JƐRƖMAAYA 51 - WƖA TENIŊ

¹ Wɩɩ-la La TƖƖNA sɩ bʋla nɛ ŋ-la: “Bee na, mɩ jaŋ yigi nɩalɩŋ sɩɩ chei leriŋ a hɛ Babɩlɔŋ arɩ nɩalɩŋ sɩ hɔŋ ʋ lɛ.

² Mɩ jaŋ tɩŋ nɩwogusuŋ dɩ ba mʋ Babɩlɔŋ a chei ʋ tinteeŋ kala a paa chaarɛ. Ba jaŋ chɩŋ ʋ lɛ sɛmɛ na-kala tapʋlɩɩ-la wʋlɔrʋŋ sɩ jaŋ jʋʋ-ʋ.

³ Má sɩ́ leŋe dɩ to-yuoro wuo lɛrɛ ʋ toŋ hɛ, má sɩ́ leŋe dɩ ʋ wuo laalɛ bayuori kɩaa. Má sɩ́ ʋ bapʋɔsaa kʋŋkala leŋ. Má chei ʋ laalɩyuoroo kala gbelem gbelem.

⁴ Ba jaŋ tele sʋʋ Babɩlɔŋ lɛ, a chaasa bolimi woruŋ ʋ womporunuŋ lɛ.

⁵ Mɩ-na ma TƖƖNA Wɩa, doluŋ kala Tɩɩna, bɩ Iziral tɩŋŋaa arɩ Juda nɩaa vɩa ta, arɩ ba sɩ ŋaa wʋbɔŋŋɔɔ mɩ-na ba Iziral tɩŋŋaa Wɩa sɩ bɩ disiniŋ kɛnɛ sɩpaaŋ, ba tinteeŋ kala lɛ.

⁶ Má fá lɩɩ Babɩlɔŋ lɛ. Má fá a laa ma mɩɩsɩŋ. Má sɩ́ ma tɩtɩa chei a tɩŋ ʋ wʋbɔŋŋɔɔ wɩaa. Bʋa-la yie nɛ dɩ mɩ-na ma TƖƖNA joŋ mɩ baanɩŋ tiŋ ʋ lɛ, mɩ jaŋ dɔgɩsʋ ŋɩɩ sɩ maga.

⁷ Babɩlɔŋ fa nagɛ sɛlɩmɛ nyʋnyʋala nɛ mɩ nɩsɩŋ lɛ. Mɩ leŋe dʋnɩa nɩaa kala nyʋa ʋ tʋɔŋ nɛ a bugi. Tinteyee nɩaa nyʋa ʋ tʋɔŋ sɩnɩŋ nɛ a bugi. Ŋɩɩ leŋ ba nyuŋ viiri.

⁸ Babɩlɔŋ jaŋ guu tel a bori. Má yel ʋ lɛ. Má chɛ daalusuŋ a hɛ ʋ lere-la sɩɩ wɩɩ, kapo ʋ jaŋ wuo duori.

⁹ Nɩwogusu-la sɩ hɛ nɩmɛ sɩ, ‘La fa jaŋ sɛɩ a vaarɛ Babɩlɔŋ, ama ʋ bɩ jaŋ wuo duori. Má leŋ la leŋu aŋ ka dɩ la kʋŋkala mʋ la tinteeŋ, bɛɛ wɩaa ʋ wɩɩŋ jɩla tɩgɛ wɩa-nyuŋ nɛ, a yi duoŋ-bɩlɩmbaanaa.’ ”

¹⁰ Mɩ nɩaa, má ŋaa goŋ, La TƖƖNA daga arɩ la kɩaa sɩma nɛ. Má kɔ dɩ la bʋlʋ Zaayɔŋ lɛ, wɩɩ-la La TƖƖNA Wɩa sɩ ŋaa.

¹¹ Má taa ma to-hɛŋŋɛɛ, aŋ paa ma hɔɔtaalɩ-la ma sɩ kaa kɛrɛɛ laa bayuori hɛŋŋɛɛ. La TƖƖNA yigi Media tɩŋŋaa kuoroo hɛ nɛ, bɛɛ wɩaa ʋʋ chɛ ʋ chei Babɩlɔŋ nɛ. La TƖƖNA jaŋ joŋ ʋ baanɩŋ tiŋ ʋ lɛ a tɩŋ ʋ dɩɩ-bal-la wɩaa.

