JƐRƖMAAYA 1 - WƖA TENIŊ

¹ Wɩalɩŋ Hɩlɩkaaya nanʋala Jɛrɩmaaya sɩ bʋla nɛ ŋ-la. Ʋ fa ŋaa Wɩɩsʋllɩ sɩpaalaaraa dɔŋɔ nɛ, a lɩɩ taŋ-la ba sɩɩ yɩrɛ Anatɔf sɩ hɛ Bɛnjamɩŋ tinteeŋ lɛ.

² Amɔŋ nanʋala Josaaya sɩ dii Juda tinteeŋ kuoruŋ, ʋ jɩsɩŋ fii arɩ batori tʋɔŋ nɛ La TƖƖNA fa bʋl wɩaa a pɩ Jɛrɩmaaya.

³ Ŋɩɩ harɩŋ, ʋ fa bɩra bʋl wɩaa a pʋ bʋa-la lɛ Josaaya nanʋala Jehoyakim sɩ dii Juda tinteeŋ kuoruŋ. Ʋ ha bʋl wɩaa pʋpʋ nɛ a mʋ yi Josaaya nanʋala Zedikaaya sɩ dii kuoruŋ ʋ jɩsɩŋ fii arɩ kʋbala chɛŋ-nɔŋ tʋɔŋ. Bʋa-la lɛ dɩ ba fa kɛsɛ Jerusalɛm nɩaa mʋ yoŋ-baga.

La TƖƖNA yɩrɛ Jɛrɩmaaya

⁴ La TƖƖNA fa bʋl wɩaa pɩmɛ. Ʋ sɩ,

⁵ “Ka dɩ mɩ-na ŋaaŋ a hɛ ŋ naaŋ luoruŋ tʋɔŋ, mɩ jɩmɩŋ nɛ. Ka dɩ ba-na lʋlʋŋ, mɩ lɩɩsɩŋ nɛ a leŋ ŋ ŋaa mɩ wʋlaabʋllʋ a pɩ tinteyee nɩaa.”

⁶ Ŋɩɩ nɛ mɩ bʋl, “Ou, La Tɩɩna Wɩɩjarɩbakɔ, mɩ bɩ wɩaa bʋlʋŋ jɩŋ. Mɩ ha ŋaa hambie nɛ.”

⁷ Ama La TƖƖNA bʋla pɩmɛ, “Sɩ́ bʋl, arɩ ŋ ŋaa hambie nɛ. Dɩ mɩ nɛ tɩmɩŋ nʋʋkala teeŋ, ʋ maga dɩ ŋ mʋ nɛ a bʋl wɩɩ-la mɩ sɩ sɩ ŋ bʋl.

⁸ Sɩ́ ba fá, mɩ hɛ ŋ teeŋ nɛ, mɩ jaŋ laaŋ ta ba nɩsɩŋ lɛ. Mɩ-na ma TƖƖNA nɛ bʋla.”

⁹ Ŋɩɩ nɛ La TƖƖNA lɩɩsɛ ʋ nɩsɩŋ a digi mɩ niiŋ lɛ, aŋ bʋla pɩmɛ, “Lɛɛlɛ mɩ joŋ mɩ niiŋ wɩaa a hɛ ŋ niiŋ lɛ nɛ.

¹⁰ Jɩnɩŋ, mɩ lɩɩsɩŋ nɛ a leŋ ŋ kɛŋ doluŋ tinteyee arɩ kuoroo tinteyee lɛ, dɩ ŋ wuo churiba a yigiba lo, dɩ ŋ wuo cheiba a yuo diiba, dɩ ŋ wuo saaba a leŋ dɩ ba chɩŋ.”

¹¹ Ŋɩɩ nɛ La TƖƖNA pɩɛsɛmɛ, “Jɛrɩmaaya, bɛɛ kʋŋ nɛ ŋ na?” Mɩ bʋl, “Mɩ na fʋfʋlʋŋ naakeliŋ nɛ.”

¹² La TƖƖNA bʋla pɩmɛ, “Ŋ sɛnɛ na woruŋ nɛ. Mɩɩ beŋ nɛ dɩ wɩɩ-la mɩ sɩ bʋla kʋ ŋaa.”

¹³ La TƖƖNA bɩra pɩɛsɛmɛ, “Bɛɛ kʋŋ nɛ ŋ na?” Mɩ bʋl, “Mɩ na pupoiŋ arɩ lɩɩŋ sɩ chɔ nyiniŋ nyuŋ a wuwulimi wɩɩpɔsʋŋ nagʋa dɩɩrɩŋ nɛ, a kpile hɛ wɩɩpɔsʋŋ nadiiŋ dɩɩrɩŋ.”

¹⁴ La TƖƖNA bʋla pɩmɛ, “Wʋlɔrʋŋ jaŋ lɩɩ wɩɩpɔsʋŋ nagʋa a kʋ jʋʋ nɩalɩŋ kala sɩ hɛ tintee-la lɛ.

¹⁵ Mɩɩ chɛ mɩ yɩrɛ wɩɩpɔsʋŋ nagʋa dɩɩrɩŋ tinteeŋ nɩaa nɛ. Ba kuoroo jaŋ kɔ a bil ba kuoru kpasɩnɩŋ Jerusalɛm boi-baalaa niiŋ. Ba jaŋ golli ma kɛrɛsɩŋ chu a yuo Juda tasɩŋ kala. Mɩ-na ma TƖƖNA nɛ bʋla.

¹⁶ Mɩ jaŋ dii mɩ nɩaa sarɩya a tɩŋ ba wʋbɔŋŋɔɔ wɩaa. Ba vɩamɛ nɛ, aŋ nyɩgɛ kʋsʋɔrʋsʋŋ pɩpɩ vesiŋ a kpʋkpaarɛ vʋɩyaa ba tɩtɩa sɩ ŋaa.

¹⁷ Kɛŋ ŋ tɩtɩa hɛ dɔŋɔ a mʋ bʋl wɩɩ-la kala mɩ sɩ jaŋ bʋla pɩŋ a pɩba. Sɩ́ ba fá, ŋɩɩ dee mɩ jaŋ leŋ dɩ fawʋllʋŋ kɛnɩŋ ba sɩpaaŋ.

¹⁸ Jɩnɩŋ, mɩ leŋe ŋ nagɛ tabalɩŋ ba sɩ saa kɛrɛ golli nɛ. Ŋ nagɛ hɔɔŋ jebiiŋ nɛ, a nagɛ kɔlɩɩŋ kɛrɛ a chɩŋ Juda tinteeŋ kuoru balaa, ʋ tɩntɩnnɩ-hɩasɩŋ, Wɩɩsʋllɩ sɩpaalaaraa arɩ ʋ nɩaa kala lɛ.

¹⁹ Ba jaŋ yuoŋ, ama ba bɩ jaŋ wuo yuo diiŋ, bɛɛ wɩaa, mɩ hɛ ŋ teeŋ nɛ, mɩ jaŋ laaŋ ta ba nɩsɩŋ lɛ. Mɩ-na ma TƖƖNA nɛ bʋla.”