JƐRƖMAAYA 46 - WƖA TENIŊ

Wɩɩ-la La TƖƖNA sɩ bʋla tɩgɛ Ijipiti lɛ

¹ La TƖƖNA bʋl wɩaa a pɩ ʋ wʋlaabʋlla Jɛrɩmaaya a mʋ tɩgɛ tinteyee lɛ.

² Ʋ bʋl wɩaa a mʋ tɩgɛ Ijipiti tinteeŋ kuoro Neko laalɩyuoro-la lɛ nɛ, ba nɛ Babɩlɔŋ kuoro Nebukadineza yuo dii Kakɛmɩs sɩ kpagɛ Yufireti fuo-la lɛ ŋɩɩ. Bʋa-la lɛ Josaaya nanʋala Jehoyakim sɩ dii Juda tinteeŋ kuoruŋ ʋ jɩ-nɛsɛ lɛ nɛ ŋɩɩ. La TƖƖNA sɩ,

³ “Má ŋaa ma hɔɔtaalɩ-la ma sɩ kaa kɛrɛɛ laa bayuori hɛŋŋɛɛ siri, kʋjalaa arɩ kʋbiisiŋ kala a mʋ yuo laalɩŋ.

⁴ Má nyɩgɩlɛ ma janɩŋ a jɩl. Ma paa nyunchu gbaŋ-kogunuŋ chu a chɩŋ ma dɩchɩnaa. Ma chɛsɛ ma tiŋŋee a paa ma bayuori kɩaa laalɛ.

⁵ Bɛɛ kʋŋ nɛ mɩ nɩna? Fawʋllʋŋ kɛmba nɛ, ba mɩɩra fɩfá nɛ, ba yuo dii ba laalɩyuoroo nɛ. Baa fa nɛ lɩma lɩma, ba bɩ harɩŋ ka daasɛ, fawʋllʋŋ golliba chu nɛ. Mɩ-na ma TƖƖNA nɛ bʋla.

⁶ Nɩalɩŋ naaŋ sɩ lɩma bɩ jaŋ fá viiri koo nɩalɩŋ sɩ dolie fori. Ba gɛrɛ nɛ a tel wɩɩpɔsʋŋ nagʋa dɩɩrɩŋ a kpagɛ Yufireti fuo-la.

⁷ Kʋbɛɛ nɛ sie ŋ-la a nagɛ Naayɩl fuo-la, a nagɛ fuoŋ sɩ gbu lɩlɩɩ?

⁸ Ijipiti sie nɛ a nagɛ Naayɩl fuo-la, a nagɛ fuoŋ sɩ gbu lɩlɩɩ. Ʋ sɩ, ‘Mɩ jaŋ sii a tɔ tinteeŋ. Mɩ jaŋ chei tabalaa arɩ ba nɩaa.’

⁹ Má leŋ dɩ janɩ-la yaraa lɩŋ. Ma nɩalɩŋ ma sɩ kɛŋ janɩŋ torukoba vɩvɛŋ, má chaasa tii paa. Laalɩyuoroo, má mʋmʋ ma Kus arɩ Puti tɩmma-la sɩ kori hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ, arɩ Lidiya baalaa sɩ lɛrɛ ba tosuŋ hɛ.

¹⁰ Ama tapʋlɩɩ-la ŋaa mɩ-na ma TƖƖNA doluŋ kala Tɩɩna kʋa nɛ, tapʋlɩɩ-la mɩ sɩ jaŋ joŋ mɩ baanɩŋ tiŋ mɩ dʋndɔŋŋɔɔ lɛ. Mɩ tokobiiŋ jaŋ dii nɩaa ŋɩɩ a vɔgɛ, a nyʋa ba chalɩŋ ma ŋɩɩ a vɔgɛ. Mɩ-na ma TƖƖNA doluŋ kala Tɩɩna jaŋ kpʋ mɩ dʋndɔŋŋɔɔ wɩɩpɔsʋŋ nagʋa dɩɩrɩŋ tintee-la lɛ a kpagɛ Yufireti fuo-la.