¹² Má kɛŋ tuuta je dɩ ba mʋ ŋmoo kɛrɛ-la sɩ golli Babɩlɔŋ a lo. Má leŋ dɩ laalɩyuoro-la sɩɩ pɔ leriŋ faasa yʋgɛ, a chɩŋ ba dɩchɩnaa a bibeŋ. Má leŋ dɩ laalɩyuoro faa a pɔ. La TƖƖNA jaŋ ŋaa wɩalɩŋ ʋ sɩɩ chɛ ʋ ŋaa, wɩalɩŋ ʋ sɩ daga arɩ ʋ jaŋ ŋaa Babɩlɔŋ nɩaa lɛ.

¹³ Ma Babɩlɔŋ nɩaa hɔŋ lee-la sɩ kɛŋ fuonuŋ yʋga nɛ, a kɛŋ kɩaa yʋgɛ woruŋ. Ma dɩdɛrɩŋ kɔ nɛ, bʋa-la lɛ sɩ maga dɩ ba kpʋma.

¹⁴ La TƖƖNA doluŋ kala Tɩɩna ŋmɩɛsɛ ʋ tɩtɩa: Mɩ jaŋ leŋ dɩ ma tasɩŋ su arɩ nɩaa, a nagɛ hɔbɩ-laalɩŋ. Ba jaŋ ŋaa laalɩyuori diiri goŋ ma nyuŋ.

¹⁵ Wɩa kɛŋ ʋ doluŋ nɛ a ŋaa tinteeŋ, a kɛŋ ʋ wʋjɩmɩŋ ma a ŋaa dʋnɩa. Ʋ sɩ jɩŋ wɩaa sɩaa ma lɛ nɛ ʋ to a ŋaa wɩa-nyuŋ a leŋ ʋ jɛrɛ.

¹⁶ Dɩ ʋ nɛ kpɩa goŋ, lɩɩ-la sɩ hɛ wɩa-nyuŋ yie huuri nɛ. Ʋ yie leŋ duoŋ-bɩlɩmbaanaa lɩɩ dʋnɩa dɩdɛrɩŋ a kʋ hɛ dɔŋɔ. Ʋ leŋ duonuŋ nɩnɩɩ, aŋ lɩlɩgɩsɛ, a leŋ peliŋ ma lɩɩ ʋ lee-la lɛ ʋ sɩ bilu a lulu.

¹⁷ Nʋʋkala chʋʋla nɛ a bɩ wʋjɩmɩŋ kɛnɛ. Hɩɩsɩŋ dii nɩalɩŋ sɩ kɛŋ sɛlɩmɛ libi tɔŋŋɔɔ nɛ, bɛɛ wɩaa ba tɔmɔ-la bɩ wʋtɩtɩɩ kɛnɛ, ba bɩ wiese kɛnɛ.

¹⁸ Ba bɩ bʋbʋa kala kɛnɛ. Ba ŋaa kɩaa sɩ kɛŋ mɔmʋŋ nɛ. Dɩ ba sarɩya diiniŋ tapʋlʋŋ nɛ yie, ba jaŋ cheiba.

¹⁹ Jekɔb Wɩa-na bɩ ba naga. Ʋ nɛ ŋaa kʋŋkala, aŋ lɩɩsɛ Iziral tɩŋŋaa ba ŋaa ʋ nɩaa. Ʋ yɩrɩŋ nɛ La TƖƖNA doluŋ kala Tɩɩna.

²⁰ La TƖƖNA sɩ, “Babɩlɔŋ, ŋ nɛ mɩ laalɩŋ toŋguluŋ, mɩ laalɩyuori kʋa. Ŋ nɛ mɩ jaŋ kaa ŋmoo tinteyee pɩsɛ, ŋ nɛ mɩ kaa chei kuori-gentisiŋ.

²¹ Ŋ nɛ mɩ kaa ŋmoo janɩŋ arɩ ja-jɩllaa pɩsɛ, ŋ nɛ mɩ kaa ŋmoo laalɩŋ janɩŋ torukoba arɩ nɩalɩŋ sɩ kɛmba vɩvɛŋ a pɩsɛ.

