JƐRƖMAAYA 34 - WƖA TENIŊ

Ba kpʋrɩsɛ Zedikaaya dɩgɩlaa

¹ Babɩlɔŋ kuoro Nebukadineza arɩ ʋ laalɩyuoroo arɩ ʋ kuori gentisiŋ arɩ ʋ nɩaa sɩ hɛ tintee-la kala ʋ sɩɩ beŋ lɛ sɩ mʋa a yuyuo Jerusalɛm arɩ tasɩ-la kala sɩ gollu lɛ nɛ, La TƖƖNA bʋl wɩaa a pɩ Jɛrɩmaaya.

² Wɩɩ-la La TƖƖNA, Iziral tɩŋŋaa Wɩa sɩ bʋla nɛ ŋ-la: Mʋ Juda tinteeŋ kuoro Zedikaaya teeŋ a bʋla pʋ, “Wɩɩ-la mɩ-na ma TƖƖNA sɩ bʋla nɛ ŋ-la: Mɩɩ chɛ mɩ joŋ tabalɩŋ deeŋ a hɛ Babɩlɔŋ kuoro nɩsɩŋ lɛ nɛ dɩ ʋ nyɩgʋ.

³ Ŋ bɩ jaŋ fori ʋ nɩsɩŋ lɛ, ba jaŋ yuo kɛnɩŋ a kaa mʋ hɛ ʋ nɩsɩŋ lɛ. Ŋ jaŋ na Babɩlɔŋ kuoro arɩ ŋ sɩɩŋ, ŋ dɩ ʋ jaŋ joŋ sɩaa chaasɛ dɔŋɔ a bʋl wɩaa. Ŋɩɩ harɩŋ nɛ ba jaŋ kɛnɩŋ mʋ Babɩlɔŋ.

⁴ Ama Juda tinteeŋ kuoro Zedikaaya, jegile nɩɩ nii-la mɩ-na ma TƖƖNA sɩ hɛ, wɩɩ-la mɩ-na ma TƖƖNA sɩ bʋla tɩgɛ ŋ lɛ nɛ ŋ-la: Ŋ bɩ jaŋ sʋʋ laalɩŋ lɛ.

⁵ Ŋ jaŋ sʋʋ fɛlɛlɛ. Ba sɩ hɛ yoho nyiniŋ a zil ŋ nyɩmmaba ŋɩɩ, nɩalɩŋ sɩ laa sɩpaaŋ a dii kuoruŋ aŋ ka pɩŋ, ŋɩɩ tɩtɩa nɛ ba jaŋ hɛ ŋ ma yoho nyiniŋ a ziliŋ a yel ŋ lɛ a bʋl, ‘Ou la nɩhɩaŋ.’ Mɩ-na ma TƖƖNA tɩtɩa nɛ hɛ niiŋ deeŋ, mɩ nɛ bʋla.”

⁶ Ŋɩɩ nɛ Wɩa wʋlaabʋlla Jɛrɩmaaya bʋl wɩaa deemba kala a pɩ Juda tinteeŋ kuoro Zedikaaya Jerusalɛm lɛ.

⁷ Bʋa-la lɛ dɩ Babɩlɔŋ kuoro ka yuo Jerusalɛm arɩ Juda tabala-la dɔnsʋŋ ba ha sɩ bɩ yuo laa: Lakɩs arɩ Azɛka. Tabalaa deemba ba sɩ saa kɛrɩsɩŋ golli dʋndʋŋa nɛ fa ha ka Juda lɛ.

Ba joŋ yosuŋ ta

⁸ Kuoro Zedikaaya arɩ nɩalɩŋ kala sɩ hɛ Jerusalɛm lɛ bil niiŋ arɩ ba jaŋ joŋ yosuŋ ta, ŋɩɩ harɩŋ La TƖƖNA bʋl wɩaa pɩ Jɛrɩmaaya.

⁹ Nʋʋkala fa maga ʋ joŋ ʋ yomo sɩ ŋaa Hiburu tɩɩna a ta nɛ dɩ ʋ mʋ, baalaa arɩ haalaa kala. Juu tɩɩna kala bɩ maga dɩ ʋ kɛŋ ʋ dɔŋɔ tɩɩna bil dɩ ʋ ŋaa ʋ yoŋ.

¹⁰ Ŋɩɩ nɛ tɩntɩnnɩ-hɩasɩ-la arɩ nɩalɩŋ kala sɛɩ a bil niiŋ arɩ ba jaŋ joŋ ba yoŋ-baalaa arɩ ba yoŋ-haalaa ta a bɩra sɩ́ ba kaa bɩrɩmɛ yosi. Ba sɛɩ a jomba ta.

¹¹ Ama ʋ ŋɩɩ harɩŋ, ba bɩra kɛŋ ba tʋɔbɩɩnaa bɩrɩmɛ, a kɛsɛ ba yosu-la ba fa sɩ joŋo ta ba bɩra ŋaa yosi.

