JƐRƖMAAYA 48 - WƖA TENIŊ

Wɩɩ-la La TƖƖNA sɩ bʋla tɩgɛ Mʋab tinteeŋ lɛ

¹ Wɩalɩŋ sɩ mʋ tɩgɛ Mʋab lɛ nɛ ŋ-la: Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: “Wɩɩŋ puu Nebo, bɛɛ wɩaa ʋ jaŋ pɩŋ jikpeeŋ. Ba jaŋ yuo dii Kɩrɩatam, a yigi ʋ dɩ-duoruŋ lo, dɩ hɩɩsɩŋ dii ʋ nɩaa.

² Nɩaa bɩra bɩ jaŋ bɛsɛ Mʋab lɛ. Hɛsɩbɔŋ lɛ, nɩaa jaŋ chɛ ŋɩɩ ba sɩ jaŋ ŋaa dɩ ʋ tel a bʋl: ‘Má kɔ dɩ la dɛrɛ tinteeŋ deeŋ.’ Taŋ-la ba sɩɩ yɩrɛ Madɩmɛŋ ma jaŋ ŋaa chɩm. Laalɩŋ jaŋ kire to ʋ harɩŋ.

³ Jegile nɩɩ nii-ŋmobo-la ba sɩɩ ŋmoo Horonem lɛ, ba chaasa ŋmoo niiŋ nɛ a tɩŋ ba taŋ sɩ faasa chei.

⁴ Mʋab jaŋ boro tel, ʋ biiriŋ jaŋ ŋmoo niiŋ.

⁵ Baa mʋ Luhif nɛ, a faasa yele mʋmʋ. Horonem wombiiŋ lɛ, nɩaa tʋɔŋ cheye nɛ ba yiyel a tɩŋ ba taŋ cheyiŋ wɩaa.

⁶ Má fá, má fá a laa ma mɩɩsɩŋ. Ma nagɛ tɩɩ-puguŋ sɩ hɛ tintee-hɩlɩŋ lɛ nɛ.

⁷ Mʋab, ŋ sɩ joŋ ŋ yɩɛlaa hɛ ŋ wʋŋaalaa arɩ ŋ sɩ kɛŋ kɩaa lɛ ŋɩɩ, ba jaŋ yuo kɛŋ ŋ ma, a joŋ vene-la ba sɩɩ yɩrɛ Chɛmɔs mʋ yoŋ-baga, ʋ dɩ nɩalɩŋ sɩɩ kpaarʋ arɩ ʋ tɩntɩnnɩ-hɩasɩŋ.

⁸ Nɩɩ-la sɩɩ chei leriŋ jaŋ kɔ tasɩ-la kala lɛ. Taŋ kala bɩ jaŋ fori. Fuo-naasɩŋ jaŋ chei, dɩ tintee-taalɩŋ ma kala chei, bɛɛ wɩaa mɩ-na ma TƖƖNA nɛ bʋla.

⁹ Joŋ yɩsɩŋ hɛ Mʋab tinteeŋ lɛ, bɛɛ wɩaa ʋ jaŋ pɩŋ pɛɩ. Ʋ tasɩŋ jaŋ pɩŋ hoi, nʋʋkala bɩ jaŋ hɛ nɩmɛ.

¹⁰ Ŋmɩaŋ jaŋ dii nɩɩ-la kala sɩ bɩ ʋ tʋɔ-kala kaa tɩtɩŋ mɩ-na ma TƖƖNA tɩntɩŋŋaa. Ŋmɩaŋ jaŋ dii nɩɩ-la kala sɩ vɩa dɩ ʋ kpʋ Mʋab tɩŋŋaa.

¹¹ Mʋab tɩŋŋaa hɔnɔ nɛ sɔm ba hambiiriŋ kala lɛ, a nagɛ girep nɛnɛɛ sɩnɩŋ sɩ fɩɛla tele pɩŋ, ba bɩ ʋ bɩsa lɩɩ pupoiŋ dɔŋɔ a hɩhɛ dɔŋɔ lɛ. Ʋ ha bɩ yoŋ-baga mʋa. Ʋ sɩma bɩ lɩa, ʋ sʋɔra ma bɩ bɩrɩma.”

