JƐRƖMAAYA 13 - WƖA TENIŊ

Gɛrɩpɛ fʋfʋlʋŋ tɩŋgɛnnɛ

¹ Wɩɩ-la La Tɩɩna fa sɩ bʋla pɩmɛ nɛ ŋ-la: “Mʋ yɔɔ gɛrɩpɛ fʋfʋlʋŋ tɩŋgɛnnɛ a joŋo vɔɔ ŋ tɩŋa, ama sɩ́ leŋe dɩ ʋ digi lɩɩŋ.”

² Ŋɩɩ nɛ mɩ yɔɔ tɩŋgɛnnɛ-la, arɩ La TƖƖNA sɩ dagɛ ŋɩɩ, a joŋo vɔɔ mɩ tɩŋa.

³ Ŋɩɩ nɛ La TƖƖNA bɩra bʋl wɩaa pɩmɛ lɩamɩŋ lɛ. Ʋ sɩ,

⁴ “Joŋ tɩŋgɛnnɛ-la ŋ sɩ yɔbɔ a vʋvɔɔ a kaa mʋ Pɛraf sɩ kpagɛ Yufireti fuo-la a joŋo faa bʋ-bʋa lɛ.”

⁵ Ŋɩɩ nɛ mɩ kaa mʋ faa Pɛraf lɛ, arɩ La TƖƖNA fa sɩ bʋl ŋɩɩ pɩmɛ.

⁶ Ʋ dieni, ka La TƖƖNA bɩra bʋla pɩmɛ, “Mʋ Pɛraf a joŋ tɩŋgɛnnɛ-la mɩ fa sɩ ŋaa ŋ kaa mʋ faa nɩmɛ.”

⁷ Ŋɩɩ nɛ mɩ mʋ Pɛraf lee-la mɩ fa sɩ joŋ tɩŋgɛnnɛ-la faa, a lɩɩsɛ dɩ ʋ kala cheye ŋ bɩra bɩ jaŋ wuo kaa ŋaa wɩɩkala.

⁸ Ŋɩɩ nɛ La TƖƖNA bɩra bʋl wɩaa pɩmɛ.

⁹ Wɩɩ-la ʋ sɩ bʋla nɛ ŋ-la: “Kʋ-la sɩ chei ŋɩɩ, ŋɩɩ tɩtɩa nɛ, mɩ jaŋ chei Juda nɩaa babii-ballɩŋ arɩ Jerusalɛm nɩaa ma babii-ballɩɩ-la sɩ faasa yʋgɛ.

¹⁰ Nɩbɔŋŋɔɔ deemba sɩ vɩa dɩ ba jegile nɩɩ mɩ wɩaa, nɩalɩŋ sɩɩ to ba nyuduoŋ harɩŋ, a kire tuto vʋɩyaa harɩŋ a tɩma pɩpɩba a kpʋkpaarɛba jaŋ nagɛ tɩŋgɛnnɛ deeŋ. Ba jaŋ chei a chaasa ŋaa nɩpɛɩba.

¹¹ A nagɛ ba sɩ yie joŋ tɩŋgɛnnɛ vɔɔ tɩŋa ŋɩɩ, ŋɩɩ tɩtɩa nɛ mɩ fa vɔɔ Iziral doho arɩ Juda doho nɩaa kala a mɛrɛ mɩ tɩtɩa lɛ. Mɩ fa ŋaa ŋɩɩ dɩ ba ŋaa mɩ nɩaa nɛ, a dɩdɛnnɛmɛ a yɩyɩrɛ mɩ yɩrɩ-balɩŋ a zizilmi, ama ba fa bɩ jegile nɩɩ. Mɩ-na ma TƖƖNA nɛ bʋla.

Girep nɛnɛɛ sɩnɩŋ puroo

¹² Bʋla pɩba, ‘Wɩɩ-la mɩ-na ma TƖƖNA Iziral tɩŋŋaa Wɩa sɩ bʋla nɛ ŋ-la: Girep nɛnɛɛ sɩnɩŋ puru na-kala maga dɩ ʋ su nɛ arɩ girep nɛnɛɛ sɩnɩŋ.’ Dɩ ba nɛ pɩɛsɩŋ, ‘Ŋ bɩɩna la bɩ jɩŋ arɩ girep nɛnɛɛ sɩnɩŋ puru na-kala maga dɩ ʋ su arɩ girep nɛnɛɛ sɩnɩŋ nɛ koo?’

¹³ Ŋɩɩ-na bʋla pɩba, ‘Wɩɩ-la La TƖƖNA sɩ bʋla nɛ ŋ-la: Mɩ jaŋ leŋ dɩ nɩalɩŋ kala sɩ hɛ tintee-la lɛ ŋaa sɩ-nyʋara a pɛ Devit doho nɩalɩŋ sɩɩ dii kuoruŋ: Wɩɩsʋllɩ sɩpaalaaraa, mɩ wʋlaabʋllaa, arɩ nɩalɩŋ kala sɩ hɛ Jerusalɛm lɛ.

