JƐRƖMAAYA 36 - WƖA TENIŊ

Jehoyakim nyɩgɛ Jɛrɩmaaya teniŋ

¹ Josaaya nanʋala Jehoyakim sɩ dii Juda tinteeŋ kuoruŋ ʋ jɩ-nɛsɛ lɛ nɛ, La TƖƖNA bʋl wɩɩŋ deeŋ a pɩ Jɛrɩmaaya:

² “Joŋ teniŋ a ŋmʋnsɛ wɩalɩŋ kala mɩ sɩ bʋla tɩgɛ Iziral arɩ Juda lɛ arɩ tinteye-la dɔnsʋŋ, a chɩŋ bʋa-la lɛ mɩ sɩ suomo a bʋl wɩaa pɩpɩŋ, bʋa-la lɛ Josaaya sɩ dii kuoruŋ a kaa kɔ lɛɛlɛ.

³ Kapo Juda nɩaa nɛ nɩɩ wʋlɔrʋnʋ-la mɩ sɩɩ bɩɩnʋ dɩ mɩ joŋo hɛ ba lɛ, ba jaŋ bɩrɩma lɩɩ ba wʋbɔŋŋɔɔ lɛ. Dɩ ba nɛ ŋaa ŋɩɩ, mɩ jaŋ joŋ ba wʋbɔŋŋɔɔ arɩ ba wʋcheelee a chɛba.”

⁴ Ŋɩɩ nɛ Jɛrɩmaaya yɩrɛ Neria nanʋala Baruk, a bʋbʋl wɩalɩŋ kala La TƖƖNA sɩ bʋla pʋ, ka Baruk ŋmʋnsa hɩhɛ teniŋ lɛ.

⁵ Ŋɩɩ nɛ Jɛrɩmaaya bʋla pɩ Baruk, “Ba pɔ mɩ bɩra sɩ́ La TƖƖNA dɩɩ-bal-la jʋʋ nɛ.

⁶ Ŋɩɩ wɩaa, mʋ La TƖƖNA dɩɩ-bal-la tapʋlɩɩ-la ba sɩɩ vɔɔ niiŋ, a karɩmɛ La TƖƖNA niiŋ wɩalɩŋ mɩ sɩ bʋla ŋ ŋmʋnsɛ. Karɩmɛba a pɩ Juda nɩalɩŋ kala sɩ lɩɩ ba tasɩŋ kɔ.

⁷ Kapo ba jaŋ kɔ La TƖƖNA sɩpaaŋ a sʋlʋ aŋ bɩrɩma lɩɩ ba wʋbɔŋŋɔɔ lɛ, bɛɛ wɩaa La TƖƖNA sɩ na baanɩŋ a bʋl wɩalɩŋ tɩgɛ nɩaa deemba lɛ bɩ bana kɛnɛ.”

⁸ Ŋɩɩ nɛ Neria nanʋala Baruk ŋaa wɩalɩŋ kala Wɩa wʋlaabʋlla Jɛrɩmaaya sɩ sɩ ʋ ŋaa. La TƖƖNA dɩɩ-bal-la lɛ ʋ karɩmɛ La TƖƖNA niiŋ wɩalɩŋ sɩ hɛ teŋ-la tʋɔŋ.

⁹ Josaaya nanʋala Jehoyakim sɩ dii Juda kuoruŋ ʋ jɩsɩŋ banɔŋ chɛnsɩŋ nibi lɛ, bʋa-la lɛ nɛ Jerusalɛm nɩaa kala arɩ nɩalɩŋ sɩ lɩɩ Juda tasɩŋ kʋ vɔɔ niiŋ a sʋl La TƖƖNA.

¹⁰ Baruk fa chɩŋ Safaŋ nanʋala Gɛmarɩa sɩ ŋaa teŋ ŋmʋnsʋra dɩa lɛ nɛ, dɩa-la fa hɛ nyuŋ kaala-la lɛ nɛ, a kpagɛ Wɩa dɩɩ-bal-la boi-baal falɩɩ-la, aŋ karɩmɛ wɩalɩŋ kala Jɛrɩmaaya sɩ bʋla sɩ hɛ teŋ-la tʋɔŋ La TƖƖNA dɩɩ-bal-la lɛ a pɩ nɩalɩŋ kala.

