JƐRƖMAAYA 16 - WƖA TENIŊ

Wʋlɔrʋŋ tapʋlʋŋ

¹ Ŋɩɩ nɛ La TƖƖNA bʋla pɩmɛ,

² “Ʋ bɩ maga dɩ ŋ jaa haala a lʋl biiriŋ leriŋ deeŋ.”

³ Wɩɩ-la La TƖƖNA sɩ bʋla a mʋ tɩgɛ hambolibiisi-la arɩ hantolibiisi-la ba sɩ lʋla tinteeŋ deeŋ lɛ, ba naamba arɩ ba nyɩmmaba lɛ nɛ ŋ-la:

⁴ “Nyanyal bɔŋŋɔɔ jaŋ kpʋba. Ba bɩ jaŋ hugiba koo a yel ba yoho. Ba jaŋ nagɛ nʋsʋrʋŋ a pɩŋ tinteeŋ. Ba jaŋ kpʋ dɔnsʋŋ laalɩŋ lɛ, dɩ losuŋ ma kɛŋ dɔnsʋŋ dɩ ba sʋʋ. Ba kʋsʋʋnʋŋ jaŋ bɩrɩmɛ zaaraa arɩ baga kɩaa kʋdiilee.”

⁵ Wɩɩ-la La TƖƖNA bɩra sɩ bʋla nɛ ŋ-la: “Pʋpɔ ŋ sɩ́ dɩa kala lɛ ba sɩɩ ŋaa yoho kʋdiilee jʋʋ. Pʋpɔ ŋ sɩ́ yel koo a nyagɛ nɩalɩŋ sɩɩ yel bɔyɛ, bɛɛ wɩaa, mɩ leŋ ŋɩɩ mɩ fa sɩɩ pɛ ba lɛ nɛ. Mɩ fa sɩ choba ŋɩɩ a fɩfá ba nisusuŋ, ŋɩɩ bɩra tuo. Mɩ-na ma TƖƖNA nɛ bʋla.

⁶ Nɩbalaa arɩ nɩbiisiŋ kala jaŋ sʋʋ tinteeŋ deeŋ lɛ. Ba bɩ jaŋ hugiba koo a yel ba yosuŋ. Nʋʋkala bɩ jaŋ tɩŋ ba wɩaa a kpɛrɛ ʋ tɩtɩa koo a fʋŋ ʋ nyuŋ.

⁷ Nʋʋkala bɩ jaŋ joŋ kʋdiilii a pɩ nɩalɩŋ sɩɩ yel yoho, dɩ ʋ nyɩmma koo ʋ naaŋ nɛ paala sʋʋ ma, nʋʋ bɩ jaŋ joŋ kʋnyʋalɩɩ ma paala pɩba a nyagɛ ba bɔyɛ.

⁸ Pʋpɔ ŋ sɩ́ dɩa kala lɛ ba sɩ ŋaa kʋdiilee dii aŋ gbigbieli jʋʋ, a hɔŋ nɩmɛ dii kɩaa aŋ nyʋa kɩaa.

⁹ Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Ŋ mɩɩsɩŋ lɛ, ŋ sɩɩŋ jaŋ na dɩ mɩ leŋe dɩ tʋɔtɔrɛ goŋ-la ba sɩɩ ŋaa kala dɛrɛ, dɩ ha-falaa arɩ ba balaba goŋ ma dɛrɛ leriŋ deeŋ.

¹⁰ Dɩ ŋ nɛ bʋl wɩaa deemba kala pɩ nɩaa deemba dɩ ba pɩɛsɩŋ, ‘Bɛɛ nɛ tɩɩ La TƖƖNA bʋl wʋlɔrʋŋ deeŋ a tɩgɛ la lɛ? Wʋbɛɛ nɛ la chei? Wʋbɔŋ bɛɛ nɛ la ŋaa La TƖƖNA Wɩa lɛ?’

¹¹ Ŋɩɩ-na bʋla pɩba, ‘A tɩŋ ma naabalɩmaba sɩ vɩamɛ, aŋ to vesiŋ, a kpaarɛba wɩaa nɛ tɩɩ.’ Mɩ-na ma TƖƖNA nɛ bʋla. Ba vɩamɛ nɛ a bɩ mɩ wombii-la mɩ sɩ bile dɩ ba tuto ka to.

