JƐRƖMAAYA 33 - WƖA TENIŊ

La TƖƖNA hɛ niiŋ arɩ ʋ jaŋ bɩra kɛŋ ʋ nɩaa kɔ ba tinteeŋ

¹ Jɛrɩmaaya fa ha sɩ hɛ nɩalɩŋ sɩɩ pɔ leriŋ kaala-la lɛ ba sɩ kɛnʋ tɔ hɛ, ŋɩɩ nɛ La TƖƖNA bʋl wɩaa pʋ lɩamɩŋ lɛ:

² Wɩɩ-la La TƖƖNA nɛ sɩ ŋaa dʋnɩa, ʋ nɛ sɩ mɛʋ a leŋ ʋ chɩŋ woruŋ, ʋ yɩrɩŋ ŋaa La TƖƖNA sɩ bʋla nɛ ŋ-la:

³ “Yɩrɛmɛ, mɩ jaŋ sɛɩ, a dagɩŋ wʋduoruŋ arɩ wɩalɩŋ sɩ faa ŋ bɩ ba jɩŋ.

⁴ Wɩɩ-la mɩ-na ma TƖƖNA, Iziral tɩŋŋaa Wɩa sɩ bʋla tɩgɛ dɩɩsɩ-la sɩ hɛ tabalɩŋ deeŋ lɛ arɩ Juda kuoroo dɩɩsɩ-la ba sɩ saa vaŋkumba yelli a yuo laalɩŋ yige lo

⁵ bʋa-la lɛ Babɩlɔŋ tɩŋŋaa sɩ yuo diiba nɛ ŋ-la: Dɩɩsɩ-la jaŋ su arɩ sʋʋnʋŋ nɩalɩŋ mɩ sɩ jaŋ faasa na baanɩŋ a kpʋ. Mɩ jaŋ lɩɩsɛ mɩ sɩaa tabalɩŋ deeŋ lɛ a tɩŋ wʋbɔmɔ-la kala ba sɩ ŋaa wɩaa.

⁶ Ama arɩ ŋɩɩ kala, mɩ ha jaŋ pɩ mɩ nɩaa yarɩfɩɛlaa dɩ ba duori. Mɩ jaŋ vaarɛba a leŋ dɩ ba tinteeŋ chaasa kɛŋ fɩɛlɩŋ dɩ ba hɔŋ sɔm.

⁷ Mɩ jaŋ kɛŋ Juda arɩ Iziral nɩaa mɩɩra lɩɩ yoŋ-baga-la ba sɩ yuo kɛsɛba mʋ a kɔ, a leŋ dɩ ba chɩŋ a nagɛ ŋɩɩ ba fa sɩ naga.

⁸ Mɩ jaŋ pɩɩsɛ wʋbɔŋ-la kala ba sɩ ŋaa mɩ lɛ a ta, a joŋ wʋbɔmɔ-la ma kala ba sɩ vɩamɛ aŋ ŋaa chɛba.

⁹ Ŋɩɩ nɛ tabalɩŋ deeŋ jaŋ laa yɩrɩŋ pɩmɛ dɩ mɩ tʋɔŋ tɔrɛ, dɩ nɩaa dɩdɛnnɛmɛ a zizilmi dʋnɩa tinteye-la kala nɩaa sɩ nɩɩ wʋzɔmɔ-la mɩ sɩ ŋaa pʋ sɩpaaŋ. Fawʋllʋŋ jaŋ kɛmba dɩ ba chichel a tɩŋ dʋa bal-la arɩ fɩɛl-la mɩ sɩ pʋ wɩaa.”

¹⁰ Wɩɩ-la La TƖƖNA sɩ bʋla nɛ ŋ-la: “Ma bʋla a mʋ tɩgɛ leriŋ deeŋ lɛ, ‘Ʋ pɩŋ hoi nɛ, nɩaa arɩ pʋsʋŋ tuo.’ Arɩ ŋɩɩ kala, Juda tasɩŋ arɩ Jerusalɛm womporunu-la sɩ pɩŋ pɛɩ ŋɩɩ, nɩaa koo pʋsʋŋ tuo ba lɛ, nɩaa jaŋ bɩra nɩɩ

¹¹ tʋɔtɔrɛ goŋ nɩmɛ. Ha-falaa arɩ ba balaba jaŋ bɩra ŋaa goŋ, dɩ nɩalɩŋ ma sɩ kɛŋ Wɩɩsʋlʋŋ kɩaa kɔ mɩ-na ma TƖƖNA dɩa dɩ ba lɔllɛmɛ bʋl, ‘Má lɔllɛ La TƖƖNA doluŋ kala Tɩɩna, bɛɛ wɩaa ʋ wɩaa zɔmɔ ʋ chonuŋ bɩ dɛrɛ.’ Mɩ jaŋ leŋ dɩ tinteeŋ deeŋ bɩra kɛŋ dʋa arɩ ʋ fa sɩ nagɛ ŋɩɩ. Mɩ-na ma TƖƖNA nɛ bʋla.”

¹² Wɩɩ-la La TƖƖNA, doluŋ kala Tɩɩna sɩ bʋla nɛ ŋ-la: “Leriŋ deeŋ sɩ pɩŋ hoi a bɩ nɩaa arɩ pʋsʋŋ kɛnɛ ʋ tasɩŋ kala lɛ, pʋsʋŋ dɩ-diilee jaŋ hɛ nɩmɛ, dɩ pie-daaraa kiri ba piesee mʋ dɩ ba pɩna wiesi.

