JƐRƖMAAYA 29 - WƖA TENIŊ

Teŋ-la Jɛrɩmaaya sɩ ŋmʋnsa pɩ nɩalɩŋ ba sɩ kaa mʋ yoŋ-baga

¹ Teŋ-la Jɛrɩmaaya sɩ ŋmʋnsa Jerusalɛm lɛ a kaa mʋ pɩ nɩhɩasɩ-la sɩ hɛ yoŋ-baga lɛ arɩ Wɩɩsʋllɩ sɩpaalaaraa, Wɩa wʋlaabʋllaa arɩ nɩalɩŋ kala Nebukadineza sɩ kɛsɛ lɩɩ Jerusalɛm a kaa mʋ Babɩlɔŋ nɛ ŋ-la.

² Ba sɩ hɛ yoŋ-baga lɛ ŋɩɩ, Jɛrɩmaaya ŋmʋnsɛ teniŋ deeŋ a pɩ kuoro Jehoyachiŋ arɩ ʋ naaŋ, kuoro dɩa tɩntɩnnɩ-hɩasɩŋ a pɛ Juda arɩ Jerusalɛm sɩpaalaaraa lɛ, nɩalɩŋ sɩ jɩŋ nɩsɩŋ tɩntɩŋŋaa arɩ libiree.

³ Ʋ joŋ teŋ-la hɛ nɩaa deemba nɩsɩŋ lɛ nɛ: Safaŋ nanʋala Ɛlasa arɩ Hɩlɩkaaya nanʋala Gɛmarɩa. Ba nɛ Juda kuoro Zedikaaya tɩŋ ba mʋ Babɩlɔŋ kuoro Nebukadineza teeŋ. Teŋ-la tʋɔŋ wɩaa nɛ ŋ-la:

⁴ Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla tɩgɛ nɩalɩŋ kala ʋ sɩ kaa lɩɩ Jerusalɛm lɛ a mʋ yoŋ-baga Babɩlɔŋ lɛ nɛ ŋ-la:

⁵ “Má saa dɩɩsɩŋ a hɔŋ nɩmɛ. Má bil bagɩsɩŋ a duu kɩaa a didii.

⁶ Má jaa haalaa a lʋl biiriŋ. Má jaa haalaa pɩ ma hambolibiisiŋ, aŋ joŋ ma toloo ma pɩ balaba, dɩ ba ma lʋl biiriŋ. Má pʋŋa yʋgɛ lee-la, má sɩ́ muuru.

⁷ Má chɩchɛ dɩ wɩaa vɛŋ woruŋ tabal-la lɛ mɩ sɩ kɛmma mʋ yoŋ-baga ma hɛ. Má sʋl mɩ-na ma TƖƖNA pʋ, bɛɛ wɩaa, dɩ wɩaa nɛ vɛŋ woruŋ taŋ-la lɛ, wɩaa jaŋ vɛŋ woruŋ a pɩ ma ma.”

⁸ Wʋtɩtɩɩ, wɩɩ-la La TƖƖNA doluŋ kala Tɩɩna, Iziral tɩŋŋaa Wɩa bɩra sɩ bʋla nɛ ŋ-la: “Má sɩ́ leŋe dɩ ma nɩalɩŋ sɩ sɩ ba ŋaa mɩ wʋlaabʋllaa arɩ ma vʋgʋra-la sɩ guoli ma tʋɔŋ nyɩsɛma. Má sɩ́ jegile nɩɩ ba duoso-la ma sɩ yie leŋ ba nyuŋ nyaasɛ ba duduosi.

⁹ Baa nyɩɛ wɩaa nɛ mɩ yɩrɩŋ lɛ a pɩpɩma. Mɩ bɩ ba tɩma. Mɩ-na ma TƖƖNA nɛ bʋla.”

¹⁰ Wɩɩ-la La TƖƖNA bɩra sɩ bʋla nɛ ŋ-la: “Dɩ jɩsɩŋ mahɩŋ batori arɩ fii-la mɩ sɩ joŋo pɩ Babɩlɔŋ nɛ suo, mɩ jaŋ ŋaa wʋzɔŋŋɔɔ pɩma, a leŋ dɩ tʋɔtɔrɛ nii-la mɩ sɩ hɛ arɩ mɩ jaŋ kɛmma mɩɩra kɔ leriŋ deeŋ kʋ ŋaa wʋtɩtɩɩ.

