JƐRƖMAAYA 52 - WƖA TENIŊ

Jerusalɛm tele

¹ Zedikaaya fa ŋaa jɩsɩŋ mara arɩ kʋbala nɛ aŋ dii kuoruŋ Juda tinteeŋ lɛ. Ʋ hɔŋ Jerusalɛm lɛ a bemba jɩsɩŋ fii arɩ kʋbala nɛ. Ʋ naaŋ yɩrɩŋ nɛ fa Hamʋtal, a ŋaa Jɛrɩmaaya tolo, a lɩɩ Lɩbɩna.

² Ʋ fa ŋaa wʋbɔŋŋɔɔ nɛ La TƖƖNA teeŋ, arɩ Jehoyakim fa sɩ ŋaa ŋɩɩ.

³ La TƖƖNA baanɩŋ fa chaasa sii Jerusalɛm arɩ Juda tinteeŋ nɩaa nyuŋ nɛ kɩŋkɛŋ, ʋ vɩaba ta. Bʋa deeŋ lɛ dɩ Zedikaaya vɩa Babɩlɔŋ kuoro niiŋ.

⁴ Ʋ sɩ dii kuoruŋ ʋ jɩsɩŋ nibi, chɛŋ fii, tapʋl fii lɛ Babɩlɔŋ kuoro Nebukadineza sii kɛsɛ ʋ laalɩyuoroo kala ba kʋ yuo Jerusalɛm. Ba fa ŋmoo buguŋ tabal-la harɩŋ nɛ aŋ saa vaŋkumba a golli tabal-la kɛrɛ ba sɩ jaŋ to jʋʋ tabal-la tʋɔŋ.

⁵ Ba tɔ tabal-la nɩaa hɛ ŋɩɩ nɛ a mʋ yi Zedikaaya kuoruŋ jɩ-fii arɩ kʋbala lɛ.

⁶ Chɛŋ-nɛsɛ tʋɔŋ tapʋl nibi chɛɛŋ, losuŋ faasa jʋʋ tabal-la woruŋ, kʋdiilii kala tuo dɩ ba dii.

⁷ Ŋɩɩ nɛ Babɩlɔŋ laalɩyuoro-la ŋmoo taŋ-la kɛrɛ lo. Zedikaaya arɩ ʋ laalɩyuoroo sii tɩtaŋɩŋ a fá to boi-baal-la sɩ hɛ kɛrɩsɩŋ balɩa pɛgɛ a kpagɛ kuoro ŋmaŋkaaŋ a lɩɩ, arɩ ba dʋndɔŋŋɔɔ fa sɩ golli tabal-la ma kala. Ba fá to Jɔdaŋ fuo-la dɩɩrɩŋ a mʋ.

⁸ Ama Babɩlɔŋ laalɩyuoro-la kire to ba harɩŋ, a mʋ puuba Jeriko tintee-taalɩ-la lɛ, Zedikaaya laalɩyuoroo kala fá pɩsɛ aŋ kaʋ.

⁹ Ba kɛnʋ a kaa mʋ Babɩlɔŋ kuoro teeŋ, taŋ-la ba sɩɩ yɩrɛ Rɩbɩla sɩ hɛ Hamaf tinteeŋ lɛ, Nebukadineza diiu sarɩya, a joŋ cheeriŋ pʋ.

¹⁰ Rɩbɩla lɛ, Babɩlɔŋ kuoro leŋ ba kpʋ Zedikaaya hambolibiisiŋ kala ʋ sɩɩŋ lɛ, a kpʋ Juda tɩntɩnnɩ-hɩasɩŋ ma kala.

¹¹ Ŋɩɩ nɛ ʋ kɔrɩgɔ chaarɛ Zedikaaya ma sɩaa, aŋ hɛʋ kɔlɩɩŋ chɔrʋmɔɔ a lɛrʋ kaa mʋ Babɩlɔŋ. Ba kɛnʋ mʋ tɔ bɩnɩŋ dɩa nɩmɛ, ʋ hɛ nɩmɛ ŋɩɩ a mʋ sʋʋ.

¹² Nebukadineza sɩ dii kuoruŋ, ʋ jɩsɩŋ fii arɩ nibi, chɛŋ nɔŋ, tapʋl-fii lɛ, ŋɩɩ nɛ Nebuzaradaŋ sɩ ŋaa laalɩyuoro-la sɩɩ pɔ kuoro kʋhɩaŋ, aŋ pɛ ŋaa ʋ tɩntɩnnʋ kɔ Jerusalɛm.

¹³ Ʋ sɩ kɔ, ʋ nyɩgɛ Wɩa dɩɩ-bal-la, kuoru dɩa arɩ Jerusalɛm dɩɩsɩŋ kala. Dɩɩ-nyuŋ kala sɩ hɛ nɩmɛ nɛ ʋ nyɩgɛ.

