JƐRƖMAAYA 6 - WƖA TENIŊ

Dʋndɔŋŋɔɔ golli Jerusalɛm chu

¹ “Bɛnjamɩŋ doho nɩaa, má fá a laa ma tɩtɩa. Má fá lɩɩ Jerusalɛm lɛ. Má ŋmʋʋ banyile taŋ-la ba sɩɩ yɩrɛ Tɛkʋa lɛ! Má hɛ nyiniŋ dɩ ʋ ŋaa magɩl lee-la ba sɩɩ yɩrɛ Bɛf Hakerem lɛ, bɛɛ wɩaa wʋlɔrʋŋ nɛ lɩɩ wɩɩpɔsʋŋ nagʋa dɩɩrɩŋ a kʋkɔ. Ʋ ŋaa wɩɩ sɩ chaasa lɔrɛ nɛ.

² Jerusalɛm zɔmɔ nɛ woruŋ, ama mɩ jaŋ cheyu.

³ Sɩpaalaaraa arɩ ba nɩaa jaŋ kɔ ʋ lɛ, a hɛ ba lɛŋŋɛɛ a gollu, dɩ ba kʋŋkala hɔŋ lee-la ba sɩ kere pʋ.”

⁴ Ba jaŋ bʋl, “Má kɛŋ ma tɩtɩaba dɩ la yuo Jerusalɛm. Má sii dɩ la yuou wɩɩhɛyɛ. Ama leriŋ ka biri nɛ, dɩdaanɩŋ yie nɛ, daaliimee duomo pɩpɛ nɛ.

⁵ Má sii dɩ la yuou tɩtaŋɩŋ, a chei ʋ dɩɩ-duoruŋ.”

⁶ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Má keri Jerusalɛm tɩɩsɩŋ lo, a saa lusuŋ-choluŋ yelli ʋ kɛrɩsɩŋ. Ʋ maga mɩ dɔgɩsɛ tabalɩŋ deeŋ nɩaa nɛ, bɛɛ wɩaa ba wʋrɩgɛ nɩaa nɛ kɩŋkɛŋ ʋ lɛ.

⁷ A nagɛ lɩɩŋ sɩ yie bul a lɩlɩɩ viliŋ lɛ ŋɩɩ, ŋɩɩ nɛ Jerusalɛm wʋbɔŋŋɔɔ ŋaanɩŋ nagɛ. Yuosuŋ arɩ leriŋ cheyiŋ yʋga ʋ lɛ. Mɩɩ na ʋ nɩaa nyanyalaa arɩ ʋ naawɩɩlaa kala nɛ.

⁸ Jerusalɛm tɩmma, má jegile nɩɩ ŋɩɩ mɩ sɩɩ chagɩlɛma, dɩ ŋɩɩ dee, mɩ jaŋ lɩɩ ma harɩŋ, a leŋ dɩ ma tinteeŋ pɩŋ hoi dɩ nʋʋkala sɩ́ wuo hɔŋ nɩmɛ.”

⁹ Wɩɩ-la La TƖƖNA doluŋ kala Tɩɩna bɩra sɩ bʋla nɛ ŋ-la: “Ba jaŋ tiire kpʋ Iziral nɩkaana-la, dɩ ba kala lɛl gbelem gbelem a nagɛ ba sɩ tɔrɛ girep nɛnɛɛ aŋ bɩra mʋ kuuni.”

¹⁰ Kʋbɛɛ nɛ mɩ jaŋ wuo bʋl wɩaa chagɩlɛ? Kʋbɛɛ nɛ jaŋ jegile nɩɩ mɩ teeŋ? Ba dɩgɩlaa tɔ nɛ, ba bɩ wɩaa wuo nɩɩ. La TƖƖNA niiŋ wɩaa ŋaa jomo nɛ ba teeŋ. Ba tʋɔŋ bɩ wɩalɩŋ lɛ tɔrɔ.