¹¹ Mɩ jɩŋ tʋɔbɩɩna-la mɩ sɩ kɛnɛ arɩ ma nɛ. Mɩ-na ma TƖƖNA nɛ bʋla. Mɩ kɛŋ mɩ tʋɔŋ dɩ mɩ ŋaama woruŋ nɛ, mɩ bɩ chɛ dɩ mɩ ŋaa wʋbɔŋ ma lɛ. Mɩ kɛŋ mɩ tʋɔŋ dɩ mɩ leŋ dɩ ma kɛŋ yɩɛlaa nɛ, dɩ ma chie zɔŋ.

¹² Ŋɩɩ lɛ nɛ ma jaŋ kʋ sʋlmɛ, a chʋɔlɛmɛ dɩ mɩ jegile nɩɩ ma teeŋ.

¹³ Ma jaŋ chɛmɛ, a namɛ. Dɩ ma nɛ chɛmɛ arɩ ma tʋɔŋ kala,

¹⁴ ma jaŋ namɛ. Mɩ-na ma TƖƖNA nɛ bʋla. Mɩ jaŋ kɛmma mɩɩra lɩɩ yoŋ-baga-la kɔ. Mɩ jaŋ chɛ kɛsɛma a lɩɩ tinteye-la arɩ lere-la kala mɩ sɩ kɛmma pɩsa hɛ lɛ. Mɩ-na ma TƖƖNA nɛ bʋla. Mɩ jaŋ mɩɩra kɛmma kɔ lee-la ma fa sɩ hɛ, ka mɩ kɛmma mʋ yoŋ-baga.”

¹⁵ Ma jaŋ wuo bʋl, “La TƖƖNA lɩɩsɛ ʋ wʋlaabʋllaa pɩla nɛ Babɩlɔŋ lɛ.”

¹⁶ Ama wɩɩ-la La TƖƖNA sɩ bʋla tɩgɛ kuoru-la sɩ hɔŋ Devit kuoru kpasa lɛ, arɩ nɩalɩŋ kala sɩ hɛ tabalɩŋ deeŋ lɛ, ma tinteeŋ nɩalɩŋ sɩ bɩ yoŋ-baga mʋa:

¹⁷ Wʋtɩtɩɩ, wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Mɩ jaŋ joŋ laalɩŋ, losuŋ arɩ nyanyalɩɩ a hɛ nɩaa deemba lɛ, aŋ leŋ dɩ ba nagɛ tutogi-nambɩlaa sɩ cheye, a lɔrɛ a bɩ ba dii kɛnɛ.

¹⁸ Mɩ jaŋ joŋ laalɩŋ, losuŋ arɩ nyanyal-bɔmʋŋ a kire to ba harɩŋ. Mɩ jaŋ leŋ dɩ ba kɛŋ nyɛsɩŋ dʋnɩa kuori-gentisiŋ nɩaa kala teeŋ, dɩ nɩaa kɛŋ ba yɩrɩŋ ŋmɩɛsa hɩhɛ dɔŋɔ lɛ. Nɩaa jaŋ naba dɩ fawʋllʋŋ kɛmba dɩ ba hihirigi. Tinteye-la kala lɛ mɩ sɩ kiriba hɛ, nɩaa jaŋ sisieri ba lɛ a mʋmɔmba.

¹⁹ Mɩ jaŋ dɔgɩsɛba ŋɩɩ a tɩŋ ba sɩ bɩ jegile nɩɩ mɩ niiŋ wɩaa, wɩalɩŋ mɩ sɩ to mɩ wʋlaabʋllaa lɛ a bʋla pɩba bʋlɩa bʋlɩa. Ma nɩalɩŋ ma sɩ hɛ yoŋ-baga lɛ, ma ma bɩ jegile nɩɩ. Mɩ-na ma TƖƖNA nɛ bʋla.

²⁰ Ŋɩɩ wɩaa, ma nɩalɩŋ kala mɩ sɩ kaa lɩɩ Jerusalɛm lɛ a kaa mʋ yoŋ-baga Babɩlɔŋ lɛ, má jegile nɩɩ.

²¹ Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla tɩgɛ Kolaaya nanʋala Ahab arɩ Maasɛya nanʋala Zedikaaya lɛ nɛ ŋ-la. Ba nyɩɛ wɩaa nɛ pɩpɩma mɩ yɩrɩŋ lɛ: Mɩ jaŋ jomba hɛ Babɩlɔŋ kuoro Nebukadineza nɩsɩŋ lɛ dɩ ʋ kpʋba ma sɩɩŋ lɛ.

²² A tɩŋ ba wɩaa, nɩalɩŋ kala ba sɩ kɛsɛ lɩɩ Juda a kaa mʋ yoŋ-baga Babɩlɔŋ lɛ jaŋ kɛŋ wɩɩŋ deeŋ a ŋmɩɛsa hɩhɛ nɩaa lɛ: ‘La TƖƖNA jaŋ dagɩŋ arɩ ʋ fa sɩ dagɛ Zedikaaya arɩ Ahab ŋɩɩ, nɩalɩŋ Babɩlɔŋ kuoro sɩ nyɩga.’