¹¹ Gɛmarɩa nanʋala Mɩkaaya sɩ ŋaa Safaŋ nihiŋ sɩ nɩɩ La TƖƖNA wɩalɩŋ kala sɩ hɛ teŋ-la tʋɔŋ,

¹² ʋ sii mʋ teŋ ŋmʋnsʋrʋ-la dɩa sɩ hɛ kuoru dɩa lɛ, lee-la tɩntɩnnɩ-hɩasɩ-la kala sɩ hɔnɔ: Ɛlɩsama sɩ ŋaa teŋ ŋmʋnsʋra, Sɛmaaya nanʋala Delaaya, Akɩbɔ nanʋala Ɛlɩnataŋ, Safaŋ nanʋala Gɛmarɩa, Hananaaya nanʋala Zedikaaya arɩ tɩntɩnnɩ-hɩasɩ-la dɔnsʋŋ kala.

¹³ Mɩkaaya sɩ bʋl wɩalɩŋ kala ʋ sɩ nɩa dɩ Baruk karɩma teŋ-la a pɩ nɩalɩŋ dɛrɛ,

¹⁴ tɩntɩnnɩ-hɩasɩ-la kala tɩŋ Nɛtanɩa nanʋala Jehudi, sɩ ŋaa Sɛlɛmaaya nihiŋ a ŋaa Kus ma nihi-lɩɛrɛ dɩ ba bʋla pɩ Baruk, “Kɛŋ teŋ-la ŋ sɩ karɩma pɩ nɩalɩŋ kaa kɔ.” Ŋɩɩ nɛ Neria nanʋala Baruk kori teŋ-la a kaa mʋ ba teeŋ.

¹⁵ Ba bʋla pʋ, “Yaa tuu hɔŋ a karɩmɛ teŋ-la pɩla.” Ŋɩɩ nɛ Baruk karɩma pɩba.

¹⁶ Ʋ sɩ karɩmɛ wɩalɩŋ ba nɩɩ, fawʋllʋŋ kɛmba ba bibeŋ dɔŋɔ aŋ bʋla pɩ Baruk, “La maga la mʋ bʋl wɩaa deemba kala a pɩ kuoro nɛ.”

¹⁷ Ŋɩɩ nɛ ba pɩɛsɛ Baruk, “Bʋla pɩla, ɛɛ nɛ ŋ ŋaa a ŋmʋnsɛ wɩaa deemba kala? Jɛrɩmaaya nɛ bʋl wɩaa deembaa?”

¹⁸ Baruk bʋl, “Oo, ʋ nɛ bʋl wɩaa deemba kala mɩ kɛŋ pensi daaŋ ŋmʋnsɛba a hɛ teniŋ lɛ.”

¹⁹ Ŋɩɩ nɛ tɩntɩnnɩ-hɩasɩ-la bʋla pɩ Baruk, “Ŋ dɩ Jɛrɩmaaya, má mʋ faa. Má sɩ́ leŋe dɩ nʋʋkala jɩŋ lee-la ma sɩ hɛ.”

²⁰ Ba joŋ teŋ-la a bil Ɛlɩsama sɩ ŋaa teŋ ŋmʋnsʋra dɩa lɛ, aŋ mʋ kuoro teeŋ kaala lɛ a bʋl wɩalɩŋ kala pʋ.

²¹ Ŋɩɩ nɛ kuoro tɩŋ Jehudi dɩ ʋ mʋ joŋ teŋ-la kɔ. Jehudi mʋ joŋ teŋ-la Ɛlɩsama sɩ ŋaa teŋ ŋmʋnsʋra dɩa lɛ a kaa kɔ a karɩma pɩ kuoro, ka tɩntɩnnɩ-hɩasɩ-la kala chɩŋ ʋ sɛmɛ.

²² Jɩna tʋɔŋ chɛŋ nibi lɛ nɛ, dɩ kuoro fa hɔŋ waarɩŋ sɩ yie jʋʋ ʋ hʋhɔŋ dɩa-la lɛ, ka nyiniŋ didii pupoiŋ tʋɔŋ a chɩŋ ʋ sɩpaaŋ.

²³ Dɩ Jehudi nɛ karɩmɛ wɩalɩŋ sɩ hɛ teŋ-la tʋɔŋ naaderee batori koo banɛsɛ, kuoro yie kɛŋ sɩɩ-bie nɛ a keriba a joŋo hɛ nyiŋ-la sɩ hɛ pupoiŋ lɛ. Ʋ ŋaa ŋɩɩ nɛ a nyɩgɛ teŋ-la kala.

