JƐRƖMAAYA 15 - WƖA TENIŊ

¹ Ŋɩɩ nɛ La TƖƖNA bʋla pɩmɛ, “Dɩ Mosis arɩ Samʋɛl nɛ fa paala kʋ chɩŋ mɩ sɩpaaŋ a sʋlmɛ ma, mɩ bɩ jaŋ fá nɩaa deemba nenige. Kiriba ta dɩ ba sʋrɩsɛ mɩ sɩpaaŋ! Leŋ dɩ ba mʋ!

² Dɩ ba nɛ pɩɛsɩŋ, ‘Nɩɩ nɛ la jaŋ mʋ?’ bʋla pɩba, Wɩɩ-la mɩ-na ma TƖƖNA sɩ bʋla nɛ ŋ-la: ‘Nɩalɩŋ nyanyal bɔŋŋɔɔ sɩ jaŋ kpʋ, ba jaŋ kpʋ. Nɩalɩŋ sɩ jaŋ sʋʋ laalɩŋ lɛ, ba jaŋ sʋʋ. Nɩalɩŋ losuŋ sɩ jaŋ kɛŋ dɩ ba sʋʋ, ba jaŋ sʋʋ. Nɩalɩŋ ma ba sɩ jaŋ kɛsɛ mʋ yoŋ-baga, ba jaŋ kɛsɛ mʋ.’

³ Mɩ jaŋ joŋ wɩaa banɛsɛ sɩ jaŋ cheiba a hɛ ba lɛ. Mɩ-na ma TƖƖNA nɛ bʋla. Ba jaŋ kpʋba laalɩŋ lɛ, dɩ vasɩŋ lɛrɛba kaa viiri, dɩ zaaraa arɩ baga kɩaa diiba, a kɛmba chei.

⁴ Mɩ jaŋ ŋaa dɩ ba nagɛ kʋŋ sɩɩ sʋɔrʋ dʋnɩa kuoroo kala teeŋ, a tɩŋ wɩalɩŋ Hezikaaya nanʋala Manasɛ sɩ dii Juda tinteeŋ kuoruŋ a ŋaa Jerusalɛm lɛ wɩaa.

⁵ Jerusalɛm nɩaa, kʋbɛɛ nɛ jaŋ fá ma nenige? Kʋbɛɛ nɛ jaŋ bunsi ma wɩaa? Kʋbɛɛ nɛ jaŋ chɩna pɩɛsa na ma yarɩfɩɛlaa wɩaa?

⁶ Ma vɩamɛ nɛ. Mɩ-na ma TƖƖNA nɛ bʋla. Ma joŋ harɩŋ yɩyɩamɛ nɛ. Ŋɩɩ wɩaa mɩ jaŋ joŋ nɩsɩŋ daŋ ma lɛ a cheima. Mɩ bɩra bɩ jaŋ wuo fá ma nisusuŋ.

⁷ Mɩ jaŋ kɛŋ mɩɩ-chaarɛ gbaŋa chaarɛma a balɩma lɩɩsɛma tintee-la tabalɩŋ boi-baalaa niiŋ. Mɩ jaŋ joŋ tʋɔ-cheeŋ hɛ mɩ nɩaa lɛ, mɩ jaŋ cheiba, bɛɛ wɩaa ba bɩ ba wʋbɔŋŋɔɔ ŋaanɩŋ leŋe.

⁸ Mɩ jaŋ leŋ dɩ ba yo-haalaa faasa pʋrɩgɛ, a kɩɩ mʋgʋ-balɩŋ niiŋ hagɩlɩ-bumbugulo. Mɩ jaŋ kɛŋ nɩalɩŋ sɩɩ chei leriŋ kʋ hɛ ba lɛ wɩɩhɛɩ-siesee, dɩ ba kpʋ ba bapʋɔsɛ-biisiŋ, ka dɩ ba naamba bibeŋ. Mɩ jaŋ guu lɛrɛ tʋɔ-cheeŋ arɩ wɩaa sɩ faasa kɛŋ fawʋllʋŋ kɩŋkɛŋ a kʋ hɛ ba lɛ.

⁹ Naaŋ-la sɩ kɛŋ biiriŋ balɩpɛ jaŋ yiegi, a wiese lʋlɔl. Ʋ wɩɩ-muluŋ jaŋ jʋʋ, ka ʋ ha ŋaa wɩɩhɛyɛ. Ba jaŋ hɩɩsʋ a jolimu. Mɩ jaŋ kpʋ nɩalɩŋ sɩ ka a bɩ sʋba ba dʋndɔŋŋɔɔ sɩpaaŋ. Mɩ-na ma TƖƖNA nɛ bʋla.”

¹⁰ Mɩ naaŋ, ŋ lʋlmɛ hɛ wɩaa lɛ nɛ, mɩ ŋaa nʋʋ tintee-la nɩaa kala kaa yuyuo yuosuŋ. Mɩ ha bɩ kʋŋ joŋo chɩŋ nʋʋ, mɩ bɩ nʋʋ ma chɩŋ die, ka nʋʋkala ŋmɩɛsa hɩhɛ mɩ lɛ.

