JƐRƖMAAYA 20 - WƖA TENIŊ

Jɛrɩmaaya arɩ nɩɩ-la ba sɩɩ yɩrɛ Pasɩhɔ

¹ Ɩma nanʋala Pasɩhɔ sɩ ŋaa Wɩɩsʋllɩ sɩpaalaara, aŋ ŋaa La TƖƖNA dɩɩ-bal-la tɩntɩnnaa nɩhɩaŋ ma, sɩ nɩa dɩ Jɛrɩmaaya ka bʋl wɩalɩŋ Wɩa doluŋ lɛ,

² ʋ leŋ ba ŋmoo Wɩa wʋlaabʋlla Jɛrɩmaaya, aŋ kɛnʋ jɩla hɛ kuruŋ Bɛnjamɩŋ boi-baal-la sɩ kpagɛ La TƖƖNA dɩɩ-bal-la lɛ.

³ Taŋ sɩ pʋla, Pasɩhɔ lɩɩsʋ. Ŋɩɩ harɩŋ Jɛrɩmaaya bʋla pʋ, “Yɩrɩ-la La TƖƖNA sɩɩ yɩrɩŋ bɩra dee Pasɩhɔ, ŋ yɩrɩŋ nɛ Magɔ-Misabib (ʋ bʋbʋɔŋ nɛ fawʋllʋŋ hɛ lee-kala).

⁴ Wɩɩ-la La TƖƖNA sɩ bʋla nɛ ŋ-la: ‘Mɩ jaŋ leŋ dɩ fawʋllʋŋ kɛnɩŋ dɩ ŋ ma leŋ dɩ fawʋllʋŋ kɛŋ ŋ nandɔnsʋŋ. Ŋ sɩɩŋ lɛ, ŋ nandɔnsʋ-la dʋndɔŋŋɔɔ jaŋ kpʋba. Mɩ jaŋ joŋ Juda nɩaa kala hɛ Babɩlɔŋ kuoro nɩsɩŋ lɛ. Ʋ jaŋ kpʋ dɔnsʋŋ a kɛŋ dɔnsʋŋ ma mʋ Babɩlɔŋ tinteeŋ.

⁵ Mɩ jaŋ joŋ ba tabalɩŋ deeŋ dʋa kala a pɩ ba dʋndɔŋŋɔɔ, ba kʋŋaalaa, ba kʋyuŋŋoo arɩ Juda kuoroo dʋa kala. Ba jaŋ yuo laa ba kala a kaa mʋ Babɩlɔŋ.

⁶ Ŋ-na Pasɩhɔ, arɩ nɩalɩŋ kala sɩ hɛ ŋ dɩa lɛ jaŋ mʋ yoŋ-baga Babɩlɔŋ lɛ. Ŋ jaŋ sʋʋ nɩmɛ dɩ ba huguŋ, ŋ dɩ ŋ nandɔnsʋ-la kala ŋ sɩ nyɩɛ wɩaa pa.’ ”

Jɛrɩmaaya sɩ ŋmɛnɛ

⁷ La TƖƖNA, ŋ nyɩsɛmɛ nɛ, mɩ sɛɩ. Ŋ dolie kɩɩmɛ nɛ, a yuo diimi. Nɩaa ka sieri mɩ lɛ nɛ tapʋlɩɩ kala, nʋʋkala mʋmɔŋ mɩ lɛ.

⁸ Dɩ mɩ nɛ bʋl wɩaa bʋa na-kala, mɩ yie yel nɛ a heele bʋbʋl doluŋ sɩ diila arɩ cheeriŋ sɩ puula. La TƖƖNA niiŋ wɩaa joŋ joŋŋoo arɩ hɩɩsɩŋ nɛ a hɩhɛ mɩ lɛ tapʋlɩɩ kala.