¹¹ Ijipiti nɩaa, ma mʋ Gɩlɩad a bee chɛ daalusuŋ. Ma daalusu-la kala ŋaa pɛɩ nɛ, kʋŋkala bɩ ma wuo vaarɛ.

¹² Tinteyee nɩaa jaŋ nɩɩ hɩɩsɩ-la sɩ diima wɩaa. Ma nii-ŋmobo jaŋ su dʋnɩa kala. Ma bayuoroo jaŋ gɛrɛ dɔŋɔba, a kala tele hɛ dɔŋɔ.”

¹³ Wɩɩ-la La TƖƖNA sɩ bʋla pɩ ʋ wʋlaabʋlla Jɛrɩmaaya a mʋ tɩgɛ Babɩlɔŋ kuoro Nebukadineza sɩɩ kɔ dɩ ʋ yuo Ijipiti nɩaa lɛ nɛ ŋ-la:

¹⁴ “Má heele bʋl wɩɩŋ deeŋ Ijipiti arɩ Mɩgɩdɔl lɛ. Má heele bʋlʋ Memfis arɩ Tapanhɛs ma lɛ: ‘Má chɩŋ ma dɩchɩnaa a ŋaa siri, bɛɛ wɩaa laalɩŋ ka dii nɩalɩŋ sɩ gollima nɛ.’

¹⁵ Bɛɛ nɛ tɩɩ ma bayuoroo pɩŋ tinteeŋ? Ba bɩ wuo chɩŋ, bɛɛ wɩaa mɩ-na ma TƖƖNA jaŋ yigiba lo.

¹⁶ Ba jaŋ gɛrɛ dɔŋɔ bʋlɩa bʋlɩa, a tele daŋ dɔŋɔ nyuŋ. Ba jaŋ bʋl, ‘Má sii, má leŋ dɩ la mɩɩra mʋ la tɩtɩa tinteeŋ, la nɩaa teeŋ, a kagɛ laal-la la dʋndɔŋŋɔɔ sɩ kaa pɛsɛ la lɛ.’

¹⁷ Nɩmɛ ba jaŋ faasa bʋl, ‘Goŋ bal nɛ Ijipiti tinteeŋ kuoro ta ŋɩŋaa, ʋ leŋe ʋ nyu-sɩmɩŋ bal ʋ lɛ nɛ.’

¹⁸ Mɩ-na ma TƖƖNA doluŋ kala Tɩɩna yɩrɩŋ nɛ La TƖƖNA. Mɩ sɩ weye wɩaa, a nagɛ peel-la ba sɩɩ yɩrɛ Tabɔ sɩ sii kɩɩ peelee kala ŋɩɩ, peel-la ba sɩɩ yɩrɛ Kamɛl ma sii kɩɩ mʋgʋ-balɩŋ ŋɩɩ, ŋɩɩ nɛ nɩɩ-la sɩ jaŋ kʋ yuoma doluŋ jaŋ nagɛ.

¹⁹ Má paa ma kɩaa a ŋaa siri dɩ ma mʋ yoŋ-baga, ma nɩalɩŋ sɩ hɛ Ijipiti lɛ, bɛɛ wɩaa, Memfis jaŋ pɩŋ hoi a cheye pɩŋ, nʋʋkala bɩ jaŋ hɛ nɩmɛ.

²⁰ Ijipiti zɔmɔ a nagɛ nɛ-pa-bie nɛ, ama dɩma ka kɔ ʋ lɛ nɛ a lɩɩ wɩɩpɔsʋŋ nagʋa dɩɩrɩŋ.

