JƐRƖMAAYA 25 - WƖA TENIŊ

Iziral tɩŋŋaa jaŋ mʋ yoŋ-baga jɩsɩŋ mahɩŋ batori arɩ fii

¹ La TƖƖNA bɩra bʋl wɩaa pɩ Jɛrɩmaaya a mʋ tɩgɛ Juda nɩaa lɛ, bʋa-la lɛ Josaaya nanʋala Jehoyakim sɩ dii Juda tinteeŋ kuoruŋ ʋ jɩ-nɛsɛ lɛ, dɩ Nebukadineza ma sɩ dii Babɩlɔŋ kuoruŋ, ʋ jɩ-bumbuŋ lɛ nɛ ŋɩɩ.

² Ŋɩɩ nɛ Wɩa wʋlaabʋlla Jɛrɩmaaya bʋl wɩalɩŋ pɩ Juda nɩaa kala arɩ ba nɩalɩŋ kala sɩ hɛ Jerusalɛm lɛ. Ʋ sɩ:

³ Jɩsɩŋ mara arɩ batori sɩ bala, a chɩŋ Amɔŋ nanʋala Josaaya sɩ dii Juda tinteeŋ kuoruŋ ʋ jɩsɩŋ fii arɩ batori lɛ a kaa kɔ jɩnɩŋ, La TƖƖNA bʋl wɩaa pɩmɛ nɛ. Mɩ ma laa bʋla pɩma bʋlɩa bʋlɩa, ama ma bɩ jegile nɩɩ.

⁴ La TƖƖNA tɩŋ ʋ wʋlaabʋllaa sɩ ŋaa ʋ tɩntɩnnaa ba kɔ ma teeŋ bʋlɩa bʋlɩa nɛ, ama ma bɩ jegile nɩɩ ba teeŋ koo a kɛŋ wɩalɩŋ ba sɩ bʋla tɩŋ.

⁵ Ba sɩ, “Má kʋŋkala bɩrɩma lɩɩ ma wombii-bɔmɔ-la ma sɩɩ to arɩ wʋbɔmɔ-la ma sɩɩ ŋaa lɛ. Dɩ ma nɛ ŋaa ŋɩɩ, ma jaŋ wuo hɔŋ tintee-la lɛ La TƖƖNA sɩ joŋo pɩ ma dɩ ma naabalɩmaba a kaa mʋ wuu.

⁶ Má sɩ́ vesiŋ to a kpʋkpaarɛba. Má sɩ́ kɩalɩŋ ma sɩ ŋaa, kaa ŋaa dɩ mɩ baanɩŋ sii. Dɩ ma nɛ vɩa wɩaa deemba, mɩ bɩ jaŋ ŋaama wʋbɔŋ kala.”

⁷ La TƖƖNA sɩ, “Ama ma bɩ jegile nɩɩ mɩ teeŋ, aŋ kɛŋ kɩalɩŋ ma sɩ kɛŋ ma nɩsɩŋ ŋaa, a ŋaa a leŋ mɩ baanɩŋ sii a lɛrɛ wʋbɔŋŋɔɔ kʋ hɛ ma tɩtɩa lɛ.”

⁸ Ŋɩɩ wɩaa, La TƖƖNA doluŋ kala Tɩɩna sɩ, “A tɩŋ ma sɩ bɩ jegile nɩɩ mɩ niiŋ wɩaa,

⁹ mɩ jaŋ yɩrɛ nɩaa kala sɩ hɛ wɩɩpɔsʋŋ nagʋa arɩ mɩ tɩntɩnna Babɩlɔŋ kuoro Nebukadineza a hɛ dɔŋɔ, a kɛmba kʋ hɛ tinteeŋ deeŋ arɩ ʋ nɩaa arɩ tinteye-la kala sɩ gollu lɛ. Mɩ-na ma TƖƖNA nɛ bʋla. Mɩ jaŋ chei ba kala gbelem gbelem dɩ ba ŋaa mɔmɩa dɩ nɩaa sisieri ba lɛ, nɩaa jaŋ naba dɩ fawʋllʋŋ kɛmba dɩ ba hihirigi. Ba jaŋ pɩŋ jikpeeŋ a kaa mʋ wuu.

¹⁰ Mɩ jaŋ leŋ dɩ tʋɔtɔrɛ goŋ-la ba sɩɩ ŋaa dɛrɛ, dɩ goŋ-la ha-falaa arɩ ba balaba ma sɩɩ ŋaa dɛrɛ. Nɔmʋŋ ma bɩra bɩ jaŋ dɔŋ, ba bɩ jaŋ nyɩgɛ chaanaa ma nɩmɛ.

¹¹ Tintee-la kala jaŋ pɩŋ jikpeeŋ a ŋaa hoi. Ma dɩ tinteye-la nɩaa jaŋ tɩma pɩ Babɩlɔŋ kuoro jɩsɩŋ mahɩŋ batori arɩ fii.