¹³ Tintee-la peelee sɩ yʋga tasɩŋ lɛ, wɩɩjʋʋlʋŋ dɩɩrɩŋ dundollu-la sɩ hɛ peelee bʋbʋɔŋ arɩ wɩɩpɔsʋŋ nadiiŋ, Bɛnjamɩŋ tinteeŋ lɛ, tabiisi-la sɩ golli Jerusalɛm arɩ Juda tasɩŋ lɛ, pie-daaraa jaŋ bɩra daa ba piesee. Mɩ-na ma TƖƖNA nɛ bʋla.”

¹⁴ La TƖƖNA sɩ, “Tapʋlaa ka kɔ nɛ, mɩ jaŋ leŋ dɩ tʋɔtɔrɛ nii-la mɩ sɩ hɛ pɩ mɩ nɩaa Iziral tɩŋŋaa arɩ Juda nɩaa sɛnɛ kʋ ŋaa wʋtɩtɩɩ.

¹⁵ Tapʋlɩa-la lɛ, mɩ jaŋ lɩɩsɛ nʋʋ sɩ ŋaa tʋɔpʋl Tɩɩna Devit doho nɩaa tʋɔŋ dɩ ʋ dii kuoruŋ. Ʋ jaŋ ŋaa wɩaa ba bʋa lɛ arɩ wʋtɩtɩɩ tintee-la lɛ.

¹⁶ Tapʋlɩa-la lɛ, ba jaŋ laa Juda nɩaa ta, dɩ Jerusalɛm nɩaa hɔŋ sɔm. Ba jaŋ yɩyɩrɛ tabal-la: La TƖƖNA nɛ ŋaa la kɛŋ tʋɔpʋla.”

¹⁷ Wɩɩ-la La TƖƖNA sɩ bʋla nɛ ŋ-la: “Devit doho nʋʋ nɛ jaŋ dii kuoruŋ bʋa na-kala Iziral tinteeŋ lɛ.

¹⁸ Levi doho nɩaa ma sɩ ŋaa Wɩɩsʋllɩ sɩpaalaaraa jaŋ hɛ nɩmɛ bʋa na-kala a ŋɩŋaa kʋnyɩgaa Wɩɩsʋlʋŋ, mɩaa Wɩɩsʋlʋŋ, a kpʋ pʋsʋŋ ma a ŋɩŋaa Wɩɩsʋlʋŋ.”

¹⁹ La TƖƖNA bɩra bʋl wɩaa pɩ Jɛrɩmaaya:

²⁰ Wɩɩ-la La TƖƖNA sɩ bʋla nɛ ŋ-la: “Dɩ ŋ nɛ jaŋ wuo chei nii-la sɩ hɛ mɩ dɩ wɩɩhɛyɛ arɩ tɩtaŋɩŋ pɛgɛ, a pɔ dɩ wɩa sɩ́ pɔsʋ bʋa-la sɩ maga lɛ, dɩ taŋ ma sɩ́ biru bʋa-la sɩ maga lɛ,

²¹ ŋɩɩ-na, ŋ jaŋ wuo chei nii-la sɩ hɛ mɩ dɩ mɩ tɩntɩnna Devit pɛgɛ, arɩ nii-la mɩ sɩ bile mɩ dɩ Levi doho nɩaa pɛgɛ arɩ ba nɛ ŋaa Wɩɩsʋllɩ sɩpaalaaraa a tɩtɩŋ mɩ sɩpaaŋ, dɩ Devit bɩra sɩ́ doho nʋʋ kɛŋ sɩ jaŋ dii kuoruŋ.

²² Mɩ jaŋ leŋ dɩ mɩ tɩntɩnna Devit doho nɩaa arɩ Levi doho nɩalɩŋ sɩɩ tɩŋ mɩ sɩpaaŋ doho nɩaa pʋŋ woruŋ a bɩ nii kɛnɛ a nagɛ chɛnwʋlaa sɩ hɛ wɩa-nyuŋ koo hagɩlɩ-bumbugulo sɩ pɩŋ mʋgʋ-balɩŋ niiŋ.”

²³ La TƖƖNA bʋl wɩaa pɩ Jɛrɩmaaya:

²⁴ “Ŋ bɩ nɩa arɩ nɩaa ka bʋl arɩ mɩ vɩa kuori gentisiŋ deemba balɩa mɩ sɩ lɩɩsa ta nɛɛ? Ŋɩɩ wɩaa ba sɩɩŋ bɩ mɩ nɩaa ka su, a bɩra bɩ bene arɩ ba ŋaa tintee ma.

²⁵ Wɩɩ-la La TƖƖNA sɩ bʋla nɛ ŋ-la: Dɩ mɩ nɛ fa bɩ niiŋ bile mɩ dɩ wɩɩhɛyɛ arɩ tɩtaŋɩŋ pɛgɛ a bil wombiee pɩ wɩa-nyuŋ arɩ tinteeŋ dɩ ba tuto,

²⁶ ŋɩɩ-na mɩ fa jaŋ vɩa Jekɔb doho nɩaa arɩ mɩ tɩntɩnna Devit, a bɩ jaŋ lɩɩsɛ ʋ hambolibiisiŋ dɔŋɔ dɩ ʋ beŋ Abɩraham, Aɩzɩk arɩ Jekɔb doho nɩaa. Mɩ jaŋ leŋ dɩ ba bɩra mɩɩra kɔ ba tinteeŋ a fá ba nenige.”