JƐRƖMAAYA 24 - WƖA TENIŊ

Tutogi-nambɩlaa sɩ hɛ sinsiŋ balɩa

¹ Babɩlɔŋ kuoro Nebukadineza sɩ kɛŋ Juda kuoro Jehoyachiŋ sɩ ŋaa Jehoyakim nanʋala arɩ Juda tinteeŋ tɩntɩnnɩ-hɩasɩŋ, nɩalɩŋ sɩ jɩŋ nɩsɩŋ tɩntɩŋŋaa arɩ libire lɩɩ Jerusalɛm lɛ a kaa mʋ yoŋ-baga Babɩlɔŋ tinteeŋ lɛ, ʋ ŋɩɩ harɩŋ lɛ nɛ La TƖƖNA dagɛmɛ tutogi-nambɩlaa sinsiŋ balɩa sɩ chɩŋ La TƖƖNA dɩɩ-bal-la sɩpaaŋ.

² Sime-la dɔŋɔ kɛŋ tutogi-nambɩlaa sɩ zɔmɔ nɛ, kɩalɩŋ sɩ laa sɩpaaŋ a bɩɩ. Ka sime-la dɔŋɔ ma kɛŋ tutogi-nambɩlaa sɩ cheye, a lɔrɛ a bɩ ba dii kɛnɛ.

³ Ŋɩɩ nɛ La TƖƖNA pɩɛsɛmɛ, “Jɛrɩmaaya, bɛɛ kʋŋ nɛ ŋ na?” Ŋɩɩ nɛ mɩ bʋl, “Tutogi-nambɩlaa. Kɩalɩŋ sɩ zɔmɔ chaasa zɔŋ nɛ, ama kɩalɩŋ sɩ cheye, chaasa lɔrɛ nɛ a bɩ ba dii kɛnɛ.”

⁴ Ŋɩɩ nɛ La TƖƖNA bʋl wɩaa pɩmɛ. Ʋ sɩ,

⁵ “Wɩɩ-la mɩ-na ma TƖƖNA, Iziral tɩŋŋaa Wɩa sɩ bʋla nɛ ŋ-la: A nagɛ tutogi-nambɩlɩa-la sɩ zɔmɔ ŋɩɩ, ŋɩɩ nɛ mɩ joŋ Juda nɩalɩŋ ba sɩ kɛsɛ mʋ yoŋ-baga ba ma nagɛ. Ba nɛ mɩ leŋ ba lɩɩ leriŋ deeŋ ŋɩɩ a mʋ Babɩlɔŋ tinteeŋ.

⁶ Mɩ jaŋ beŋ ba nyuŋ dɩ wɩaa zɔmɔ pɩba, a kɛmba mɩɩra kɔ tinteeŋ deeŋ. Mɩ jaŋ leŋ dɩ ba chɩŋ, mɩ bɩ jaŋ leŋ dɩ ba tel. Mɩ jaŋ leŋ dɩ ba naapoloo jʋʋ tinteeŋ, mɩ bɩ jaŋ churiba.

⁷ Mɩ jaŋ pɩba tʋɔ-la sɩ jaŋ leŋ dɩ ba jɩŋ arɩ mɩ nɛ ba TƖƖNA. Ba jaŋ ŋaa mɩ nɩaa, dɩ mɩ ma ŋaa ba Wɩa, bɛɛ wɩaa ba jaŋ mɩɩra kɔ mɩ teeŋ arɩ ba tʋɔŋ kala.

⁸ Ama a nagɛ tutogi-nambɩlɩa-la sɩ cheye, a lɔrɛ ŋɩɩ a bɩ ba dii kɛnɛ, mɩ-na ma TƖƖNA sɩ: Ŋɩɩ tɩtɩa nɛ mɩ jaŋ joŋo ŋaa Juda kuoro Zedikaaya lɛ, ʋ tɩntɩnnɩ-hɩasɩŋ arɩ nɩalɩŋ sɩ bɩ sʋba a lɩɩ Jerusalɛm lɛ, dɩ ba hɛ tinteeŋ deeŋ lɛ koo dɩ ba mʋ hɛ Ijipiti tinteeŋ lɛ nɛ.

⁹ Mɩ jaŋ lɛrɛ wʋlɔrʋŋ kʋ hɛ ba lɛ, dɩ ba nagɛ kʋŋ sɩɩ sʋɔrʋ dʋnɩa tinteyee nɩaa kala teeŋ. Hɩɩsɩŋ jaŋ diiba dɩ nɩaa sisieri ba lɛ. Nɩaa jaŋ kɛŋ ba yɩrɩŋ ŋmɩɛsa hɩhɛ nɩaa lɛ lee na-kala mɩ sɩ kɛmba pɩsa hɛ.

¹⁰ Mɩ jaŋ joŋ laalɩŋ, losuŋ arɩ nyanyalɩɩ a hɛ ba lɛ, a cheiba ŋɩɩ halɩɩ dɩ ba dɛrɛ tintee-la mɩ sɩ joŋo pɩ ba dɩ ba naabalɩmaba lɛ.”