JƐRƖMAAYA 43 - WƖA TENIŊ

¹ Jɛrɩmaaya sɩ bʋl wɩalɩŋ kala ba TƖƖNA Wɩa sɩ bʋla a pɩ nɩalɩŋ dɛrɛ, wɩalɩŋ kala La TƖƖNA sɩ tɩmʋ dɩ ʋ bʋl,

² ŋɩɩ nɛ Hosaaya nanʋala Azarɩa arɩ Karɩa nanʋala Johanaŋ arɩ nɩalɩŋ kala sɩ kɛŋ sɩɩ-duoŋ bʋla pɩ Jɛrɩmaaya, “Ŋŋ nyɩɛ wɩaa nɛ. La TƖƖNA Wɩa bɩŋ tɩma dɩ ŋ kʋ bʋla pɩla arɩ la sɩ́ mʋ hɔŋ Ijipiti tinteeŋ lɛ.

³ Neria nanʋala Baruk nɛ yigiŋ hɛ la lɛ dɩ ŋ jonla hɛ Babɩlɔŋ tɩŋŋaa nɩsɩŋ lɛ, dɩ ba kpʋla koo a kɛnla mʋ yoŋ-baga Babɩlɔŋ lɛ.”

⁴ Ŋɩɩ nɛ Karɩa nanʋala Johanaŋ arɩ laalɩyuori-hɩasɩ-la kala a pɛ nɩalɩŋ kala lɛ bɩ La TƖƖNA niiŋ to ba sɩ jaŋ hɔŋ Juda tinteeŋ lɛ.

⁵ Ama Karɩa nanʋala Johanaŋ arɩ laalɩyuori-hɩasɩ-la sii kɛsɛ Juda nɩkaana-la kala sɩ mɩɩra lɩɩ tinteye-la, lere-la kala lɛ ba fa sɩ pɩsa hɛ a kɔ dɩ ba hɔŋ Juda tinteeŋ a kaa mʋ Ijipiti tinteeŋ.

⁶ Ba fa pɛ kɛsɛ baalaa, haalaa arɩ hambiisiŋ ma mʋ nɛ, a pɛ kuoro tolie-la Nebuzaradaŋ sɩ ŋaa laalɩyuoro-la sɩɩ pɔ kuoro nɩhɩaŋ sɩ joŋo hɛ Ahɩkam nanʋala Gedalia sɩ ŋaa Safaŋ nihiŋ nɩsɩŋ lɛ, a pɛ Jɛrɩmaaya Wɩa wʋlaabʋllʋ-la arɩ Neria nanʋala Baruk lɛ.

⁷ Ŋɩɩ nɛ ba bɩ La TƖƖNA niiŋ to aŋ mʋ Ijipiti tinteeŋ a mʋ yi taŋ-la ba sɩɩ yɩrɛ Tapanhɛs.

⁸ Tapanhɛs lɛ nɛ La TƖƖNA bʋl wɩaa a pɩ Jɛrɩmaaya. Ʋ sɩ,

⁹ “Leŋ dɩ Juu tɩmma-la bibeniŋ ka dɩ ŋ paa tabɩaa sɩ jalɩa a kaa mʋ hugi ba sɩ kɛŋ chʋrʋŋ ŋaa tiebie-la a saa wombii-la sɩ hɛ Ijipiti tinteeŋ kuoro, kuoru dɩa boi-niiŋ Tapanhɛs lɛ.

¹⁰ Bʋla pɩba, ‘Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Mɩ jaŋ tɩma yɩrɛ mɩ tɩntɩnna Babɩlɔŋ kuoro Nebukadineza a leŋ dɩ ʋ kuoru kpasa chɩŋ tabɩaa deemba mɩ sɩ hugo lee-la. Ʋ jaŋ kɛŋ kuori-palɩŋ jɛrɛ tɔba.

¹¹ Ʋ jaŋ kʋ yuo Ijipiti tɩŋŋaa, a leŋ dɩ nɩalɩŋ sɩ maga dɩ ba sʋʋ, sʋʋ, a leŋ dɩ nɩalɩŋ sɩ maga dɩ ba ŋaa yosi ma ŋaa yosi, a leŋ dɩ nɩalɩŋ ma sɩ maga dɩ ba sʋʋ laalɩŋ lɛ sʋʋ laalɩŋ lɛ.

¹² Ʋ jaŋ chol nyiniŋ hɛ Ijipiti tɩŋŋaa vesiŋ dɩɩsɩŋ. Ʋ jaŋ nyɩgɛ ba vesiŋ dɩɩsɩ-la aŋ paa ba vesi-la dɔnsʋŋ viiri. A nagɛ pie-daara sɩ yie kɛŋ ʋ gɛrɩŋ bɛ ʋ tɩtɩa ŋɩɩ, ŋɩɩ tɩtɩa nɛ ʋ jaŋ kɛŋ Ijipiti bɛ ʋ tɩtɩa a lɩɩ nɩmɛ dɩ wɩɩkala bɩ ʋ lɛ ŋaa.

¹³ Ba wɩɩpɔsʋŋ vene-la dɩa sɩ hɛ Ijipiti lɛ, ʋ jaŋ ŋmoo ʋ jebie-la lo aŋ nyɩgɛ Ijipiti tinteeŋ vesi-la dɩɩsɩŋ.’ ”