JƐRƖMAAYA 31 - WƖA TENIŊ

Iziral tɩŋŋaa jaŋ mɩɩra kɔ Wɩa teeŋ

¹ La TƖƖNA sɩ, “Bʋa-la lɛ, mɩ jaŋ ŋaa Iziral doho nɩaa kala Wɩa, dɩ ba ma ŋaa mɩ nɩaa.”

² Wɩɩ-la La TƖƖNA sɩ bʋla nɛ ŋ-la: “Nɩalɩŋ sɩ foro laalɩŋ lɛ, ba jaŋ cheŋ nyu-sɩmɩŋ tintee-hɩlɩŋ lɛ. Mɩ jaŋ kɔ a leŋ dɩ Iziral tɩŋŋaa na wiese.”

³ La TƖƖNA fa kɛŋ ʋ tɩtɩa dagɛla nɛ a bʋl, “Mɩ choma nɛ, chono-la bɩ dɩdɛrɩŋ kɛnɛ. Mɩ kɛmma kʋ kpagɛ mɩ tɩtɩa nɛ, a kɛŋ zile arɩ kenyiri ma teeŋ.

⁴ Iziral tɩmma, mɩ jaŋ bɩra kɛmma kɩɩ dɩ ma chɩŋ woruŋ. Ma jaŋ bɩra paa ma chɩnchɩgɩsɩŋ, a lɩɩ dɩ ma dɩ nɩalɩŋ tʋɔŋ sɩ tɔrɔ gʋa.

⁵ Ma jaŋ bɩra pɛrɛ girep tɩɩsɩŋ bagɩsɩŋ Samarɩa dundolluŋ nyuŋ. Paaraa jaŋ chɔnsɛ tɩɩsɩ-la, a nɩɩ ba nɛnɛɛ sɩma.

⁶ Tapʋlɩɩ dɔŋ jaŋ kɔ, nɩalɩŋ sɩ pɔ leriŋ a bibeŋ jaŋ faasa yɩrɛ Efirem dundolluŋ nyuŋ a bʋl, ‘Má kɔ dɩ la mʋ Zaayɔŋ, La TƖƖNA Wɩa teeŋ.’ ”

⁷ Wɩɩ-la La TƖƖNA sɩ bʋla nɛ ŋ-la: “Má yɩɩ yɩɩlaa arɩ tʋɔtɔrʋŋ a pɩ Iziral. Má ŋaa goŋ a pɩ tinteyee kala tʋɔŋ kʋbalɩŋ. Má leŋ dɩ nɩaa nɩɩ ma sɩ dɛnnʋ a bʋl, ‘La TƖƖNA, laa ŋ nɩaa ta, Iziral tɩŋŋaa nɩkaana-la.’

⁸ Má bee na, mɩ jaŋ kɛmba lɩɩ wɩɩpɔsʋŋ nagʋa tinteeŋ dɩɩrɩŋ a kɔ, mɩ jaŋ kɛmba lɩɩ dʋnɩa sɛmɛ na-kala a kʋ hɛ dɔŋɔ. Nyʋlɩmaa arɩ gbɛrɩgɛɛ jaŋ hɛ ba tʋɔŋ, hapuugoo arɩ haalaa sɩɩ chɛ ba lʋl ba luoruŋ wʋwɩɩ ma jaŋ hɛ ba tʋɔŋ. Ba jaŋ yʋgɛ woruŋ a mɩɩra kɔ.

⁹ Ba jaŋ kɔ aŋ yiyel, mɩ nɛ kɛmba mɩɩraa kɔ, ba jaŋ chʋchʋɔlɛmɛ. Mɩ jaŋ kɛmba to lere-la sɩ kɛŋ lɩɩŋ yʋgɛ, dɩ ba vɛŋ tinteeŋ sɩ magɛ dɔŋɔ nyuŋ a sɩ́ gɛrʋ, bɛɛ wɩaa mɩ nɛ Iziral tɩŋŋaa nyɩmma. Efirem nɛ ŋaa mɩ hambolibii bumbuŋ.

¹⁰ Tinteyee nɩaa, má jegile nɩɩ mɩ-na ma TƖƖNA wɩaa. Má heele bʋlba a pɩ nɩalɩŋ sɩ hɔŋ mʋgʋ-balɩŋ niiŋ dɩ-bolii. Mɩ-na nɛ kɛŋ Iziral tɩŋŋaa pɩsɛ, mɩ saa jaŋ bɩra kɛmba kʋ hɛ dɔŋɔ. Mɩ jaŋ beŋ mɩ nɩaa nyuŋ a nagɛ pie-daara sɩɩ beŋ ʋ piesee ŋɩɩ.”

¹¹ La TƖƖNA sɩ, “Mɩ jaŋ laa Iziral tɩŋŋaa ta, mɩ jaŋ laaba ta nɩalɩŋ sɩ dolie kɩɩba nɩsɩŋ lɛ.

¹² Ba jaŋ kɔ a ŋaa goŋ arɩ tʋɔtɔrʋŋ Zaayɔŋ dundolluŋ nyuŋ. Ba jaŋ jʋɔsɛ a tɩŋ kʋ-daŋ-la mɩ-na ma TƖƖNA sɩ joŋo pɩba wɩaa. Mɩ pɩba mɩaa, girep nɛnɛɛ sɩ-falɩŋ arɩ nʋʋŋ, a pɛ biiri-la ba nɛsɩŋ arɩ ba piesee sɩ lʋla lɛ. Ba jaŋ nagɛ lɩga sɩ kɛŋ fɩɛlɩŋ woruŋ, ba tʋɔŋ bɩra bɩ jaŋ chei.

¹³ Hatoloo jaŋ gʋa dɩ ba tʋɔŋ tɔrɛ, a pɛ bapʋɔsaa arɩ banɩhɩasɩŋ lɛ. Mɩ jaŋ leŋ dɩ ba yele bɩrɩmɛ tʋɔtɔrʋŋ. Mɩ jaŋ nyagɛ ba bɔyɛ, a leŋ dɩ ba tʋɔ-chei-la bɩrɩmɛ tʋɔtɔrʋŋ.

¹⁴ Mɩ jaŋ leŋ dɩ Wɩɩsʋllɩ sɩpaalaaraa vɔgɛ arɩ Wɩɩsʋlʋŋ kʋ-daŋ, a leŋ dɩ mɩ nɩaa vɔgɛ arɩ kʋ-daŋ-la mɩ sɩ jaŋ pɩba. Mɩ-na ma TƖƖNA nɛ bʋla.”

¹⁵ Wɩɩ-la La TƖƖNA sɩ bʋla nɛ ŋ-la: “Nʋʋ nɩɩ yel Rama lɛ. Nɩɩ-la faasa yiyel nɛ. Rakɛl ka yel ʋ biiriŋ wɩaa nɛ. Ʋʋ yel nɛ a bɩ sɛɩ dɩ ba nyagɛ ʋ bɔyɛ, bɛɛ wɩaa ʋ biiriŋ kala sʋba nɛ.”

¹⁶ Wɩɩ-la La TƖƖNA sɩ bʋla nɛ ŋ-la: “Má leŋ yele, aŋ fɩɩsɛ ma sɩlɩɩrɩŋ ta, bɛɛ wɩaa mɩ jaŋ tiŋ ma lɔlʋŋ chɩmɩŋ. Mɩ-na ma TƖƖNA nɛ bʋla. Ba jaŋ lɩɩ ba dʋndɔŋŋɔɔ tinteeŋ a mɩɩra kɔ.

¹⁷ Ŋɩɩ wɩaa má kɛŋ yɩɛlaa nɛ a mʋ tɩgɛ ma chie lɛ. Mɩ-na ma TƖƖNA nɛ bʋla. Ma biiriŋ jaŋ mɩɩra kɔ ba tɩtɩa tinteeŋ.

¹⁸ Mɩ chaasa nɩɩ Efirem sɩ yele a bʋl, ‘Ŋ kɛmmɛ tʋraa kɩɩ a nagɛ nɛ-bie ba ha sɩ bɩ daga nɛ, mɩ sɛɩ ŋ kɛmmɛ tʋra kɩɩ. Kɛmmɛ mɩɩra kɔ ŋ teeŋ, dɩ mɩ hɛ ŋ leriŋ, bɛɛ wɩaa ŋ nɛ mɩ TƖƖNA Wɩa.

¹⁹ Mɩ sɩ ŋaa wɩaa a yeŋŋi, mɩ bɩrɩma lɩɩ nɛ. Mɩ sɩ kʋ jɩŋ wɩalɩŋ sɩaa, mɩ gʋrɛ nyuŋ nɛ. Hɩɩsɩŋ fa kɛmmɛ mɩ muuri, bɛɛ wɩaa hɩɩsɩ-la diimi a tɩŋ wɩalɩŋ kala mɩ sɩ ŋaa mɩ hambiriŋ kala lɛ nɛ.’

²⁰ Efirem nɛ mɩ hambolibii-chooluŋ, mɩ tʋɔŋ tɔrɛ ʋ nyuŋ. Mɩ yie bʋl wɩaa a jʋʋ ʋ lɛ ma nɛ, ama mɩ haa liisi ʋ wɩaa nɛ. Mɩ tʋɔŋ kɛnʋ woruŋ, mɩ chaasaa fá ʋ nenige. Mɩ-na ma TƖƖNA nɛ bʋla.

²¹ Má bil magɩlaa wombiee lɛ, má bil magɩla-la sɩ jaŋ dagɛma wombiiŋ. Má jɩŋ wombii-jalɩɩ-la wɩaa, wɛŋ-la ma fa sɩ to mʋ. Iziral tɩmma, má mɩɩra kɔ, má mɩɩra kɔ ma tasɩŋ.

²² Ɛɛ nɛ maa chɛ ma gɔllɔ baara diene magɛ, ma Iziral tɩŋŋaa sɩ bɩ wʋtɩtɩɩ kɛnɛ? La TƖƖNA jaŋ ŋaa wʋfalɩɩ dʋnɩa lɛ, haala jaŋ pʋpɔ baala.”

²³ Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: “Dɩ mɩ nɛ kɛmba mɩɩra lɩɩ yoŋ-baga kɔ, nɩalɩŋ sɩ hɛ Juda tinteeŋ arɩ ʋ tasɩŋ lɛ jaŋ bɩra kɔ a bʋl wɩaa deemba: ‘La TƖƖNA jaŋ pɛ tʋɔpʋl dɩa deeŋ sɩ chɩŋ peel-la sɩ bɩ disiniŋ kɛnɛ lɛ nyuŋ.’

²⁴ Nɩaa jaŋ hɔnɔ hɛ dɔŋɔ Juda tinteeŋ arɩ ʋ tasɩŋ kala lɛ, paaraa arɩ nɩalɩŋ sɩ kɛŋ ba pʋsʋŋ gɔllɔɔ baarɛ.

²⁵ Mɩ jaŋ leŋ dɩ nɩalɩŋ sɩ lɔlɔ yaraa polli, a leŋ dɩ nɩalɩŋ ma sɩ yiege bɩra kɛŋ doluŋ.”

²⁶ Ŋɩɩ lɛ nɛ nɩaa jaŋ bʋl, “Mɩ pɩŋ doŋ nɛ aŋ sii mɩ yaraa kala polli, doŋ-la sɩma pɩmɛ.”

²⁷ “Mɩ-na ma TƖƖNA nɛ bʋla, tapʋlaa ka kɔ nɛ, mɩ jaŋ leŋ dɩ nɩaa arɩ pʋsʋŋ bɩra pʋŋa su Iziral arɩ Juda tinteeŋ.

²⁸ Mɩ fa sɩ beŋ ba nyuŋ a kɛmba churi ŋɩɩ, a yigiba lo, a cheiba, a lɛrɛ wʋlɔrʋŋ kʋ hɛ ba lɛ, ŋɩɩ tɩtɩa nɛ mɩ jaŋ bɩra beŋ ba nyuŋ dɩ ba wasa hɔŋ a leŋ dɩ ba chɩŋ woruŋ. Mɩ-na ma TƖƖNA nɛ bʋla.

²⁹ Bʋa-la lɛ nɩaa bɩra bɩ jaŋ bʋl, ‘Nyɩmmaba nɛ chaŋ girep nɛŋ huoruŋ ka ba biiriŋ nyɩlaa mɩɩra nyal.’

³⁰ Ama nʋʋkala jaŋ sʋʋ a tɩŋ ʋ tɩtɩa wʋbɔŋŋɔɔ wɩaa nɛ. Dɩ nʋʋkala nɛ chaŋ girep nɛŋ-huoruŋ, ʋ tɩtɩa nyɩlaa nɛ jaŋ nyal.”

³¹ La TƖƖNA bɩra bʋla, “Bʋa dɔŋ jaŋ kɔ, dɩ mɩ bil nii-falɩŋ mɩ dɩ Iziral tɩŋŋaa arɩ Juda doho nɩaa pɛgɛ.

³² Ʋ bɩ jaŋ nagɛ nii-la mɩ fa sɩ bile mɩ dɩ ba naabalɩmaba pɛgɛ, bʋa-la lɛ mɩ sɩ kɛmba kaa kʋʋ lɩɩ Ijipiti tinteeŋ lɛ. Mɩ fa ŋaa ba bala nɛ, aŋ ka ba ha pɛ vɩa aŋ chei nii-la sɩ hɛ mɩ dɩ ba pɛgɛ. La TƖƖNA nɛ bʋla.”

³³ La TƖƖNA bɩra sɩ, “Bʋa-la lɛ nii-la mɩ sɩ jaŋ bil mɩ dɩ Iziral tɩŋŋaa pɛgɛ nɛ ŋ-la: Mɩ jaŋ joŋ wombii-la mɩ sɩ bile dɩ ba tuto wɩaa hɛ ba nyuŋ lɛ, aŋ ŋmʋnsʋ a hɛ ba tʋɔŋ ma lɛ. Mɩ jaŋ ŋaa ba Wɩa, dɩ ba ma ŋaa mɩ nɩaa.

³⁴ Nʋʋkala bɩra bɩ jaŋ dagɛ ʋ dɔŋɔ tɩɩna koo ʋ naambii ŋɩɩ ʋ sɩ jaŋ ŋaa a jɩmmɛ, bɛɛ wɩaa ba kala jaŋ jɩmmɛ, a chɩŋ nɩbiisiŋ lɛ a kaa jɩl nɩbalaa. Mɩ jaŋ joŋ ba wʋbɔŋŋɔɔ chɛba. Mɩ bɩra bɩ jaŋ liliisi ba wʋbɔŋŋɔɔ wɩaa. Mɩ-na ma Tɩɩna nɛ bʋla.”

³⁵ Wɩɩŋ deeŋ nɛ La TƖƖNA bʋl, nɩɩ-la sɩ leŋe wɩɩpɔsʋŋ pʋpɔsɛ wɩɩhɛyɛ, a leŋ chɛnɛ arɩ chɛnwʋlaa pʋpɔsɛ tɩtaŋɩŋ, ʋ nɛ yie kɛŋ mʋgʋ-balɩŋ vuugi ʋ lɩɩ-peliŋ dɔŋ. Ʋ yɩrɩŋ nɛ La TƖƖNA doluŋ kala Tɩɩna.

³⁶ La TƖƖNA sɩ, “Dɩ kɩaa deemba mɩ sɩ daga nɛ wuo lɛl mɩ sɩaa lɛ, ŋɩɩ-na Iziral doho ma jaŋ lɛl, a bɩra sɩ́ tintee ŋaa mɩ teeŋ.”

³⁷ Wɩɩ-la La TƖƖNA sɩ bʋla nɛ ŋ-la: “Dɩ nʋʋ nɛ jaŋ wuo magɩsɛ wɩa-nyuŋ, a wuo chɛ na dʋnɩa gentine ma, mɩ jaŋ vɩa Iziral doho nɩaa kala, a tɩŋ wɩalɩŋ kala ba sɩ ŋaa. Mɩ-na ma TƖƖNA nɛ bʋla.”

³⁸ La TƖƖNA bɩra sɩ, “Tapʋlaa ka kɔ nɛ, ba sɩ jaŋ wasa saa tabalɩŋ deeŋ a pɩmɛ, a chɩŋ Hananɛl dɩɩ-leŋii-la lɛ a kaa mʋ yi boi-baal-la sɩ hɛ je-gʋnʋŋ lɛ.

³⁹ Ba jaŋ magɩsɛ tintee-la bʋa a chɩŋ ŋɩɩ tegi tegi a mʋ yi Garɛb dundolo aŋ gʋra mʋ Gʋa,

⁴⁰ a kɛŋ fuonaa-la lɛ ba sɩɩ hugi sʋʋnʋŋ aŋ joŋ tʋɔrʋŋ ma tɩta, a pɛ lere-la kala ba sɩ dɩŋa lɛ a mʋ yi Kɩdɩrɔŋ Fuonaaŋ sɩ hɛ wɩɩpɔsʋŋ dɩɩrɩŋ, a kɛŋ ŋɩɩ mʋ yi Janɩŋ Boi-baal-la sɩ hɛ je-gʋnʋŋ lɛ. Leree deemba kala jaŋ ŋaa dɩ-zɔmɔ a pɩ mɩ-na ma TƖƖNA. Ba bɩra bɩ jaŋ kɔ dɩ ba churi tabal-la koo a ŋmobu lo.”