⁹ Ama dɩ mɩ nɛ sɩ, “Mɩ bɩ jaŋ yɩrɛ ʋ yɩrɩŋ koo a bʋl wɩaa ʋ yɩrɩŋ lɛ,” ʋ niiŋ wɩaa sɩ hɛ mɩ tʋɔŋ lɛ yie nagɛ nyiniŋ a nyɩnyɩgɛmɛ. Mɩ lɔlɔ nɛ arɩ wɩalɩŋ sɩ hɛ mɩ tʋɔŋ lɛ. Wʋtɩtɩɩ, mɩ bɩ jaŋ wuo.

¹⁰ Mɩ nɩa dɩ nɩaa yʋga a munso bʋbʋl, “Fawʋllʋŋ hɛ lee-kala nɛ. Má wuoli ʋ bʋbʋɔŋ. Má leŋ la wuoli ʋ bʋbʋɔŋ.” Mɩ nandɔnsʋŋ kala nɩɩ gbɛrɛ dɩ mɩ tel a bʋbʋl, “Kapo la jaŋ wuo nyɩsʋ a yuo diiu a joŋ la baanɩŋ fɩɩsɛ ʋ lɛ.”

¹¹ Ama La TƖƖNA hɛ mɩ teeŋ nɛ a nagɛ laalɩyuori babii-balɩŋ. Ŋɩɩ wɩaa, nɩalɩŋ sɩ to naasɩŋ dʋdɔgɩsɛmɛ jaŋ gɛrɛ tel, ba bɩ jaŋ yuo diimi. Ba jaŋ yuo lɔl, dɩ hɩɩsɩŋ chaasa diiba. Nɩaa bɩ jaŋ kɔ dɩ ba yʋ hɩɩsɩ-la sɩ diiba wɩaa.

¹² La TƖƖNA doluŋ kala Tɩɩna, ŋ nɛ yie magɩsɛ tʋɔpʋl tɩŋŋaa, a jɩŋ wɩalɩŋ sɩ hɛ ba tʋɔŋ arɩ ba nyuŋ lɛ. Leŋ dɩ mɩ na ŋɩɩ ŋ sɩ jaŋ joŋ ŋ baanɩŋ timba, bɛɛ wɩaa, mɩ joŋ mɩ wɩɩkala hɛ ŋ nɩsɩŋ lɛ nɛ.

¹³ Má yɩɩ yɩɩlaa a pɩ La TƖƖNA. Má dɛnnɛ La TƖƖNA. Ʋ yie laa nɩalɩŋ sɩ bɩ ba tɩtɩa lɛ wuo pɛ ta nɛ nɩbɔŋŋɔɔ nɩsɩŋ lɛ.

¹⁴ Leŋ dɩ ŋmɩaŋ dii tapʋlɩɩ-la ba sɩ lʋlmɛ. Tapʋlɩɩ-la mɩ naaŋ sɩ lʋlmɛ bɩ tapʋl-zɔŋ ŋaa.

¹⁵ Leŋ dɩ ŋmɩaŋ dii baal-la sɩ kʋ hɛ duoso pɩ mɩ nyɩmma, a leŋ ʋ tʋɔŋ tɔrɛ a bʋl, “Ba lʋl hambolibie nɛ a pɩŋ.”

¹⁶ A leŋ dɩ baal-la nagɛ tasɩ-la La TƖƖNA sɩ cheye a bɩ ba nenige fá. A leŋ dɩ ʋ nɩɩ nii-ŋmobo chʋchʋɔŋ, aŋ nɩɩ laalɩŋ goŋ ma wɩɩhɛyɛ.

¹⁷ Ʋ bɩ mɩ kpʋa mɩ naaŋ luoruŋ tʋɔŋ. Dɩ mɩ nɛ fa sʋʋ mɩ naaŋ luoruŋ tʋɔŋ, ʋ luoruŋ nɛ fa jaŋ ŋaa mɩ bʋa a kaa mʋ wuu.

¹⁸ Bɛɛ nɛ paala tɩɩ mɩ kʋ lɩɩ mɩ naaŋ luoruŋ tʋɔŋ, a nɩna wʋwalɩmaa arɩ tʋɔ-cheeŋ ka dɩ mɩ tapʋlaa kala ma dɛrɛ arɩ hɩɩsɩŋ?