¹⁴ Ŋɩɩ nɛ Nebuzaradaŋ leŋ ʋ laalɩyuoroo ŋmoo kɛrɛ-la ba fa sɩ saa golli Jerusalɛm a lo.

¹⁵ Nebuzaradaŋ sɩ ŋaa nɩalɩŋ sɩɩ pɔ kuoro nɩhɩaŋ kɛsɛ nɩalɩŋ dɔnsʋŋ sɩ faasa summi arɩ nɩalɩŋ kala sɩ ka Jerusalɛm lɛ, arɩ nɩalɩŋ kala sɩ jɩŋ nɩsɩŋ tɩntɩŋŋaa, a kaa mʋ yoŋ-baga a pɛ nɩalɩŋ Nebukadineza fa sɩ laa sɩpaaŋ kɛsɛ mʋ lɛ.

¹⁶ Ama Nebuzaradaŋ leŋ summo-la dɔnsʋŋ nɛ dɩ ba tɩtɩŋ girep tɩɩsɩŋ bagɩsɩŋ lɛ arɩ bagɩsɩŋ dɔnsʋŋ lɛ.

¹⁷ Babɩlɔŋ laalɩyuoro-la ŋmoo kɔlɩɩŋ jebie-la sɩ chɩŋ Wɩa dɩɩ-bal-la sɩpaaŋ giri, a yɛrɛ kɩalɩŋ ba sɩ kɛŋ kɔlɩɩŋ libi ba nagɛ torukoba a kɛŋ naasɩŋ a vɩvɛŋ, a pɛ kɔlɩɩŋ taasɩ-gbaŋ-gugulii-la ba sɩɩ yɩrɛ mʋga lɛ. Ba sɩ yɛrɛ kɩalɩŋ, ba paa kɔlɩɩ-la kala a kaa mʋ Babɩlɔŋ.

¹⁸ Ba fa pɛ paa kɩaa deemba ma kaa viiri nɛ: Puposuŋ, safʋlba, kɩalɩŋ ba sɩ kaa wasɛ chaaŋ ŋmɛnɩŋ tɩta, kʋmɩsɩrɩ gbansɩŋ, gbansɩŋ arɩ kɩalɩŋ dɔnsʋŋ kala ba sɩ kɛŋ kɔlɩɩŋ ŋaa a kaa tɩtɩŋ Wɩa dɩɩ-bal-la lɛ nɛ.

¹⁹ Nebuzaradaŋ fa pɛ paa kɩalɩŋ kala ba sɩ kɛŋ sɛlɩmɛ sɩ chaasa zɔŋ koo hɔpʋla kaa ŋaa nɛ, taasɩ gbansɩŋ, nyiniŋ hɛntɛrɛɛ, kʋmɩsɩrɩ gbansɩŋ, puposuŋ, kɩalɩŋ nyuŋ chaanaa sɩɩ chɩŋ, gbansɩŋ arɩ kʋnyʋalaa gbansɩŋ.

²⁰ Kɔlɩɩ-la Solomoŋ fa sɩ kaa libi jebie-la balɩa sɩ chɩŋ Wɩa dɩɩ-bal-la sɩpaaŋ, kɩalɩŋ sɩ nagɛ torukoba a kɛŋ naasɩŋ a vɩvɛŋ arɩ taasɩ-gbaŋ-gugulii-la ba sɩɩ yɩrɛ mʋga, arɩ kɔlɩɩŋ nɛ-belliŋ fii arɩ balɩa sɩ hɛ ʋ bʋbʋɔŋ, ba fa yʋga kɩɩ magɩsɩŋ nɛ.

²¹ Jebie-la kʋŋkala leŋiŋ fa ŋaa naakieliŋ nibi nɛ. Ʋ jalɩŋ ma ŋaa naakieliŋ bʋlɩdʋ. Ba kʋŋkala barɩmɩŋ fa magɛ neniee banɛsɛ nɛ aŋ kɛŋ bʋa.

²² Kɩalɩŋ ba sɩ kɛŋ kɔlɩɩŋ libi ba nagɛ nyunchuuluŋ a sagɛ jebii-la nyuŋ leŋiŋ ŋaa naakieliŋ bʋlɩa arɩ kpaa magɛ dɔŋɔ nɛ, ba kɛŋ kɔlɩɩŋ ŋaa kɩaa sɩ nagɛ kampoi nɛnɛɛ a kpɩɛra golli. Jebii-la dɔŋɔ ma ba sɩ kɛŋ kɩalɩŋ sɩ nagɛ kampoi nɛnɛɛ kpɩɛrɛ ma nagɛ ŋɩɩ tɩtɩa nɛ.

