JƐRƖMAAYA 9 - WƖA TENIŊ

¹ Mɩ fa cho dɩ mɩ nyuŋ nagɛ lɩɩ-bul-sɩɩŋ nɛ dɩ mɩ sɩaa ma fa bubul sɩlɩɩrɩŋ. Mɩ fa jaŋ yel tɩtaŋɩŋ arɩ wɩɩhɛyɛ kala a tɩŋ ba sɩ kpʋ mɩ nɩaa wɩaa.

² Mɩ fa cho dɩ mɩ kɛŋ lee nɛ tintee-hɩlɩŋ lɛ nʋhʋɔraa sɩ jaŋ kʋ jʋjʋʋ, dɩ mɩ lɩɩ mɩ nɩaa tʋɔŋ a fá mʋ hɛ nɩmɛ, a kagɛ ba lɛ. Ba kala ka ŋaa wʋchɔrʋmɔɔ nɛ. Ba ŋaa nɩ-daŋ nɛ, ba bɩ wʋtɩtɩɩ kɛnɛ Wɩa teeŋ.”

³ Ŋɩɩ nɛ La TƖƖNA bʋl, “Ba kɛŋ ba tɩtɩa nɛ a nagɛ toŋ ba sɩ lɛrɛ hɛ, baa chɛ dɩ ba nyɩɛ wɩaa nɛ. Ba wʋtɩtɩɩ dee bɩ leŋe ba kɛŋ doluŋ tintee-la lɛ. Ba wʋbɔŋŋɔɔ ŋaanɩŋ lɩa aŋ ka pɩpɩ dɔŋɔ nɛ. Ba bɩ mɩ kaa tɩtɩŋ.

⁴ Má kɛŋ ma tɩtɩa arɩ ma nandɔnsʋŋ. Má sɩ́ ma naambiiriŋ laa dii. Naambii kala ka nyɩsɛ ʋ dɔŋɔ tɩɩna nɛ. Nandɔŋ ma kala ŋaa yɩrɩ-cheeru.

⁵ Nandɔŋɔ yie nyɩsɛ ʋ nandɔŋɔ. Ba kʋŋkala bɩ wʋtɩtɩɩ ka bʋl. Ba niiree mal wʋnyɩɛrɩŋ nɛ. Baa lɔl ba tɩtɩa nɛ wʋbɔŋŋɔɔ ŋaanɩŋ lɛ.

⁶ Jɛrɩmaaya, ŋ tagɩlɛ nɩ-nyɩsɛraa tʋɔŋ nɛ. Ba sɩɩ nyɩsɛ nɩaa ŋɩɩ, ba bɩ mɩ kaa tɩtɩŋ. Mɩ-na ma TƖƖNA nɛ bʋla.”

⁷ Ŋɩɩ wɩaa, wɩɩ-la La TƖƖNA, doluŋ kala Tɩɩna sɩ bʋla nɛ ŋ-la: “Mɩ jaŋ joŋ nyiniŋ hɛ ba lɛ a magɩsɛba na a lɩɩsɛ ba disiniŋ ta a nagɛ ba sɩ yie joŋ hɔpʋla hɛ nyiniŋ lɛ a lɩɩsɛ disiniŋ ŋɩɩ. Wʋbɛɛ nɛ mɩ jaŋ bɩra wuo ŋaa a tɩŋ mɩ nɩaa wʋbɔŋŋɔɔ wɩaa?

⁸ Ba niiree nagɛ to-hɛmɩŋ sɩ kɛŋ huoŋ nɛ, a nyɩnyɩɛ wɩaa. Ba yie kɛŋ ba niiree bʋl wʋzɔŋŋɔɔ a pɩpɩ dɔŋɔ, ama wʋbɔŋŋɔɔ nɛ hɛ ba tʋɔŋ lɛ ba kaa gbɛrɛ dɔŋɔ.

⁹ Bɛɛ nɛ tɩɩ mɩ bɩ jaŋ dɔgɩsɛba a tɩŋ wɩɩŋ deeŋ wɩaa?” Mɩ-na ma TƖƖNA nɛ bʋla. “Bɛɛ nɛ jaŋ tɩɩ mɩ bɩ jaŋ joŋ mɩ baanɩŋ tiŋ tintee doho deeŋ lɛ?”

¹⁰ Ŋɩɩ nɛ mɩ bʋl, “Mɩ jaŋ yele pɩ peelee aŋ ta jembiiŋ tɩgɛ ba pʋsʋŋ dɩ-diilee lɛ. Ba pɩna nɛ hoi, nʋʋkala bɩ nɩmɛ ka vɛŋ, ŋ bɩra bɩ nɛsɩŋ yele ka nɩɩ nɩmɛ. Diibiisiŋ kala file lɛl nɛ, bagɩlaa ma fá viiri.”

¹¹ La TƖƖNA sɩ, “Mɩ jaŋ leŋ dɩ Jerusalɛm pɩŋ jikpeeŋ, a ŋaa jolluŋ dɩjʋʋlʋŋ. Mɩ jaŋ leŋ dɩ Juda tasɩŋ pɩŋ hoi, dɩ nʋʋkala sɩ́ wuo hɔŋ lee-la.”

¹² Ŋɩɩ nɛ mɩ pɩɛsɛ La Tɩɩna, “Kʋbɛɛ nɛ hɛ nɩmɛ a kɛŋ wʋjɩmɩŋ a maga dɩ ʋ wuo jɩŋ wɩɩŋ deeŋ sɩaa? Kʋbɛɛ nɛ La TƖƖNA hɛ sɩ jaŋ wuo dagɛ wɩɩ-la bʋbʋɔŋ? Bɛɛ nɛ tɩɩ tintee-la chei a pɩŋ jikpeeŋ a nagɛ tintee-hɩlɩŋ, nʋʋkala bɩ nɩmɛ wuo to bɩbal?”

