋla arɩ mɩ naŋ dɩ ŋ hɔŋ tutogo bʋbʋɔŋ nɛ tɩɩ, ŋ laa mɩ wɩaa dii koo? Ŋ jaŋ na wʋkpuŋkperisiŋ a kɩɩ ŋ-la.”

⁵¹ Ŋɩɩ nɛ Yesu bʋla pʋ, “Wʋtɩtɩɩ nɛ mɩ bʋlaa pɩŋ, ma jaŋ na wɩa-nyuŋ dɩ ʋ suro, dɩ Wɩa tɩndaaraa lɩɩ nɩmɛ a kʋʋ tuu mɩ-na Nuhuobiine Bie teeŋ, aŋ mɩɩra jɩjɩl.”