JƐRƖMAAYA 49 - WƖA TENIŊ

Wɩɩ-la La TƖƖNA sɩ bʋla tɩgɛ Amɔŋ tinteeŋ lɛ

¹ Wɩalɩŋ sɩ mʋ tɩgɛ Amɔŋ tɩŋŋaa lɛ nɛ ŋ-la: Wɩɩ-la La TƖƖNA sɩ bʋla nɛ ŋ-la: “Iziral bɩ hambolibiisiŋ kɛnɛɛ? Ʋ bɩ nɩalɩŋ sɩ jaŋ dii ʋ dʋa kɛnɛɛ? Bɛɛ nɛ saa tɩɩ vene-la ba sɩɩ yɩrɛ Mɔlɛk laa Gad tinteeŋ? Bɛɛ nɛ tɩɩ ʋ nɩaa hɔŋ Gad tasɩŋ lɛ?

² Ama tapʋlaa ka kɔ nɛ, dɩ mɩ ŋaa laalɩyuori goŋ ma Mʋab tɩŋŋaa tabalɩŋ Raba nyuŋ. Ʋ jaŋ bɩrɩmɛ jikpeeŋ, ka dɩ ba nyɩgɛ tabiisi-la kala sɩ gollu. Ŋɩɩ nɛ Iziral tɩŋŋaa ma jaŋ kiri nɩalɩŋ fa sɩ kiriba ta, mɩ-na ma TƖƖNA nɛ bʋla.

³ Ou Hɛsɩbɔŋ, ŋmoo niiŋ, bɛɛ wɩaa ba chei Aɩ nɛ. Nɩalɩŋ sɩ hɛ Raba lɛ, má ŋmoo niiŋ. Má laalɛ tʋɔ-chei gɛnnɩŋ a yel. Má fá bɩbaarɛ taŋ-la tʋɔŋ, bɛɛ wɩaa ba jaŋ joŋ ma vene-la ba sɩɩ yɩrɛ Mɔlɛk a mʋ yoŋ-baga, a pɛ nɩalɩŋ sɩɩ kpaarʋ lɛ arɩ ʋ tɩntɩnnɩ-hɩasɩŋ lɛ.

⁴ Bɛɛ nɛ tɩɩ ma bibigisi ma doluŋ lɛ? Ma doluŋ ka dɛrɛ nɛ. Ma ŋaa nɩa sɩ bɩ wʋtɩtɩɩ kɛnɛ nɛ. Ma joŋ ma yɩɛlaa hɛ ma kɩaa lɛ nɛ aŋ bʋl, ‘Kʋbɛɛ nɛ jaŋ wuo yuola?’

⁵ Mɩ jaŋ leŋ dɩ nɩalɩŋ sɩ hɔnɔ gollima fawʋllʋŋ kɛmma. Mɩ-na ma TƖƖNA doluŋ kala Tɩɩna nɛ bʋla. Ba jaŋ kiri ma kala ta. Nʋʋkala bɩ jaŋ kɛŋ nɩalɩŋ sɩ fa pɩsɛ kʋ hɛ dɔŋɔ.

⁶ Ama ŋɩɩ harɩŋ, mɩ jaŋ leŋ dɩ Amɔŋ tɩŋŋaa bɩra dʋa, mɩ-na ma TƖƖNA nɛ bʋla.”

Wɩɩ-la La TƖƖNA sɩ bʋla tɩgɛ Ɛdɔm tinteeŋ lɛ

⁷ Wɩɩ-la La TƖƖNA doluŋ kala Tɩɩna sɩ bʋla a tɩgɛ Ɛdɔm lɛ nɛ ŋ-la: “Wʋjɩnnʋ kala bɩra tuo Tɛmaŋ lɛɛ? Wʋjɩnnʋ bɩra tuo a bʋl wɩaa chɩchagɩlɛ nɩaa? Ba wʋjɩmɩŋ dɛrɛ nɛɛ?

⁸ Má mɩɩrɛ a faasa fá, a mʋ faa bʋ-bʋɔsʋŋ sɩ luŋie lɛ, ma nɩalɩŋ sɩ hɛ Dɛdaŋ lɛ, bɛɛ wɩaa, mɩ jaŋ kɛŋ wʋlɔrʋŋ kʋ hɛ Ɛsɔ lɛ bʋa-la lɛ mɩ sɩ jaŋ dɔgɩsʋ.