¹³ La TƖƖNA sɩ, “Ba sɩ vɩa wombii-la mɩ sɩ bile pɩba dɩ ba tuto wɩaa nɛ tɩɩ. Ba bɩ mɩ niiŋ sɛyɛ a bɩ mɩ wombii-la mɩ sɩ bile to.

¹⁴ Ama ba mɩɩra to ba nyuduoŋ harɩŋ nɛ. Ba fa to vene-la ba sɩɩ yɩrɛ Baal nɛ, arɩ ba nyɩmmaba fa sɩ dagɛba ŋɩɩ.

¹⁵ Ŋɩɩ wɩaa, wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Má bee na, mɩ jaŋ leŋ dɩ nɩaa deemba dii kʋdii haarɩŋ, a nyʋa lɩɩŋ ba sɩ hɛ bɩɛlɩŋ.

¹⁶ Mɩ jaŋ kɛmba pɩsa hɛ tinteyee lɛ ba dɩ ba nyɩmmaba kʋŋkala ha sɩ bɩ jɩŋ. Mɩ jaŋ kire to ba harɩŋ arɩ tokobiiŋ see dɩ mɩ kpʋba.”

¹⁷ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Bɩɩnɛ wɩaa woruŋ a mʋ tɩgɛ wɩalɩŋ sɩɩ ŋaa lɛ! Yɩrɛ hagɔgɔɔ dɩ ba kɔ, tɩma yɩrɛ ba nɩalɩŋ sɩ chaasa jɩŋ yele.

¹⁸ Leŋ dɩ ba ŋaa lɩma kɔ a kʋ yel hagɔgʋŋ pɩla, a mʋ yi bʋa-la lɛ la sɩaa sɩ jaŋ pɩpɛllɛ arɩ sɩlɩɩrɩŋ, dɩ la sɩaa kala ŋaa lɩɩ.

¹⁹ La nɩa dɩ baa ŋmoo niiŋ nɛ Zaayɔŋ lɛ a bʋbʋl, ‘La cheye dɛrɛ nɛ. La hɩɩsɩŋ chaasa yʋgɛ nɛ. Ʋ maga dɩ la lɩɩ la tinteeŋ lɛ nɛ, bɛɛ wɩaa la dɩɩsɩŋ kala nɛ ba ŋmoo lo.’ ”

²⁰ Ou, haalaa, lɛɛlɛ má jegile nɩɩ La TƖƖNA wɩaa. Má suri ma dɩgɩlaa a nɩɩ ʋ niiŋ wɩaa. Má dagɛ ma toloo ŋɩɩ ba sɩɩ yel, má dagɛ dɔŋɔ hagɔgʋŋ.

²¹ Sʋʋŋ to tokoroba nɛ a jʋʋ la dɩɩsɩŋ a jʋʋ la dɩɩ-duoruŋ. Ʋ kpʋ hambiisiŋ nɛ womporunuŋ lɛ, aŋ kpʋ bapʋɔsaa ma biliiŋ lɛ.

²² Wɩɩ-la mɩ-na La TƖƖNA sɩ bʋla nɛ ŋ-la: “Nuhuobiinee kʋsʋʋnʋŋ jaŋ pɩna yieni, a nagɛ nʋsʋrʋŋ sɩ pɩŋ dɩ-jalɩŋ, a nagɛ ba sɩ ta mɩaa kɩɛlɛ, ka nʋʋ tuo dɩ ʋ paa hɛ dɔŋɔ.”

²³ Wɩɩ-la La TƖƖNA bɩra sɩ bʋla nɛ ŋ-la: “Wʋjɩnna bɩ maga dɩ ʋ kɛŋ ʋ wʋjɩmɩŋ ŋmoo bɔyɛ. Nɩduoŋ ma bɩ maga ʋ kɛŋ ʋ doluŋ ŋmoo bɔyɛ. Kɩaa tɩɩna ma bɩ maga dɩ ʋ kɛŋ ʋ kɩaa ŋmoo bɔyɛ.

²⁴ Ama, leŋ dɩ nʋʋkala nɩɩ ŋmoo ʋ bɔyɛ, ʋ ŋmoo ʋ bɔyɛ a mʋ tɩgɛ wɩɩŋ deeŋ nɛ: Arɩ ʋ jɩŋ mɩ wɩaa sɩaa nɛ, a jɩmmɛ dɩ mɩ nɛ ŋaa ʋ TƖƖNA. Nɩɩ-la sɩ cho nɩaa a kɛŋ wʋtɩtɩɩ arɩ tʋɔpʋla a ŋɩŋaa wɩaa tinteeŋ lɛ, wɩaa deemba nɩɩ tɔrɛ mɩ tʋɔŋ. Mɩ-na ma TƖƖNA nɛ bʋla.”

²⁵ La TƖƖNA bɩra sɩ, “Tapʋlaa ka kɔ nɛ, mɩ sɩ jaŋ dɔgɩsɛ nɩalɩŋ kala sɩ keri ba penee dʋndʋŋ, aŋ bɩ ba tʋɔŋ pʋlla.

²⁶ Nɩalɩŋ nɛ ŋaa: Ijipiti nɩaa, Ɛdɔm nɩaa, Amɔŋ nɩaa, Mʋab nɩaa arɩ nɩalɩŋ kala sɩ hɛ tintee-hɩlɩŋ lɛ dɩ-boloo. Tinteyee deemba kala nɩaa bɩ ba tʋɔŋ pʋlla. Iziral tɩŋŋaa kala ma paala bɩ ba tʋɔŋ pʋlla.”