JƐRƖMAAYA 39 - WƖA TENIŊ

Jerusalɛm tele

¹ Ŋ-la nɛ ba to a yuo dii Jerusalɛm: Zedikaaya sɩ dii Juda tinteeŋ kuoruŋ, ʋ jɩsɩŋ nibi tʋɔŋ chɛŋ fii lɛ nɛ, Babɩlɔŋ kuoro Nebukadineza arɩ ʋ laalɩyuoroo kala sii mʋ yuo Jerusalɛm a gollu chu.

² Zedikaaya sɩ dii kuoruŋ ʋ jɩ-fii arɩ kʋbala tʋɔŋ chɛŋ nɛsɛ tapʋl nibi chɛɛŋ, ba ŋmoo tabal-la kɛrɛ sɛmɛ dɔŋɔ lo aŋ jʋʋ taŋ-la.

³ Ŋɩɩ nɛ Babɩlɔŋ kuoro tɩntɩnnɩ-hɩasɩ-la hɔŋ tʋtʋɔbaanɩŋ boi-baal-la lɛ. Ba yɩraa nɛ ŋ-la: Nɛgal-Sarɛza a lɩɩ Samɩga, Nebo-Sasɛkɩm, ʋ ŋaa ʋ tɩntɩnnaa nɩhɩaŋ nɛ, Nɛgal-Sarɛza, ʋ ma ŋaa tɩntɩnnɩ-hɩaŋ nɛ a saa pɛ Babɩlɔŋ kuoro tɩntɩnnɩ-hɩasɩ-la dɔnsʋŋ lɛ.

⁴ Juda tinteeŋ kuoro Zedikaaya arɩ laalɩyuoro-la kala sɩ naba, ba fá lɩɩ tabal-la lɛ tɩtaŋɩŋ. Ba to wombii-la sɩ hɛ kuoro gaarɩŋ lɛ nɛ a mʋ to boi-baal-la sɩ hɛ jebie-la balɩa pɛgɛ a to Araba dɩɩrɩŋ a mʋ.

⁵ Ama Babɩlɔŋ laalɩyuoro-la kire to ba harɩŋ a mʋ kɛŋ Zedikaaya Jeriko tintee-taalɩŋ lɛ. Ba kɛnʋ a kaa mʋ Babɩlɔŋ kuoro Nebukadineza teeŋ Rɩbɩla sɩ hɛ Hamaf tinteeŋ lɛ. Ʋ diiu sarɩya a joŋ cheeriŋ pʋ.

⁶ Rɩbɩla lɛ, Babɩlɔŋ kuoro leŋ ba kpʋ Zedikaaya hambolibiisiŋ ʋ sɩɩŋ lɛ, a kpʋ Juda nɩbalaa ma kala.

⁷ Ŋɩɩ nɛ ʋ leŋ ba kɔrɩgɔ chaarɛ Zedikaaya ma sɩaa, aŋ hɛʋ kɔlɩɩŋ chɔrʋmɔɔ a kɛnʋ mʋ Babɩlɔŋ.

⁸ Babɩlɔŋ tɩmma-la chol nyiniŋ hɛ kuoro dɩa lɛ arɩ nɩalɩŋ dɩɩsɩŋ aŋ ŋmoo Jerusalɛm jebiee lo.

⁹ Ŋɩɩ nɛ Nebuzaradaŋ sɩ ŋaa laalɩyuoro-la sɩɩ pɔ Babɩlɔŋ kuoro nɩhɩaŋ kɛsɛ nɩalɩŋ sɩ ka tabal-la lɛ a kaa mʋ yoŋ-baga Babɩlɔŋ lɛ, a pɛ nɩalɩŋ sɩ kɛŋ ba tɩtɩa mʋ pʋ, arɩ nɩalɩŋ dɔnsʋŋ sɩ ka.

¹⁰ Ama Nebuzaradaŋ sɩ ŋaa laalɩyuoro-la sɩɩ pɔ kuoro nɩhɩaŋ fa leŋ nɩalɩŋ dɔnsʋŋ sɩ ŋaa summo a bɩ kʋŋkala kɛnɛ Juda lɛ nɛ. Bʋa-la lɛ ʋ pɩba bagɩsɩŋ arɩ girep tɩɩsɩŋ bagɩsɩŋ nɛ.

¹¹ Kuoro Nebukadineza fa bʋl wɩaa nɛ a pɩ Nebuzaradaŋ sɩ ŋaa laalɩyuoro-la sɩɩ pɔʋ nɩhɩaŋ a mʋ tɩgɛ Jɛrɩmaaya lɛ, ʋ sɩ,

¹² “Má kɛnʋ a beŋ ʋ nyuŋ. Má sɩ́ ʋ wʋbɔŋ ŋaa, ama má ŋaa wɩɩ-la kala ʋ sɩ pɩɛsaa chɛ a pʋ.”

¹³ Ŋɩɩ nɛ Nebuzaradaŋ sɩ ŋaa laalɩyuoro-la sɩɩ pɔ kuoro nɩhɩaŋ, arɩ Nebusazɩbaŋ sɩ ŋaa tɩntɩnnaa nɩhɩaŋ, arɩ Nɛgal-Sarɛza ma sɩ ŋaa tɩntɩnnɩ-hɩaŋ arɩ Babɩlɔŋ tɩntɩnnɩ-hɩasɩ-la dɔnsʋŋ kala

¹⁴ tɩŋ ba mʋ lɩɩsɛ Jɛrɩmaaya laalɩyuoro-la sɩɩ pɔ kuoro kaala-la tʋɔŋ. Ba joŋu pɩ Ahɩkam nanʋala Gedalia sɩ ŋaa Safaŋ nihiŋ dɩ ʋ kɛnʋ mɩɩra mʋ ʋ dɩa. Ŋɩɩ nɛ Jɛrɩmaaya ka Juda lɛ ʋ nɩaa tʋɔŋ.

¹⁵ Bʋa-la lɛ Jɛrɩmaaya fa sɩ hɛ laalɩyuoro-la sɩɩ pɔ kuoro kaala-la lɛ, La TƖƖNA bʋl wɩaa pʋ. Ʋ sɩ,

¹⁶ “Mʋ bʋla pɩ Ɛbɛd-Mɛlɛk sɩ ŋaa Kus tɩɩna, ‘Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Mɩɩ chɛ mɩ ŋaa wɩalɩŋ mɩ sɩ bʋla tɩgɛ tabalɩŋ deeŋ lɛ nɛ: Wʋlɔrʋnʋŋ nɛ, wʋzɔŋŋɔɔ dee. Bʋa-la lɛ wɩalɩŋ kala jaŋ ŋaa ŋ sɩɩŋ lɛ.

¹⁷ Ama mɩ jaŋ laaŋ ta tapʋlɩɩ-la, mɩ-na ma TƖƖNA nɛ bʋla, mɩ bɩ jaŋ joŋuŋ hɛ nɩalɩŋ ŋ sɩɩ fá nɩsɩŋ lɛ.

¹⁸ Mɩ jaŋ laaŋ ta. Ŋ bɩ jaŋ sʋʋ laalɩŋ lɛ, ŋ jaŋ fori a laa ŋ mɩɩsɩŋ, bɛɛ wɩaa ŋ laamɛ dii nɛ. Mɩ-na ŋ TƖƖNA nɛ bʋla.’ ”