JƐRƖMAAYA 32 - WƖA TENIŊ

Jɛrɩmaaya yɔɔ tinteeŋ

¹ Zedikaaya sɩ dii Juda tinteeŋ kuoruŋ, ʋ jɩ-fii lɛ nɛ La TƖƖNA bʋl wɩaa a pɩ Jɛrɩmaaya, dɩ Nebukadineza ma sɩ dii Babɩlɔŋ kuoruŋ, ʋ jɩsɩŋ fii arɩ chori lɛ nɛ ŋɩɩ.

² Bʋa-la lɛ, dɩ Babɩlɔŋ kuoro laalɩyuoroo kʋʋ yuo Jerusalɛm a gollu chu, ka ba kɛŋ Wɩa wʋlaabʋlla Jɛrɩmaaya ma tɔ hɛ laalɩyuoro-la sɩɩ pɔ kuoro kaala lɛ, Juda tinteeŋ kuoru dɩa lɛ.

³ Juda tinteeŋ kuoro Zedikaaya nɛ fa kɛnʋ tɔ hɛ lee-la, aŋ bʋl, “Bɛɛ nɛ tɩɩ ŋ bʋl ŋɩɩ? Ŋ sɩ sɩ, ‘Wɩɩ-la La TƖƖNA sɩ bʋla nɛ ŋ-la: Mɩɩ chɛ mɩ joŋ tabalɩŋ deeŋ a hɛ Babɩlɔŋ kuoro nɩsɩŋ lɛ dɩ ʋ yuo diiu.

⁴ Juda tinteeŋ kuoro Zedikaaya bɩ jaŋ fori Babɩlɔŋ tɩŋŋaa nɩsɩŋ lɛ. Ʋ jaŋ sɛnɛ jʋʋ Babɩlɔŋ kuoro nɩsɩŋ, ʋ dɩ ʋ jaŋ joŋ sɩaa chaasa dɔŋɔ aŋ bʋbʋl wɩaa. Ʋ jaŋ naʋ arɩ ʋ tɩtɩa sɩɩŋ.

⁵ Ʋ jaŋ kɛŋ Zedikaaya mʋ Babɩlɔŋ tinteeŋ, dɩ ʋ hɛ nɩmɛ a mʋ yi bʋa-la lɛ mɩ sɩ dɔgʋsʋ woruŋ. Dɩ ma nɛ yuo Babɩlɔŋ tɩŋŋaa, ma bɩ jaŋ wuo yuo diiba.’ ” Mɩ-na ma TƖƖNA nɛ bʋla.

⁶ La TƖƖNA bʋla pɩ mɩ-na Jɛrɩmaaya,

⁷ “Ŋ nyɩmbie Salum nanʋala Hanamɛl jaŋ kɔ ŋ teeŋ a bʋl, ‘Laa mɩ ŋmaŋkaa-la sɩ hɛ Anatɔf lɛ a yɔɔ, bɛɛ wɩaa ŋ nɛ ŋaa mɩ naambile sɩ tɩgɛ mɩ lɛ a jaŋ dii mɩ dʋa dɩ mɩ nɛ tuo. Ŋ nɛ kɛŋ wombiiŋ dɩ ŋ yɔbʋ.’ ”

⁸ La TƖƖNA sɩ bʋl ŋɩɩ, mɩ naambie Hanamɛl kɔ mɩ teeŋ, nɩalɩŋ sɩɩ pɔ leriŋ kaala-la tʋɔŋ a bʋl, “Laa mɩ ŋmaŋkaa-la sɩ hɛ Anatɔf lɛ Bɛnjamɩŋ tinteeŋ a yɔɔ. Ŋ nɛ kɛŋ wombiiŋ dɩ ŋ wuo bilu, yɔɔ dɩ ʋ ŋaa ŋ kʋŋ.” Ŋɩɩ nɛ mɩ jɩŋ arɩ La TƖƖNA nɛ bʋl wɩɩŋ deeŋ.

⁹ Mɩ laa tintee-la yɔɔ mɩ naambie Hanamɛl teeŋ aŋ dɩɩsɛ warɩpʋla fii arɩ balɩpɛ a pʋ.

¹⁰ Ŋɩɩ nɛ mɩ joŋ mɩ neniiŋ teŋ-la sɩ dagɛ wɩɩ-la mɩ sɩ ŋaa lɛ, aŋ kaa pilime tɔ, a leŋ nʋʋ pɛ na, aŋ joŋ warɩpʋla-la daŋ sanɩa lɛ a magɩsɛ.

