JƐRƖMAAYA 35 - WƖA TENIŊ

Rekab doho nɩaa

¹ Bʋa-la lɛ Josaaya nanʋala Jehoyakim sɩ dii Juda tinteeŋ kuoruŋ nɛ, La TƖƖNA bʋla pɩ Jɛrɩmaaya:

² “Mʋ Rekab dɩa nɩaa leriŋ, a yɩrɛba dɩ ba kɔ mɩ dɩɩ-bal-la sɛmɛ dɩɩsɩ-la dɔŋɔ dɩ ŋ pɩba girep nɛnɛɛ sɩnɩŋ dɩ ba nyʋa.”

³ Ŋɩɩ nɛ mɩ mʋ yɩrɛ Jazanɩa sɩ ŋaa Jɛrɩmaaya dɔŋ ma nanʋala, aŋ ŋaa Habazɩnaya ma nihiŋ, arɩ ʋ naambiiriŋ a pɛ ʋ hambolibiisiŋ kala lɛ, Rekab dɩa nɩaa kala.

⁴ Mɩ kɛmba kaa kɔ La TƖƖNA dɩɩ-bal-la, a kɛmba jʋʋ Ɩgɩdalɩa nanʋala Hanaŋ sɩ ŋaa Wɩa tɩntɩnnʋ hambolibiisiŋ dɩa. Dɩa-la fa tɩgɛ tɩntɩnnɩ-hɩasɩ-la dɩa lɛ nɛ, kʋ-la sɩ sugili Salum nanʋala Maasɛya sɩ ŋaa nɩɩ-la sɩɩ pɔ boi-niiŋ dɩa nyuŋ.

⁵ Ŋɩɩ nɛ mɩ joŋ gbansɩŋ girep nɛnɛɛ sɩnɩŋ sɩ suo arɩ nyʋnyʋalʋsʋŋ a bil Rekab dɩa nɩalɩŋ sɩpaaŋ aŋ bʋla pɩba, “Ma nyʋa girep nɛnɛɛ sɩnɩŋ.”

⁶ Ama ba mɩɩra bʋla pɩmɛ, “La bɩ tɩɩnɛnɛɛ sɩnɩŋ ka nyʋa, bɛɛ wɩaa la naabalɩma Rekab nanʋala Jonadab bʋl ŋ-la nɛ a pɩla: ‘Ma-na koo ma doho nɩaa kʋŋkala bɩ maga dɩ ʋ nyʋa girep nɛnɛɛ sɩnɩŋ.

⁷ Má sɩ́ dɩɩsɩŋ ma saa, a sɩ́ kɩaa ma duu koo a bil tɩɩnɛnɛɛ bagɩsɩŋ. Ma bɩ maga ma kɛŋ kɩaa deemba kʋŋkala. Ma maga ma jʋjʋʋ lɛŋŋɛɛ nɛ bʋa na-kala. Ŋɩɩ nɛ ma jaŋ hɔŋ tintee-la lɛ ma sɩ ŋaa nʋhʋɔraa a dieni.’

⁸ La to wɩalɩŋ kala la naabalɩma Rekab nanʋala Jonadab sɩ dagɛla nɛ. La-na koo la haalaa koo la biiriŋ kʋŋ ha bɩ girep nɛnɛɛ sɩnɩŋ nyʋa,

⁹ koo a saa dɩɩsɩŋ a jʋjʋʋ, koo a bil tɩɩnɛnɛɛ bagɩsɩŋ koo kʋdiilee bagɩsɩŋ.

¹⁰ La jʋʋ lɛŋŋɛɛ nɛ a chaasa to wɩalɩŋ kala la naabalɩma Rekab nanʋala Jonadab sɩ dagɛla.

¹¹ Ama Babɩlɔŋ kuoro Nebukadineza sɩ kʋʋ yuo tinteeŋ deeŋ nɛ, la sɩ, ‘Má kɔ, la maga la mʋ Jerusalɛm, a wuo fori Babɩlɔŋ tɩŋŋaa arɩ Siiria laalɩyuoroo nɩsɩŋ lɛ.’ Ŋɩɩ nɛ tɩɩ la hɛ Jerusalɛm lɛ ŋɩɩ.”

¹² Ŋɩɩ nɛ La TƖƖNA bʋl wɩaa pɩ Jɛrɩmaaya:

¹³ Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: “Mʋ pɩɛsɛ Juda baalaa arɩ Jerusalɛm nɩaa na: ‘Ma bɩ jaŋ gʋnnɛ wɩaa a to mɩ niiŋ wɩaa koo?’ Ma TƖƖNA nɛ pɩɛsa.

¹⁴ Rekab nanʋala Jonadab bʋla pɩ ʋ hambolibiisi-la dɩ ba sɩ́ girep nɛnɛɛ sɩŋ-la nyʋa. Ŋɩɩ nɛ ba kɛŋ wɩɩ-la kaa tɩŋ, arɩ jɩnɩŋ kala ba bɩ girep nɛnɛɛ sɩnɩŋ ka nyʋa, bɛɛ wɩaa baa to ba naabalɩmaba niiŋ nɛ. Ama mɩ-na bʋl wɩaa pɩma bʋlɩa bʋlɩa nɛ ka ma bɩ mɩ niiŋ to.

¹⁵ Mɩ tɩŋ mɩ wʋlaabʋllaa kala ma teeŋ nɛ bʋlɩa bʋlɩa. Ba bʋla pɩma, ‘Ma kʋŋkala maga ma bɩrɩma lɩɩ ma wʋbɔŋŋɔɔ lɛ nɛ, a bɩrɩmɛ ma wʋŋaalaa. Má sɩ́ vesiŋ to, dɩ ma nɛ ŋaa ŋɩɩ, ma jaŋ hɔŋ tintee-la mɩ sɩ joŋo pɩ ma dɩ ma naabalɩmaba lɛ.’ Ama ma bɩ jegile nɩɩ mɩ teeŋ koo a kaa tɩŋ.

¹⁶ Rekab nanʋala Jonadab doho nɩaa kɛŋ wɩɩ-la ba naabalɩma sɩ bʋla pɩba kaa tɩŋ nɛ, ama nɩaa deemba bɩ mɩ niiŋ to.

¹⁷ Ŋɩɩ wɩaa, wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Má jegile nɩɩ, mɩ jaŋ kɛŋ wʋlɔrʋnʋ-la kala wɩaa mɩ sɩ bʋla a kaa kʋ hɛ Juda arɩ nɩalɩŋ kala sɩ hɛ Jerusalɛm lɛ. Mɩ bʋl wɩaa pɩba nɛ, ama ba bɩ jegile nɩɩ. Mɩ yɩrɛba nɛ, ama ba bɩ sɛyɛ.”

¹⁸ Ŋɩɩ nɛ Jɛrɩmaaya bʋla pɩ Rekab doho nɩalɩŋ, “Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: ‘Ma sɛɩ wɩalɩŋ ma naabalɩma Jonadab sɩ dagɛma nɛ, a to wɩalɩŋ kala ʋ sɩ dagɛma, a ŋaa ba kala.’

¹⁹ Ŋɩɩ wɩaa, wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: ‘Rekab nanʋala Jonadab jaŋ kɛŋ hambolibie bʋa na-kala dɩ ʋ tɩma pɩpɩmɛ.’ ”