⁹ Dɩ nɩalɩŋ sɩɩ tɔrɛ girep nɛnɛɛ nɛ kɔ ŋ leriŋ, ba bɩ jaŋ tɔrɛ aŋ ka nɛnɛɛ mʋa? Dɩ gaaraa nɛ kɔ tɩtaŋɩŋ, kɩaa magɛ ŋɩɩ ba sɩɩ chɛ dee ba jaŋ gaa?

¹⁰ Ama mɩ-na jaŋ gbegisi Ɛsɔ, ka dɩ ʋ kɛŋ yarɩ-biree. Mɩ jaŋ suri lee-la ʋ sɩɩ faa, dɩ ʋ bɩra sɩ́ ʋ tɩtɩa wuo kaa faa. Ʋ biiriŋ, ʋ naambiiriŋ arɩ nɩalɩŋ sɩ jʋʋ kpɩkpagʋ kala jaŋ sʋʋ, dɩ ʋ doho kala dɛrɛ.

¹¹ Má leŋ ma biisinsiŋ pɩmɛ, mɩ jaŋ pɔba. Ma yo-haalaa ma jaŋ wuo joŋ ba yɩɛlaa hɛ mɩ lɛ.”

¹² Wɩɩ-la La TƖƖNA sɩ bʋla nɛ ŋ-la: “Dɩ nɩalɩŋ sɩ bɩ maga dɩ ba dɔgɩsɛba nɛ ba dɔgɩsɛ, bɛɛ nɛ tɩɩ ma-na jaŋ mʋ pɛɩ? Ma bɩ jaŋ mʋ pɛɩ, ma jaŋ na hɛɛ-la sɩ maga ma na.

¹³ Mɩ-na ma TƖƖNA sɩ: Mɩ ŋmɩɛsɛ mɩ tɩtɩa, Bozira jaŋ pɩŋ jikpeeŋ a bɩrɩmɛ mɔmɩɩ dɩ nɩaa sisieri ʋ lɛ, dɩ nɩaa naʋ, dɩ fawʋllʋŋ kɛmba dɩ ba hihirigi a kɛŋ ʋ yɩrɩŋ ŋmɩɛsa hɩhɛ nɩaa lɛ. Ʋ tasɩŋ kala jaŋ pɩŋ jikpeeŋ a kaa mʋ wuu.”

¹⁴ Mɩ nɩɩ wɩɩ nɛ a lɩɩ La TƖƖNA teeŋ: Ʋ tɩŋ nʋʋ nɛ dɩ ʋ mʋ tinteyee nɩaa teeŋ a bʋl, “Má kʋ hɛ dɔŋɔ a yuo Ɛdɔm. Má sii yuo laalɩŋ.”

¹⁵ La TƖƖNA sɩ, “Lɛɛlɛ mɩ jaŋ leŋ dɩ ma muuri tinteyee tʋɔŋ, dɩ nɩaa bee gʋgʋʋnɛ ma.

¹⁶ Fawʋllɩɩ-la ma sɩ joŋo hɛ nɩaa lɛ arɩ ma babii-ballɩɩ-la nyɩsɛma nɛ. Ma hɛ bʋsʋŋ nyu-gbaŋa nɛ, a hɔŋ dundolluŋ nyuŋ. Ma hɛ wɩa-nyuŋ dɩ-bolii ma nɛ a nagɛ kachuuŋ, ama mɩ jaŋ lɛrɛma lɩɩ nɩmɛ a kʋ tʋʋ. Mɩ-na ma TƖƖNA nɛ bʋla.

¹⁷ Ɛdɔm jaŋ bɩrɩmɛ kʋŋ sɩ kɛŋ fawʋllʋŋ, dɩ nɩaa na a hihirigi. Ʋ wɩaa jaŋ kperi nɩalɩŋ kala sɩ to nɩmɛ bɩbal, dɩ ba sisieri ʋ lɛ a tɩŋ ŋɩɩ ba sɩ cheyu.

¹⁸ A nagɛ Wɩa sɩ chei Sodom arɩ Gomora ŋɩɩ, a pɛ tasɩ-la sɩ kpagɛ ba lɛ, ŋɩɩ nɛ jaŋ ŋaa Ɛdɔm lɛ, dɩ nʋʋkala sɩ́ nɩmɛ hɛ. Nʋʋkala bɩ jaŋ hɔŋ nɩmɛ. Mɩ-na ma TƖƖNA nɛ bʋla.

