JƐRƖMAAYA 18 - WƖA TENIŊ

Jɛrɩmaaya mʋ pupo-mɛɛrɛ dɩa

¹ Wɩɩ-la La TƖƖNA sɩ bʋla pɩ Jɛrɩmaaya nɛ ŋ-la:

² “Mʋ pupo-mɛɛrɛ dɩa, nɩmɛ nɛ mɩ jaŋ bʋl wɩaa pɩŋ.”

³ Ŋɩɩ nɛ mɩ mʋ pupo-mɛɛrɛ dɩa, a na dɩ ʋʋ mɛ pupoiŋ bʋbʋa-chala soro lɛ.

⁴ Pupo-mɛɛrʋ-la sɩ cho dɩ ʋ mɛ pupoi-la dɩ ʋ nagɛ ŋɩɩ, ka ʋ bɩ ŋɩɩ naga, ʋ bɩra kɛŋ chʋrʋ-la kala ŋmʋra hɛ dɔŋɔ lɛ a mɛ pupoiŋ dɔŋ, ʋ nagɛ ŋɩɩ ʋ sɩɩ chɛ.

⁵ Ŋɩɩ nɛ La TƖƖNA bɩra bʋla pɩmɛ:

⁶ “Iziral tɩmma, mɩ bɩ wombiiŋ kɛnɛ dɩ mɩ ŋaama ŋɩɩ arɩ pupo-mɛɛrʋ-la sɩ ŋaa ŋɩɩ chʋrʋ-la lɛɛ? A nagɛ chʋrʋ-la sɩ hɛ pupo-mɛɛrʋ-la nɩsɩŋ lɛ ŋɩɩ, ŋɩɩ nɛ ma Iziral tɩŋŋaa ma hɛ mɩ nɩsɩŋ lɛ.

⁷ Dɩ mɩ nɛ bʋla bʋa na-kala lɛ arɩ mɩ jaŋ churi tintee nɩaa koo kuoru-gentine a yige lo a cheiba,

⁸ dɩ tintee-la nɩaa mɩ sɩ bʋl ŋɩɩ pa nɛ bɩrɩma lɩɩ ba wʋbɔŋŋɔɔ lɛ, ŋɩɩ-na mɩ jaŋ lemba, mɩ bɩra bɩ jaŋ joŋ wʋlɔrʋŋ hɛ ba lɛ arɩ mɩ sɩ bɩɩnɛ ŋɩɩ.

⁹ Dɩ bʋa dɔŋɔ ma lɛ nɛ dɩ mɩ bʋl arɩ ba saa tintee koo kuori-gentine a leŋ dɩ ʋ chɩŋ woruŋ,

¹⁰ ka dɩ ba ŋaa wʋbɔŋŋɔɔ mɩ sɩɩŋ lɛ a bɩ mɩ niiŋ sɛyɛ, ŋɩɩ-na mɩ jaŋ kɛŋ wʋzɔŋ-la mɩ fa sɩ bɩɩna dɩ mɩ ŋaa pɩba a bɩrɩmɛ.

¹¹ Lɛɛlɛ bʋla pɩ Juda nɩaa arɩ ba nɩalɩŋ dɔnsʋŋ sɩ hɛ Jerusalɛm lɛ, ‘Wɩɩ-la mɩ-na ma TƖƖNA sɩ bʋla nɛ ŋ-la: Má bee na, mɩɩ bɩɩnɛ wɩɩ nɛ dɩ mɩ ŋaa ma lɛ. Wʋlɔrʋ nɛ mɩɩ bɩɩnɛ dɩ mɩ joŋo dɔgɩsɛma. Ŋɩɩ wɩaa má kʋŋkala bɩrɩma lɩɩ ma wʋbɔŋŋɔɔ lɛ. Ma bɩrɩmɛ ma mɛlɛ arɩ ma wʋŋaalaa.’

¹² Ama ba jaŋ bʋl, ‘Ŋɩɩ bɩ bʋbʋa kala kɛnɛ. La jaŋ tuto la wombie-la la tɩtɩa sɩ vʋʋra bil. La kʋŋkala jaŋ kɛŋ nyuduoŋ a to ʋ tʋɔbɔmʋŋ harɩŋ.’ ”

¹³ Ŋɩɩ wɩaa, wɩɩ-la La TƖƖNA sɩ bʋla nɛ ŋ-la: “Ma pɩɛsɛ tinteyee lɛ a na, kʋbɛɛ nɛ ha nɩɩ wʋdoho deeŋ? Iziral tɩŋŋaa ŋaa wɩɩ sɩ chaasa lɔrɛ nɛ.