¹² Ama dɩ jɩsɩŋ mahɩŋ batori arɩ fii-la nɛ suo, mɩ jaŋ dɔgɩsɛ Babɩlɔŋ kuoro arɩ ʋ nɩaa arɩ ba tinteeŋ kala a tɩŋ ba cheeriŋ wɩaa. Mɩ jaŋ leŋ dɩ ba tinteeŋ pɩŋ jikpeeŋ a kaa mʋ wuu. Mɩ-na ma TƖƖNA nɛ bʋla.

¹³ Mɩ jaŋ joŋ wɩalɩŋ kala mɩ sɩ bʋla tɩgɛ tintee-la lɛ a ŋaa ʋ lɛ. Wɩalɩŋ ba sɩ ŋmʋnsa hɛ teniŋ deeŋ tʋɔŋ arɩ wɩalɩŋ Jɛrɩmaaya sɩ bʋla mɩ doluŋ lɛ a tɩgɛ tinteye-la kala lɛ.

¹⁴ Babɩlɔŋ tɩmma-la jaŋ ŋaa tintee daŋ nɩaa arɩ kuori duoruŋ yosi. Mɩ jaŋ timba a tɩŋ ba mɛlɛ arɩ ba wʋŋaalaa wɩaa.”

Wɩa baanɩŋ

¹⁵ Wɩɩ-la La TƖƖNA, Iziral tɩŋŋaa Wɩa sɩ bʋla pɩmɛ nɛ ŋ-la: “Laa mɩ baanɩŋ sɩ nagɛ girep nɛnɛɛ sɩnɩŋ sɩ dolie a su nyʋnyʋala mɩ nɩsɩŋ lɛ, a kaa mʋ a leŋ dɩ tinteye-la kala nɩaa teeŋ mɩ sɩ tɩmɩŋ nyʋa.

¹⁶ Dɩ ba nɛ nyʋaʋ, ba jaŋ gɩgɛrɛ a mʋ nyaasɛ a tɩŋ laal-la mɩ sɩ jaŋ lɔgɔ hɛ ba lɛ wɩaa.”

¹⁷ Ŋɩɩ nɛ mɩ laa nyʋnyʋala-la La TƖƖNA nɩsɩŋ lɛ, a leŋ tinteye-la kala nɩaa teeŋ ʋ sɩ tɩmmɛ nyʋa ʋ tʋɔŋ.

¹⁸ Ba nɛ: Jerusalɛm arɩ Juda tasɩŋ dɔnsʋŋ kala, ba kuoroo arɩ ba tɩntɩnnɩ-hɩasɩŋ, dɩ ʋ jaŋ cheiba dɩ ba ŋaa mɔmɩa dɩ nɩaa sisieri ba lɛ, dɩ nɩaa naba dɩ fawʋllʋŋ kɛmba dɩ ba hihirigi, aŋ kɛŋ ba yɩrɩŋ ŋmɩɛsa hɩhɛ nɩaa lɛ, arɩ ba sɩ nagɛ ŋɩɩ jɩnɩmba,

¹⁹ Ijipiti tinteeŋ kuoro, ʋ nanzɔɔba, ʋ tɩntɩnnɩ-hɩasɩŋ arɩ ʋ nɩaa kala,

²⁰ arɩ nɩwogusu-la kala sɩ hɛ nɩmɛ, a pɛ Us kuoroo kala lɛ, Fɩlɩsɩtɩa kuoroo kala (nɩalɩŋ sɩ hɛ Asɩkɛlɔŋ, Gaza, Ɛkʋrɔŋ arɩ nɩalɩŋ sɩ ka Asɩdɔd lɛ),

²¹ a pɛ Ɛdɔm nɩaa lɛ, Mʋab nɩaa arɩ Amɔŋ nɩaa,

²² Taaya arɩ Sɩdɔŋ kuoroo, kuorusu-la sɩ hɛ fuoŋ niiŋ mʋgʋ-balɩŋ cholo,

²³ nɩalɩŋ sɩ hɛ Dedaŋ, Tɛma, Bus arɩ nɩalɩŋ kala sɩ hɛ dɩ-boloo,

²⁴ Arebia tɩŋŋaa kuoroo kala sɩ ŋaa nɩwogusuŋ a hɛ tintee-hɩlɩŋ lɛ,

²⁵ Zimiri, Ɛlam arɩ Midia kuoroo kala,

²⁶ a pɛ wɩɩpɔsʋŋ nagʋa dɩɩrɩŋ kuoroo kala lɛ, kɩalɩŋ sɩ kpaga arɩ kɩalɩŋ sɩ bolie kala, dʋnɩa kuori-gentisiŋ kala. A lɩɩ nɩaa deemba kala harɩŋ, Sɛsak kuoro ma jaŋ nyʋa nyʋnyʋala-la tʋɔŋ.