¹² Ama ma nɛ paala ŋaa wʋbɔŋŋɔɔ a kɩɩ ma naabalɩmaba-la. Ma kʋŋkala kɛŋ nyuduoŋ nɛ a to ʋ tʋɔbɔmʋŋ harɩŋ, aŋ vɩa dɩ ʋ sɛɩ mɩ niiŋ.

¹³ Ŋɩɩ wɩaa, mɩ jaŋ lɩɩsɛma tinteeŋ deeŋ lɛ a kaa mʋ tintee dɔŋ, ma-na koo ma naabalɩmaba sɩ bɩ jɩŋ. Nɩmɛ nɛ, ma jaŋ tuto vesiŋ wɩɩhɛyɛ arɩ tɩtaŋɩŋ kala. Mɩ bɩ jaŋ kɔ dɩ mɩ fá ma nenige.”

¹⁴ La TƖƖNA bɩra sɩ, “Tapʋlaa ka kɔ nɛ, nɩaa bɩra bɩ jaŋ bʋl, ‘La ŋmɩɛsɛ La TƖƖNA sɩ weye, ʋ nɛ kɛŋ Iziral tɩŋŋaa kʋ lɩɩ Ijipiti tinteeŋ lɛ.’

¹⁵ Ama ba jaŋ bʋl, ‘La ŋmɩɛsɛ La TƖƖNA sɩ weye, ʋ nɛ kɛŋ Iziral tɩŋŋaa kaa lɩɩ wɩɩpɔsʋŋ nagʋa tinteeŋ arɩ tinteye-la kala lɛ ʋ sɩ kɛmba pɩsa hɛ.’ Mɩ jaŋ bɩra leŋ dɩ ba kʋ tɩɩ tintee-la mɩ sɩ joŋo pɩ ba naabalɩmaba.

¹⁶ Ama lɛɛlɛ, mɩ-na ma TƖƖNA jaŋ tɩma yɩrɛ nɩ-daŋ dɩ ba kʋ kɛsɛ nɩaa deemba a nagɛ chenfil-kpʋʋra sɩɩ kɛsɛ chenfilee. Ʋ ŋɩɩ harɩŋ lɛ, mɩ jaŋ tɩma yɩrɛ nambagɩlaa ma a yʋgɛ, dɩ ba kʋ bagɩla kɛsɛba peelee arɩ dundolluŋ nyuŋ arɩ bʋ-pɛgɩsɩŋ lɛ.

¹⁷ Mɩ sɩaa ka na ba wʋŋaalaa kala nɛ. Wɩalɩŋ kʋŋkala bɩ faa mɩ teeŋ. Ba wʋbɔŋŋɔɔ ma bɩ faa mɩ teeŋ.

¹⁸ Mɩ jaŋ timba naansɩɩŋ bʋlɩa a tɩŋ ba wʋbɔŋŋɔɔ arɩ ba wʋcheelee wɩaa, bɛɛ wɩaa ba ŋaa disiniŋ hɛ mɩ tinteeŋ lɛ nɛ arɩ ba tɔmɔ-la sɩ bɩ wei, a leŋ mɩ tinteeŋ su arɩ ba tɔmɔ-la mɩ sɩɩ kɩsʋ.”

¹⁹ La TƖƖNA, mɩ doluŋ arɩ mɩ dɩ-duoŋ, ŋ nɛ mɩ yie yuori dɩ hɛɛŋ nɛ jʋʋmɛ. Tinteyee nɩaa jaŋ kɔ ŋ teeŋ, a lɩɩ dʋnɩa sɛmɛ na-kala a bʋl, La naabalɩmaba bɩ kʋŋkala kɛnɛ see vesiŋ sɩ bɩ wʋtɩtɩɩ kɛnɛ, tɔŋŋɔɔ sɩ ŋaa kʋpɛɩba a bɩ wʋzɔŋ kala ŋaa pɩba.

²⁰ Nuhuobiinee jaŋ wuo ŋaa ba tɩtɩa vesiŋ? Oo, ama ba bɩ Wɩa ŋaa.

²¹ La TƖƖNA bʋl, “Ŋɩɩ-na mɩ jaŋ dagɛba bʋa deeŋ lɛ, mɩ jaŋ dagɛba mɩ doluŋ kala. Ŋɩɩ nɛ ba jaŋ jɩŋ arɩ mɩ nɛ ba TƖƖNA.”