¹¹ Mɩ joŋ teŋ-la sɩ daga arɩ mɩ yɔɔ tintee-la nɛ, kʋ-la mɩ sɩ pilime tɔ sɩ kɛŋ wɩalɩŋ sɩ mʋ tɩgɛ tintee-la lɛ, a pɛ kʋ-la mɩ sɩ bɩ pilime tɔ lɛ,

¹² a joŋo pɩ Baruk sɩ ŋaa Neria nanʋala, aŋ ŋaa Maasɛya ma nihiŋ. Mɩ ŋaa ŋɩɩ nɛ mɩ naambie Hanamɛl sɩɩŋ lɛ arɩ nɩalɩŋ kala sɩ paa ba neniee a ŋaa pɛ-naaraa, arɩ Juu tɩmma-la kala sɩ hɔŋ nɩalɩŋ sɩɩ pɔ leriŋ kaala-la lɛ.

¹³ Ba kala sɩpaaŋ wɩaa deemba nɛ mɩ bʋla pɩ Baruk:

¹⁴ “Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Laa tenniŋ deemba sɩ daga arɩ mɩ yɔɔ tintee-la nɛ, kʋ-la ba sɩ pilime tɔ arɩ kʋ-la ba sɩ bɩ pilime tɔ kala a joŋo hɛ pupoiŋ tʋɔŋ dɩ ba hɛ nɩmɛ a dieni a sɩ́ chei,

¹⁵ bɛɛ wɩaa, wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Nɩaa jaŋ bɩra yɔɔ dɩɩsɩŋ, tinteyee arɩ girep tɩɩsɩŋ bagɩsɩŋ tinteeŋ deeŋ lɛ.”

¹⁶ Mɩ sɩ joŋ tenni-la sɩ daga arɩ mɩ yɔɔ tintee-la a pɩ Neria nanʋala Baruk a dɛrɛ, mɩ sʋl La TƖƖNA a bʋl,

¹⁷ “La TƖƖNA Wɩɩjarɩbakɔ, ŋ dol-balɩŋ arɩ ŋ naduo-la nɛ ŋ kaa ŋaa wɩa-nyuŋ arɩ tinteeŋ. Wɩɩkala tuo a dolie pɩŋ.

¹⁸ Ŋ yie dagɛ ŋ chonuŋ a pɩ nɩaa bʋɩba nɛ, ama ŋ yie dɔgɩsɛ nɩaa biiriŋ arɩ ba nihee a tɩŋ ba nyɩmmaba wʋbɔŋŋɔɔ wɩaa. Ŋ nɛ Wɩa sɩ faasa kɛŋ doluŋ, ŋ yɩrɩŋ nɛ La TƖƖNA, doluŋ kala Tɩɩna.

¹⁹ Ŋ wɩaa kala ŋaa wʋbala nɛ, ŋ wʋŋaalaa ma kala ŋaa wʋduoru. Ŋ sɩaa ka na nuhuobiinee wʋŋaalaa kala nɛ. Ŋ yie tiŋ nʋʋkala a lɩɩ ŋɩɩ ʋ mɛlɛ arɩ ʋ wʋŋaalaa sɩ naga nɛ.

²⁰ Ŋ ŋaa wʋmagɩlaa arɩ wʋkpuŋkperisiŋ nɛ Ijipiti tinteeŋ lɛ, aŋ ha ŋɩŋaaba a kaa kɔ jɩnɩŋ, Iziral tɩŋŋaa arɩ dʋnɩa nɩaa kala tʋɔŋ. Ŋɩɩ leŋ ŋ laa yɩrɩ-balɩŋ lee-kala.

²¹ Ŋ ŋaa wʋmagɩlaa arɩ wʋkpuŋkperisiŋ nɛ, a dagɛ ŋ doluŋ, a ŋaa wɩaa sɩ kɛŋ fawʋllʋŋ a kɛŋ ŋ nɩaa Iziral tɩŋŋaa kaa kʋ lɩɩ Ijipiti tinteeŋ lɛ.

²² Ŋ joŋ tinteeŋ deeŋ a pɩ Iziral tɩŋŋaa nɛ, kʋ-la ŋ fa sɩ ŋmɩɛsa arɩ ŋ jaŋ joŋo pɩ ba naabalɩmaba, tintee-la sɩ sɩma woruŋ.

²³ Ba kʋ jʋʋ tintee-la nɛ a tɩɩʋ, ama ba bɩ ŋ niiŋ sɛyɛ koo a to wombii-la ŋ sɩ bile dɩ ba tuto. Ba bɩ wɩalɩŋ ŋ sɩ daga dɩ ba ŋaa kʋŋkala ŋaa. Ŋɩɩ nɛ ŋ kɛŋ wʋlɔrʋŋ deeŋ kala kʋ hɛ ba lɛ.