²³ Kɩalɩŋ sɩ nagɛ kampoi nɛnɛɛ fa ŋaa mahɩŋ banɛsɛ arɩ fɩɩ nɛ sɛsɩ-la lɛ. Kɩalɩŋ sɩ nagɛ kampoi nɛnɛɛ a hɛ kɩalɩŋ ba sɩ kpɩɛra nyuŋ fa ŋaa zɔlɔ nɛ.

²⁴ Nebuzaradaŋ fa pɛ kɛsɛ Sɛraaya sɩ ŋaa Wɩɩsʋllɩ sɩpaalaaraa kʋhɩaŋ nɛ arɩ Zefanaaya ma sɩɩ tɩgɛ ʋ lɛ, arɩ nɩalɩŋ batori sɩɩ pɔ Wɩa dɩɩ-bal-la boyee.

²⁵ Nɩalɩŋ ha sɩ ka tabal-la lɛ, ʋ kɛsɛ nɩhɩaŋ-la sɩɩ beŋ laalɩyuoroo arɩ nɩaa balɩpɛ sɩ bʋl wɩaa chɩchagɩlɛ kuoro. Ʋ fa kɛŋ tɩntɩnnɩ-hɩaŋ-la ma sɩɩ dɩɩsɛ tintee-la nɩaa nɛ, a pɛ ʋ tɩntɩnnɩ dɔnsʋŋ mahɩŋ batori sɩ hɛ tabal-la lɛ.

²⁶ Nɩalɩŋ sɩɩ pɔ kuoro nɩhɩaŋ Nebuzaradaŋ kɛsɛ ba kala a kaa mʋ Babɩlɔŋ kuoro teeŋ Rɩbɩla lɛ.

²⁷ Rɩbɩla tinteeŋ lee-la ba sɩɩ yɩrɛ Hamaf lɛ nɛ kuoro leŋ ba kpʋba. Ŋɩɩ nɛ Juda nɩaa mʋ yoŋ-baga a kagɛ ba tinteeŋ lɛ.

²⁸ Nɩalɩŋ Nebukadineza sɩ kɛsɛ mʋ yoŋ-baga niiŋ nɛ ŋ-la: Ʋ sɩ dii kuoruŋ jɩ-pɛɩ lɛ, ʋ kɛsɛ Juu tɩŋŋaa bʋɩ batori arɩ mara arɩ batori nɛ.

²⁹ Jɩ-fii arɩ chori lɛ, ʋ kɛsɛ nɩaa zɔlɔ chori arɩ mara arɩ fii arɩ balɩa nɛ a lɩɩ Jerusalɛm lɛ.

³⁰ Ʋ jɩsɩŋ mara arɩ batori lɛ, Nebuzaradaŋ sɩ ŋaa nɩalɩŋ sɩɩ pɔ kuoro nɩhɩaŋ kɛsɛ Juu tɩŋŋaa zɔɔ-balɩpɛ arɩ mahɩŋ balɩa arɩ banɔŋ nɛ a kaa mʋ yoŋ-baga. Ba kala fa ŋaa nɩaa bʋɩ banɛsɛ arɩ zɔɔ-balɩdʋ nɛ.

Ba lɩɩsɛ Jehoyachiŋ bɩnɩŋ dɩa lɛ

³¹ Ba fa sɩ kɛŋ Juda tinteeŋ kuoro Jehoyachiŋ tɔ bɩnɩŋ dɩa Babɩlɔŋ lɛ, ʋ jɩsɩŋ mara arɩ fii arɩ balɩpɛ lɛ, ŋɩɩ nɛ baal kʋbala baa yɩrɛ Nɩbɔmʋŋ-Merodak kʋ dii Babɩlɔŋ tinteeŋ kuoruŋ, a leŋ ba lɩɩsɛ Juda kuoro Jehoyachiŋ, chɛŋ fii arɩ balɩa tapʋlaa mara arɩ banɔŋ chɛɛŋ.

³² Evil-Merodak fa kɛŋ Jehoyachiŋ nɛ woruŋ, a pʋ dɩchɩnɩŋ a kɩɩ kuorusu-la dɔnsʋŋ kala ba fa sɩ kɛsɛ tɔ bɩnɩŋ dɩa Babɩlɔŋ lɛ.

³³ Kuoro fa leŋe Jehoyachiŋ wuri ʋ dansarɩka gɛnnɩŋ ta nɛ aŋ lɩlaalɛ ʋ tɩtɩa gɛnnɩŋ, a didii kɩaa kuoro dɩa lɛ tapʋlɩɩ kala.

³⁴ Tapʋlɩɩ kala Babɩlɔŋ kuoro yie pɩ Jehoyachiŋ moribiee nɛ a kaa mʋ yi bʋa-la lɛ ʋ sɩ sʋba.