¹¹ La TƖƖNA, baaŋ-la ŋ sɩ na ba nyuŋ chaasa tʋgʋmɛ nɛ. Mɩ bɩ jaŋ wuo nyagʋ bil. Ŋɩɩ nɛ La TƖƖNA bʋla pɩmɛ, “Joŋ ŋ baaŋ-la fɩɩsɛ ba biiriŋ sɩ hɛ womporuŋ lɛ, arɩ bapʋɔsɩa-la sɩ hilime. Sɩ́ baalaa arɩ ba haalaa ma lɩɩsa ta. Sɩ́ nɩalɩŋ sɩ faasa hɩɛsɛ ma lɩɩsa ta.

¹² Ba dɩɩsɩŋ jaŋ mɩɩra ŋaa ba dʋndɔŋŋɔɔ kɩaa, a pɛ ba bagɩsɩŋ arɩ ba haalaa lɛ. Mɩ jaŋ dɔgɩsɛ nɩalɩŋ sɩ hɛ tintee-la lɛ.” La TƖƖNA nɛ bʋla.

¹³ “Ba nɩbiisiŋ arɩ ba nɩbalaa kala kɛŋ yarɩ-bieriŋ nɛ a chɩchɛ kɩaa. Mɩ wʋlaabʋllaa arɩ Wɩɩsʋllɩ sɩpaalaaraa ma nagɛ ŋɩɩ tɩtɩa nɛ, a kala nyɩnyɩsɛ nɩaa.

¹⁴ Ba yie kɛŋ sɛntɛrɩŋ nɛ a chɛsɛ mɩ nɩaa naawɩɩlaa a nagɛ ba firise nɛ. Ba yie bʋl, ‘Fɩɛlɩŋ hɛ nɩmɛ, fɩɛlɩŋ hɛ nɩmɛ,’ ka fɩɛlɩŋ paala tuo.

¹⁵ Wʋkɩsɩa-la ba sɩɩ ŋaa, hɩɩsɩŋ kɛmba nɛɛ? Aɩ, ba paala bɩ hɩɩsɩŋ ka fá. Ba paala bɩ jɩŋ ŋɩɩ ba sɩ jaŋ kɛŋ sɩaa chei. Ŋɩɩ wɩaa ba jaŋ sʋʋ, a pɛ nɩalɩŋ sɩ sʋba lɛ. Mɩ jaŋ dɔgɩsɛba a kɛmba muuri. Mɩ-na ma TƖƖNA nɛ bʋla.”

¹⁶ Wɩɩ-la La TƖƖNA sɩ bʋla nɛ ŋ-la: “Má chɩŋ wɛŋ-chɛŋŋɛɛ lɛ aŋ beŋ, má pɩɛsa chɛ a jɩŋ wombii-bɩnɩa-la, má pɩɛsa na lee-la wombii-zɔŋ-la sɩ hɛ, a tou, dɩ ma dɩnsɩŋ na wiese. Ama ma sɩ, ‘La bɩ jaŋ tou.’

¹⁷ Mɩ fa lɩɩsɛ nɩaa nɛ dɩ ba pɔma aŋ bʋl, ‘Má jegile nɩɩ banyile-la ba sɩ ŋmʋa aa kɛŋ ma tɩtɩa.’ Ama ma sɩ, ‘La bɩ jaŋ jegile nɩɩ.’

¹⁸ Ŋɩɩ wɩaa tinteyee nɩaa, má jegile nɩɩ, máa beŋ, a na wɩɩ-la mɩ sɩ jaŋ ŋaa mɩ nɩaa lɛ.

¹⁹ Tinteeŋ nɩaa, má jegile nɩɩ. Mɩ kɛŋ wʋlɔrʋ nɛ a kʋkɔ dɩ mɩ hɛ nɩaa deemba lɛ, a tɩŋ ba wʋŋaalaa wɩaa. Ba bɩ jegile nɩɩ mɩ niiŋ wɩaa, aŋ vɩa mɩ wombie-la mɩ sɩ bile dɩ ba tuto.

²⁰ Kʋsʋɔrʋsʋ-la ba sɩ kaa lɩɩ taŋ-la ba sɩɩ yɩrɛ Sɩɩba arɩ tegisi-la dɔnsʋŋ sʋɔra sɩ sɩma ba kaa lɩɩ tintee-la sɩ bolie kʋʋ pɩmɛ, ba bɩ bʋbʋɔ kala kɛnɛ mɩ teeŋ. Mɩ bɩ ma kʋnyɩgaa Wɩɩsʋlʋŋ kɩaa ka laa. Mɩ tʋɔŋ bɩ pʋsʋ-la ma sɩ yie kpʋ pɩmɛ nyuŋ ka tɔrɛ.”