²⁴ Bee na ŋɩɩ ba sɩ saa vaŋkumba dɩ ba yuo dii tabal-la. A tɩŋ laalɩŋ, losuŋ arɩ nyanyalɩŋ wɩaa, tabal-la jaŋ jʋʋ Babɩlɔŋ tɩmma-la sɩɩ yuou nɩsɩŋ. Wɩɩ-la ŋ sɩ bʋla sɛnɛ ŋaa nɛ, ʋ nɛ ŋ nɩna ŋɩɩ lɛɛlɛ.

²⁵ Ŋ sɩ jaŋ joŋ tabal-la a hɛ Babɩlɔŋ tɩŋŋaa nɩsɩŋ lɛ ma, ŋ-na La TƖƖNA Wɩɩjarɩbakɔ ha bʋla pɩmɛ, ‘Joŋ warɩpʋla a yɔɔ tintee-la, aŋ leŋ dɩ nɩaa ŋaa pɛ-naaraa.’ ”

²⁶ Ŋɩɩ nɛ La TƖƖNA bʋla pɩ Jɛrɩmaaya:

²⁷ “Mɩ nɛ ma TƖƖNA, nuhuobiinee kala Wɩa. Wɩɩ nɛ hɛ nɩmɛ a dolie pɩmɛɛ?

²⁸ Ŋɩɩ wɩaa, wɩɩ-la mɩ-na ma TƖƖNA sɩ bʋla nɛ ŋ-la: Mɩɩ chɛ mɩ joŋ tabalɩŋ deeŋ hɛ Babɩlɔŋ kuoro Nebukadineza arɩ ʋ nɩaa nɩsɩŋ lɛ nɛ dɩ ba yuo diiu.

²⁹ Babɩlɔŋ tɩmma-la sɩɩ yuo tabalɩŋ deeŋ jaŋ kʋ jʋʋ joŋ nyiniŋ hɛʋ. Ba jaŋ nyɩgʋ dɩ ʋ dii tel, a pɛ dɩɩsɩ-la nɩaa sɩ kaa ŋaa wɩaa mɩ baanɩŋ sii lɛ. Dɩɩsɩ-la nyuŋ nɛ ba nyɩgɛ kʋsʋɔrʋsʋŋ pɩpɩ vene-la ba sɩɩ yɩrɛ Baal, aŋ pɛ ŋaa kʋnyʋalaa Wɩɩsʋlʋŋ ma aa pɩ vesiŋ.

³⁰ Iziral tɩŋŋaa arɩ Juda nɩaa hambiiriŋ kala lɛ a kaa kɔ ŋ-la, ba bɩ wʋzɔŋ kala ŋaa mɩ sɩɩŋ lɛ, see wʋbɔŋ. Wʋtɩtɩɩ, Iziral tɩŋŋaa bɩ wʋzɔŋ kala ŋaa, ba mɩɩra kɛŋ vesi-la ba tɩtɩa sɩ ŋaa nɛ a leŋ mɩ baanɩŋ sii. Mɩ-na ma TƖƖNA nɛ bʋla.

³¹ A chɩŋ tapʋlɩɩ-la ba sɩ saa tabalɩŋ deeŋ a kaa kɔ jɩnɩŋ, ba leŋe mɩ baanɩŋ chaasa sii nɛ. Mɩ baanɩŋ sie nɛ a magɛ mɩ leŋ dɩ tabal-la nyɩɩgɛ mɩ sɩaa lɛ.

³² Iziral tɩŋŋaa arɩ Juda nɩaa leŋe mɩ baanɩŋ sii nɛ a tɩŋ wʋbɔmɔ-la kala ba sɩ ŋaa wɩaa, ba dɩ ba kuoroo arɩ ba tɩntɩnnɩ-hɩasɩŋ, ba Wɩɩsʋllɩ sɩpaalaaraa arɩ ba nɩalɩŋ sɩ sɩ ba ŋaa mɩ wʋlaabʋllaa nɛ, a pɛ Juda nɩaa arɩ ba nɩalɩŋ sɩ hɛ Jerusalɛm lɛ.

³³ Ba joŋ harɩŋ nɛ yɩamɛ, ba sɩpaaŋ tuo mɩ lɛ. Mɩ sɩ dagɛba bʋlɩa bʋlɩa ma kala, ba bɩ jegile nɩɩ, koo a sɛɩ dɩ mɩ kɛmba tʋra kɩɩ.

³⁴ Ba joŋ ba tɔŋŋɔɔ mɩ sɩɩ kɩsʋ nɛ a bil mɩ dɩɩ-bal-la mɩ yɩrɩŋ sɩ hɛ lɛ, a ŋaa ʋ kɛŋ disiniŋ.