¹² La TƖƖNA sɩ, “Ama tapʋlaa ka kɔ nɛ, mɩ jaŋ tɩŋ nɩaa dɩ ba kʋ bɩsɛ Mʋab ta a nagɛ girep nɛnɛɛ sɩnɩŋ. Ba jaŋ leŋ dɩ ʋ pupoyee wuoli a yɛrɛba.

¹³ Mʋab tɩŋŋaa tʋɔŋ jaŋ lɩɩ Chɛmɔs vene-la, a nagɛ Iziral tɩŋŋaa tʋɔŋ sɩ lɩɩ Bɛtɛl ŋɩɩ ba fa sɩ joŋ ba yɩɛlaa hɛ ʋ lɛ.

¹⁴ Ɛɛ nɛ ma jaŋ wuo bʋl: La ŋaa bayuoroo nɛ, a jɩŋ laalɩŋ yuonuŋ woruŋ.

¹⁵ Ba jaŋ chei Mʋab arɩ ʋ tasɩŋ, ba jaŋ kpʋ ʋ bapʋɔsɛ zɔŋŋɔɔ kala. Mɩ-na Kuoro nɛ bʋla, mɩ yɩrɩŋ nɛ ma TƖƖNA doluŋ kala Tɩɩna.

¹⁶ Mʋab teliŋ kpaga nɛ, wʋlɔrʋŋ jaŋ guu kɔ ʋ lɛ.

¹⁷ Má yele pʋ, ma nɩalɩŋ kala sɩ kpagʋ, ma nɩalɩŋ kala sɩ jɩŋ yɩrɩ-la ʋ sɩ kɛnɛ. Má bʋl, ‘Ɛɛ nɛ kuori dantɩgɛ duo-la bori ŋɩɩ, ɛɛ nɛ kuori dantɩga-la sɩ kɛŋ yɩrɩŋ bori ŋɩɩ.’

¹⁸ Má joŋ yɩrɩ-la kala ma sɩ kɛnɛ bil aŋ tuu hɔŋ tinteeŋ sɩ hɩla lɛ. Ou, Dɩbɔŋ nɩaa, nɩɩ-la sɩ chei Mʋab jaŋ kɔ ma ma lɛ, a chei ma tabala-la ba sɩ saa kɛrɩsɩŋ golli.

¹⁹ Má chɩŋ wombiiŋ sɛmɛ a bibeŋ, ma nɩalɩŋ sɩ hɛ Arʋa lɛ. Má pɩɛsɛ baala-la sɩɩ fá arɩ haala-la sɩ foro fɩfá, má pɩɛsɛba, ‘Wʋbɛɛ nɛ ŋaa?’

²⁰ Hɩɩsɩŋ dii Mʋab nɛ, ʋ kala yagɩsɛ. Má ŋmoo niiŋ, a yel. Má chɩŋ Anɔŋ fuo-la leriŋ a heele bʋl arɩ ba chei Mʋab nɛ.

²¹ Mɩ-na Wɩa dii tasɩ-la sɩ hɛ tintee-taala lɛ sarɩya nɛ, Hɔlɔŋ, Jaza arɩ Mɛfaaf,

²² Dɩbɔŋ, Nebo arɩ Bɛf Dibilatem,

²³ Kiriatem, Bɛf Gamʋl arɩ Bɛf Mioŋ,

²⁴ Kɛrɩɔf arɩ Bozira a kɛŋ ŋɩɩ mʋ Mʋab tasɩŋ kala, kɩalɩŋ sɩ kpaga arɩ kɩalɩŋ sɩ bolie kala.

²⁵ Mʋab doluŋ dɛrɛ nɛ. Ʋ vaaŋ boro nɛ. Mɩ-na ma TƖƖNA nɛ bʋla.

²⁶ Má leŋ dɩ ʋ bugi, bɛɛ wɩaa ʋ dagɛ ʋ tɩtɩa nɛ mɩ-na ma TƖƖNA teeŋ. Má leŋ dɩ Mʋab bilimi kɩalɩŋ ʋ sɩ tʋɔsa tʋɔŋ. Má leŋ dɩ ʋ bɩrɩmɛ kʋŋ dɩ nɩaa sisieri ʋ lɛ.

