JƐRƖMAAYA 22 - WƖA TENIŊ

Sarɩya-la sɩ pɩna gbɛrɛ kuori bɔŋŋɔɔ

¹ Wɩɩ-la La TƖƖNA sɩ bʋla nɛ ŋ-la, “Sii tuu Juda kuoro dɩa a bʋl wɩɩŋ deeŋ pʋ:

² ‘Juda kuoro, jegile nɩɩ wɩɩ-la mɩ-na ma TƖƖNA sɩ bʋla. Ŋ nɛ nɩɩ-la sɩ hɔŋ Devit kuoru kpasa nyuŋ, ŋ dɩ ŋ tɩntɩnnɩ-hɩasɩŋ arɩ ŋ nɩaa sɩ yie kʋ to boi-baalaa deemba a jʋjʋʋ,

³ wɩɩ-la mɩ-na ma TƖƖNA sɩ bʋla nɛ ŋ-la: Má kɛŋ wʋtɩtɩɩ a ŋaa wɩaa ba bʋa lɛ. Má lorigo laa nɩɩ-la ba sɩ nyaga bil ta nɩɩ-la sɩɩ gʋrʋ nɩsɩŋ lɛ. Má sɩ́ wʋbɔŋ koo yuosu wɩɩ ŋaa nʋhʋɔrʋ koo biisime koo yo-haala lɛ. Má sɩ́ nʋʋ ma sɩ bɩ wɩɩ ŋaa chei kpʋ leriŋ deeŋ.

⁴ Dɩ ma nɛ wuo fɩɛlɛ ma sɩaa a ŋɩŋaa wɩaa deemba mɩ sɩ dagɛma, ŋɩɩ-na kuoru-la sɩ jaŋ hɔŋ Devit kuoru kpasa nyuŋ jaŋ to kuoru dɩa deeŋ boi-balaa jʋjʋʋ kuoro jaŋ. Ba jaŋ jɩl janɩŋ torukoba arɩ janɩŋ, dɩ ba nɩhɩasɩŋ arɩ ba nɩaa tuto ba harɩŋ.

⁵ Ama dɩ ma nɛ bɩ wɩaa deemba mɩ sɩ dagɛma ka to, mɩ-na ma TƖƖNA nɛ bʋla, mɩ ŋmɩɛsa, kuoru dɩa deeŋ jaŋ pɩŋ jikpeeŋ.’ ”

⁶ Wɩɩ-la La TƖƖNA sɩ bʋla tɩgɛ Juda kuoro dɩa lɛ nɛ ŋ-la: “Arɩ ŋ sɩ zɔmɔ nagɛ Gɩlɩad tinteeŋ ma kala mɩ teeŋ, a nagɛ Lɛbanɔŋ peelee, mɩ jaŋ leŋ dɩ ŋ nagɛ tintee-hɩlɩŋ, a nagɛ tasɩ-la nɩaa sɩ́ bɩ jʋʋ.

⁷ Mɩ jaŋ joŋ nɩalɩŋ sɩɩ chei leriŋ a hɛ ma lɛ, nʋʋkala arɩ ʋ bayuori kɩaa. Ba jaŋ keri ma kuolo tɩɩ zɔŋŋɔɔ kala a joŋo hɛ nyiniŋ lɛ.

⁸ Nɩaa jaŋ lɩɩ tintee daŋ a kʋ to tabalɩŋ deeŋ bɩbal a pɩpɩɛsɛ dɔŋɔ, ‘Bɛɛ nɛ tɩɩ La TƖƖNA ŋaa wʋdoho deeŋ tabalɩŋ deeŋ sɩ faasa yʋgɛ lɛ?’

⁹ Wɩɩ-la ba sɩ jaŋ bʋla pɩba nɛ: ‘A tɩŋ ba sɩ vɩa nii-la sɩ hɛ ba dɩ ba TƖƖNA Wɩa pɛgɛ aŋ tuto vesiŋ a kpʋkpaarɛba nɛ tɩɩ.’ ”

¹⁰ Juda nɩaa, má sɩ́ yele pɩ kuoru-la sɩ sʋba koo sɩ tuo. Ama má yel woruŋ a pɩ nɩɩ-la ba sɩ kaa mʋ yoŋ-baga, bɛɛ wɩaa ʋ bɩra bɩ jaŋ mɩɩra kɔ a na tintee-la lɛ ba sɩ lʋlʋ.