¹¹ La TƖƖNA sɩ, “Wʋtɩtɩɩ, mɩ jaŋ laaŋ ta wʋzɔŋ wɩaa. Wʋtɩtɩɩ, mɩ jaŋ leŋ dɩ ŋ dʋndɔŋŋɔɔ kʋ sʋlʋŋ dɩ ŋ pɛ ba lɛ, bʋa-la lɛ wʋlɔrʋŋ arɩ hɛɛŋ sɩ jaŋ jʋʋba.

¹² Nuhuobiine bɩ jaŋ wuo bori hɔɔŋ arɩ kɔlɩɩŋ hɔɔ-la ba sɩ kaa lɩɩ wɩɩpɔsʋŋ nagʋa dɩɩrɩŋ.

¹³ Ma dʋa arɩ ma kɩaa kala, mɩ jaŋ leŋ dɩ nɩaa kʋ paaba viiri, ba bɩ jaŋ tiŋ kʋŋkala a tɩŋ wʋbɔmɔ-la ma sɩ ŋaa ma tinteeŋ kala lɛ wɩaa.

¹⁴ Mɩ jaŋ leŋ dɩ ma ŋaa ma dʋndɔŋŋɔɔ yosi, tintee-la ma sɩ bɩ jɩŋ lɛ. Mɩ baanɩŋ jaŋ sii a nagɛ nyiniŋ ma nyuŋ a diima.”

¹⁵ La TƖƖNA, ŋ jɩŋ wɩɩkala sɩaa nɛ, liisi mɩ wɩaa aŋ beŋ mɩ nyuŋ. Laa mɩ yuosuŋ yuo pɩmɛ nɩalɩŋ sɩ to naasɩŋ dɔgɩsɛmɛ lɛ. Sɩ́ nyalɩma bibeŋ ka dɩ ba kpʋmɛ. Liise yi ŋɩɩ mɩ sɩ dii hɩɩsɩŋ ŋ wɩaa.

¹⁶ Ŋ sɩ bʋl ŋ wɩaa pɩmɛ, mɩ jegile nɩɩ nɛ. Wɩalɩŋ nɩɩ pɩmɛ tʋɔtɔrʋŋ, mɩ choba woruŋ, bɛɛ wɩaa mɩ ŋaa ŋ nʋʋ nɛ, La TƖƖNA Wɩa doluŋ kala Tɩɩna.

¹⁷ Mɩ ha bɩ nɩalɩŋ sɩɩ nɩɩ sɩma a yie hɔnɔ ŋɩŋaa goŋ harɩŋ to, mɩ dɩ ba ha bɩ hɔnɔ dii kɩaa a gbieli. Mɩ yie hɔŋ mɩ dʋndʋŋ nɛ, bɛɛ wɩaa ŋ nɛ kɛmmɛ tɩtɩŋ, ŋ joŋ ŋ baanɩŋ hɛ mɩ lɛ.

¹⁸ Bɛɛ nɛ tɩɩ mɩ hɛɛŋ bɩ dɛrɛ, mɩ naawɩɩlaa ma faasa verigi a bɩ fɩɛlɛ? Ŋ chɛ ŋ nyɩsɛmɛ a nagɛ fuoŋ sɩ yie hɩl wulumuŋ lɛ nɛ koo a nagɛ lɩɩ-bul-sɩɩŋ sɩ tɔ nɛɛ?

¹⁹ Ŋɩɩ wɩaa, wɩɩ-la La TƖƖNA sɩ bʋla pɩ Jɛrɩmaaya nɛ ŋ-la: “Dɩ ŋ nɛ bɩrɩma lɩɩ ŋ wʋbɔŋŋɔɔ ŋaanɩŋ lɛ, mɩ jaŋ leŋ dɩ ŋ bɩra kʋ tɩma pɩpɩmɛ. Dɩ ŋ nɛ jaŋ leŋ wʋtɔɔnʋŋ bʋlʋŋ, aŋ bʋbʋl wɩaa sɩ kɛŋ bʋbʋɔŋ, ŋ jaŋ ŋaa mɩ wʋlaabʋllʋ. Leŋ dɩ nɩaa deemba nɛ mɩɩra kʋ toŋ, ama ʋ bɩ maga dɩ ŋ nɛ toba.

²⁰ Mɩ jaŋ leŋ dɩ ŋ nagɛ jeeŋ nɩaa deemba teeŋ, ŋ jaŋ nagɛ kɔlɩɩŋ ba sɩ kaa saa jeeŋ gollo chu. Ba jaŋ yuoŋ, ama ba bɩ jaŋ wuo yuo diiŋ, bɛɛ wɩaa mɩ hɛ ŋ teeŋ nɛ, mɩ jaŋ pɔŋ a laaŋ ta. Mɩ-na ma TƖƖNA nɛ bʋla.

²¹ Mɩ jaŋ laaŋ ta nɩbɔŋŋɔɔ nɩsɩŋ lɛ, a laaŋ ta tʋɔhɛɛ tɩŋŋaa nɩsɩŋ lɛ.”