²² Ŋ nɛ mɩ kaa ŋmoo baalaa arɩ haalaa pɩsɛ, ŋ nɛ mɩ kaa ŋmoo banɩhɩasɩŋ arɩ bapʋɔsaa a pɩsɛ, ŋ nɛ mɩ kaa ŋmoo hambolibiisiŋ arɩ hantolibiisiŋ pɩsɛ.

²³ Ŋ nɛ mɩ kaa ŋmoo pie-daaraa arɩ ba piesee pɩsɛ, ŋ nɛ mɩ kaa ŋmoo paara arɩ ʋ nɛ-pɛrɛɛ a pɩsɛ. Ŋ nɛ mɩ kaa ŋmoo tinteyee nɩhɩasɩŋ arɩ ba tɩntɩnnɩ-hɩasɩŋ a pɩsɛ.”

²⁴ La TƖƖNA sɩ, “Ma sɩɩŋ lɛ mɩ jaŋ mɩɩra tiŋ Babɩlɔŋ arɩ nɩalɩŋ kala sɩ hɛ ʋ lɛ, a tɩŋ ba sɩ ŋaa wɩalɩŋ kala sɩ bɩ zɔŋ Zaayɔŋ lɛ.

²⁵ Mɩ chɩŋ ŋ-na Babɩlɔŋ lɛ nɛ, ŋ nagɛ peeliŋ nɛ a chei nɩaa. Ŋ chei dʋnɩa kala nɛ. Mɩ jaŋ lɩɩsɛ nɩsɩŋ a liesiŋ, a bilimiŋ ta peel-la nyuŋ, a leŋ dɩ ŋ dii nyiniŋ.

²⁶ Ba bɩ jaŋ joŋ tabɩɩ kala ŋ lɛ a kaa bil je-gʋnʋŋ tiebiiŋ, koo a kaa bil dɩa gentine, bɛɛ wɩaa ŋ jaŋ pɩŋ hoi a kaa mʋ wuu. Mɩ-na ma TƖƖNA nɛ bʋla.

²⁷ Má kɛŋ tuuta je tintee-la lɛ. Má ŋmʋʋ banyilliŋ tinteyee lɛ. Má leŋ dɩ tinteye-la nɩaa ŋaa siri a yuo Babɩlɔŋ. Má yɩrɛ kuori-gentisiŋ deemba kala hɛ ʋ lɛ: Ararat, Mini arɩ Asɩkɛnas. Má lɩɩsɛ laalɩyuori-hɩaŋ dɩ ʋ laa nɩalɩŋ sɩpaaŋ dɩ ba mʋ yuou. Má leŋ dɩ janɩŋ mʋ ʋ lɛ a nagɛ hɔbɩ-laalɩŋ.

²⁸ Má leŋ dɩ tinteye-la ŋaa siri a mʋ yuou: Media kuoroo, ba tinteyee nɩhɩasɩŋ arɩ ba tɩntɩnnɩ-hɩasɩŋ kala, arɩ tinteye-la kala ba sɩɩ beŋ.

²⁹ Fawʋllʋŋ kɛŋ dʋnɩa nɩaa nɛ ba chichel, bɛɛ wɩaa wɩɩ-la mɩ-na ma TƖƖNA sɩɩ chɛ dɩ mɩ ŋaa Babɩlɔŋ nɩaa lɛ chɩna nɛ. Mɩ jaŋ leŋ dɩ Babɩlɔŋ tinteeŋ pɩŋ hoi, dɩ nʋʋkala sɩ nɩmɛ hɛ.

³⁰ Babɩlɔŋ laalɩyuori babiibalaa leŋ yuosuŋ nɛ. Ba ka ba dɩ-duoruŋ lɛ nɛ. Ba doluŋ dɛrɛ nɛ. Ba mɩɩra nagɛ haalaa nɛ. Ba chol nyiniŋ hɛ ʋ d-jʋʋlaa kala lɛ nɛ. Ba bori ʋ boi-baalaa doloo kala nɛ.

³¹ Tɩndaaraa paa puu dɔŋɔ nɛ, dɩ ba mʋ heele pa Babɩlɔŋ kuoro arɩ ba yuo dii ʋ tabalɩŋ kala nɛ.