¹⁹ A nagɛ naachigiŋ sɩ lɩɩ Jɔdaŋ duuŋ tʋɔŋ a kʋkɔ a mʋmʋ pʋsʋŋ dɩ-diiliŋ sɩ kɛŋ ya-zɔmʋŋ, mɩ jaŋ kɔ a guu kiri Ɛdɔm tɩŋŋaa ba tinteeŋ lɛ. Kʋbɛɛ nɛ mɩ jaŋ lɩɩsɛ dɩ ʋ ŋaa wɩɩŋ deeŋ? Kʋbɛɛ nɛ nagɛmɛ a jaŋ wuo magɩsɛmɛ? Sɩpaalaarɩ bɛɛ nɛ jaŋ wuo kɛŋ ʋ tɩtɩa magɩsɛmɛ?”

²⁰ Ŋɩɩ wɩaa, má jegile nɩɩ wɩɩ-la La TƖƖNA sɩ bɩɩna tɩgɛ Ɛdɔm lɛ arɩ wɩɩ-la ʋ sɩ bɩɩna dɩ ʋ ŋaa nɩalɩŋ sɩ hɛ Tɛmaŋ lɛ: Ba jaŋ kɛsɛ ba biiriŋ a lɛrɛ viiri. Ʋ jaŋ chei ba pʋsʋŋ dɩ-diiliŋ gbelem gbelem a tɩŋ ba wɩaa.

²¹ Dɩ Ɛdɔm nɩaa nɛ tele, ba dɔmɔ jaŋ leŋ dɩ dʋnɩa jigisi. Ba yele jaŋ mʋ huuri Mʋgʋ-fɩaŋ lɛ.

²² Dʋndɔmɔ jaŋ kʋ tuu ba lɛ a nagɛ kachuuŋ a kɛŋ kɩŋkɛnsɩŋ jɛrɛ tɔ Bozira lɛ. Tapʋlɩɩ-la Ɛdɔm laalɩyuoroo bɔyɛ jaŋ joŋ a nagɛ haala sɩɩ chɛ dɩ ʋ lʋl ʋ bɔyɛ jujoŋ ŋɩɩ.

Wɩɩ-la ba sɩ bʋla a mʋ tɩgɛ Damasɩkʋs lɛ

²³ Wɩɩ-la La TƖƖNA sɩ bʋla tɩgɛ Damasɩkʋs lɛ nɛ ŋ-la: “Hamaf arɩ Apadɩ tʋɔŋ cheye nɛ bɛɛ wɩaa ba nɩɩ wʋbɔŋ nɛ. Ba tʋɔŋ kala vʋgʋma nɛ a nagɛ mʋgʋ-balɩŋ sɩɩ vuugu.

²⁴ Damasɩkʋs pʋgʋma nɛ, ʋ mɩɩra dɩ ʋ fá nɛ. Fawʋllʋŋ kɛnʋ nɛ. Tʋɔ-cheeŋ arɩ hɛɛŋ jʋʋ-ʋ nɛ, a wʋwɩɩ ʋ lɛ a nagɛ haala sɩɩ chɛ ʋ lʋl ʋ luoruŋ wʋwɩɩ.

²⁵ Bɛɛ nɛ tɩɩ ba vɩa tabal-la sɩ kɛŋ yɩrɩŋ ta, taŋ-la nyuŋ mɩ tʋɔŋ sɩ tɔrɔ?

²⁶ Wʋtɩtɩɩ, ʋ bapʋɔsaa jaŋ sʋʋ womporunuŋ lɛ. Ba jaŋ kpʋ ʋ laalɩyuoroo kala tapʋlɩɩ-la. Mɩ-na ma TƖƖNA doluŋ kala Tɩɩna nɛ bʋla.

²⁷ Mɩ jaŋ chol nyiniŋ hɛ Damasɩkʋs jeyee lɛ. Nyiŋ-la jaŋ dii Bɛŋ-Hadad dɩɩ-duoruŋ.”

Wɩɩ-la La TƖƖNA sɩ bʋla tɩgɛ Kɛda arɩ Hazɔ lɛ

²⁸ Wɩɩ-la La TƖƖNA sɩ bʋla tɩgɛ Kɛda arɩ Hazɔ kuori tinteyee lɛ, ba nɛ Babɩlɔŋ kuoro Nebukadineza yuo ŋɩɩ. Wɩɩ-la La TƖƖNA sɩ bʋla nɛ ŋ-la: “Má sii a yuo Kɛda a chei nɩalɩŋ sɩ hɛ wɩɩpɔsʋŋ dɩɩrɩŋ.

