JƐRƖMAAYA 21 - WƖA TENIŊ

Wɩa vɩa wɩɩ-la Zedikaaya sɩ pɩɛsaa chɛ

¹ La TƖƖNA bʋl wɩaa a pɩ Jɛrɩmaaya, bʋa-la lɛ kuoro Zedikaaya sɩ leŋe Malɩkɩja nanʋala Pasɩhɔ arɩ Maasɛya nanʋala Zefanaaya sɩ ŋaa Wɩɩsʋllɩ sɩpaalaara kɔ ʋ teeŋ. Ba sɩ,

² “Chɛ na wɩaa La TƖƖNA teeŋ a pɩla, bɛɛ wɩaa Babɩlɔŋ kuoro Nebukadineza ka yuola nɛ. Kapo La TƖƖNA jaŋ ŋaa wʋkpuŋkpere pɩla arɩ ʋ fa sɩɩ ŋaa ŋɩɩ, dɩ ʋ mʋ aŋ ka la.”

³ Ama Jɛrɩmaaya bʋla pɩba, “Má mʋ bʋla pɩ Zedikaaya,

⁴ ‘Wɩɩ-la La TƖƖNA, Iziral tɩŋŋaa Wɩa sɩ bʋla nɛ ŋ-la: Mɩ jaŋ kɛŋ bayuori kɩalɩŋ sɩ hɛ ŋ nɩsɩŋ lɛ a mɩɩra gʋra chaasɛ ŋ tɩtɩa, kɩalɩŋ ŋ sɩ kaa yuyuo Babɩlɔŋ kuoro arɩ Babɩlɔŋ nɩalɩŋ sɩ hɛ kɛrɩsɩ-la sɩ golluŋ harɩŋ a yuyuoŋ. Mɩ jaŋ kɛŋ nɩalɩŋ kala kʋ jʋʋ hɛ dɔŋɔ tabalɩŋ deeŋ tʋɔŋ.

⁵ Mɩ-na tɩtɩa nɛ jaŋ tɩɛnɛ mɩ naduoŋ a yuoŋ arɩ baanɩŋ. Mɩ baanɩŋ jaŋ chaasa sii woruŋ.

⁶ Mɩ jaŋ kpʋ nɩalɩŋ sɩ hɛ tabalɩŋ deeŋ lɛ, nuhuobiinee arɩ pʋsʋŋ kala. Nyanyal-bɔŋ nɛ jaŋ kpʋba.’ ”

⁷ La TƖƖNA sɩ, “Ŋɩɩ harɩŋ, mɩ jaŋ joŋ Juda kuoro Zedikaaya, ʋ tɩntɩnnɩ-hɩasɩŋ arɩ nɩalɩŋ sɩ hɛ tabalɩŋ deeŋ lɛ, nɩalɩŋ nyanyal-bɔŋ-la, laalɩŋ arɩ losuŋ sɩ bɩ kpʋa a hɛ Babɩlɔŋ kuoro Nebukadineza nɩsɩŋ lɛ, arɩ ba dʋndɔmɔ-la sɩɩ chɛ dɩ ba lɩɩsɛ ba mɩɩsɩŋ. Ʋ jaŋ kpʋba. Ʋ bɩ jaŋ fá ba nisusuŋ koo ba nenige, ʋ tʋɔŋ bɩ jaŋ wɩɩ ba lɛ.

⁸ Ha bʋla pɩ nɩalɩŋ, ‘Wɩɩ-la mɩ-na ma TƖƖNA sɩ bʋla nɛ ŋ-la: Má bee na, mɩ joŋ mɩɩsɩŋ wombiiŋ arɩ sʋʋŋ wombiiŋ nɛ a bibil ma sɩpaaŋ.

⁹ Nʋʋ na-kala sɩ jaŋ hɔŋ tabalɩŋ deeŋ tʋɔŋ, laalɩŋ koo losuŋ koo nyanyal-bɔmʋŋ jaŋ kpʋʋ. Ama nʋʋ na-kala sɩ jaŋ kɛŋ ʋ tɩtɩa lɩɩ pɩ Babɩlɔŋ tɩmma-la sɩ kʋ tɔma hɛ jaŋ kɛŋ mɩɩsɩŋ, ʋ jaŋ fori a laa ʋ mɩɩsɩŋ.’ ”

¹⁰ La TƖƖNA bɩra sɩ, “Mɩ chaasa kɛŋ mɩ tʋɔŋ dɩ mɩ ŋaa wʋbɔŋ nɛ tabalɩŋ deeŋ lɛ, wʋzɔŋ dee. Mɩ jaŋ joŋu hɛ Babɩlɔŋ kuoro nɩsɩŋ lɛ, dɩ ʋ cheyu arɩ nyiniŋ.”

¹¹ Bʋla pɩ Juda kuoro dɩa nɩaa ma, “Má jegile nɩɩ mɩ-na ma TƖƖNA niiŋ wɩaa.

¹² Devit doho nɩaa, wɩɩ-la mɩ-na ma TƖƖNA sɩ bʋla nɛ ŋ-la: Má to wʋtɩtɩɩ tapʋlɩɩ na-kala. Má lorigo laa nɩɩ-la ba sɩ nyaga bil ta, nɩɩ-la sɩɩ gʋrʋ nɩsɩŋ lɛ. Dɩ ŋɩɩ dee, mɩ baanɩŋ jaŋ pusi a nagɛ nyiniŋ, a tɩŋ wʋbɔmɔ-la ma sɩ ŋaa wɩaa. Nʋʋkala tuo sɩ jaŋ leŋ dɩ mɩ baaŋ-la fɩɛlɛ.

¹³ Jerusalɛm, mɩ-na ma TƖƖNA chɩŋ ŋ lɛ nɛ, ŋ-na Jerusalɛm sɩ sagɛ tintee leŋiŋ nyuŋ a keese tɔ fuonaasɩŋ lɛ a nagɛ bʋŋ sɩ je wɩa-nyuŋ a keese tɔ tintee taala lɛ ŋɩɩ. Ma sɩ: ‘Kʋbɛɛ nɛ jaŋ wuo kʋ yuola? Kʋbɛɛ nɛ jaŋ wuo kʋ jʋʋ lee-la la sɩ faa?’

¹⁴ Mɩ jaŋ dɔgɩsɛma arɩ ma wʋŋaalaa sɩ dagɛ ŋɩɩ. Mɩ-na ma TƖƖNA nɛ bʋla. Mɩ jaŋ joŋ nyiniŋ hɛ ma duuŋ lɛ, dɩ ʋ dii kʋŋkala sɩ gollima. Mɩ-na ma TƖƖNA nɛ bʋla.”