JƐRƖMAAYA 37 - WƖA TENIŊ

Ba kɛŋ Jɛrɩmaaya tɔ bɩnɩŋ dɩa

¹ Babɩlɔŋ kuoro Nebukadineza nɛ leŋe Josaaya nanʋala Zedikaaya dii Juda tinteeŋ kuoruŋ. Jehoyakim nanʋala Jehoyachiŋ nyuŋ nɛ ʋ laa dii kuorii-la.

² Ʋ-na koo ʋ tɩntɩnnaa koo nɩalɩŋ kala sɩ hɛ tintee-la lɛ bɩ wɩalɩŋ La TƖƖNA sɩ to Wɩa wʋlaabʋlla Jɛrɩmaaya lɛ a bʋl kaa tɩŋ.

³ Ama kuoro Zedikaaya mɩɩra tɩŋ Sɛlɛmaaya nanʋala Jehukal arɩ Maasɛya nanʋala Zefanaaya sɩ ŋaa Wɩɩsʋllɩ sɩpaalaara dɩ ba kɛŋ tɩndaarɩŋ deeŋ mʋ pɩ Jɛrɩmaaya: “Laa sʋlʋŋ, sʋl La TƖƖNA Wɩa pɩla.”

⁴ Bʋa deeŋ lɛ dɩ ba ha bɩ Jɛrɩmaaya kaa tɔ bɩnɩŋ dɩa, ʋ fa jaŋ wuo gʋgɔllɛ nɩalɩŋ tʋɔŋ ŋɩɩ kala ʋ sɩɩ chɛ.

⁵ Ijipiti tinteeŋ kuoro laalɩyuoroo kala fa lɩɩ Ijipiti tinteeŋ lɛ nɛ. Babɩlɔŋ tɩmma-la sɩ mʋʋ yuo Jerusalɛm a gollo chu sɩ nɩɩ ba wɩaa, ba leŋ Jerusalɛm aŋ mɩɩrɛ.

⁶ Ŋɩɩ nɛ La TƖƖNA bʋl wɩaa pɩ ʋ wʋlaabʋlla Jɛrɩmaaya. Ʋ sɩ,

⁷ “Wɩɩ-la mɩ-na ma TƖƖNA, Iziral tɩŋŋaa Wɩa sɩ bʋla nɛ ŋ-la: Bʋla pɩ Juda tinteeŋ kuoro, nɩɩ-la sɩ tɩmɩŋ dɩ ŋ kʋ chɛ na wɩaa mɩ teeŋ, Ijipiti tinteeŋ kuoro laalɩyuoro-la sɩ kʋ lɩɩ dɩ ba pɛ ŋ lɛ, ba jaŋ mɩɩra mʋ ba tɩtɩa tinteeŋ Ijipiti.

⁸ Ŋɩɩ nɛ Babɩlɔŋ nɩaa jaŋ mɩɩra kʋ yuo tabalɩŋ deeŋ. Ba jaŋ yuo diiu a nyɩgʋ dɩ ʋ dii tel.

⁹ Wɩɩ-la mɩ-na ma TƖƖNA sɩ bʋla nɛ ŋ-la: Má sɩ́ ma tɩtɩa nyɩsʋ a bʋl, ‘Babɩlɔŋ tɩmma-la jaŋ lenla.’ Ba bɩ jaŋ lemma.

¹⁰ Dɩ ma nɛ fa paala yuo dii Babɩlɔŋ tɩŋŋaa laalɩyuoroo kala sɩɩ yuoma ma, aŋ ka ba nɩalɩŋ sɩ bolimo dʋndʋŋa ma ba lɛŋŋɛɛ lɛ, ba jaŋ wuo kʋ lɩɩ a nyɩgɛ tabalɩŋ deeŋ dɩ ʋ dii tel.”

¹¹ Babɩlɔŋ tɩŋŋaa laalɩyuoro-la sɩ leŋ Jerusalɛm yuonuŋ aŋ mɩɩrɛ a tɩŋ Ijipiti tinteeŋ laalɩyuoroo wɩaa, ŋɩɩ harɩŋ nɛ

¹² Jɛrɩmaaya suomo lɩɩ tabal-la lɛ dɩ ʋ mʋ Bɛnjamɩŋ tinteeŋ a laa ʋ tinteeŋ kpaalɩŋ nɩalɩŋ sɩ hɛ nɩmɛ tʋɔŋ.