²⁷ Ŋɩɩ nɛ La TƖƖNA sɩ, “Bʋla pɩba, ‘Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Má nyʋa, má nyʋa bugi a tʋɔsɛ, a tel a bɩra sɩ́ sii, a tɩŋ laal-la mɩ sɩ jaŋ lɔgɔ hɛ ma lɛ wɩaa.’

²⁸ Ama dɩ ba nɛ vɩa dɩ ba laa nyʋnyʋala-la ŋ nɩsɩŋ lɛ a nyʋa, bʋla pɩba, Wɩɩ-la mɩ-na ma TƖƖNA doluŋ kala Tɩɩna sɩ bʋla nɛ ŋ-la: Má maga dɩ má nyʋaʋ nɛ.

²⁹ Má bee na, mɩ suomo kɛŋ wʋlɔrʋŋ nɛ a kʋkɔ dɩ mɩ hɛ mɩ tabal-la lɛ. Ma bɩɩna mɩ jaŋ vɩa ma dɔgʋsʋŋ? Mɩ bɩ jaŋ leŋ ma mʋ pɛɩ, bɛɛ wɩaa mɩ lɔgɛ laalɩŋ nɛ dɩ mɩ hɛ nɩalɩŋ kala sɩ hɛ dʋnɩa lɛ. Mɩ-na ma TƖƖNA doluŋ kala Tɩɩna nɛ bʋla.

³⁰ Bʋl wɩaa deemba kala mɩ doluŋ lɛ a tɩgɛ ba lɛ, aŋ bʋla pɩba: ‘Mɩ-na ma TƖƖNA jaŋ faasa kpɩa goŋ wɩa-nyuŋ, mɩ jaŋ hɛ mɩ dɩa sɩ bɩ disiniŋ kɛnɛ lɛ aŋ namɩsɛ. Mɩ jaŋ ŋaa goŋ mɩ tinteeŋ nɩaa nyuŋ woruŋ. Mɩ jaŋ ŋaa goŋ a nagɛ nɩa sɩɩ chagɛ dɩ ʋ lɩɩsɛ girep nɛnɛɛ sɩnɩŋ. Mɩ jaŋ kpɩa goŋ-la nɩalɩŋ kala sɩ hɛ dʋnɩa lɛ nyuŋ.

³¹ Goŋ-bal-la jaŋ chɩɩmɛ dʋnɩa kala, bɛɛ wɩaa mɩ-na ma TƖƖNA kɛŋ wɩɩ nɛ a mʋ tɩgɛ tinteyee lɛ. Mɩ jaŋ dii dʋnɩa nɩaa kala sarɩya, a kpʋ nɩbɔŋŋɔɔ. Mɩ-na ma TƖƖNA nɛ bʋla.’ ”

³² Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Má bee na, wʋlɔrʋnʋŋ ka pusi nɛ, a lɩɩ tinteeŋ a mʋ jʋʋ dɔŋɔ. Pel-duoŋ ka sii nɛ a lɩɩ dʋnɩa dɩdɛrɩŋ.”

³³ Bʋa-la lɛ, nɩalɩŋ La TƖƖNA sɩ jaŋ kpʋ jaŋ pɩŋ lee-kala, a lɩɩ dʋnɩa sɛmɛ dɔŋɔ a kaa mʋ sɛmɛ dɔŋɔ. Ba bɩ jaŋ hugiba koo a yel ba yoho. Ama ba jaŋ pɩŋ tinteeŋ a nagɛ nʋsʋrʋŋ.

³⁴ Ma sɩpaalaaraa, má ŋmoo niiŋ a yel. Ma nɩalɩŋ sɩɩ beŋ nɩaa, má bibilimi tinteeŋ. Bʋa-la lɛ ba sɩ jaŋ kpʋma yie nɛ. Ma jaŋ tel a pɩsɛ a nagɛ pupoiŋ sɩ munso.

³⁵ Sɩpaalaaraa bɩ jaŋ kɛŋ dɩ-fá-mʋʋlɩɩ. Nɩalɩŋ sɩpaalaara-la bɩ dɩ-fori kɛnɛ.

³⁶ Má nɩɩ sɩpaalaaraa nii-ŋmobo, ma nɩɩ nɩalɩŋ sɩɩ beŋ nɩaa yele, bɛɛ wɩaa La TƖƖNA ka chei ba pʋsʋŋ dɩ-diiliŋ nɛ.

³⁷ Tintee-la sɩ fɩɛla pɩŋ sɔm kala jaŋ chei, a tɩŋ La TƖƖNA sɩ faasa na baanɩŋ wɩaa.

³⁸ La Tɩɩna jaŋ sii a nagɛ naachigiŋ sɩ sii ʋ dɩpɩnɩŋ, a leŋ dɩ ba tinteeŋ pɩŋ hoi a tɩŋ laal-la sɩ jʋʋba arɩ La TƖƖNA sɩ faasa na baanɩŋ a dɔgɩsɛba wɩaa.