¹² Ŋɩɩ nɛ La TƖƖNA bʋl wɩaa a pɩ Jɛrɩmaaya. Ʋ sɩ,

¹³ “Wɩɩ-la mɩ-na ma TƖƖNA, Iziral tɩŋŋaa Wɩa sɩ bʋla nɛ ŋ-la: Mɩ fa bil niiŋ nɛ mɩ dɩ ma naabalɩmaba pɛgɛ, bʋa-la lɛ mɩ sɩ kɛmba kaa kʋ lɩɩ Ijipiti tinteeŋ lɛ, lee-la ba fa sɩ ŋaa yosi. Mɩ fa bʋla pɩba:

¹⁴ Jɩsɩŋ balɩpɛ na-kala lɛ, ma kʋŋkala maga ŋ joŋ Hiburu tɩɩna sɩ ŋaa ŋ yomo ta nɛ, nɩalɩŋ sɩ joŋ ba tɩtɩa yalla pɩma. Dɩ ʋ nɛ tɩma pɩŋ jɩsɩŋ balɩdʋ, ʋ maga ŋ joŋu ta nɛ dɩ ʋ mʋ. Ama ma naabalɩmaba bɩ jegile nɩɩ mɩ teeŋ koo a kaa tɩŋ.

¹⁵ Ma sɩ bɩrɩma lɩɩ ma wʋbɔŋŋɔɔ lɛ aŋ ŋaa wɩaa ba bʋa lɛ ʋ bɩ diene. Ma kʋŋkala fa joŋ ʋ dɔŋɔ tɩɩna sɩ ŋaa ʋ yomo ta nɛ. Ma paala bil niiŋ nɛ mɩ sɩpaaŋ mɩ dɩɩ-bal-la lɛ mɩ yɩrɩŋ sɩ hɛ.

¹⁶ Ama lɛɛlɛ ma bɩra mɩɩrɛ harɩŋ nɛ a chei mɩ yɩrɩŋ. Ma kʋŋkala bɩra mɩɩra kɛsɛ ma yoŋ-baala-la arɩ yoŋ-haala-la ma fa sɩ joŋo ta dɩ ba mʋ lee-kala ba sɩɩ chɛ nɛ. Ma fʋgɛba nɛ ba bɩra ŋaa ma yosi.

¹⁷ Ŋɩɩ wɩaa, wɩɩ-la mɩ-na ma TƖƖNA sɩ bʋla nɛ ŋ-la: Ma bɩ mɩ niiŋ to, ma bɩ ma dɔnsʋŋ tɩŋŋaa sɩ ŋaa ma yosuŋ joŋo ta. Ŋɩɩ wɩaa mɩ-na jaŋ jomma ta: Mɩ jaŋ leŋ dɩ laalɩŋ, losuŋ arɩ nyanyal-bɔmʋŋ kpʋma. Mɩ jaŋ leŋ dɩ ma nagɛ kʋŋ sɩɩ sʋɔrʋ kuori-gentisiŋ kala sɩ hɛ dʋnɩa lɛ teeŋ.

¹⁸ Baala-la sɩ chei mɩ nii-la sɩ hɛ mɩ dɩ ba pɛgɛ, a bɩ wɩalɩŋ sɩ mʋ tɩgɛ nii-la lɛ ba sɩ bile mɩ sɩpaaŋ to, mɩ jaŋ ŋaa wɩaa ba lɛ a nagɛ nɛ-bie ba sɩ kaa keri balɩa a bil, aŋ vɩvɛŋ nammɩa-la ba sɩ kaa kere bil balɩa pɛgɛ.

¹⁹ Juda arɩ Jerusalɛm sɩpaalaaraa, kuoro dɩa tɩntɩnnɩ-hɩasɩŋ, Wɩɩsʋllɩ sɩpaalaaraa arɩ tintee-la nɩaa kala sɩ to nɛ-bie-la ba sɩ kaa kere bil balɩa pɛgɛ bɩbal,

²⁰ mɩ jaŋ jomba hɛ ba dʋndɔŋŋɔɔ sɩɩ chɛ ba lɩɩsɛ ba mɩɩsɩŋ nɩsɩŋ lɛ. Ba kʋsʋʋnʋŋ jaŋ bɩrɩmɛ zaaraa arɩ baga kɩaa kʋdiilee.

²¹ Mɩ jaŋ joŋ Juda tinteeŋ kuoro Zedikaaya arɩ ʋ tɩntɩnnɩ-hɩasɩŋ a hɛ ba dʋndɔmɔ-la sɩɩ chɛ ba lɩɩsɛ ba mɩɩsɩŋ nɩsɩŋ lɛ, Babɩlɔŋ kuoro laalɩyuoro-la sɩ mɩɩrɛ harɩŋ a bɩra bɩ maa yuo.

²² Mɩ-na ma TƖƖNA nɛ bʋla, mɩ jaŋ pa wombiiŋ, a kɛmba mɩɩra kɔ tabalɩŋ deeŋ. Ba jaŋ yuo laaʋ a nyɩgʋ dɩ ʋ dii tel. Mɩ jaŋ leŋ dɩ Juda tasɩŋ chei a pɩŋ, dɩ nʋʋkala sɩ́ wuo hɔŋ nɩmɛ.”