²⁴ Kuoro arɩ ʋ nanzɔɔba-la kala sɩ nɩɩ wɩaa deemba, fawʋllʋŋ bɩ ba kɛnɛ koo ba ŋaa wɩaa a dagɛ arɩ ba tʋɔŋ cheye.

²⁵ Ɛlɩnataŋ, Delaaya arɩ Gɛmarɩa fa paala sʋl kuoro ma nɛ arɩ ʋ sɩ́ teŋ-la nyɩgʋ, ama ʋ bɩ ba teeŋ jegile,

²⁶ aŋ mɩɩra bʋla pɩ kuoro nanʋala Jɛramɛɛl, Azɩrɩɛl nanʋala Sɛraaya arɩ Abɩdɛɛl nanʋala Sɛlɛmaaya dɩ ba kɛŋ Baruk sɩ ŋaa Wɩa teniŋ kerichi arɩ Wɩa wʋlaabʋlla Jɛrɩmaaya. Ama La TƖƖNA kɛmba faa nɛ.

²⁷ Kuoro sɩ nyɩgɛ teŋ-la tʋɔŋ wɩalɩŋ Jɛrɩmaaya sɩ bʋla, Baruk ŋmʋnsɛ harɩŋ, La TƖƖNA bʋl wɩaa pɩ Jɛrɩmaaya. Ʋ sɩ,

²⁸ “Joŋ teniŋ dɔŋɔ a ŋmʋnsɛ wɩalɩŋ sɩ hɛ bumbuŋ teŋ-la lɛ a hɛ ʋ lɛ, ʋ nɛ Juda kuoro Jehoyakim nyɩgɛ ŋɩɩ.

²⁹ Bʋla pɩ Juda tinteeŋ kuoro Jehoyakim, wɩɩ-la mɩ-na ma TƖƖNA sɩ bʋla nɛ ŋ-la: Ŋ nyɩgɛ teŋ-la nɛ aŋ bʋl, ‘Bɛɛ nɛ tɩɩ ŋ ŋmʋnsɛ arɩ Babɩlɔŋ kuoro jaŋ sɛnɛ kʋ chei tinteeŋ deeŋ a kpʋ ʋ nɩaa arɩ ʋ pʋsʋŋ kala?’

³⁰ Ŋɩɩ wɩaa, wɩɩ-la mɩ-na ma TƖƖNA sɩ bʋla tɩgɛ Juda kuoro Jehoyakim lɛ nɛ ŋ-la: Ʋ bɩ jaŋ kɛŋ nʋʋ sɩ jaŋ hɔŋ Devit kuoru kpasa-la nyuŋ. Ba jaŋ joŋ ʋ kʋsʋʋŋ yuo ta dɩ wɩa kpʋʋ wɩɩhɛyɛ, dɩ nyalɩŋ ma nyala kɛnʋ tɩtaŋɩŋ.

³¹ Mɩ jaŋ dɔgɩsɛ ʋ dɩ ʋ biiriŋ arɩ ʋ tɩntɩnnaa a tɩŋ ba wʋbɔŋŋɔɔ wɩaa. Mɩ jaŋ kɛŋ wʋlɔrʋnʋ-la wɩaa mɩ sɩ bʋla tɩgɛ ba lɛ kaa kʋ hɛ ba dɩ nɩalɩŋ kala sɩ hɛ Jerusalɛm arɩ Juda lɛ, bɛɛ wɩaa ba bɩ jegile nɩɩ mɩ teeŋ.”

³² Ŋɩɩ nɛ Jɛrɩmaaya bɩra joŋ teniŋ dɔŋɔ a pɩ Neria nanʋala Baruk sɩ ŋaa Wɩa teniŋ kerichi. Ŋɩɩ nɛ Jɛrɩmaaya bʋl wɩalɩŋ, Baruk ŋmʋnsɛba hɩhɛ teŋ-la lɛ, wɩalɩŋ kala fa sɩ hɛ teŋ-la Juda kuoro Jehoyakim sɩ nyɩga tʋɔŋ. Ba ŋmʋnsɛ wʋdaŋ sɩ nagɛ bumbuŋ wɩalɩŋ nɛ a pɛ.