²¹ Ŋɩɩ wɩaa, wɩɩ-la La TƖƖNA bɩra sɩ bʋla nɛ ŋ-la: “Mɩ jaŋ joŋ baŋkɛŋ wɩaa kɛrɛ nɩaa deemba. Bii-lʋllaa arɩ ba biiriŋ jaŋ gɛrɛba tel. Pɛ-jʋʋraa arɩ ba nandɔnsʋŋ ma jaŋ sʋʋ.”

²² Wɩɩ-la La TƖƖNA sɩ bʋla nɛ ŋ-la: “Má bee na laalɩyuoroo nɛ lɩɩ wɩɩpɔsʋŋ nagʋa dɩɩrɩŋ tinteeŋ kʋkɔ. Tintee-la nɩaa sɩ faasa kɛŋ doluŋ nɛ ba koso kʋkɔ ba hɛ ma lɛ, ba lɩɩ dɩ-bolii kʋkɔ.

²³ Ba nyɩgɩla nɛ a kori tosuŋ arɩ ba tiŋŋee, ba ŋaa laalɩyuori tʋɔhɛɩ tɩmma nɛ, a bɩ nɩaa nenige ka fá. Ba sɩ jɩl ba janɩŋ, ba dɔmɔ nagɛ mʋgʋ-balɩŋ sɩɩ huuru nɛ. Ba ŋaa nɩaa sɩ nyɩgɩla dɩ ba yuo laalɩŋ nɛ a kɔ dɩ ba yuo ŋ-na Jerusalɛm.”

²⁴ La nɩɩ la dʋndɔmɔ-la wɩaa nɛ, ŋɩɩ leŋ la nandaasɩŋ yʋɔrɛ. Hɛɛŋ chaasa jʋʋla nɛ, a nagɛ haala sɩɩ chɛ dɩ ʋ lʋl ʋ luoruŋ wʋwɩɩ.

²⁵ Má pɔ ma sɩ́ pɔkɔŋ nyuŋ jɩl a sɩ́ wombiee ma lɛ vɛŋ, bɛɛ wɩaa la dʋndɔmɔ-la kori tokobiee nɛ, fawʋllʋŋ hɛ lee-kala.

²⁶ La Tɩɩna sɩ, “Mɩ nɩaa, má paa tʋɔ-chei gɛnnɩŋ laalɛ a bilimi tʋɔrʋŋ lɛ. Má chaasa yel, yel-haaŋ a nagɛ nʋʋ sɩ kɛŋ ʋ bii-bala ʋ sʋʋ. Ʋ bɩ jaŋ dieni ka dɩ nɩɩ-la sɩɩ chei leriŋ guu kɔ ma lɛ, a yuola.

²⁷ Jɛrɩmaaya magɩsɛ mɩ nɩaa a nagɛ ŋɩɩ nɩa sɩ jaŋ magɩsɛ hɔɔnʋŋ a nɩna ŋɩɩ ba sɩ naga nɛ.

²⁸ Ba kala ŋaa nyu-duo tɩmma nɛ a vɩa mɩ niiŋ, a gɔllɔ chichei nɩaa yɩrɩŋ. Ba wɩaa dolie nagɛ kɔlɩɩŋ arɩ hɔɔŋ nɛ, ba kala wʋŋaalaa lɔrɔ.

²⁹ Ba du chafugumoo nyiniŋ ʋ faasa didii nɛ, dɩ ʋ joŋ hɔɔŋ dii, ama ba sɩɩ chɛ dɩ ba lɩɩsɛ hɔɔ-la disiniŋ ta ŋɩɩ ŋaa pɛɩ nɛ, ba bɩ nɩbɔŋŋɔɔ disiniŋ wuo lɩɩsa tɩta.

³⁰ Ba kɛmba yɩyɩrɛ hɔpʋla ba sɩ vɩa ta nɛ, bɛɛ wɩaa mɩ-na ma Tɩɩna vɩaba ta nɛ.”