¹¹ Wɩɩ-la La TƖƖNA sɩ bʋla tɩgɛ Josaaya nanʋala Salum lɛ nɛ ŋ-la: Ʋ nɛ laa ʋ nyɩmma nyuŋ a dii Juda tinteeŋ kuoruŋ, ama ʋ lɩɩ leriŋ deeŋ lɛ nɛ. La TƖƖNA sɩ, “Ʋ bɩ jaŋ kɔ dɩ ʋ mɩɩra kɔ.

¹² Ʋ jaŋ sʋʋ lee-la ba sɩ yuo kɛnʋ mʋ, ʋ bɩra bɩ jaŋ na tinteeŋ deeŋ.

¹³ Wɩɩŋ puu nɩɩ-la kala sɩ bɩ tʋɔpʋla lɛ to a saa ʋ kuoru dɩa, a bɩ wʋtɩtɩɩ lɛ to saa dɩɩsɩŋ sugili ʋ nyuŋ, a leŋ ʋ taŋ nɩaa tɩŋ pɛɩ, ka ʋ bɩ ba lɔlʋŋ chɩmɩŋ time.

¹⁴ Ʋ sɩ, ‘Mɩ jaŋ saa kuori dɩɩ-bal a pɩ mɩ tɩtɩa, dɩ ʋ nyuŋ dɩɩsɩŋ jal woruŋ.’ Ŋɩɩ nɛ ʋ hɛ ʋ tokoroba ba jal a kɛŋ kuolo daasɩŋ kɩɛla tɔ a kɛŋ penti fɩaŋ mɩɛrɛ ʋ kala.

¹⁵ Dɩ ŋ nɛ kɛŋ kuolo daasɩŋ saa dɩɩsɩŋ, ŋɩɩ daga arɩ ŋ ŋaa kuoru nɛɛ? Ŋ nyɩmma fa kɛŋ kʋdiilee arɩ kʋnyʋalaa yʋgɛ nɛ woruŋ, ama ʋ fa ŋaa wɩaa ba bʋa lɛ nɛ arɩ wʋtɩtɩɩ, ŋɩɩ nɛ wɩaa vɛŋ woruŋ a pʋ.

¹⁶ Ʋ fa chɩna gbɛrɛ summoo arɩ nɩalɩŋ sɩ bɩ ba tɩtɩa lɛ wuo pɛ nɛ, wɩaa vɛŋ woruŋ a pʋ. Ŋɩɩ nɩa sɩ jaŋ ŋaa a dagɛ arɩ ʋ jɩmmɛ nɛ ŋɩɩ. Mɩ-na ma TƖƖNA nɛ bʋla.

¹⁷ Ama ŋ sɩaa arɩ ŋ tʋɔŋ kala hɛ gɩrɩma dii lɛ nɛ, a kpʋkpʋ nɩaa sɩ bɩ wɩɩ cheye a dʋdɔgɩsɛ nɩaa, aŋ pɛ kɛŋ nɩaa kɩaa lɩlaa.”

¹⁸ Ŋɩɩ wɩaa, wɩɩ-la La TƖƖNA sɩ bʋla tɩgɛ Juda kuoro Jehoyakim sɩ ŋaa Josaaya nanʋala lɛ nɛ ŋ-la: “Nɩaa bɩ jaŋ yel ʋ lɛ a bʋl, ‘La naambii baa!’ Ba bɩ jaŋ yel ʋ lɛ a bʋl, ‘La kʋhɩaŋ baa!’

¹⁹ Ba jaŋ hugu a nagɛ kaku-sʋʋŋ. Ba jaŋ lɛrʋ kaa lɩɩ Jerusalɛm lɛ a joŋu ta boi-baalaa niiŋ.