²⁷ Mʋab, ŋ fa sieri Iziral tɩŋŋaa lɛ nɛ. Ŋ kɛnʋ gaaraa tʋɔŋ nɛɛ a magɛ dɩ ŋ vigisi nyuŋ a sisieri ʋ lɛ dɩ ŋ nɩɩ bʋl ʋ wɩaa?

²⁸ Má leŋ ma tasɩŋ aŋ mʋ hɛ bʋsʋŋ tʋɔŋ, ma nɩalɩŋ sɩ hɛ Mʋab lɛ. Má nagɛ kokomo sɩ mʋ saa ʋ dɛlɛ bʋ-bʋa niiŋ nɛ.

²⁹ La nɩɩ Mʋab babii-ballɩŋ wɩaa nɛ, ʋ babiibal kɩŋkɛŋ-la arɩ ʋ dagɛ ŋ-tɩtɩɩ arɩ ʋ sɩɩ-duoŋ.

³⁰ Mɩ jɩŋ ʋ sɩɩ-duoŋ lɛ nɛ, ama ʋ kala jaŋ ŋaa pɛɩ. Mɩ-na ma TƖƖNA nɛ bʋla. Ʋ dagɛ ʋ-tɩtɩɩ-la bɩ jaŋ ŋaa wɩɩkala pʋ.

³¹ Ŋɩɩ wɩaa, mɩ jaŋ ŋmoo niiŋ a mʋ tɩgɛ Mʋab lɛ, mɩ jaŋ yel a pɩ Mʋab tɩŋŋaa kala. Mɩ yele pɩpɩ Kɩ Harɛsɛf baalaa nɛ.

³² Mɩ jaŋ yele pɩŋ, a kɩɩ ŋɩɩ mɩ sɩ yele pɩ Jaza, ou, Sɩbɩma girep tɩɩsɩŋ. Ŋ naakelee tɛllɛ mʋ yi mʋgʋ-balɩŋ nɛ. Ba mʋ yi Jaza mʋgʋ-balɩŋ nɛ. Nɩɩ-la sɩɩ chei kɩaa tuu ŋ tɩɩnɛnɛɛ sɩ bɩa lɛ nɛ arɩ ŋ girep nɛnɛɛ.

³³ Tʋɔtɔrʋ-la kala nɩaa fa sɩ kɛnɛ Mʋab girep bagɩsɩŋ lɛ arɩ ba bagɩsɩŋ dɔnsʋŋ lɛ kala lɛlɛ nɛ. Mɩ leŋe girep nɛnɛɛ sɩnɩŋ dɛrɛ nɛ lere-la ba sɩɩ ŋaa sɩnɩŋ. Nɩaa bɩra bɩ sɩŋ-la chaga a ŋɩŋaa goŋ arɩ tʋɔtɔrʋŋ. Nɩaa ka ŋaa goŋ nɛ, ama tʋɔtɔrɛ goŋ dee.

³⁴ Ba nii-ŋmobo ka sii nɛ a lɩɩ Hɛsɩbɔŋ a mʋ Ɛlɩalɩ arɩ Jahazi, a lɩɩ Zʋaa lɛ a mʋ yi Horonem arɩ Ɛgalaf Sɛlɩsɩya, bɛɛ wɩaa Nimirim fuonuŋ ma hʋa nɛ.

³⁵ Mʋab tinteeŋ lɛ, mɩ jaŋ dɛrɛ nɩalɩŋ sɩɩ kpaarɛ vʋɩya vesiŋ dɩ-kpaaraa a nyɩgɛ kʋsʋɔrʋsʋŋ pɩpɩ ba vesiŋ. Mɩ-na ma TƖƖNA nɛ bʋla.

³⁶ Mɩ tʋɔŋ lɛ, mɩ yele a pɩpɩ Mʋab nɛ a nagɛ ba sɩɩ ŋmʋʋ ŋmʋlʋŋ. Ʋʋ yel nɛ a nagɛ ŋmʋlʋŋ a pɩ Kɩɩ Harɛsɛf nɩaa. Dʋa-la kala ba sɩ chɛ lɛlɛ nɛ.

