JƐRƖMAAYA 17 - WƖA TENIŊ

¹ La Tɩɩna sɩ, “Hɔɔŋ nɛ ba kaa ŋmʋnsɛ Juda wʋbɔmʋŋ. Hɔɔ-chʋlachʋla-bie nɛ ba kaa tuuri. Ba ŋmʋnsɛ wɩalɩŋ hɛ ba tʋɔŋ lɛ nɛ arɩ ba vʋɩ-kpaarɛ korunuŋ nyilliŋ lɛ.

² Ba biiriŋ ma paala ka liisi ba vʋɩyaa korunu-la wɩaa nɛ arɩ vene-la ba sɩɩ yɩrɛ Asɩra daasɩŋ ba sɩ pɛ tɩɩ-lugu na-kala bʋbʋɔŋ arɩ dundolluŋ sɩ leŋie nyuŋ.

³ Mɩ peeliŋ sɩ hɛ tintee-la lɛ, ma dʋa arɩ ma kɩaa kala, mɩ jaŋ leŋ dɩ nɩaa laa ba kala, a pɛ ma vesiŋ dɩ-kpaaraa kala lɛ a tɩŋ wʋbɔmɔ-la ma sɩ ŋaa ma tinteeŋ kala lɛ wɩaa.

⁴ A tɩŋ ma tɩtɩa cheeriŋ wɩaa, dʋa-la mɩ sɩ joŋo pɩma jaŋ lɛl ma nɩsɩŋ lɛ. Mɩ jaŋ leŋ dɩ ma ŋaa ma dʋndɔŋŋɔɔ yosi, tintee-la ma sɩ bɩ jɩŋ lɛ. Ma leŋe mɩ baanɩŋ faasa sii ma nyuŋ nɛ, ʋ saa bɩ jaŋ fɩɛlɛ.”

⁵ Wɩɩ-la La TƖƖNA sɩ bʋla nɛ ŋ-la: “Ŋmɩaŋ jaŋ dii nɩɩ-la sɩ joŋ ʋ yɩɛlaa hɛ nuhuobiine lɛ, nɩɩ-la sɩ yelli nuhuobiine a joŋu ʋ nɛ ŋaa ʋ doluŋ, arɩ nɩalɩŋ sɩ mɩɩrɛ mɩ-na ma TƖƖNA harɩŋ.

⁶ Ʋ jaŋ nagɛ tɩɩ-pʋgʋŋ sɩ hɛ tintee-hɩlɩŋ lɛ, ʋ bɩ jaŋ kɔ dɩ ʋ dʋa kʋŋkala. Ʋ jaŋ hɛ tintee-hɩlɩŋ lere-la sɩ ŋaa kpesi bʋɔsʋŋ, tintee-la sɩ kɛŋ yɩsɩŋ, lee-la kʋŋkala sɩ bɩ jaŋ wuo waa.

⁷ Ama mɩ-na ma TƖƖNA jaŋ pɛ nɩɩ-la sɩ laamɛ dii lɛ, nɩɩ-la sɩ joŋ ʋ yɩɛlaa hɛ mɩ lɛ.

⁸ Ʋ jaŋ nagɛ tɩa ba sɩ chɔnsɔ a kpagɛ lɩɩŋ, ʋ naapoloo tɛllɛ mʋ jʋʋ fuoŋ. Ʋ bɩ lɩmɩŋ ka fá. Ʋ pɩpaarɩŋ yie biri nɛ bʋa na-kala lɛ. Ʋ-na sɩpaa tuo, dɩ hɩlɩŋ nɛ chɩna ma, ʋ yie nɩnɛŋ bʋa na-kala lɛ nɛ.

⁹ Nuhuobiine tʋɔŋ nɛ jaŋ wuo nyɩsɛ nɩa a kɩɩ kʋŋkala. Ʋ ŋaa kʋŋ nʋʋ sɩ bɩ wuo tɩɩbɛ nɛ. Kʋbɛɛ nɛ jaŋ wuo jɩŋ nuhuobiine tʋɔŋ wɩaa sɩaa?