³⁵ Ba saa vesiŋ dɩ-kpaaraa nɛ Bɛŋ Hɩnɔm fuonaaŋ lɛ a pɩ vene-la ba sɩɩ yɩrɛ Baal dɩ ba kɛsɛ ba hambolibiisiŋ arɩ ba hantolibiisiŋ a kpaarɛ vene-la ba sɩɩ yɩrɛ Mɔlɛk. Wɩɩ mɩ sɩ bɩ ba daga, ŋɩɩ paala bɩ mɩ tʋɔbɩɩnaa ma kɔ arɩ ba jaŋ ŋaa wʋkɩsɩŋ deeŋ a leŋ dɩ Juda ŋaa wʋbɔŋ.

³⁶ Ma bʋlaa tɩgɛ tabalɩŋ deeŋ lɛ, ‘Laalɩŋ, losuŋ arɩ nyanyalɩɩ jaŋ leŋ dɩ taŋ deeŋ jʋʋ Babɩlɔŋ kuoro nɩsɩŋ,’ ama wɩɩ-la mɩ-na ma TƖƖNA, Iziral tɩŋŋaa Wɩa sɩ bʋla nɛ ŋ-la:

³⁷ Mɩ jaŋ sɛnɛ kɛsɛba hɛ dɔŋɔ lɛ a kaa lɩɩ tinteye-la kala lɛ mɩ sɩ chaasa na baanɩŋ mɩ yaraa hosi mɩ kiriba hɛ lɛ. Mɩ jaŋ kɛmba mɩɩra kɔ leriŋ deeŋ dɩ ba hɔŋ sɔm.

³⁸ Ba jaŋ ŋaa mɩ nɩaa, dɩ mɩ ma ŋaa ba Wɩa.

³⁹ Mɩ jaŋ leŋ dɩ ba kɛŋ tʋɔ-bala a ŋɩŋaa wʋbala sɩ jaŋ leŋ dɩ ba fɩfámɛ bʋa na-kala, dɩ ŋɩɩ ŋaa wʋzɔŋ a pɩ ba dɩ ba doho nɩaa ba ha sɩ jaŋ lʋl.

⁴⁰ Mɩ jaŋ hɛ niiŋ sɩ bɩ dɩdɛrɩŋ kɛnɛ mɩ dɩ ba pɛgɛ. Mɩ bɩ jaŋ kɔ dɩ mɩ vɩa dɩ mɩ ŋaa wʋzɔŋŋɔɔ a pɩba. Mɩ jaŋ ŋaa dɩ ba fɩfámɛ, dɩ ŋɩɩ leŋ dɩ ba sɩ́ mɩ harɩŋ mɩɩrʋ.

⁴¹ Mɩ jaŋ jʋjʋɔsɛ dɩ mɩ nɛ ŋaa wʋzɔŋŋɔɔ pɩba, aŋ sɛnɛ kɛŋ mɩ tʋɔŋ arɩ mɩ wɩɩkala a leŋ dɩ ba hɔŋ tinteeŋ deeŋ lɛ.”

⁴² Wɩɩ-la La TƖƖNA bɩra sɩ bʋla nɛ ŋ-la: “Mɩ sɩ lɛrɛ wʋbɔŋ-balaa deemba kala kʋ hɛ nɩaa deemba lɛ ŋɩɩ, ŋɩɩ tɩtɩa nɛ mɩ jaŋ pɩba dʋa-la kala mɩ sɩ hɛ niiŋ arɩ mɩ jaŋ joŋo pɩba.

⁴³ Nɩaa jaŋ bɩra yɔɔ ŋmaŋkaanɩŋ tinteeŋ deeŋ lɛ, tintee-la ma sɩ sɩ Babɩlɔŋ nɩaa yuo laa nɛ ʋ pɩŋ hoi, nɩaa arɩ pʋsʋŋ tuo ʋ lɛ.

⁴⁴ Nɩaa jaŋ joŋ warɩpʋla a yɔɔ ŋmaŋkaanɩŋ, dɩ ba ŋmʋnsɛ tenniŋ a joŋ neniee, a kɛŋ tenni-la pilime tɔ ka dɩ nɩaa dii ŋaa pɛ-naaraa. Wɩɩŋ deeŋ jaŋ ŋaa Bɛnjamɩŋ tinteeŋ arɩ tabiisi-la sɩ golli Jerusalɛm lɛ. Ʋ jaŋ ŋaa Juda tasɩŋ arɩ tintee-la peelee sɩ yʋga lɛ, a pɛ wɩɩjʋʋlʋŋ dundollu-la sɩ hɛ peelee bʋbʋɔŋ arɩ wɩɩpɔsʋŋ nadiiŋ dɩɩrɩŋ, bɛɛ wɩaa mɩ jaŋ leŋ dɩ ba bɩra mɩɩra kɔ ba tinteeŋ. Mɩ-na ma Tɩɩna nɛ bʋla.”