JƐRƖMAAYA 8 - WƖA TENIŊ

¹ La TƖƖNA sɩ, “Bʋa-la lɛ, ba jaŋ kuuso chaarɛ Juda tinteeŋ kuoru-balaa arɩ ba tɩntɩnnɩ-hɩasɩŋ, Wɩɩsʋllɩ sɩpaalaaraa arɩ mɩ wʋlaabʋllaa arɩ nɩalɩŋ kala fa sɩ hɛ Jerusalɛm lɛ haŋgbelee ba vaamaa lɛ.

² Ba jaŋ kɛmba yieni dɩ wɩɩpɔsʋŋ, chɛnɛ arɩ chɛnwʋlaa kala sɩ hɛ wɩa-nyuŋ chaana hɛ ba lɛ. Nɩalɩŋ fa cho kɩaa deemba nɛ a tɩma pɩpɩba. Ba faa toba nɛ a pɩɛsɛba chɩchɛ dɩ ba na wɩaa a kpʋkpaarɛba. Nʋʋ bɩ jaŋ kuri haŋgbele-la hɛ dɔŋɔ a hugi, ama ba jaŋ lemba ta dɩ ba pɩŋ tinteeŋ a nagɛ nʋsʋrʋŋ.

³ Lee na-kala mɩ sɩ vɩa tintee-bɔmʋŋ deeŋ nɩaa ta, nɩkaana-la sɩ bɩ sʋba jaŋ cho sʋʋŋ a kɩɩ mɩɩsɩŋ. Mɩ-na ma TƖƖNA doluŋ kala Tɩɩna nɛ bʋla.”

Ŋɩɩ ba sɩ jaŋ dɔgɩsɛ nɩaa a tɩŋ ba wʋbɔŋŋɔɔ wɩaa

⁴ Pɩɛsɛba na, “Wɩɩ-la mɩ-na ma TƖƖNA sɩ pɩɛsa nɛ ŋ-la: Dɩ nɩaa nɛ tele, ba bɩ sii? Dɩ nʋʋ nɛ yeŋŋe, ʋ bɩ harɩŋ ka mɩɩrɛ?

⁵ Bɛɛ nɛ saa tɩɩ nɩaa deemba vɩa dɩ ba mɩɩra kɔ mɩ teeŋ? Bɛɛ nɛ tɩɩ Jerusalɛm nɩaa yie mɩɩrɛ mɩ harɩŋ? Ba nyʋa mɛrɛ vʋɩyaa sɩɩ nyɩsɛba lɛ nɛ, aŋ vɩa dɩ ba mɩɩra kɔ mɩ teeŋ.

⁶ Mɩ-na chaasa jegili ba teeŋ nɛ woruŋ, ama ba bɩ wɩaa ka bʋl ba bʋɔsʋŋ lɛ. Nʋʋkala bɩ bɩrɩma lɩɩ ʋ wʋbɔŋŋɔɔ ŋaanɩŋ lɛ, a pɩɛsɛ, ‘Wʋbɛɛ nɛ mɩ ŋaa?’ Nʋʋkala ka ŋaa wɩɩ-la ʋ sɩ cho nɛ, a nagɛ jaaba sɩ tʋɔra mʋmʋ laalɩŋ.

⁷ Naliiribommie sɩɩ fil wɩa-nyuŋ ma paala jɩŋ yibiiniŋ arɩ tafaaŋ bʋa nɛ. Kokosuŋ, zaarɩ-kokobiisiŋ arɩ chakpoliba ma paala jɩŋ bʋa-la lɛ ba sɩ yie gɔllɔ mʋ leree nɛ. Ama mɩ nɩaa-na bɩ wɩalɩŋ mɩ-na ba TƖƖNA sɩɩ chɛ jɩŋ.

⁸ Ɛɛ nɛ ma jaŋ wuo bʋl, ‘La ŋaa wʋjɩnna nɛ, bɛɛ wɩaa la kɛŋ La TƖƖNA wombii-la ʋ sɩ bile dɩ la tuto nɛ.’ Ka nɩalɩŋ sɩɩ ŋmʋnsɛ tenniŋ kɛŋ wɩalɩŋ kaa bɩrɩmɛ wʋnyɩɛrɩŋ?

⁹ Hɩɩsɩŋ jaŋ kɛŋ wʋjɩnnaa, ba niiŋ jaŋ maa dɩ ba bɛrɛ kɛmba, ba sɩ vɩa mɩ-na ma TƖƖNA niiŋ wɩaa, wʋjɩŋ bɛɛ nɛ ba kɛŋ?

¹⁰ Ŋɩɩ wɩaa mɩ jaŋ laa ba haalaa pɩ ba-wogusuŋ, ka dɩ nɩtanɩa ma laa ba bagɩsɩŋ tɩɩ. Ba nɩbiisiŋ arɩ ba nɩbalaa kala kɛŋ yarɩ-bieriŋ nɛ a chɩchɛ kɩaa. Mɩ wʋlaabʋllaa arɩ Wɩɩsʋllɩ sɩpaalaaraa ma nagɛ ŋɩɩ tɩtɩa nɛ a kala nyɩnyɩsɛ nɩaa.