¹⁰ Mɩ-na ma TƖƖNA nɛ yie beŋ nɩa tʋɔŋ a magɩsʋ na wɩalɩŋ sɩ hɛ ʋ nyuŋ lɛ aŋ timu a mʋ tɩgɛ ʋ mɛlɛ, arɩ ʋ wʋŋaalaa sɩ nagɛ ŋɩɩ lɛ.”

¹¹ A nagɛ yoho sɩ bɩ halaa lo, aŋ pɛŋ hala-la nyuŋ a tiesi, ŋɩɩ tɩtɩa nɛ nɩɩ-la sɩ ŋmʋrɛ nɩaa a dʋa kɩaa nagɛ. Dɩ ʋ nɛ yi ʋ jɩsɩŋ kpaa magɛ dɔŋɔ, ʋ dʋa-la jaŋ lɛl. Dɩdɛrɩŋ kala, ʋ jaŋ jɩŋ arɩ ʋ ŋaa nɩyaarɩ nɛ.

¹² Dɩ-suomuŋ kala nɛ la Wɩa kuoru kpasa kɛŋ tʋla a leŋie kɩɩ kʋŋkala. Ʋ nɛ ŋaa la Wɩa dɩɩ-balɩŋ sɩ bɩ disiniŋ kɛnɛ.

¹³ La TƖƖNA, ŋ lɛ nɛ Iziral tɩŋŋaa yɩɛlaa kala hɛ. Hɩɩsɩŋ jaŋ dii nɩalɩŋ kala sɩ joŋ harɩŋ yɩaŋ. Nɩalɩŋ kala sɩ mɩɩrɛ ŋ harɩŋ yɩrɩŋ jaŋ lɛl a nagɛ ba sɩ ŋmʋnsɛ nɩa yɩrɩŋ bil hagɩla lɛ, a tɩŋ ba sɩ vɩa La TƖƖNA sɩɩ pɩba mɩɩsɩŋ a nagɛ lɩɩ-bulo.

¹⁴ La TƖƖNA, vaarɛmɛ, dɩ ŋ nɛ ŋaa ŋɩɩ, mɩ jaŋ duori. Dɩ ŋ nɛ laamɛ ta, mɩ jaŋ na wiese, ŋ nɛ mɩɩ dɛnnɛ.

¹⁵ Nɩaa vɛnɛɛ pɩɛsɛmɛ bʋa kala, “La TƖƖNA niiŋ wɩalɩŋ hɛ nɩɩ? Leŋ dɩ wɩalɩŋ lɛɛlɛ sɛnɛ ŋaa.”

¹⁶ Mɩ bɩ ŋ harɩŋ mɩɩra a vɩa dɩ mɩ ŋaa ŋ pie-daarʋ. Mɩ ha bɩ bɩɩna arɩ maachie wʋlɔrʋŋ jaŋ jʋʋ ŋ nɩaa. Ŋ jɩŋ wɩalɩŋ kala mɩ sɩɩ bʋl nɛ.

¹⁷ Sɩ́ leŋe dɩ fawʋllʋŋ kɛmmɛ kɩŋkɛŋ. Ŋ nɛ mɩɩ yuori bʋa na-kala dɩ wʋlɔrʋŋ nɛ jʋʋmɛ.

¹⁸ Leŋ dɩ nɩalɩŋ sɩ to naasɩŋ dɔgɩsɛmɛ dii hɩɩsɩŋ, ama lɩɩsɛ mɩ-na hɩɩsɩŋ lɛ. Leŋ dɩ fawʋllʋŋ kɛmba, ama lɩɩsɛ mɩ-na wɩalɩŋ sɩ kɛŋ fawʋllʋŋ lɛ. Leŋ dɩ wʋlɔrʋŋ kʋ jʋʋba. Cheiba naansɩɩŋ bʋlɩa.

Ŋɩɩ ba sɩ jaŋ tuto chɛ-wiesii-la woruŋ

¹⁹ Wɩɩ-la La TƖƖNA sɩ bʋla pɩmɛ nɛ ŋ-la, “Mʋ chɩŋ nɩalɩŋ boi-baalɩŋ niiŋ, lee-la Juda kuoroo sɩ to jʋjʋʋ tabal-la aŋ lɩlɩɩ. Chɩŋ Jerusalɛm boi-baala-la dɔnsʋŋ ma kala lɛ.

