JƐRƖMAAYA 23 - WƖA TENIŊ

Nɩɩ-la sɩ ŋaa tʋɔpʋl tɩɩna

¹ La TƖƖNA sɩ, “Wɩɩŋ puu sɩpaalaara-la sɩɩ chei mɩ nɩaa, a ŋaa ba pɩpɩsɛ.

² Ŋɩɩ wɩaa, wɩɩ-la mɩ-na ma TƖƖNA, Iziral tɩŋŋaa Wɩa sɩ bʋla a pɩpɩ ma sɩpaalaara-la sɩɩ beŋ mɩ nɩaa nɛ ŋ-la: A tɩŋ ma sɩ bɩ mɩ nɩaa nyuŋ bene, aŋ ŋaa ba pɩsɛ, a kiriba ta wɩaa, mɩ jaŋ dɔgɩsɛma a tɩŋ wʋbɔŋ-la ma sɩ ŋaa wɩaa.

³ Mɩ tɩtɩa jaŋ kɛŋ mɩ nɩaa nɩkaana-la kaa kʋ lɩɩ tinteye-la lɛ mɩ sɩ kiriba mʋ hɛ, a kɛmba mɩɩra kɔ ba tɩtɩa tinteeŋ. Dɩ ba nɛ kɔ nɩmɛ, ba jaŋ lʋl biiriŋ, a pʋŋa yʋgɛ.

⁴ Mɩ jaŋ lɩɩsɛ sɩpaalaaraa pɩba dɩ ba bemba. Fawʋllʋŋ bɩra bɩ jaŋ kɛmba, ba bɔyɛ ma bɩ jaŋ joŋ. Ba kʋŋkala bɩ jaŋ lɛl. Mɩ-na ma TƖƖNA nɛ bʋla.”

⁵ La TƖƖNA sɩ, “Tapʋlaa ka kɔ nɛ, dɩ mɩ lɩɩsɛ tʋɔpʋl Tɩɩna Devit doho nɩaa tʋɔŋ, ʋ jaŋ ŋaa kuoru sɩ jaŋ beŋ ʋ nɩaa arɩ wʋjɩmɩŋ. Ʋ jaŋ kɛŋ wʋtɩtɩɩ, a ŋaa wɩaa ba bʋa lɛ tintee-la lɛ.

⁶ Ʋ kuoruŋ bʋa lɛ, ʋ jaŋ laa Juda nɩaa ta, dɩ Iziral nɩaa ma hɔŋ sɔm. Yɩrɩ-la ba sɩ jaŋ yɩyɩrʋ nɛ: La TƖƖNA nɛ ŋaa la kɛŋ tʋɔpʋla koo La TƖƖNA nɛ laala ta arɩ wʋtɩtɩɩ.”

⁷ La TƖƖNA bɩra sɩ, “Tapʋlaa ka kɔ nɛ, nɩaa bɩra bɩ jaŋ bʋl, ‘La ŋmɩɛsɛ La TƖƖNA sɩ weye a kɛŋ Iziral tɩŋŋaa kʋ lɩɩ Ijipiti tinteeŋ lɛ.’

⁸ Ama ba jaŋ bʋl, ‘La ŋmɩɛsɛ La TƖƖNA sɩ weye a kɛŋ Iziral tɩŋŋaa kaa lɩɩ wɩɩpɔsʋŋ nagʋa tinteeŋ lɛ arɩ tinteye-la kala lɛ ʋ sɩ kɛmba pɩsa hɛ.’ Ŋɩɩ nɛ ba jaŋ bɩra hɔŋ ba tɩtɩa tinteeŋ lɛ.”

Wɩa wʋlaabʋlla-la sɩɩ nyɩɛ wɩaa

⁹ A mʋ tɩgɛ Wɩa wʋlaabʋlla-la lɛ, mɩ tʋɔŋ kala chaasa vʋgʋmɛ nɛ, mɩ yaraa kala chichel. Mɩ nagɛ nɩa sɩ nyʋa sɩnɩŋ nɛ, nɩa sɩ nyʋa sɩnɩŋ a chaasa bugi, a tɩŋ La TƖƖNA arɩ ʋ niiŋ wɩaa sɩ bɩ disiniŋ kɛnɛ wɩaa.

