JƐRƖMAAYA 27 - WƖA TENIŊ

Juda nɩaa jaŋ tɩma pɩpɩ Kuoro Nebukadineza

¹ Josaaya nanʋala Zedikaaya sɩ dii Juda tinteeŋ kuoruŋ, ʋ bɩ diene ka La TƖƖNA bʋl wɩɩŋ deeŋ pɩ mɩ-na Jɛrɩmaaya.

² Wɩɩ-la La TƖƖNA sɩ bʋla pɩmɛ nɛ ŋ-la: “Pɩɩnɛ gɛnɛ a kaa vɔɔ daasɩŋ gɛsɛ dɔŋɔ a laalɛ ŋ baŋŋaa lɛ.

³ Tɩŋ tinteye-la nɩalɩŋ sɩ chɩŋ ba kuoroo naasɩŋ lɛ a kɔ Juda tinteeŋ kuoro Zedikaaya teeŋ Jerusalɛm lɛ dɩ ba bʋla pɩ ba kuoroo: Ɛdɔm kuoro, Mʋab kuoro, Amɔŋ kuoro, Taaya kuoro arɩ Sɩdɔŋ kuoro.

⁴ Joŋ tɩndaarɩ-la pɩba dɩ ba kaa mʋ bʋla pɩ ba nɩhɩasɩ-la, ‘Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Má bʋla pɩ ma kuoroo arɩ

⁵ mɩ kɛŋ mɩ dol-balɩŋ arɩ mɩ naduoŋ nɛ a ŋaa dʋnɩa arɩ nuhuobiine arɩ pʋsʋ-la kala sɩ hɛ ʋ lɛ. Mɩ yie jomba pɩ nʋʋ na-kala mɩ tʋɔŋ sɩ tɔrɛ ʋ nyuŋ nɛ.

⁶ Lɛɛlɛ mɩ jaŋ laa ma tinteyee kala pɩ mɩ tɩntɩnna Babɩlɔŋ kuoro Nebukadineza. Mɩ jaŋ leŋ dɩ baga kɩaa kala ma paala tuto ʋ niiŋ.

⁷ Tinteyee kala jaŋ tɩma pɩ ʋ dɩ ʋ nanʋala arɩ ʋ nihiŋ see dɩ bʋa-la ʋ tɩtɩa tinteeŋ sɩ jaŋ tel yie, ŋɩɩ lɛ nɛ tintee daŋ arɩ kuori-balaa jaŋ yuo diiu dɩ ʋ tɩmaa pɩba.

⁸ Dɩ tinteeŋ koo kuoru-gentine kala nɛ vɩa dɩ ʋ tɩma pɩ Babɩlɔŋ kuoro Nebukadineza koo a bɩ ba tɩtɩa joŋo hɛ ʋ nɩsɩŋ lɛ, mɩ jaŋ joŋ laalɩŋ, losuŋ arɩ nyanyal-bɔmʋŋ dɔgɩsɛ tintee-la nɩaa, aŋ to ʋ lɛ a kpʋ ba kala. Mɩ-na ma TƖƖNA nɛ bʋla.

⁹ Ŋɩɩ wɩaa, má sɩ́ ma nɩalɩŋ sɩ sɩ ba ŋaa mɩ wʋlaabʋllaa, ma vʋgʋraa, ma nɩalɩŋ sɩɩ dagɛ duosoo bʋbʋɔŋ, ma chichiribee arɩ kantɔŋ yɩrɩraa teeŋ jegilu, nɩalɩŋ sɩ bʋla pɩma arɩ ma bɩ jaŋ tɩma pɩ Babɩlɔŋ kuoro.

¹⁰ Nɩaa deemba nyɩɛ wɩaa nɛ pɩma sɩ jaŋ leŋ ba lɩɩsɛma ma tinteeŋ lɛ dɩ ma mʋ hɛ dɩ-bolii. Mɩ jaŋ kirima ta dɩ ma sʋʋ.

¹¹ Ama dɩ tintee kala nɩaa nɛ jaŋ joŋ ba tɩtɩa hɛ Babɩlɔŋ kuoro nɩsɩŋ lɛ a tɩma pʋpʋ, mɩ jaŋ leŋ dɩ tintee-la nɩaa hɔŋ ba tɩtɩa tinteeŋ lɛ a pɩpɛrɛ nɩmɛ. Mɩ-na ma TƖƖNA nɛ bʋla.’ ”

¹² Wɩɩŋ deeŋ tɩtɩa nɛ mɩ-na Jɛrɩmaaya fa bʋla pɩ Juda tinteeŋ kuoro Zedikaaya. Mɩ sɩ, “Joŋ ŋ tɩtɩa hɛ Babɩlɔŋ kuoro nɩsɩŋ lɛ a tɩma pɩ ʋ dɩ ʋ nɩaa, ŋɩɩ nɛ ŋ jaŋ kɛŋ mɩɩsɩŋ.