¹⁴ Mɩ jaŋ paaba yagɛ a daŋ dɔŋɔ lɛ, nyɩmmaba arɩ biiriŋ kala. Mɩ-na ma TƖƖNA nɛ bʋla. Mɩ bɩ jaŋ lemba, mɩ bɩ jaŋ fá ba nenige koo ba nisusuŋ, mɩ jaŋ kpʋba.’ ”

Ba fugisi Iziral tɩŋŋaa arɩ ba jaŋ kɛsɛba mʋ yoŋ-baga

¹⁵ Má kpil dɩgɩlaa a jegile nɩɩ wɩalɩŋ La TƖƖNA sɩ bʋla aŋ sɩ́ nyuduoŋ kɛŋ.

¹⁶ Má zil ma TƖƖNA Wɩa, ka dɩ ʋ-na leŋ dɩ leriŋ biri, dɩ ma gɛrɛ dundollu-la sɩ kɛŋ birimiŋ lɛ. Maa chɛ dɩ ma na pʋlʋmʋŋ nɛ, ama ʋ jaŋ kɛŋ pʋlʋŋ-la bɩrɩmɛ birimiŋ lim, a ŋaa dɩ leriŋ faasa biri woruŋ.

¹⁷ Ama dɩ ma nɛ bɩ jegile nɩɩ, mɩ jaŋ lʋara yel a tɩŋ ma babii-ballɩŋ wɩaa. Mɩ jaŋ chaasa yel woruŋ, dɩ mɩ sɩaa pɩpɛllɛ sɩlɩɩrɩŋ, bɛɛ wɩaa ba jaŋ yuo kɛsɛ La TƖƖNA nɩaa kaa viiri.

¹⁸ La TƖƖNA bʋla pɩmɛ, “Bʋla pɩ kuoru-balɩŋ arɩ ha-kuoro, má tuu ma kuoru kpasɩnɩŋ nyuŋ, ma kuori-nyunchu zɔmɔ-la jaŋ suri ma nyusuŋ lɛ a tuu tel.”

¹⁹ Ba jaŋ tɔ tabala-la sɩ hɛ Juda tinteeŋ wɩɩpɔsʋŋ nadiiŋ dɩɩrɩŋ a hɛ, nʋʋkala tuo sɩ jaŋ wuo laaba ta. Ba jaŋ kɛsɛ Juda nɩaa kala a kaa mʋ yoŋ-baga, ba jaŋ kɛsɛ ba kala a kaa viiri.

²⁰ Má kɛŋ ma sɩaa je a na nɩalɩŋ sɩ lɩɩ wɩɩpɔsʋŋ nagʋa dɩɩrɩŋ kʋkɔ. Nɩɩ nɛ nɩalɩŋ ba sɩ joŋo hɛ ma nɩsɩŋ lɛ hɛ, nɩalɩŋ ma fa sɩ kaa ŋmoo bɔyɛ?

²¹ Wʋbɛɛ nɛ ma jaŋ bʋl dɩ La TƖƖNA nɛ leŋe nɩalɩŋ ma sɩ joŋo arɩ ba dɩ ma niiŋ chaasa ŋaa kʋbala nɛ mɩɩra kɛŋ doluŋ ma nyuŋ? Hɛɛŋ bɩ jaŋ jʋʋma a nagɛ haala sɩɩ chɛ ʋ lʋl ʋ luoruŋ wʋwɩɩ ŋɩɩ?

²² Dɩ ma nɛ pɩɛsɛ ma tɩtɩa, “Bɛɛ nɛ tɩɩ wɩɩŋ deeŋ ŋaa la lɛ?” Ma wʋbɔŋŋɔɔ sɩ yʋga wɩaa nɛ tɩɩ ba kɩɛsɛ ma gɛnnɩŋ aŋ dɔgɩsɛma ŋɩɩ.

²³ Kus tɩɩna jaŋ wuo kɛŋ ʋ yaraa bɩrɩmɛ koo kpeye jaŋ wuo kɛŋ ʋ yaraa sɩ ŋaa ŋmʋna ŋmʋna ŋɩɩ a bɩrɩmɛ? Ma ma saa bɩ jaŋ wuo ŋaa wʋzɔŋŋɔɔ, bɛɛ wɩaa wʋbɔŋŋɔɔ nɛ ma ŋaa mal.

²⁴ La TƖƖNA sɩ, “Mɩ jaŋ kɛmma pɩsɛ a nagɛ mɩɩ-jɔrʋŋ tintee-hɩlɩŋ peliŋ sɩ paa vɩvɛŋ.

²⁵ Ma toruŋ nɛ ŋɩɩ, kpaal-la mɩ sɩ daga pɩma nɛ ŋɩɩ. Mɩ-na ma TƖƖNA nɛ bʋla, bɛɛ wɩaa ma yʋ mɩ wɩaa nɛ aŋ joŋ ma yɩɛlaa hɛ wʋnyɩɛrɩ vʋɩyaa lɛ.

²⁶ Mɩ jaŋ polli ma gɛnnɩŋ ta, ka dɩ nɩaa na ma hɩɩsɩŋ,

²⁷ a tɩŋ ma wʋchɔrʋmɔɔ arɩ ma sɩaa wʋchoolie-la ma sɩ hiine chɛ, arɩ hɩɩsɩ wɩalɩŋ ma sɩ ŋaa lɛ. Mɩ na wʋkɩsɩa-la ma sɩɩ ŋaa nɛ dundolluŋ arɩ bagɩsɩŋ lɛ. Jerusalɛm tɩmma, wɩɩŋ puuma. Ɛɛ nɛ maa chɛ dɩ ma kɛŋ disiniŋ a diene magɛ?”