¹⁰ Tintee-la kala nɛ suo arɩ hachɔrʋmɔɔ, bɛɛ wɩaa ŋmɩaŋ dii nɩalɩŋ nɛ, tintee-la kala hɩl. Yaŋ-la sɩ hɛ tintee-hɩlɩŋ lɛ kala nɛ hɩla. Wɩa wʋlaabʋlla-la ka to nɩbɔŋ wombiee nɛ, a dɩdagɛ ba doluŋ ŋɩɩ sɩ bɩ maga.

¹¹ La TƖƖNA bɩra sɩ, “Mɩ wʋlaabʋllaa arɩ Wɩɩsʋllɩ sɩpaalaaraa bɩ mɩ ka fá. Mɩ dɩɩ-bal-la ma tɩtɩa lɛ, baa ŋaa wʋbɔŋŋɔɔ nɛ.

¹² Ŋɩɩ wɩaa, ba wombiiŋ jaŋ sɩsɩɛrɛ, mɩ jaŋ kiriba hɛ birimiŋ lɛ, dɩ ba tel nɩmɛ. Mɩ jaŋ kɛŋ wʋlɔrʋŋ kʋ hɛ ba lɛ jɩna-la lɛ mɩ sɩ jaŋ dɔgɩsɛba. Mɩ-na ma TƖƖNA nɛ bʋla.

¹³ Samarɩa tɩmma-la sɩ ŋaa mɩ wʋlaabʋllaa tʋɔŋ, mɩ na dɩ wʋlɔrʋŋ deeŋ nɛ baa ŋaa: Baa bʋl wɩaa vene-la ba sɩɩ yɩrɛ Baal yɩrɩŋ lɛ nɛ, a leŋ mɩ nɩaa Iziral tɩŋŋaa yeŋŋi.

¹⁴ Jerusalɛm tɩmma-la sɩ ŋaa mɩ wʋlaabʋllaa ma tʋɔŋ, mɩ na wɩɩ sɩ bɩ ba na kɛnɛ nɛ: Baa ŋaa wʋchɔrʋmɔɔ nɛ aŋ pɛ nyɩnyɩɛ wɩaa ma. Ba pɛ wʋbɔŋ ŋaaraa lɛ nɛ ba ŋɩŋaa wʋbɔŋŋɔɔ, ŋɩɩ leŋ nʋʋkala bɩ chɛ ʋ leŋ wʋbɔŋŋɔɔ ŋaanɩŋ. Ba kala nagɛ Sodom nɩaa nɛ mɩ teeŋ, Jerusalɛm nɩaa ma nagɛ Gomora nɩaa.”

¹⁵ Ŋɩɩ wɩaa, wɩɩ-la La TƖƖNA doluŋ kala Tɩɩna bɩra sɩ bʋla tɩgɛ ʋ wʋlaabʋlla-la lɛ nɛ ŋ-la: “Mɩ jaŋ leŋ dɩ ba dii kʋdii haarɩŋ, aŋ nyʋa lɩɩŋ ba sɩ hɛ bɩɛlɩŋ, bɛɛ wɩaa, mɩ wʋlaabʋlla-la nɛ leŋe wʋbɔŋŋɔɔ ŋaanɩŋ pʋrɩgɛ tintee-la kala lɛ.

¹⁶ Wɩɩ-la mɩ-na ma TƖƖNA doluŋ kala Tɩɩna sɩ bʋla nɛ ŋ-la: Má sɩ́ nɩalɩŋ sɩ nyɩɛ wɩaa arɩ ba ŋaa mɩ wʋlaabʋllaa a bʋl wɩalɩŋ pɩpɩma teeŋ jegilu. Ba leŋe ma kɛŋ yɩɛlaa sɩ bɩ jaŋ kʋ ŋaa wʋtɩtɩɩ nɛ. Ba yie bʋl wɩalɩŋ ba tɩtɩa sɩ bɩɩna nɛ a pɩpɩma, mɩ-na ma TƖƖNA dee bɩ wɩalɩŋ bʋla.