¹³ Ama ʋ sɩ mʋ yi Bɛnjamɩŋ boi-baalɩŋ, nɩalɩŋ sɩɩ pɔ leriŋ nɩhɩaŋ, ʋ yɩrɩŋ nɛ fa Ɩrɩja, a ŋaa Sɛlɛmaaya nanʋala aŋ ŋaa Hananaaya ma nihiŋ, ʋ kɛnʋ aŋ bʋl, “Ŋ lenla aŋ mʋ pɛ Babɩlɔŋ tɩŋŋaa lɛ nɛ.”

¹⁴ Ŋɩɩ nɛ Jɛrɩmaaya bʋl, “Wɩɩŋ deeŋ bɩ wʋtɩtɩɩ ŋaa. Mɩ-na bɩ ma leŋe aŋ mʋ pɛ Babɩlɔŋ tɩŋŋaa lɛ.” Ama Ɩrɩja bɩ Jɛrɩmaaya teeŋ jegile, aŋ kɛnʋ mʋ tɩntɩnnɩ-hɩasɩŋ sɩpaaŋ.

¹⁵ Ba na baanɩŋ Jɛrɩmaaya nyuŋ a ŋmobu aŋ kɛnʋ tɔ dɩa Jonataŋ sɩ ŋaa teŋ ŋmʋnsʋra dɩa lɛ. Ba fa kɛŋ ʋ dɩa-la bɩrɩmɛ nɩtɔɔrɛ dɩa nɛ.

¹⁶ Ba fa tɔ Jɛrɩmaaya nɩtɔɔrɛ dɩa sɩ hɛ tinteeŋ bʋbʋɔŋ nɛ, ʋ hɛ nɩmɛ a dieni.

¹⁷ Ŋɩɩ nɛ kuoro Zedikaaya tɩŋ ba mʋ kɛnʋ kaa kɔ kuoro dɩa. Nɩmɛ nɛ ʋ lʋara pɩɛsʋ, “La TƖƖNA bɩ wɩɩ bʋlaa?” Jɛrɩmaaya sɩ, “Oo ʋ bʋla nɛ, ʋ jaŋ joŋuŋ hɛ Babɩlɔŋ kuoro nɩsɩŋ lɛ.”

¹⁸ Ŋɩɩ nɛ Jɛrɩmaaya pɩɛsɛ kuoro Zedikaaya, “Wʋbɛɛ nɛ mɩ ŋaa a chei ŋ-na koo ŋ tɩntɩnnɩ-hɩasɩŋ koo nɩaa deemba, ma kɛmmɛ tɔ dɩa?

¹⁹ Nɩɩ nɛ ŋ Wɩa wʋlaabʋlla-la sɩ bʋl wɩaa pɩŋ hɛ, nɩalɩŋ sɩ sɩ, ‘Babɩlɔŋ kuoro bɩ jaŋ kʋ yuoŋ koo a yuo tinteeŋ deeŋ?’

²⁰ Kuoro, mɩ nɩhɩaŋ, mɩɩ sʋlʋŋ jegile nɩɩ. Leŋ dɩ mɩ bʋl wɩɩ-la mɩ sɩ kɛnɛ: Bɩra sɩ́ mɩ kaa mɩɩra mʋ Jonataŋ sɩ ŋaa teŋ ŋmʋnsʋra dɩa, dɩ ŋ ŋaa ŋɩɩ, mɩ jaŋ sʋʋ nɩmɛ.”

²¹ Ŋɩɩ nɛ kuoro Zedikaaya pa wombiiŋ dɩ ba joŋ Jɛrɩmaaya hɛ laalɩyuoro-la sɩɩ pɔ kuoro kaala lɛ, aŋ pʋpʋ boroboro-la ba sɩɩ yallɛ womporuŋ lɛ see dɩ ba kala dɛrɛ tabal-la lɛ. Ŋɩɩ nɛ Jɛrɩmaaya ka laalɩyuoro-la sɩɩ pɔ kuoro kaala-la tʋɔŋ.