¹⁴ Lɩɩ-la sɩ faasa fɩɛlɛ a gulimi Lɛbanɔŋ peel-leŋie-la lɛ lere-la sɩ chullo tutuu ka lɛl nɛɛ? Ʋ lɩɩ-fɩɛla-la sɩ pɩna a pɛllɛ lɩɩ dɩ-bolii kʋkɔ ka kɛrɛ nɛɛ?

¹⁵ Ama mɩ nɩaa yʋ mɩ wɩaa nɛ. Ba nyɩgɛ kʋsʋɔrʋsʋŋ a pɩpɩ tɔŋŋɔɔ sɩ ŋaa kʋpɛɩba nɛ. Tɔmɔ-la nɛ leŋe ba titel ba wʋŋaalaa lɛ, a bɩ wombii-bɩnɩa-la ka to. Tɔmɔ-la leŋe ba vɩvɛŋ wombiee ba sɩ vɩa ta lɛ nɛ, wombiee ba sɩ bɩ wasa.

¹⁶ Ba tinteeŋ jaŋ pɩŋ pɛɩ, dɩ nɩaa mʋmɔŋ ʋ lɛ a kaa mʋ wuu. Ʋ wɩaa jaŋ kperi nʋʋkala sɩ to nɩmɛ a bɩbal, dɩ ba vivigisi nyuŋ.

¹⁷ Mɩ jaŋ kɛŋ mɩ nɩaa pɩsɛ ba dʋndɔŋŋɔɔ sɩpaaŋ, a nagɛ peliŋ sɩ du lɩɩ wɩɩpɔsʋŋ a paa kʋŋkɔlʋŋ. Mɩ jaŋ joŋ mɩ harɩŋ yɩaba, mɩ sɩpaaŋ dee, tapʋlɩɩ-la wʋlɔrʋnʋŋ sɩ jaŋ jʋʋba.”

¹⁸ Ba sɩ, “Má kɔ dɩ la vʋʋrɛ wɩɩ-la la sɩ jaŋ ŋaa Jɛrɩmaaya lɛ, bɛɛ wɩaa dɩ la nɛ ŋaa ŋɩɩ ma, wɩalɩŋ Wɩɩsʋllɩ sɩpaalaaraa sɩ daga a tɩgɛ wombii-la ba sɩ bile dɩ la tuto bɩ jaŋ kɔ dɩ ba lɛlɛ. Wʋjɩnnaa ma sɩɩ dagɛ wɩalɩŋ arɩ Wɩa wʋlaabʋllaa sɩɩ bʋl wɩalɩŋ bɩ jaŋ kɔ dɩ ba lɛlɛ. Ŋɩɩ wɩaa má leŋ dɩ la nyɩɛ wɩaa pʋ aŋ sɩ́ wɩalɩŋ ʋ sɩɩ bʋl jegilu.”

¹⁹ La TƖƖNA, jegile nɩɩ mɩ teeŋ. Jegile nɩɩ wɩalɩŋ nɩalɩŋ sɩ chɩŋ mɩ lɛ sɩɩ bʋl.

²⁰ Ʋ maga dɩ ba joŋ wʋbɔmʋŋ a tiŋ wʋzɔmʋŋ chɩmɩŋ nɛɛ? Ama ba lu bʋa nɛ a bil mɩ lɛ. La Tɩɩna, liise yi arɩ mɩ chɩŋ ŋ sɩpaaŋ nɛ a laa ba wɩaa bʋl, dɩ ŋ leŋ baaŋ-la ŋ fa sɩ na ba nyuŋ.

²¹ Ŋɩɩ wɩaa, La Tɩɩna, leŋ dɩ losuŋ kpʋ ba biiriŋ dɩ ba sʋʋ. Leŋ dɩ ba sʋʋ laalɩŋ lɛ, dɩ ba haalaa sɩ́ biiriŋ kɛŋ aŋ ŋaa yo-haalaa. Leŋ dɩ ba kpʋ ba baalaa arɩ bapʋɔsaa kala laalɩŋ lɛ.

²² Leŋ dɩ nɩaa nɩɩ ba nii-ŋmobo ba dɩɩsɩŋ lɛ, dɩ ŋ nɛ guu kɛŋ nɩaa sɩ jaŋ yuoba aŋ paa ba kɩaa kʋ hɛ ba lɛ. Ba lu bʋa nɛ dɩ mɩ foro tuu aŋ hɛ bɛrɩsɩŋ ma dɩ ba kɛmmɛ.

²³ La TƖƖNA, ŋ jɩŋ ŋɩɩ kala ba sɩ vʋʋra dɩ ba kpʋmɛ nɛ. Sɩ́ ba wʋbɔŋŋɔɔ joŋo chɛba, sɩ́ ŋ sɩaa lɩɩsɛ ba wʋbɔŋŋɔɔ lɛ. Leŋ dɩ ba tele bilimi ŋ sɩpaaŋ. Na baanɩŋ a dɔgɩsɛba.