¹⁷ Ba yie bʋla pɩpɩ nɩalɩŋ sɩ bɩ mɩ kaa tɩtɩŋ, ‘La TƖƖNA sɩ: Má jaŋ hɔŋ arɩ fɩɛlɩŋ.’ Ba yie bʋla pɩ nɩalɩŋ ma kala sɩɩ to ba nyuduoŋ harɩŋ, ‘Wʋbɔŋ kala bɩ jaŋ ŋaa ma lɛ.’

¹⁸ Ama ba tʋɔŋ kʋbɛɛ nɛ ha chɩŋ La TƖƖNA sɩpaaŋ, a nɩɩ mɩ wɩaa? Ba tʋɔŋ kʋbɛɛ nɛ ha jegile a nɩɩ mɩ wɩaa?

¹⁹ Bee na, mɩ-na ma TƖƖNA baanɩŋ nagɛ pel-duoŋ nɛ. Ʋ jaŋ lu a nagɛ pel-vinvilimiŋ a kʋ tuu nɩbɔŋŋɔɔ nyuŋ.

²⁰ Mɩ-na ma TƖƖNA baanɩŋ bɩ jaŋ kɔ dɩ ʋ fɩɛla, see dɩ mɩ ŋaa wɩɩ-la sɩ hɛ mɩ tʋɔŋ lɛ a dɛrɛ. Tapʋlaa baŋmɛnɛ harɩŋ, ba jaŋ jɩŋ wɩɩ-la sɩaa kala woruŋ.

²¹ Mɩ dee bɩ wʋlaabʋllaa deemba tɩma, ama ba tɩtɩa tɩndaarɩŋ nɛ ba kaa mʋ. Mɩ bɩ wɩɩ bʋla pɩba, ka ba mʋ bʋl wɩaa mɩ yɩrɩŋ lɛ.

²² Ama dɩ ba nɛ fa jɩŋ mɩ tʋɔbɩɩnaa, ba fa jaŋ heele bʋl mɩ wɩaa a pɩ mɩ nɩaa, dɩ ba bɩrɩma lɩɩ ba wombii bɔmɔ-la arɩ wʋbɔmɔ-la ba sɩɩ ŋaa lɛ.

²³ Mɩ ŋaa Wɩa sɩ hɛ lee-kala nɛ, dɩ-bala dʋndʋŋ dee. Mɩ-na ma TƖƖNA nɛ bʋla.

²⁴ Nʋʋkala bɩ jaŋ wuo faa lee dɩ mɩ sɩ́ ʋ na. Mɩ hɛ tinteeŋ arɩ Wɩa-jaŋ kala lɛ nɛ. Mɩ-na ma TƖƖNA nɛ bʋla.

²⁵ Mɩ nɩa dɩ nɩalɩŋ sɩ nyɩɛ bʋbʋl wɩaa mɩ yɩrɩŋ lɛ sɩ, ‘Mɩ duoso nɛ! Mɩ duoso nɛ.’

²⁶ Ɛɛ nɛ wɩɩŋ deeŋ jaŋ hɛ wʋnyɩɛrɩ wʋlaabʋllaa deemba tʋɔŋ a diene magɛ? Ba yie nyɩɛ bʋbʋl wɩalɩŋ ba tɩtɩa sɩ bɩɩna nɛ.

²⁷ Ba bɩɩna ba sɩ bʋl duosoo wɩaa pɩpɩ dɔŋɔ ŋɩɩ jaŋ leŋ dɩ mɩ nɩaa yʋ mɩ wɩaa, arɩ ba naabalɩmaba sɩ kpaarɛ vene-la ba sɩɩ yɩrɛ Baal a yʋ mɩ wɩaa ŋɩɩ.

²⁸ Leŋ dɩ wʋnyɩɛrɩ wʋlaabʋlla-la sɩ kɛŋ duosoo wɩaa ba bʋbʋl, ama nɩalɩŋ ma sɩ kɛŋ mɩ wɩaa, ba bʋlba arɩ wʋtɩtɩɩ. Sekeliŋ arɩ mɩɩ-biiŋ bɩ dɔŋɔ maga, La TƖƖNA nɛ bʋla.

²⁹ Mɩ niiŋ wɩaa nagɛ nyiniŋ nɛ, a bɩra nagɛ hama a ŋmoo bʋŋ yɩyɛrɛ muno muno.