²¹ Ijipiti nɩaa sɩ joŋ moribiee pa aŋ laa laalɩyuoro-la nagɛ nɛ-biisiŋ sɩ nɛrɛ nɛ, ba ma jaŋ mɩɩrɛ harɩŋ a fá hɛ dɔŋɔ. Ba bɩ jaŋ wuo chɩŋ, bɛɛ wɩaa wʋlɔrʋŋ ka kɔ ba lɛ nɛ, bʋa-la lɛ sɩ maga dɩ ba dɔgɩsɛba.

²² Ijipiti tɩŋŋaa jaŋ fá aŋ fʋfʋʋrɛ a nagɛ dɩmɩŋ, dɩ ʋ dʋndɔŋŋɔɔ nɛ tʋɔra a kʋkɔ ʋ lɛ. Ba jaŋ kɔ ʋ lɛ arɩ saa-balaa, a nagɛ nɩaa sɩɩ keri tɩɩsɩŋ.

²³ Ba jaŋ keri ʋ duuŋ tɩɩsɩŋ kala lo, arɩ ʋ sɩ faasa jʋʋ dɔŋɔ ma kala. Mɩ-na ma TƖƖNA nɛ bʋla. Ba yʋga a kɩɩ hɔbɔ, nʋʋ bɩ ba wuo dɩɩsɛ.

²⁴ Ijipiti tɩŋŋaa jaŋ dii hɩɩsɩŋ, dɩ ba jomba hɛ wɩɩpɔsʋŋ nagʋa dɩɩrɩŋ nɩaa nɩsɩŋ lɛ.”

²⁵ La TƖƖNA doluŋ kala Tɩɩna, Iziral tɩŋŋaa Wɩa sɩ: “Mɩ ŋaa siri nɛ dɩ mɩ dɔgɩsɛ Tɛbɛs tɩŋŋaa vene-la ba sɩɩ yɩrɛ Amɔŋ, Ijipiti tinteeŋ kuoro, Ijipiti arɩ ʋ vesiŋ arɩ ʋ kuoroo, arɩ nɩalɩŋ sɩ joŋ ba yɩɛlaa hɛ Ijipiti tinteeŋ kuoro lɛ.

²⁶ Mɩ jaŋ jomba hɛ nɩalɩŋ sɩɩ chɛ dɩ ba lɩɩsɛ ba mɩɩsɩŋ nɩsɩŋ lɛ, Babɩlɔŋ kuoro Nebukadineza arɩ ʋ tɩntɩnnɩ-hɩasɩŋ. Ama harɩŋ, nɩaa jaŋ bɩra hɛ Ijipiti tinteeŋ lɛ, a nagɛ faafaa-la. Mɩ-na ma TƖƖNA nɛ bʋla.

²⁷ Mɩ tɩntɩnna Jekɔb, sɩ́ fawʋllʋŋ fá. Sɩ́ leŋe dɩ ŋ yaraa yʋɔrɛ Iziral. Mɩ jaŋ laama ta dɩ-bolii-la lɛ ma sɩ hɛ, mɩ jaŋ laa ma doho nɩalɩŋ ta yoŋ-baga lɛ. Jekɔb jaŋ bɩra kɛŋ fɩɛlɩŋ a hɔŋ sɔm, nʋʋkala bɩ jaŋ leŋ dɩ fawʋllʋŋ kɛnʋ.

²⁸ Mɩ tɩntɩnna Jekɔb, sɩ́ fawʋllʋŋ fá bɛɛ wɩaa mɩ hɛ ŋ teeŋ nɛ, mɩ-na ma TƖƖNA nɛ bʋla. Mɩ jaŋ chei tinteye-la kala mɩ sɩ kɛmma pɩsa hɛ gbelem gbelem, ama, mɩ bɩ jaŋ chei ma kala gbelem gbelem. Mɩ jaŋ lɛrɛ ma dɩgɩlɩŋ arɩ wʋtɩtɩɩ. Mɩ bɩ jaŋ lemma ta pɛɩ.”