¹¹ Ba yie kɛŋ sɛntɛrɩŋ nɛ a chɛsɛ mɩ nɩaa naawɩɩlaa a nagɛ ba firise nɛ. Ba yie bʋl, ‘Fɩɛlɩŋ hɛ nɩmɛ, Fɩɛlɩŋ hɛ nɩmɛ, aŋ ka fɩɛlɩŋ tuo.’

¹² Wʋkɩsɩa-la ba sɩɩ ŋaa, hɩɩsɩŋ kɛmba nɛɛ? Aɩ, ba paala bɩ hɩɩsɩŋ ka fá. Ba paala bɩ jɩŋ ŋɩɩ ba sɩ jaŋ kɛŋ sɩaa chei. Ŋɩɩ wɩaa ba jaŋ sʋʋ, a pɛ nɩalɩŋ sɩ sʋba lɛ. Mɩ jaŋ dɔgɩsɛba a kɛmba muuri. Mɩ-na ma TƖƖNA nɛ bʋla.

¹³ Mɩ jaŋ leŋ dɩ ba kʋpɛrɛɛ birigi. Girep tɩɩsɩŋ bɩ jaŋ kɛŋ nɛŋ kala. Tutogo ma bɩ jaŋ nɛŋ tutogi-nambɩlaa, ba pɩpaarɩŋ jaŋ yuori. Kɩalɩŋ kala mɩ sɩ joŋo pɩba, mɩ jaŋ laaba ba teeŋ. Mɩ-na ma TƖƖNA nɛ bʋla.”

¹⁴ Ŋɩɩ nɛ Juda nɩaa pɩɛsɛ dɔŋɔ, “Bɛɛ nɛ tɩɩ la ha hɔŋ daha? Má kʋ hɛ dɔŋɔ! Má leŋ dɩ la fá mʋ tabala-la ba sɩ saa kɛrɩsɩŋ golli a sʋʋ nɩmɛ. La TƖƖNA Wɩa ka chɛ dɩ ʋ kpʋla nɛ a joŋ bɩɛlɩŋ hɛ lɩɩŋ lɛ dɩ la nyʋa, a tɩŋ la sɩ ŋaa wʋbɔŋŋɔɔ ʋ lɛ wɩaa.

¹⁵ La faa yɩɛlʋ arɩ la jaŋ hɔŋ arɩ fɩɛlɩŋ nɛ, ama la bɩ ŋɩɩ na. Bʋa-la sɩ maga dɩ la duoro lɩɩ wɩaa lɛ, fawʋllʋŋ mɩɩra jʋʋla yʋgɛ nɛ.

¹⁶ La nɩɩ la dʋndɔŋŋɔɔ janɩŋ sɩ ŋmʋʋ mɩɩsɩŋ a lɩɩ Daŋ tinteeŋ nɛ. Ba janɩ-la yele leŋe tintee-la kala zigili nɛ. Ba kɔ dɩ ba yuo dii la tinteeŋ nɛ a chei kʋŋkala sɩ hɛ ʋ lɛ, la tabal-la arɩ nɩalɩŋ kala sɩ hɛ nɩmɛ.”

¹⁷ La TƖƖNA sɩ, “Má bee na, mɩ jaŋ leŋ dɩ dɩŋŋaa sɩ kɛŋ huoŋ kʋ jʋʋ ma tʋɔŋ, dɩ-kuuroo nʋʋ sɩ bɩ jaŋ wuo bugumi. Ba jaŋ dɩmma.”

¹⁸ Jɛrɩmaaya bʋl, “Mɩ tʋɔŋ cheye yʋgɛ nɛ, nʋʋ bɩ mɩ bɔyɛ wuo nyagɛ, mɩ daagaa chaasa viisi nɛ.

¹⁹ Jegile nɩɩ mɩ nɩaa nii-ŋmobo tintee-bolii-la lɛ. La TƖƖNA tuo Zaayɔŋ lɛɛ? Ʋ kuoru-balɩŋ bɩra tuoo?” La TƖƖNA pɩɛsɛ “Bɛɛ nɛ tɩɩ ba kɛŋ kɩalɩŋ ba sɩ mɛ ŋaa mɩ baanɩŋ sii, ba vʋɩ-pɛɩba-la ba sɩ kaa lɩɩ tawogusuŋ?”

²⁰ Jɛrɩmaaya bɩra bʋl, “Baga kɩaa ŋaanɩŋ bala nɛ, lɩmbaŋa dɛrɛ nɛ, ka nʋʋkala bɩ la laata.

²¹ Mɩ tʋɔŋ faasa chei nɛ a tɩŋ mɩ nɩaa tʋɔŋ sɩ cheye wɩaa. Mɩ yel, aŋ tuo bibeŋ.

²² Naawɩɩlaa nʋʋŋ tuo Gɩlɩad lɛɛ? Daalusuŋ tɩɩna kala tuoo? Bɛɛ nɛ saa tɩɩ mɩ nɩaa naawɩɩlaa bɩ fɩɛlɛ?