²⁹ Má laa ba piesee arɩ ba lɛŋŋɛɛ, ba lɛŋŋɛɛ patɩɩsamba arɩ ba kɩaa. Má laa ba bʋntaŋŋaba. Má ŋaa goŋ a bʋla pɩba, ‘Fawʋllʋŋ hɛ lee-kala nɛ.’

³⁰ Má faasa fá lɩma a viiri. Má mʋ hɛ bʋ-bʋɔsʋŋ sɩ luŋie lɛ, ma nɩalɩŋ sɩ hɛ Hazɔ lɛ. Babɩlɔŋ kuoro Nebukadineza chɩŋ ma lɛ nɛ, ʋ vʋʋrɛ wɩɩ nɛ a mʋ tɩgɛ ma lɛ. Mɩ-na ma TƖƖNA nɛ bʋla.”

³¹ “Má sii a mʋ yuo tintee nɩa sɩ hɔnɔ ta jɩa a bɩ wɩɩ ka fá. Mɩ-na ma TƖƖNA nɛ bʋla. Tinteeŋ deeŋ bɩ boi-baalaa koo doloo kɛnɛ ba kaa tɔ. Ʋ nɩaa yie hɔŋ ba dʋndʋŋa nɛ.

³² Ba jaŋ yuo laa ba bʋntaŋŋaba, a yuo laa ba nɛ-daŋ-la ma. Mɩ jaŋ kɛŋ ba nɩalɩŋ sɩ hɛ dɩ-boloo pɩsa hɛ lee-kala, ba nɩalɩŋ sɩ kɛ ba nyu-pʋnaa ba kui, aŋ leŋ dɩ wʋlɔrʋŋ lɩɩ sɛmɛ na-kala a kʋ jʋʋba. Mɩ-na ma TƖƖNA nɛ bʋla.

³³ Hazɔ jaŋ bɩrɩmɛ jolluŋ dɩjʋʋlʋŋ. Ʋ jaŋ pɩŋ hoi a kaa mʋ wuu. Nʋʋkala bɩ jaŋ hɛ nɩmɛ, nʋʋkala bɩ jaŋ jʋjʋʋ nɩmɛ.”

³⁴ Wɩɩ-la La TƖƖNA sɩ bʋla pɩ ʋ wʋlaabʋlla Jɛrɩmaaya a mʋ tɩgɛ Ɛlam tintee lɛ nɛ ŋ-la, Zedikaaya sɩ bumo dii Juda tinteeŋ kuoruŋ bʋa-la lɛ:

³⁵ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Má bee na, mɩ jaŋ kpʋ Ɛlam to-yuoroo, nɩalɩŋ sɩ ŋaa ba doluŋ.

³⁶ Mɩ jaŋ kɛŋ dʋndɔŋŋɔɔ lɩɩ dʋnɩa sɛmɛ kala kʋ hɛ Ɛlam lɛ. Mɩ jaŋ kɛmba pɩsa hɛ dʋnɩa sɛmɛ kala, ba jaŋ mʋ yoŋ-baga tintee kala lɛ.

³⁷ Mɩ jaŋ leŋ dɩ fawʋllʋŋ kɛŋ Ɛlam nɩaa ba dʋndɔŋŋɔɔ sɩpaaŋ, nɩalɩŋ sɩɩ chɛ ba lɩɩsɛ ba mɩɩsɩŋ. Mɩ jaŋ chaasa na baanɩŋ a kɛŋ wʋlɔrʋŋ kʋ hɛ ba lɛ. Mɩ jaŋ joŋ laalɩŋ kire to ba harɩŋ, see dɩ mɩ dɛrɛ ba kala. Mɩ-na ma TƖƖNA nɛ bʋla.

³⁸ Mɩ jaŋ bil mɩ kuoru kpasa Ɛlam lɛ a chei ʋ kuoro arɩ ʋ tɩntɩnnɩ-hɩasɩŋ.

³⁹ Ama ŋɩɩ harɩŋ, mɩ jaŋ leŋ dɩ Ɛlam nɩaa bɩra dʋa.” La TƖƖNA nɛ bʋla.