JƐRƖMAAYA 47 - WƖA TENIŊ

Wɩɩ-la La TƖƖNA sɩ bʋla a mʋ tɩgɛ Fɩlɩsɩtɩa tinteeŋ lɛ

¹ La TƖƖNA bʋl wɩaa pɩ ʋ wʋlaabʋlla Jɛrɩmaaya a mʋ tɩgɛ Fɩlɩsɩtɩa tɩŋŋaa lɛ ka Ijipiti tinteeŋ kuoro-na mʋ yuo Gaza.

² Wɩɩ-la La TƖƖNA sɩ bʋla nɛ ŋ-la: “Bee na ŋɩɩ lɩɩŋ sɩɩ sii wɩa-nyuŋ wɩɩpɔsʋŋ nagʋa dɩɩrɩŋ. Ba jaŋ pɩpɛllɛ a nagɛ fuoŋ sɩ suo a pɛllɛ lɩlɩɩ. Ba jaŋ pɛllɛ tɔ tinteeŋ arɩ kʋŋ na-kala sɩ hɛ ʋ lɛ, tasɩŋ arɩ nɩalɩŋ sɩ hɛ ba lɛ. Nɩalɩŋ jaŋ ŋmoo niiŋ, nɩalɩŋ kala sɩ hɛ tintee-la lɛ jaŋ ŋmoo niiŋ,

³ dɩ ba nɛ nɩɩ janɩŋ naasɩŋ dɔmɔ, dɩ ba nɛ nɩɩ ba dʋndɔŋŋɔɔ laalɩŋ janɩŋ torukoba dɔmɔ, arɩ ba gɩrɩŋgɩrɩmba dɔmɔ. Nyɩmmaba bɩ jaŋ pɛ ba biiriŋ lɛ, ba nɩsaa jaŋ sʋʋ mɛrɛ ba sɛsɩŋ lɛ.

⁴ Bʋa-la yie nɛ dɩ ba chei Fɩlɩsɩtɩa tɩŋŋaa, aŋ kpʋ nɩalɩŋ sɩ ka, nɩalɩŋ sɩ jaŋ wuo pɛ Taaya arɩ Sɩdɔŋ lɛ. La TƖƖNA ŋaa siri nɛ dɩ ʋ chei Fɩlɩsɩtɩa tɩŋŋaa, Kafɩtɔ fuoŋ-niiŋ nɩkaana-la.

⁵ Gaza nɩaa jaŋ fʋŋ ba nyusuŋ aa dagɛ tʋɔ-cheeŋ. Asɩkɛlɔŋ nɩaa jaŋ ŋaa ba niiŋ chɩm. Fɩlɩsɩtɩa nɩkaanaa, ɛɛ nɛ maa chɛ ma yele diene magɛ?

⁶ Ma yie yel a bʋl, ‘La TƖƖNA tokobiiŋ, ɛɛ nɛ ŋ chɛ ŋ kerila a diene magɛ?’ Mɩɩra jʋʋ ŋ pɛɛŋ, a pɩŋ sɔm.

⁷ Ama ɛɛ nɛ ʋ jaŋ ŋaa wiesi, mɩ-na ma TƖƖNA nɛ sɩ hɛʋ dɩ ʋ yuo Asɩkɛlɔŋ arɩ mʋgʋ-balɩŋ niiŋ nɩaa?”