JEMBIEE 5 - WƖA TENIŊ

Jerusalɛm nɩaa sʋl Wɩa dɩ ʋ fá ba nenige

¹ La TƖƖNA, liise yi wɩalɩŋ sɩ ŋaa la lɛ, beŋ a na hɩɩsɩŋ sɩ kɛnla ŋɩɩ.

² Ba joŋ tintee-la ŋ sɩ joŋo pɩla ʋ ŋaa la kʋŋ, a pɩ nʋhʋɔraa nɛ a joŋ la dɩɩsɩŋ ma pɩ nɩwogusuŋ.

³ La bɩrɩmɛ biisinsiŋ nɛ, a bɩ nyɩmmaba kɛnɛ, la naamba ma ŋaa yo-haalaa.

⁴ Dɩ la bɩ lɩɩŋ yɔbɔ, la bɩ nyʋa, dɩ la bɩ daasɩŋ yɔbɔ, la bɩ nyiniŋ hɛ.

⁵ Nɩalɩŋ sɩɩ kirila paa puula nɛ, la kala bɛsɩmɛ, aŋ bɩ wuo wiesi.

⁶ La joŋ la tɩtɩa pɩ Ijipiti arɩ Asiiria tɩŋŋaa nɛ, dɩ la wuo na kʋdiilee dii.

⁷ La naabalɩmaba nɛ ŋaa wʋbɔŋŋɔɔ aŋ tuo, ka la mɩɩraa na hɛɛŋ ba wʋbɔmɔ-la wɩaa.

⁸ Yosuŋ nɛ mɩɩraa benla, ka nʋʋ tuo dɩ ʋ laala ta ba nɩsɩŋ lɛ.

⁹ La yie joŋ mɩɩsɩŋ yɔɔ sʋʋŋ nɛ a na kʋdiilee, bɛɛ wɩaa nɩkpʋʋraa nɛ hɛ pɔkɔŋ nyuŋ.

¹⁰ La yaraa lɩma nɛ a nagɛ tabʋʋŋ losuŋ kɛnla la vɩvagɩlɛ.

¹¹ Baa gurigi haalaa nɛ Zaayɔŋ lɛ, aa gurigi haala-la ha sɩ bɩ baal jɩŋ Juda tasɩŋ ma lɛ.

¹² Ba kɛsɛ la sɩpaalaaraa a lieŋi nɛ, a bɩ la nɩhɩasɩŋ ma ka zil.

¹³ Ba fʋgɛ la bapʋɔsaa hɛ nɛ ba nʋnɔŋ munuŋ nɔmʋŋ lɛ, hambolibiisiŋ chʋŋ daasɩŋ a gɩgɛrɛ.

¹⁴ Nɩhɩasɩŋ bɩra bɩ tabalɩŋ boi-baalɩŋ lɛ wuo hɔŋ, bapʋɔsaa leŋ yɩɩlaa yɩɩnɩŋ.

¹⁵ Tʋɔtɔrʋŋ bɩra tuo la lɛ, la gʋala mɩɩra bɩrɩmɛ yele nɛ.

¹⁶ Kɩalɩŋ kala la sɩ kaa ŋmoo bɔyɛ bɩra tuo. Hɛɛŋ puula nɛ, bɛɛ wɩaa la ŋaa wʋbɔŋŋɔɔ nɛ.

¹⁷ Wɩɩŋ deeŋ wɩaa la daagaa viisi. Wɩaa deemba nɛ leŋe sɩlɩɩrɩŋ tɔ la sɩaa, la bɩra bɩ wuo na.

¹⁸ Zaayɔŋ pɩŋ jikpeeŋ nɛ a ŋaa hoi jolluŋ jʋʋ aŋ lɩlɩɩ.

¹⁹ La TƖƖNA, ŋ nɩɩ beŋ nɩaa a kaa mʋ wuu. Ŋ kuoruŋ bɩ dɩdɛrɩŋ kɛnɛ.

²⁰ Bɛɛ nɛ tɩɩ ŋ yie yʋ la wɩaa? Bɛɛ nɛ tɩɩ ŋ vɩala ta a dieni ŋɩɩ?

²¹ La TƖƖNA, laala dɩ la bɩra ŋaa ŋ nɩaa. Leŋ dɩ la bɩra nagɛ ŋɩɩ la fa sɩ naga,

²² see dɩ ŋ paala chaasa vɩala, a na baanɩŋ la nyuŋ a kieli.