²³ Ba ŋaa wɩalɩŋ sɩ bɩ bana kɛnɛ nɛ Iziral tinteeŋ lɛ. Ba kɛŋ ba dɔnsʋŋ tɩŋŋaa haalaa pɩŋ nɛ, aŋ nyɩɛ wɩaa ma mɩ yɩrɩŋ lɛ, ka mɩ bɩ wɩɩ bʋla pɩba. Mɩ jɩŋ wɩɩ-la ba sɩ ŋaa nɛ, aŋ ŋaa nʋʋ sɩ pɛ na wɩɩ-la. Mɩ-na ma TƖƖNA nɛ bʋla.”

Tɩndaarɩɩ-la Jɛrɩmaaya sɩ tɩma pɩ Sɛmaaya

²⁴ Wɩa bʋla pɩ Jɛrɩmaaya, “Bʋla pɩ Sɛmaaya sɩ ŋaa Nehelam tɩɩna,

²⁵ wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Ŋ ŋmʋnsɛ tenniŋ ŋ tɩtɩa yɩrɩŋ lɛ nɛ a kaa mʋ pɩ Jerusalɛm nɩaa kala arɩ Maasɛya nanʋala Zefanaaya, Wɩɩsʋllɩ sɩpaalaarɩ-hɩaŋ, arɩ Wɩɩsʋllɩ sɩpaalaaraa dɔnsʋŋ. Ŋ teŋ-la tʋɔŋ ŋ bʋla pɩ Zefanaaya,

²⁶ ‘La TƖƖNA lɩɩsɩŋ nɛ a hɛ Jehoyada nyuŋ dɩ ŋ ŋaa Wɩɩsʋllɩ sɩpaalaarʋ a bibeŋ ʋ dɩɩ-bal-la. Ʋ maga dɩ ŋ kɛŋ nʋʋ na-kala sɩɩ nyaasʋ aŋ ŋɩŋaa wɩaa a nagɛ ʋ ŋaa Wɩa wʋlaabʋllʋ nɛ a hɛ kuruŋ arɩ chɔrʋmɔɔ.

²⁷ Bɛɛ nɛ saa tɩɩ ŋ bɩ ŋɩɩ ŋaa Jɛrɩmaaya lɛ, nɩɩ-la sɩ lɩɩ Anatɔf a ŋaa wɩaa a nagɛ ʋ ŋaa Wɩa wʋlaabʋllʋ nɛ a hɛ ma tʋɔŋ?

²⁸ Ʋ tɩŋ tɩndaarɩŋ deeŋ nɛ pɩla Babɩlɔŋ lɛ: Ma jaŋ hɛ yoŋ-baga lɛ a dieni, ŋɩɩ wɩaa ma saa dɩɩsɩŋ a hɔŋ a bil bagɩsɩŋ a duu kɩaa a didii.’ ”

²⁹ Ŋɩɩ nɛ Zefanaaya sɩ ŋaa Wɩɩsʋllɩ sɩpaalaara karɩmɛ teŋ-la a pɩ Wɩa wʋlaabʋlla Jɛrɩmaaya.

³⁰ Ŋɩɩ nɛ La TƖƖNA bʋla pɩ Jɛrɩmaaya:

³¹ “Tɩŋ tɩndaarɩŋ deeŋ a pɩ nɩalɩŋ sɩ hɛ yoŋ-baga lɛ: ‘Wɩɩ-la mɩ-na ma TƖƖNA sɩ bʋla tɩgɛ Sɛmaaya sɩ lɩɩ Nehelam lɛ nɛ ŋ-la: A tɩŋ Sɛmaaya sɩ bʋl wɩaa pɩma ka mɩ dee bɩ ʋ tɩma, a leŋ ma laa ʋ wʋnyɩɛrɩ-la dii,

³² wɩɩ-la mɩ-na ma TƖƖNA sɩ bʋla nɛ ŋ-la: Mɩ jaŋ dɔgɩsɛ Sɛmaaya sɩ lɩɩ Nehelam arɩ ʋ doho nɩaa kala. Ʋ nɩaa kʋŋkala bɩ jaŋ ka nɩaa deemba tʋɔŋ. Ʋ bɩ jaŋ kɔ dɩ ʋ na wʋzɔmɔ-la mɩ sɩ jaŋ ŋaa pɩ mɩ nɩaa, bɛɛ wɩaa ʋ dagɛ nɩaa a leŋ ba vɩa mɩ niiŋ nɛ. Mɩ-na ma TƖƖNA nɛ bʋla.’ ”