³² Ba laa lere-la kala ba sɩ to chuchol ba fuonuŋ nɛ, a nyɩgɛ ba ya-lugunuŋ kala, fawʋllʋŋ kɛŋ ba laalɩyuoroo.”

³³ Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: “Ba jaŋ ŋmoo Babɩlɔŋ a nagɛ ba sɩɩ ŋmoo mɩaa ŋɩɩ taha lɛ, bʋa-la yie nɛ dɩ ba ŋaaʋ ŋɩɩ.”

³⁴ Babɩlɔŋ kuoro Nebukadineza paala liŋ nɛ. Ʋ leŋe la bɩ jɩŋ wɩɩ-la tʋɔŋ la sɩ hɛ. Ʋ leŋe la nagɛ pupo-wuoluŋ nɛ. Ʋ paala liŋ nɛ a nagɛ dɩmɩŋ, a vɔgɛ, aŋ nyɛ ta.

³⁵ Zaayɔŋ nɩaa jaŋ bʋl, “Leŋ dɩ dol-la kala Babɩlɔŋ nɩaa sɩ die la lɛ chɩmɩŋ tiŋ ba lɛ.” Jerusalɛm nɩaa ma jaŋ bʋl, “Leŋ dɩ la chal-la kala sɩ jaasa chɩmɩŋ tiŋ Babɩlɔŋ nɩaa lɛ.”

³⁶ Ŋɩɩ wɩaa, wɩɩ-la La TƖƖNA sɩ bʋla nɛ ŋ-la: “Mɩ jaŋ chɩŋ ma harɩŋ a joŋ ma chɩmɩŋ tiŋ ba lɛ. Mɩ jaŋ leŋ dɩ ʋ mʋgʋ-balɩŋ lɩɩŋ hʋ, aŋ leŋ dɩ ʋ lɩɩ-bul-sɩaa ma hɩl.

³⁷ Babɩlɔŋ jaŋ pɩŋ jikpeeŋ a nagɛ pupuluŋ, a bɩrɩmɛ jolluŋ dɩjʋʋlʋŋ, a kɛŋ fawʋllʋŋ dɩ nɩaa sisieri ʋ lɛ. Nʋʋkala bɩ jaŋ hɛ nɩmɛ.

³⁸ Ʋ nɩaa kala ka huosi nɛ a nagɛ naachigi-pɔrɔɔ. Baa huosi nɛ a nagɛ naachigi-biiriŋ.

³⁹ Ama ba jaŋ sisii, dɩ mɩ ŋaa kʋdiilee arɩ kʋnyʋalaa a pɩba a leŋ dɩ ba bugi, dɩ ŋɩɩ leŋ dɩ ba mɔmɔ ŋɩŋaa goŋ, a pɩŋ a kaa mʋ wuu a bɩ sii. Mɩ-na ma TƖƖNA nɛ bʋla.

⁴⁰ Mɩ jaŋ kɛmba kaa mʋ dɩ-kpʋʋlʋŋ a nagɛ pie-biisiŋ, a nagɛ pie-belliŋ arɩ bʋʋnaa.

⁴¹ Ba jaŋ yuo dii Babɩlɔŋ, tabal-la dʋnɩa nɩaa kala sɩɩ bɛsɛ ʋ lɛ, ba jaŋ yuo laaʋ. Babɩlɔŋ jaŋ mɩɩra bɩrɩmɛ kʋlɔrʋ tinteyee tʋɔŋ.

⁴² Mʋgʋ-balɩŋ jaŋ pɛllɛ tɔ Babɩlɔŋ. Ʋ lɩɩ-peliŋ jaŋ tɔʋ.

⁴³ Ʋ tasɩŋ jaŋ pɩŋ hoi, a ŋaa tintee-hɩlɩɩ, ʋ jaŋ ŋaa tintee nʋʋkala sɩ bɩ jaŋ hɔŋ. Nʋʋkala bɩ jaŋ to nɩmɛ bal.

⁴⁴ Mɩ jaŋ dɔgɩsɛ vene-la ba sɩɩ yɩrɛ Bɛl sɩ hɛ Babɩlɔŋ lɛ, a leŋ dɩ ʋ lusi kɩalɩŋ kala ʋ sɩ liŋe. Tinteyee nɩaa bɩra bɩ jaŋ kpaarʋ, Babɩlɔŋ kɛrɛ jaŋ tel.