²⁰ Jerusalɛm nɩaa, má mʋ Lɛbanɔŋ a ŋmoo niiŋ, ma leŋ dɩ Basaŋ nɩaa ma nɩɩ ma yikoro. Má chɩŋ Abarɩm peele-la nyuŋ a ŋmoo niiŋ, bɛɛ wɩaa ba yuo dii nɩalɩŋ kala fa sɩ kʋ pɛ ma lɛ nɛ.

²¹ Mɩ chagɩlɛma nɛ bʋa-la lɛ wɩaa fa sɩ vɛŋ woruŋ aa pɩma, ama ma sɩ, ‘La bɩ jaŋ jegile nɩɩ.’ Ŋɩɩ nɛ ma nagɛ ma hambiriŋ kala lɛ, ma bɩ mɩ niiŋ sɛyɛ.

²² Peliŋ jaŋ paa ma sɩpaalaaraa a kaa viiri, ka nɩalɩŋ sɩ kʋ pɛ ma lɛ ma mʋ yoŋ-baga. Nɩaa jaŋ jolimima dɩ hɩɩsɩŋ kɛmma, a tɩŋ ma wʋbɔŋŋɔɔ wɩaa.

²³ Ma Jerusalɛm nɩalɩŋ sɩ hɔnɔ ta jɩa, aa jʋʋ Lɛbanɔŋ kuolo daasɩŋ dɩɩsɩŋ, dɩ hɛɛŋ nɛ jʋʋma, ma jaŋ huuni. Hɛɛ-la jaŋ nagɛ haala sɩɩ chɛ ʋ lʋl, ʋ luoruŋ wʋwɩɩ.”

²⁴ La TƖƖNA sɩ, “Mɩ nɛ sɩ weye wɩaa, dɩ ŋ-na Juda kuoro Jehoyachiŋ sɩ ŋaa Jehoyakim nanʋala nɛ fa paala nagɛ kuori nenii-pɩrɩŋ a hɛ mɩ nadiiŋ nɩsɩŋ lɛ ma, mɩ fa ha jaŋ lɩɩsɩŋ ta.

²⁵ Mɩ jaŋ joŋuŋ hɛ nɩalɩŋ sɩɩ chɛ ba lɩɩsɛ ŋ mɩɩsɩŋ nɩsɩŋ lɛ, nɩalɩŋ ŋ sɩɩ fá. Mɩ jaŋ joŋuŋ hɛ Babɩlɔŋ kuoro Nebukadineza arɩ ʋ nɩaa nɩsɩŋ lɛ.

²⁶ Mɩ jaŋ joŋ ŋ dɩ ŋ naaŋ kala a yuo hɛ tintee dɔŋ lɛ, lee-la ba sɩ bɩ ma kʋŋkala lʋla dɩ ma sʋʋ nɩmɛ.

²⁷ Ma bɩra bɩ jaŋ mɩɩra kɔ tintee-la ma sɩɩ hɩɛnʋ.”

²⁸ Mɩ bʋl: Jehoyakim mɩɩra nagɛ pupoiŋ sɩ yɛrɛ ba joŋo yuo ta nɛ. Ʋ mɩɩra nagɛ kʋŋ nʋʋkala sɩ bɩ chɛ nɛ. Bɛɛ nɛ tɩɩ ba kiri ʋ dɩ ʋ biiriŋ kala ta, ba mʋ hɛ tintee ba sɩ bɩ jɩŋ lɛ?

²⁹ Tintee, tintee, tintee, jegile nɩɩ La TƖƖNA wɩaa.

³⁰ Wɩɩ-la La TƖƖNA sɩ bʋla nɛ ŋ-la: “Ŋmʋnsɛ baala deeŋ wɩaa bil arɩ ʋ bɩ bii lʋla, wɩaa bɩ jaŋ vɛŋ woruŋ pʋ ʋ mɩɩsɩŋ kala lɛ. Wɩaa bɩ jaŋ vɛŋ woruŋ a pɩ ʋ dɩ ʋ doho nɩaa kala. Ba kʋŋkala bɩ jaŋ hɔŋ Devit kuoru kpasa-la nyuŋ, a bɩra dii kuoruŋ Juda lɛ.”