³⁰ Ŋɩɩ wɩaa, mɩ chɩŋ mɩ wʋlaabʋlla-la sɩ yie nɩɩ wɩaa dɔŋɔ ba teeŋ, a kaa mʋ bʋl arɩ mɩ-na nɛ bʋla lɛ nɛ. La TƖƖNA nɛ bʋla.

³¹ Wʋtɩtɩɩ, mɩ chɩŋ wʋlaabʋlla-la sɩ yie bʋl ba tɩtɩa wɩaa aŋ bʋl mɩ-na nɛ bʋla lɛ nɛ. Mɩ-na ma TƖƖNA nɛ bʋla.

³² Mɩ chaasa chɩŋ nɩalɩŋ sɩ nyɩɛ wɩaa arɩ baa na wɩaa duosoo tʋɔŋ lɛ nɛ. Ba yie nyɩɛ wɩalɩŋ a leŋ mɩ nɩaa yeŋŋi nɛ, ka mɩ dee bɩ ba lɩɩsa koo a tɩmba. Wɩalɩŋ bɩ mɩ nɩaa lɛ ka pɛ mʋa ma. Mɩ-na ma TƖƖNA nɛ bʋla.”

Wʋnyɩɛrɩ duoso arɩ nɩalɩŋ sɩ nyɩɛ wɩaa arɩ ba ŋaa Wɩa wʋlaabʋlla nɛ

³³ La TƖƖNA bʋla pɩ Jɛrɩmaaya, “Dɩ nɩaa deemba, koo mɩ wʋlaabʋllʋ koo nʋʋ sɩ kpʋ pʋsʋŋ pɩpɩmɛ nɛ pɩɛsɩŋ, ‘Wʋbɛɛ nɛ La TƖƖNA bʋl?’ Bʋla pɩba, ‘Ma ŋaa chʋga nɛ a pɩ ma TƖƖNA, ʋ jaŋ vɩama ta.’

³⁴ Dɩ mɩ wʋlaabʋllʋ koo nʋʋ sɩ kpʋ pʋsʋŋ pɩpɩmɛ koo nʋʋ dɔŋ nɛ sɩ, ‘Wɩɩ-la La TƖƖNA sɩ bʋla nɛ ŋ-la: Mɩ jaŋ dɔgɩsɛ nɩɩ-la arɩ ʋ dɩa nɩaa kala.

³⁵ Ŋ-la nɛ ma kʋŋkala yie pɩpɩɛsɛ ma nandɔnsʋŋ koo ma naambiiriŋ: Wʋbɛɛ nɛ La TƖƖNA bʋl? La TƖƖNA sɩ bɛɛ nɛ?’

³⁶ Ʋ bɩ maga dɩ ma bɩra bʋl, ‘Wɩɩ-la La TƖƖNA sɩ bʋla nɛ ŋ-la,’ bɛɛ wɩaa nʋʋkala niiŋ wʋbʋlaa nɛ mɩɩra bɩrɩmɛ mɩ-na Wɩa wʋbʋlaa. Ŋɩɩ nɛ ma ŋaa a kɛŋ mɩ-na ma TƖƖNA Wɩa doluŋ kala Tɩɩna sɩ weye niiŋ wɩaa a bɩrɩmɛ.

³⁷ Ŋ-la nɛ ma vɛnɛ pɩpɩɛsɛ wʋlaabʋlla-la, ‘Wʋbɛɛ nɛ La TƖƖNA bʋla pɩma, koo wʋbɛɛ nɛ ʋ bʋl?’

³⁸ Ma yie bʋl, ‘Wɩɩ-la La TƖƖNA sɩ bʋla pɩma nɛ ŋ-la.’ Ka mɩ bʋla pɩma arɩ ma sɩ́ ŋɩɩ bʋl.

³⁹ Ŋɩɩ wɩaa, mɩ jaŋ sɛnɛ yʋ ma wɩaa aŋ kirima ta mɩ sɩpaaŋ, aŋ vɩa tabal-la ma mɩ sɩ joŋo pɩ ma dɩ ma naabalɩmaba a ta.

⁴⁰ Mɩ jaŋ leŋ dɩ hɩɩsɩŋ diima a kaa mʋ wuu. Ma bɩ jaŋ kɔ dɩ ma yʋ hɩɩsɩŋ deeŋ wɩaa.”