JƐRƖMAAYA 28 - WƖA TENIŊ

Wʋnyɩɛrɩ Wɩa wʋlaabʋlla Hananaaya

¹ Zedikaaya sɩ dii Juda tinteeŋ kuoruŋ, ʋ jɩ-nɛsɛ tʋɔŋ chɛŋ-nɔŋ lɛ nɛ, Wɩa wʋlaabʋlla Hananaaya, sɩ ŋaa Azu nanʋala a lɩɩ Gibioŋ bʋl wɩaa pɩmɛ La TƖƖNA dɩɩ-bal-la tʋɔŋ, Wɩɩsʋllɩ sɩpaalaaraa arɩ nɩalɩŋ kala sɩpaaŋ. Ʋ sɩ,

² “Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: ‘Mɩ jaŋ lɩɩsɛ daa-la Babɩlɔŋ kuoro sɩ joŋo laalɛ ma baŋŋaa lɛ a bori.

³ Jɩsɩŋ balɩa pɛgɛ, mɩ jaŋ kɛŋ Wɩa dɩɩ-balɩŋ tɩntɩnnɩ kɩalɩŋ Babɩlɔŋ kuoro Nebukadineza fa sɩ kʋ paa daha a kaa mɩɩra kɔ.

⁴ Mɩ jaŋ kɛŋ Juda tinteeŋ kuoro Jekonaaya (ʋ nɛ ha Jehoyachiŋ), sɩ ŋaa Jehoyakim nanʋala arɩ nɩalɩŋ kala sɩ mʋ yoŋ-baga Babɩlɔŋ lɛ a kaa mɩɩra kɔ leriŋ deeŋ, bɛɛ wɩaa mɩ jaŋ lɩɩsɛ daa-la Babɩlɔŋ kuoro sɩ joŋo laalɛ ma baŋŋaa lɛ a bori, La TƖƖNA nɛ bʋla.’ ”

⁵ Ŋɩɩ nɛ Wɩa wʋlaabʋlla Jɛrɩmaaya ma bʋla pɩ wʋnyɩɛrʋ Wɩa wʋlaabʋlla Hananaaya, Wɩa dɩɩ-bal-la tʋɔŋ, Wɩɩsʋllɩ sɩpaalaaraa arɩ nɩalɩŋ kala sɩ chɩŋ nɩmɛ sɩpaaŋ.

⁶ Ʋ sɩ, “Amɩɩ, a leŋ dɩ La TƖƖNA ŋaa ŋɩɩ. A leŋ dɩ La TƖƖNA ŋaa dɩ wɩalɩŋ ŋ sɩ bʋla a tɩgɛ ʋ dɩa kɩaa mɩɩra kaa kɔɔnʋŋ lɛ ŋaa wʋtɩtɩɩ, a pɛ nɩalɩŋ kala ba sɩ kaa mʋ yoŋ-baga Babɩlɔŋ tinteeŋ lɛ.

⁷ Arɩ ŋɩɩ ma kala, ha jegile nɩɩ wɩɩ-la mɩ ma sɩ kɛnɛ dɩ mɩ bʋla pɩ ŋ dɩ ŋ nɩalɩŋ kala:

⁸ Faafaa kala, Wɩa wʋlaabʋlla-la sɩ laa sɩpaaŋ kɔ mɩ dɩ ŋ lɛ, ba fa bʋla arɩ laalɩŋ, wʋlɔrʋŋ arɩ nyanyalɩɩ jaŋ jʋʋ tinteyee a yʋgɛ, a jʋʋ kuori-gentiŋ balaa ma a yʋgɛ.

⁹ Ama dɩ Wɩa wʋlaabʋllʋ nɛ bʋla arɩ fɩɛlɩŋ jaŋ hɛ nɩmɛ, dɩ ŋɩɩ sɛnɛ ŋaa, ŋɩɩ lɛ nɛ nɩaa jaŋ jɩŋ arɩ La TƖƖNA nɛ sɛnɛ tɩmʋ.”

¹⁰ Ŋɩɩ nɛ Wɩa wʋlaabʋlla Hananaaya kɛŋ gɛnɛ-la arɩ daa-la sɩ hɛ Wɩa wʋlaabʋlla Jɛrɩmaaya baŋŋaa lɛ lɩɩsɛ a bori,

¹¹ aŋ bʋl ŋ-la nɩalɩŋ sɩpaaŋ, “Wɩɩ-la La TƖƖNA sɩ bʋla nɛ ŋ-la: ‘Ŋɩɩ tɩtɩa nɛ mɩ jaŋ bori daa-la Babɩlɔŋ kuoro Nebukadineza sɩ joŋo laalɛ tinteyee nɩaa kala baŋŋaa lɛ jɩsɩŋ balɩa pɛgɛ.’ ” Ŋɩɩ lɛ nɛ Wɩa wʋlaabʋlla Jɛrɩmaaya viiri.

¹² Wʋnyɩɛrɩ Wɩa wʋlaabʋlla Hananaaya sɩ bori daa-la fa sɩ hɛ Wɩa wʋlaabʋlla Jɛrɩmaaya baŋŋaa lɛ ŋɩɩ, ʋ bɩ diene ka La TƖƖNA bʋl wɩaa pɩ Jɛrɩmaaya:

¹³ “Mʋ a bʋla pɩ Hananaaya, ‘Wɩɩ-la mɩ-na ma TƖƖNA sɩ bʋla nɛ ŋ-la: Ŋ bori daa-la nɛ, ama hɔɔŋ nɛ jaŋ mɩɩra lɩɩ chɩŋ daa-la nyuŋ lɛ.

¹⁴ Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Mɩ jaŋ fʋgɛ tinteyee deemba kala nɩaa hɛ dɩ ba tɩma pɩ Babɩlɔŋ kuoro Nebukadineza, ba jaŋ tɩma pʋ. Mɩ jaŋ leŋ dɩ bagɩlaa ma paala tuto ʋ niiŋ.’ ”

¹⁵ Ŋɩɩ nɛ Wɩa wʋlaabʋlla Jɛrɩmaaya bʋla pɩ wʋnyɩɛrɩ Wɩa wʋlaabʋlla Hananaaya, “Hananaaya, jegile nɩɩ, La TƖƖNA dee bɩŋ tɩma, ka ŋ nyɩɛ wɩaa a leŋ tinteeŋ deeŋ nɩaa laa ŋ wʋnyɩɛrɩ-la dii.

¹⁶ Ŋɩɩ wɩaa, wɩɩ-la La TƖƖNA sɩ bʋla nɛ ŋ-la: ‘Mɩ ŋaa siri nɛ dɩ mɩ lɩɩsɩŋ dʋnɩa deeŋ lɛ. Jɩna deeŋ tʋɔŋ ŋ jaŋ sʋʋ, bɛɛ wɩaa ŋ dagɛ nɩaa a leŋ ba lɩɩ mɩ-na ŋ TƖƖNA harɩŋ nɛ.’ ”

¹⁷ Jɩna-la tɩtɩa tʋɔŋ chɛŋ-pɛɩ lɛ nɛ, wʋnyɩɛrɩ Wɩa wʋlaabʋlla Hananaaya sʋʋ.