²⁰ Bʋla pɩba: Má jegile nɩɩ mɩ-na ma TƖƖNA wɩaa, Juda kuoroo arɩ Juda nɩaa kala, arɩ nɩalɩŋ kala sɩ hɛ Jerusalɛm lɛ a to boi-baalaa deemba jʋjʋʋ.

²¹ Wɩɩ-la mɩ-na ma TƖƖNA sɩ bʋla nɛ ŋ-la: Má pɔ ma sɩ́ kɩaa chʋŋ chɛ-wiesii-la chɛɛŋ, a sɩ́ kʋŋ ma kala chʋŋa to Jerusalɛm boi-baalaa kʋ jʋʋ.

²² Má pɔ ma sɩ́ kɩaa chʋŋa kʋ lɩɩ ma dɩɩsɩŋ lɛ, a sɩ́ tɩntɩmɩɩ kala tɩŋ chɛ-wiesii-la chɛɛŋ. Má to chɛ-wiesii-la woruŋ dɩ ʋ ŋaa tapʋl-zɔŋ, arɩ ŋɩɩ mɩ sɩ daga pɩ ma naabalɩmaba.

²³ Ama ba fa bɩ jegile nɩɩ a kaa tɩŋ. Ba fa kɛŋ nyuduoŋ nɛ a bɩ chɛ ba jegile nɩɩ koo a sɛɩ dagɩŋ.

²⁴ Mɩ-na ma TƖƖNA sɩ, dɩ ma-na nɛ fɩɛlɛ ma sɩaa a to mɩ niiŋ a bɩ kɩaa chʋŋa to boi-baala-la kʋʋ jʋʋ aŋ lɩlɩɩ tabal-la lɛ chɛ-wiesii-la chɛɛŋ, a bɩ tɩntɩmɩɩ kala ka tɩŋ tapʋlɩɩ-la, aŋ joŋ tapʋlɩɩ-la dɩ ʋ ŋaa tapʋl-zɔŋ,

²⁵ ŋɩɩ-na kuorusu-la sɩ jaŋ hɔŋ Devit kuoru kpasa nyuŋ arɩ ba tɩntɩnnɩ-hɩasɩŋ jaŋ to boi-baalaa deemba kʋ jʋʋ tabal-la. Ba dɩ ba tɩntɩnnɩ-hɩasɩŋ jaŋ jɩl janɩŋ arɩ janɩŋ torukoba a kʋ jʋʋ. Juda nɩaa arɩ nɩalɩŋ sɩ hɛ Jerusalɛm lɛ jaŋ hɔŋ tabalɩŋ deeŋ lɛ a kaa mʋ wuu.

²⁶ Nɩaa jaŋ lɩɩ Juda tasɩŋ arɩ tabiisi-la sɩ golli Jerusalɛm a kɔ. Dɔnsʋŋ ma jaŋ lɩɩ Bɛnjamɩŋ tinteeŋ arɩ wɩɩjʋʋlʋŋ dɩɩrɩŋ dundollu-la sɩ hɛ peelee bʋbʋɔŋ, arɩ wɩɩpɔsʋŋ nadiiŋ tintee-la peelee sɩ yʋga. Ba jaŋ kɛŋ kʋnyɩgaa Wɩɩsʋlʋŋ kɩaa, pʋsʋŋ ma ba sɩ jaŋ kpʋ ŋaa Wɩɩsʋlʋŋ, mɩaa Wɩɩsʋlʋŋ kɩaa, kʋsʋɔrʋsʋŋ arɩ Wɩɩsʋlʋŋ kɩaa ma ba sɩ jaŋ kaa lɔllɛmɛ a kaa kɔ mɩ-na ma TƖƖNA dɩa.

²⁷ Ama dɩ ma nɛ bɩ mɩ niiŋ to a joŋ chɛ-wiesii-la dɩ ʋ ŋaa tapʋl-zɔŋ, aŋ chʋŋ kɩaa to boi-baala-la kʋʋ jʋʋ Jerusalɛm chɛ-wiesii-la chɛɛŋ, ŋɩɩ-na mɩ jaŋ chol nyiniŋ nʋʋ sɩ bɩ jaŋ wuo dɩsɛ a hɛ Jerusalɛm boi-baala-la lɛ dɩ ʋ dii Jerusalɛm dɩɩ-duoruŋ kala.”