JƐRƖMAAYA 19 - WƖA TENIŊ

¹ Wɩɩ-la La TƖƖNA sɩ bʋla nɛ ŋ-la, “Mʋ yɔɔ taga pupo-mɛɛrɛ teeŋ. Pɛ kɛŋ nɩalɩŋ nɩhɩasɩŋ dɔnsʋŋ arɩ Wɩɩsʋllɩ sɩpaalaaraa dɔnsʋŋ,

² dɩ ma mʋ Bɛŋ-Hɩnɔm fuonaaŋ sɩ kpagɛ kanchelliŋ boi-baalɩŋ. Dɩ ma nɛ mʋ nɩmɛ, bʋl wɩalɩŋ mɩ sɩ jaŋ bʋla pɩŋ.

³ Bʋl, ‘Juda kuoroo arɩ Jerusalɛm nɩaa, má jegile nɩɩ mɩ-na ma TƖƖNA wɩaa.’ Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Má jegile nɩɩ, mɩ jaŋ kɛŋ wʋlɔrʋŋ kʋ hɛ leriŋ deeŋ nɩaa lɛ. Dɩ nʋʋkala nɛ nɩɩʋ ʋ dɩgɩlaa jaŋ chɩɩmɛ.

⁴ Ba vɩamɛ nɛ aŋ kɛŋ leriŋ deeŋ bɩrɩmɛ vesiŋ lee. Ba kpʋ pʋsʋŋ a nyɩga pɩ vesiŋ ba-na koo ba naabalɩmaba koo Juda kuoroo ha sɩ bɩ jɩŋ. Ba kpʋ nɩaa sɩ bɩ wɩɩ cheye nɛ a chei leriŋ deeŋ kala.

⁵ Ba saa Baal vesiŋ dɩ-kpaaraa nɛ dɩ ba nyɩgɛ ba hambolibiisiŋ a pɩ Baal. Mɩ dee bɩ wɩɩŋ deeŋ daga, ŋɩɩ paala bɩ mɩ tʋɔbɩɩnaa kɔ.

⁶ Ŋɩɩ wɩaa, má jɩŋ wɩɩŋ deeŋ lɛ, Mɩ-na ma Tɩɩna nɛ bʋla tapʋlaa ka kɔ nɛ nɩaa bɩra bɩ jaŋ yɩrɛ leriŋ deeŋ Tɔfɛf koo Bɛŋ Hɩnɔm fuonaaŋ, ama ba jaŋ yɩrʋ fuonaa-la lɛ ba sɩɩ kpʋ nɩaa.

⁷ Leriŋ deeŋ lɛ nɛ mɩ jaŋ chei Juda arɩ Jerusalɛm nɩaa wɩalɩŋ kala ba sɩ vʋʋra. Mɩ jaŋ leŋ dɩ ba dʋndɔŋŋɔɔ yuo diiba a kpʋba laalɩŋ lɛ, nɩalɩŋ sɩɩ chɛ ba lɩɩsɛ ba mɩɩsɩŋ. Mɩ jaŋ joŋ ba kʋsʋʋnʋŋ a pɩ zaaraa arɩ baga kɩaa.

⁸ Mɩ jaŋ chei tabalɩŋ deeŋ dɩ ʋ ŋaa kʋŋ nɩaa sɩ jaŋ mʋmɔŋ. Ʋ wɩaa jaŋ kperi nɩalɩŋ kala sɩ to nɩmɛ bɩbal, dɩ ba sisieri ʋ lɛ a tɩŋ ŋɩɩ ba sɩ cheyu.

⁹ Mɩ jaŋ leŋ dɩ ba gʋra chaŋ ba hambolibiisiŋ arɩ hantolibiisiŋ nammɩa. Bʋa-la lɛ ba dʋndɔŋŋɔɔ sɩ jaŋ faasa tɔba hɛ, ba jaŋ gʋra chɩchaŋ dɔŋɔ.

¹⁰ Jɛrɩmaaya, dɩ ŋ nɛ bʋl wɩalɩŋ dɛrɛ, joŋ taga-la yaga yɛrɛ nɩalɩŋ sɩ to ŋ harɩŋ mʋ sɩpaaŋ,

¹¹ aŋ bʋla pɩba, ‘Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: Mɩ jaŋ yɛrɛ tinteeŋ deeŋ arɩ tabalɩŋ deeŋ a nagɛ ŋɩɩ taga deeŋ sɩ yɛrɛ, ŋ bɩra bɩ ʋ wuo kaa mɛrɛ dɔŋɔ. Ba jaŋ hugi sʋʋnʋŋ Tɔfɛf lɛ ŋɩɩ halɩɩ dɩ ʋ tinteeŋ kala dɛrɛ.

¹² Wɩɩ-la mɩ sɩ jaŋ ŋaa leriŋ deeŋ arɩ nɩalɩŋ sɩ hɛ ʋ lɛ nɛ ŋɩɩ. Mɩ-na ma TƖƖNA nɛ bʋla. Mɩ jaŋ leŋ dɩ tabalɩŋ deeŋ nagɛ Tɔfɛf.

¹³ Jerusalɛm dɩɩsɩŋ arɩ Juda kuoroo dɩɩsɩŋ kala jaŋ kɛŋ disiniŋ a nagɛ Tɔfɛf. Ba dɩɩsɩ-la kala lɛ ba sɩ nyɩgɛ kʋsʋɔrʋsʋŋ lusuŋ-nyuŋ a pɩpɩ chɛnɛ arɩ chɛnwʋlaa aŋ ŋaa kʋnyʋalaa ma pɩpɩ ba vesiŋ kala jaŋ kɛŋ disiniŋ.’ ”

¹⁴ Ŋɩɩ nɛ Jɛrɩmaaya mɩɩra lɩɩ Tɔfɛf kɔ lee-la La TƖƖNA sɩ kɛnʋ mʋ dɩ ʋ bʋl wɩaa ʋ doluŋ lɛ, a kʋ chɩŋ La TƖƖNA dɩɩ-balɩŋ kaala tʋɔŋ a bʋla pɩ nɩalɩŋ kala,

¹⁵ “Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: ‘Má jegile nɩɩ, mɩ jaŋ kɛŋ wʋlɔrʋnʋ-la mɩ sɩ daga a kʋ hɛ tabalɩŋ deeŋ arɩ tabiisi-la kala sɩ gollu lɛ, bɛɛ wɩaa ba kɛŋ nyuduoŋ nɛ a bɩ chɛ ba jegile nɩɩ mɩ niiŋ wɩaa.’ ”