⁴⁵ Mɩ nɩaa, má kʋ lɩɩ ʋ lɛ. Má fá laa ma mɩɩsɩŋ. Má fá a laa ma tɩtɩa mɩ-na ma TƖƖNA sɩ faasa na baaŋ-la lɛ.

⁴⁶ Má sɩ́ leŋe dɩ ma nandaasɩŋ yʋɔrɛ koo dɩ fawʋllʋŋ kɛmma, dɩ ma nɛ nɩɩ ba-sɩ tintee-la lɛ. Ma jaŋ nɩɩ ba-sɩ jɩna deeŋ, jɩna dɔŋɔ ma dɩ ma bɩra nɩɩ ba-sɩ, a mʋ tɩgɛ yuosuŋ sɩ hɛ tintee-la lɛ, arɩ sɩpaalaaraa sɩɩ yuo dɔŋɔ.

⁴⁷ Bʋa kʋbala sɛnɛ jaŋ kɔ, dɩ mɩ dɔgɩsɛ Babɩlɔŋ tɔŋŋɔɔ. Mɩ jaŋ hɛ Babɩlɔŋ tinteeŋ kala hɩɩsɩŋ. Ʋ nɩalɩŋ mɩ sɩ jaŋ kpʋ jaŋ pɩŋ ʋ tinteeŋ lɛ.

⁴⁸ Wɩa-nyuŋ arɩ tinteeŋ arɩ kɩalɩŋ kala sɩ hɛ ba lɛ jaŋ ŋaa goŋ arɩ tʋɔtɔrʋŋ Babɩlɔŋ nyuŋ, bɛɛ wɩaa laalɩyuoroo sɩɩ chei leriŋ jaŋ lɩɩ wɩɩpɔsʋŋ nagʋa a kʋ yuou. Mɩ-na ma TƖƖNA nɛ bʋla.

⁴⁹ Babɩlɔŋ tɩŋŋaa kpʋ dʋnɩa nɩaa a yʋgɛ nɛ ama lɛɛlɛ Babɩlɔŋ jaŋ tel a tɩŋ ba sɩ kpʋ Iziral tɩŋŋaa wɩaa.”

⁵⁰ La TƖƖNA bʋla pɩ ʋ nɩalɩŋ sɩ hɛ Babɩlɔŋ lɛ, “Ma nɩalɩŋ sɩ foro laalɩŋ lɛ, má lɩɩ, ma sɩ́ dienu. Ma hɛ dɩ-bolii nɛ, ama má liisi mɩ-na ma TƖƖNA wɩaa a bɩɩnɛ Jerusalɛm ma wɩaa.

⁵¹ Ma sɩ, ‘Ba hɩɩsɛla nɛ, a tʋʋsɛla, a leŋ la dii hɩɩsɩŋ bɛɛ wɩaa nɩwogusuŋ jʋʋ La TƖƖNA dɩɩ-balɩŋ lee-la sɩ bɩ disiniŋ kɛnɛ.’

⁵² Ama mɩ sɩ bʋa dɔŋ ka kɔ nɛ, mɩ jaŋ chei tɔmɔ-la kala sɩ hɛ Babɩlɔŋ tinteeŋ, ʋ tinteeŋ kala lɛ, dɩ nɩalɩŋ sɩ bolimo huhuuni. Mɩ-na ma TƖƖNA nɛ bʋla.

⁵³ Dɩ Babɩlɔŋ nɛ paala waa a jɩlaa tɩgɛ wɩa-nyuŋ ma, a saa kɛrɛ golli ʋ dɩ-duoruŋ ma, mɩ jaŋ yigi laalɩyuoroo sɩɩ chei leriŋ a hɛ ʋ lɛ. Mɩ-na ma TƖƖNA nɛ bʋla.

⁵⁴ Nɩaa nɩɩ ŋmoo niiŋ Babɩlɔŋ lɛ, baa yel Babɩlɔŋ tinteeŋ sɩ chaasa chei wɩaa nɛ.

