JEMBIEE 4 - WƖA TENIŊ

Jerusalɛm sɩ nagɛ ŋɩɩ ʋ teliŋ harɩŋ

¹ Sɛlɩmɛ tʋla lɩa, sɛlɩmɛ sɩ zɔmɔ ŋɩɩ bɩrɩmɛ kʋpɛɩ. Wɩa dɩɩ-bal-la tabɩɩ-zɔŋŋɔɔ jaasa pɩŋ womporuŋ lɛ nɛ.

² Zaayɔŋ nɩaa fa ŋaa nɩfɩama nɛ, ba fa kɛŋ yuŋuŋ a nagɛ sɛlɩmɛ nɛ, aŋ ka nɩaa lɛɛlɛ jomba, ba nagɛ chʋrʋŋ pupoiŋ, pupo-mɛɛrɛ sɩ mɛ.

³ Jolluŋ ma yie kɛŋ ba yɩlɩŋ nɛ, a dɩɛsɛ ba biiriŋ, ka mɩ nɩaa-na kɛŋ tʋɔbɔmʋŋ ba biiriŋ lɛ a nagɛ nyaŋkɩɩbʋʋnaa sɩ hɛ tintee-hɩlɩŋ lɛ.

⁴ Mɩ nɩaa leŋe lɩɩnyʋasʋŋ kɛŋ ba bii-mulluŋ nɛ ba nandelimee jɩla mɛrɛ tilimee lɛ. Hambiisiŋ sʋsʋl kʋdiilee ka nʋʋ bɩ baa pa.

⁵ Nɩalɩŋ fa sɩɩ dii kʋdii sɩŋŋaa sʋsʋʋ losuŋ womporunuŋ lɛ. Nɩalɩŋ fa sɩ kɛŋ kɩaa a lɩlaalɛ gɛrɩ-vachalɩŋ lɛɛlɛ pɩŋ pupuloo nyuŋ nɛ.

⁶ Ŋɩɩ ba sɩ dɔgɩsɛ mɩ nɩaa nɛ yʋga a kɩɩ ŋɩɩ ba fa sɩ dɔgɩsɛ Sodom nɩaa. Wɩa fa guu cheiba nɛ, ka nʋʋ tuo dɩ ʋ pɛ ba lɛ.

⁷ Jerusalɛm nɩaa sɩpaalaaraa fa pʋlla a nagɛ kuŋkunuŋ nɛ, a pʋlla kɩɩ nayɩlɩŋ. Ba yaraa fɩɛsa kɩɩ tabɩɩ-la ba sɩɩ yɩrɛ Rubi, ba nagɩŋ zɔmɔ nagɛ tabɩɩ-tʋlɩɩ-la ba sɩɩ yɩrɛ Safɩya.

⁸ Ama lɛɛlɛ ba bire kɩɩ nʋʋ-hala bʋbʋɔŋ, nʋʋkala bɩra bɩ ba wuo jɩŋ womporunuŋ lɛ. Ba yaraa ŋmɩɩmɛ a hɩla mɛrɛ ba haŋgbelee lɛ, a nagɛ daa-hɩlɩŋ.

⁹ Nɩalɩŋ ba sɩ kpʋa laalɩŋ lɛ nɛ kpɩa nɩalɩŋ losuŋ sɩ kɛnɛ ba sʋʋ. Losuŋ-pʋla leŋe ba kiiki ŋɩɩ nɛ a mʋ sʋʋ, kʋdiilee sɩ nyaa wɩaa.

¹⁰ Haala-la sɩɩ fá nɩaa nenige kɛsɛ ba tɩtɩa biiriŋ chɔ a chɩchaŋ bʋa-la lɛ ba sɩ chei mɩ nɩaa.

¹¹ La TƖƖNA chaasa na baanɩŋ nɛ, ʋ baanɩŋ chaasa sii nɛ ʋ pɔsɛ. Ʋ fuuni nyiniŋ hɛ Zaayɔŋ lɛ nɛ, ʋ joŋ ʋ kala kɔlɩmɛ a tuu yi gentine.

¹² Dