JƐRƖMAAYA 30 - WƖA TENIŊ

Wɩa jaŋ kɛŋ Iziral tɩŋŋaa mɩɩra kɔ ba tinteeŋ

¹ Wɩɩ-la La TƖƖNA sɩ bʋla pɩ Jɛrɩmaaya nɛ ŋ-la:

² “Wɩɩ-la mɩ-na ma TƖƖNA, Iziral tɩŋŋaa Wɩa sɩ bʋla nɛ: Ŋmʋnsɛ wɩalɩŋ kala mɩ sɩ bʋla pɩŋ a hɛ teniŋ lɛ.

³ Tapʋlaa ka kɔ nɛ, mɩ-na ma TƖƖNA jaŋ kɛŋ mɩ nɩaa Iziral tɩŋŋaa arɩ Juda nɩaa mɩɩra lɩɩ yoŋ-baga kɔ, a bɩra leŋ dɩ ba hɔŋ tintee-la mɩ sɩ joŋo pɩ ba naabalɩmaba ʋ ŋaa ba kʋŋ lɛ. Mɩ-na ma TƖƖNA nɛ bʋla.”

⁴ Wɩalɩŋ La TƖƖNA sɩ bʋla tɩgɛ Iziral arɩ Juda lɛ nɛ ŋ-la:

⁵ “Mɩ nɩɩ nɩaa sɩɩ yel fawʋllʋ yele nɛ, yele-la chaasa kɛŋ fawʋllʋŋ nɛ, ba fɩɛla dee.

⁶ Pɩɛsa na: Baala jaŋ wuo lʋl biiriŋ? Bɛɛ nɛ saa tɩɩ mɩ na baduo na-kala dɩ ʋ paa nɩsaa vɔɔ ʋ kawule bʋbʋɔŋ a nagɛ haala sɩɩ chɛ ʋ lʋl, ʋ luoruŋ wʋwɩɩ ŋɩɩ, nʋʋkala nyal sɩaa?

⁷ Tapʋlɩɩ-la chaasa lɔrɛ nɛ. Tapʋlɩɩ dɔŋ jaŋ tuo a nagʋ. Bʋa-la lɛ wʋwalɩmaa jaŋ jʋʋ Jekɔb, ama ʋ jaŋ lɩɩ ba lɛ suoo.”

⁸ La TƖƖNA doluŋ kala Tɩɩna bɩra sɩ, “Dɩ tapʋlɩɩ-la nɛ yie, mɩ jaŋ bori daa-la sɩ laalɛ ba baŋŋaa, aŋ kɛrɛ chɔrʋmɔ-la ma sɩ vɔɔba. Ba bɩra bɩ jaŋ ŋaa nɩwogusuŋ yosi.

⁹ Ama, ba jaŋ tɩma pɩ mɩ-na ba TƖƖNA Wɩa a tɩma pɩ Devit doho nɩɩ-la mɩ sɩ jaŋ lɩɩsɛ dɩ ʋ ŋaa ba kuoro.

¹⁰ Ŋɩɩ wɩaa, má sɩ́ fawʋllʋŋ fá, mɩ tɩntɩnna Jekɔb doho nɩaa. Iziral tɩmma, má sɩ́ leŋe dɩ ma niiree maa. Mɩ-na ma TƖƖNA nɛ bʋla. Mɩ jaŋ sɛnɛ laama ta tintee-bolii-la ma sɩ hɛ lɛ a kɛmma kɔ dɩa. Mɩ jaŋ laa ma doho nɩalɩŋ sɩ hɛ yoŋ-baga lɛ ta. Iziral tinteeŋ jaŋ bɩra kɛŋ fɩɛlɩŋ dɩ ba hɔŋ sɔm, nʋʋkala bɩ jaŋ ŋaa dɩ fawʋllʋŋ kɛmba.

¹¹ Mɩ hɛ ma teeŋ nɛ, mɩ jaŋ laama ta. Mɩ-na ma TƖƖNA nɛ bʋla. Mɩ jaŋ chei tinteye-la kala lɛ mɩ sɩ kɛmma pɩsa hɛ, ama mɩ bɩ jaŋ chei ma-na gbelem gbelem. Mɩ jaŋ kɛmma tʋra kɩɩ arɩ wʋtɩtɩɩ. Mɩ bɩ jaŋ leŋ dɩ ma mʋ pɛɩ, mɩ jaŋ dɔgɩsɛma mʋa.”

¹² Wɩɩ-la La TƖƖNA sɩ bʋla nɛ ŋ-la: “Nʋʋ bɩ ma naawɩɩlɩŋ wuo tɩɩbɛ. Ma pɩrɩna-la bɩ vaarɩna kɛnɛ.

¹³ Nʋʋkala tuo dɩ ʋ sʋla laama, ma naawɩɩlɩŋ bɩ daaluno kɛnɛ. Ma bɩ vaarɩna kɛnɛ.

¹⁴ Ma sɩŋŋaa kala yʋ ma wɩaa nɛ, ba bɩ ma wɩaa chɩla. Mɩ ŋmooma a nagɛ ma dʋndɔmɔ sɩ jaŋ ŋmooma ŋɩɩ nɛ, a dɔgɩsɛma a nagɛ tʋɔhɛɛ tɩɩna sɩ jaŋ ŋaama ŋɩɩ, bɛɛ wɩaa ma cheeriŋ chaasa yʋgɛ nɛ, ma wʋbɔŋŋɔɔ ma faasa yʋgɛ.

¹⁵ Bɛɛ nɛ tɩɩ ma yiyel ma naawɩɩlaa wɩaa, ma hɛɛ-la sɩ bɩ daaluno kɛnɛ wɩaa? A tɩŋ ma cheeriŋ arɩ ma wʋbɔŋŋɔɔ sɩ yʋga wɩaa ŋɩɩ nɛ tɩɩ mɩ joŋ wɩaa deemba ŋaa ma lɛ.

¹⁶ Ama nɩalɩŋ kala sɩ cheima, mɩ ma jaŋ cheiba. Mɩ jaŋ kɛŋ ma dʋndɔŋŋɔɔ kala mʋ yoŋ-baga. Nɩalɩŋ sɩ laa ma kɩaa, ba jaŋ laa ba ma kɩaa. Nɩalɩŋ kala sɩ ŋaa ma bɔmbɔŋ, mɩ ma jaŋ ŋaaba bɔmbɔŋ.

¹⁷ Ama mɩ jaŋ bɩra pɩma yarɩfɩɛlaa, a ŋaa dɩ ma naawɩɩlaa ma fɩɛlɛ, a tɩŋ nɩaa sɩ sɩ Zaayɔŋ nɩaa ŋaa nɩ-kire taalɩa nɛ, nʋʋkala bɩ ba wɩaa chɩla. Mɩ-na ma TƖƖNA nɛ bʋla.”

¹⁸ Wɩɩ-la La TƖƖNA sɩ bʋla nɛ ŋ-la: “Mɩ jaŋ leŋ dɩ mɩ nɩaa Iziral tɩŋŋaa bɩra tɩɩ ba tinteeŋ. Mɩ jaŋ fá ba nenige. Ba jaŋ bɩra paa Jerusalɛm kɛrɩsɩ-la sɩ tele a wasa saa, dɩ kuoru dɩa-la wasa chɩŋ ʋ dɩchɩnɩŋ.

¹⁹ Ba jaŋ yɩɩ yɩɩlaa a lʋlɔllɛmɛ, aŋ ŋaa goŋ a jʋjʋɔsɛ. Mɩ jaŋ leŋ dɩ ba pʋŋa pɛ, ba bɩ jaŋ muuri. Mɩ jaŋ leŋ dɩ nɩaa zizilba, ba bɩ jaŋ bee gʋʋnɛba.

²⁰ Ba biiriŋ jaŋ nagɛ faafaa-la, dɩ ba tasɩŋ ma chɩŋ woruŋ mɩ sɩɩŋ lɛ. Mɩ jaŋ dɔgɩsɛ nɩalɩŋ kala sɩ nyagɛba bil.

²¹ Ba tɩtɩa dɔŋɔ nɛ jaŋ ŋaa ba sɩpaalaara. Nɩɩ-la sɩ jaŋ bibemba jaŋ lɩɩ ba tɩtɩa tʋɔŋ. Mɩ jaŋ kɛnʋ kʋ kpagɛmɛ, dɩ ʋ kʋ yimi. Kʋbɛɛ nɛ nɩɩ-la sɩ jaŋ sɛɩ a kɛŋ ʋ tɩtɩa a kʋ kpagɛmɛ? Mɩ-na ma TƖƖNA nɛ pɩɛsa.

²² Ma jaŋ ŋaa mɩ nɩaa, dɩ mɩ ma ŋaa ma Wɩa.”

²³ Ma bee na, La TƖƖNA baanɩŋ jaŋ sii a nagɛ duoŋ-peliŋ, ʋ jaŋ nagɛ pel-vinvilimiŋ a tuu nɩbɔŋŋɔɔ nyuŋ.

²⁴ La TƖƖNA baaŋ-la sɩ jaŋ chaasa sii bɩ fɩɛlɛ, see dɩ ʋ ŋaa wɩɩ-la kala sɩ hɛ ʋ tʋɔŋ lɛ. Tapʋlaa baŋmɛnɛ harɩŋ, ma jaŋ jɩŋ wɩɩŋ deeŋ bʋbʋɔŋ.