⁵⁵ Mɩ-na ma TƖƖNA jaŋ chei Babɩlɔŋ. Mɩ jaŋ leŋ dɩ ʋ goŋ pɛɩ-la kala lɛl. Ba dʋndɔŋŋɔɔ jaŋ kɔ ba lɛ a nagɛ lɩɩ-balɩŋ sɩ pɛllɛɛ kɔ. Ba jaŋ ŋaa goŋ, dɩ goŋ-la huhuuri.

⁵⁶ Laalɩyuoro-la sɩɩ chei leriŋ jaŋ kɔ Babɩlɔŋ lɛ. Ʋ jaŋ yuo kɛsɛ Babɩlɔŋ laalɩyuoroo, a bori ba tosuŋ. Mɩ-na ma TƖƖNA Wɩa nɩɩ tiŋ wʋbɔŋ ŋaaraa chɩmɩŋ, mɩ jaŋ timba ŋɩɩ sɩ maga.

⁵⁷ Mɩ jaŋ ŋaa dɩ ʋ tɩntɩnnɩ-hɩasɩŋ arɩ ʋ wʋjɩnnaa kala bugi, a pɛ ʋ tinteeŋ nɩhɩasɩŋ lɛ, ʋ tɩntɩnnaa arɩ ʋ laalɩyuoroo. Ba jaŋ pɩŋ doŋ a kaa mʋ wuu, ba bɩra bɩ jaŋ sii. Mɩ-na ma TƖƖNA doluŋ kala Tɩɩna sɩ ŋaa kuoro nɛ bʋla.”

⁵⁸ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Babɩlɔŋ kɛrɩ-barɩŋ-la kala jaŋ pɩŋ tinteeŋ dɩ nyiniŋ dii ʋ boi-baala-la kala sɩ leŋie. Nɩalɩŋ lɔlɔ ta pɛɩ nɛ, tɩntɩmɩɩ-la kala ba sɩ tɩma nagɛ nyiŋgeliŋ sɩ belime ta nɛ.”

⁵⁹ Tɩndaarɩɩ-la Jɛrɩmaaya sɩ joŋo pɩ tɩntɩnnɩ-hɩaŋ Sɛraaya, Neria nanʋala sɩ ŋaa Maasɛya nihiŋ nɛ ŋ-la, bʋa-la lɛ ʋ dɩ Juda kuoro Zedikaaya sɩ mʋ Babɩlɔŋ tinteeŋ, dɩ Zedikaaya sɩ dii kuoruŋ ʋ jɩ-nɛsɛ lɛ nɛ ŋɩɩ.

⁶⁰ Jɛrɩmaaya fa ŋmʋnsɛ wʋlɔrʋnʋ-la kala sɩ jaŋ ŋaa Babɩlɔŋ lɛ a hɛ teniŋ tʋɔŋ nɛ, wɩalɩŋ kala ba sɩ ŋmʋnsa tɩgɛ Babɩlɔŋ lɛ.

⁶¹ Ŋɩɩ nɛ ʋ bʋla pɩ Sɛraaya, “Dɩ ŋ nɛ mʋ Babɩlɔŋ, hɛ doluŋ aŋ chaasa karɩmɛ wɩalɩŋ dɩ ba lɩɩ,

⁶² aŋ bʋl, ‘Ou La TƖƖNA, ŋ sɩ ŋ jaŋ chei leriŋ deeŋ, dɩ nuhuobiiŋ koo pʋna sɩ́ nɩmɛ hɛ. Ŋ sɩ ʋ jaŋ pɩŋ hoi a kaa mʋ wuu.’

⁶³ Dɩ ŋ nɛ karɩmɛ teŋ-la dɛrɛ, joŋ tabɩɩŋ vɔɔ mɛrɛ ʋ lɛ a joŋo yuo hɛ Yufireti fuo-la lɛ,

⁶⁴ aŋ bʋl, ‘Ŋɩɩ nɛ Babɩlɔŋ jaŋ tuu lɩɩŋ bʋbʋɔŋ, ʋ bɩra bɩ jaŋ sii a tɩŋ wʋlɔrʋ-la La TƖƖNA sɩ jaŋ kaa kʋ hɛ ʋ lɛ wɩaa. Ʋ nɩaa kala jaŋ tel.’ ” Jɛrɩmaaya wɩaa dɩdɛrɩŋ nɛ ŋ-la.