³⁷ Ba fʋŋ ba nyusuŋ kala nɛ, a fʋŋ ba tɔŋŋɔɔ ma kala. Ba kpɛrɛ ba nɩsaa nɛ aŋ vɔɔ tʋɔ-chei gɛnnɩŋ.

³⁸ Mʋab lusunuŋ nyuŋ kala arɩ lere-la taŋ nɩaa sɩɩ hilimu, yele nɛ su ba kala, bɛɛ wɩaa mɩ yɛrɛ Mʋab nɛ a nagɛ pupoiŋ nʋʋkala sɩ bɩ chɛ. Mɩ-na ma TƖƖNA nɛ bʋla.

³⁹ Mʋab yɛrɛ nɛ. Baa ŋmoo niiŋ nɛ. Mʋab mɩɩrɛ harɩŋ nɛ arɩ hɩɩsɩŋ. Mʋab mɩɩra bɩrɩmɛ mɔmɩɩ nɛ nɩaa sisieri ʋ lɛ, ʋ mɩɩra kɛŋ fawʋllʋŋ nɛ nɩalɩŋ sɩ gollu teeŋ.”

⁴⁰ Wɩɩ-la La TƖƖNA sɩ bʋla nɛ ŋ-la: “Má bee na, kachuuŋ nɛ file kʋʋ tuu a jɛrɛ kɩŋkɛnsɩŋ Mʋab nyuŋ.

⁴¹ Ba jaŋ yuo dii tabala-la a laa ba dɩ-duoruŋ. Tapʋlɩɩ-la, Mʋab bayuoroo tʋɔŋ jaŋ wʋwɩɩ a nagɛ haala sɩɩ chɛ ʋ lʋl ʋ luoruŋ wʋwɩɩ ŋɩɩ.

⁴² Ba jaŋ chei Mʋab dɩ ʋ bɩra sɩ́ tintee ŋaa, bɛɛ wɩaa, ʋ dagɛ ʋ tɩtɩa nɛ La TƖƖNA teeŋ.

⁴³ Fawʋllʋŋ, buotuo luŋuŋ arɩ bɛrɛ ka gbɛrɛma, ma-na Mʋab nɩaa. Mɩ-na ma TƖƖNA nɛ bʋla.

⁴⁴ Dɩ nʋʋkala nɛ wuo fori fawʋllɩɩ-la lɛ, ʋ jaŋ tuu buotuo-luŋii-la. Dɩ nʋʋ nɛ wuo lɩɩ buotuo luŋii-la tʋɔŋ, bɛrɛ́ jaŋ kɛnʋ. Mɩ jaŋ dɔgɩsɛ Mʋab jɩna-la lɛ sɩ maga mɩ dɔgʋsʋ. Mɩ-na ma TƖƖNA nɛ bʋla.

⁴⁵ Nɩalɩŋ sɩ foro fá chɩŋ Hɛsɩbɔŋ daaliimiŋ lɛ nɛ a bɩ wɩɩkala wuo ŋaa, bɛɛ wɩaa nyiniŋ cholo nɛ Hɛsɩbɔŋ lɛ, nyiŋgeliŋ sisii Sɩhɔŋ lɛ. Ʋ dii Mʋab tile nɛ, a didii babiibal tɩmma-la nyusuŋ.

⁴⁶ Wɩɩŋ puu Mʋab tɩŋŋaa. Ba chei Chɛmɔs vene-la nɛ. Ba kɛsɛ ŋ hambolibiisiŋ mʋ yoŋ-baga nɛ, aŋ kɛsɛ ŋ hantolibiisiŋ ma mʋ ba ŋaa yosi.

⁴⁷ Ama tapʋlaa ka kɔ nɛ, mɩ jaŋ bɩra joŋ Mʋab tɩŋŋaa dʋa pɩba ba tinteeŋ lɛ. Mɩ-na ma TƖƖNA nɛ bʋla.” Wɩalɩŋ sɩ jaŋ puu Mʋab tɩŋŋaa dɩdɛrɩŋ nɛ ŋ-la.