¹³ Bɛɛ nɛ tɩɩ ŋ dɩ ŋ nɩaa chɩchɛ dɩ laalɩŋ, losuŋ arɩ nyanyal-bɔmʋŋ kpʋma? Wɩalɩŋ La TƖƖNA sɩ bʋla tɩgɛ tintee-la na-kala sɩ vɩa dɩ ʋ tɩma pɩ Babɩlɔŋ kuoro nɛ ŋɩɩ.

¹⁴ Sɩ́ nɩalɩŋ sɩ sɩ ba ŋaa mɩ wʋlaabʋllaa teeŋ jegilu. Ba sɩ, ‘Ŋ bɩ jaŋ tɩma pɩpɩ Babɩlɔŋ kuoro,’ ba nyɩɛ wɩaa nɛ pɩpɩŋ ŋɩɩ.

¹⁵ La TƖƖNA sɩ, ‘Mɩ dee bɩ ba tɩma. Baa nyɩɛ wɩaa nɛ mɩ yɩrɩŋ lɛ. Ŋɩɩ wɩaa mɩ jaŋ kirima ta dɩ ma sʋʋ, ma dɩ nɩalɩŋ sɩ sɩ ba ŋaa mɩ wʋlaabʋllaa kala a bʋl wɩaa pɩpɩma.’ ”

¹⁶ Ŋɩɩ nɛ mɩ bʋla pɩ Wɩɩsʋllɩ sɩpaalaaraa arɩ nɩalɩŋ kala, “Wɩɩ-la La TƖƖNA sɩ bʋla nɛ ŋ-la: ‘Má sɩ́ nɩalɩŋ sɩ sɩ ba ŋaa Wɩa wʋlaabʋlla-la teeŋ jegilu. Ba sɩ: Ʋ bɩ dieni, ka dɩ ba mɩɩra kɛŋ La TƖƖNA dɩa tɩntɩnnɩ kɩalɩŋ kaa lɩɩ Babɩlɔŋ kɔ. Ba nyɩɛ wɩaa nɛ a pɩpɩma ŋɩɩ.

¹⁷ Má sɩ́ ba teeŋ jegilu. Má tɩma pɩ Babɩlɔŋ kuoro, ŋɩɩ nɛ ma jaŋ kɛŋ mɩɩsɩŋ. Bɛɛ nɛ tɩɩ tabalɩŋ deeŋ jaŋ pɩŋ ji-kpee?

¹⁸ Dɩ ba nɛ sɩ ba ŋaa La TƖƖNA wʋlaabʋllaa nɛ a jɩŋ La TƖƖNA niiŋ wɩalɩŋ, leŋ dɩ ba sʋl La TƖƖNA doluŋ kala Tɩɩna yei, dɩ ʋ sɩ́ leŋe dɩ ba paa ʋ dɩɩ-bal-la kʋkaana-la arɩ Juda tinteeŋ kuoru dɩa kɩaa a pɛ Jerusalɛm kɩaa lɛ a kaa mʋ Babɩlɔŋ.’

¹⁹ Wɩɩ-la La TƖƖNA doluŋ kala Tɩɩna sɩ bʋla tɩgɛ jebie-la, taasɩ-gbaŋ gugulii-la, arɩ kɩalɩŋ ba sɩ ŋaa ba nagɛ torukoba a kɛŋ naasɩŋ a vɩvɛŋ arɩ kpɩɛra-la dɔnsʋŋ sɩ ka tabalɩŋ deeŋ lɛ,

²⁰ kɩalɩŋ Babɩlɔŋ kuoro Nebukadineza sɩ bɩ paa viiri, bʋa-la lɛ ʋ sɩ kʋ yuo kɛŋ Juda tinteeŋ kuoro Jehoyachiŋ, sɩ ŋaa Jehoyakim nanʋala Jerusalɛm lɛ a kɛnʋ mʋ yoŋ-baga Babɩlɔŋ lɛ, a pɛ Juda arɩ Jerusalɛm nɩbalaa lɛ.

²¹ Wʋtɩtɩɩ, wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla tɩgɛ kɩalɩŋ sɩ ka ʋ-na La TƖƖNA dɩa lɛ, arɩ Juda tinteeŋ kuoru dɩa sɩ hɛ Jerusalɛm lɛ nɛ ŋ-la:

²² ‘Ba jaŋ paaba kaa mʋ Babɩlɔŋ, dɩ ba hɛ nɩmɛ a mʋ yi tapʋlɩɩ-la mɩ sɩ jaŋ kʋ paaba. Mɩ-na ma TƖƖNA nɛ bʋla. Mɩ jaŋ paaba, a mɩɩra kɛmba kʋ bil leriŋ deeŋ.’ ”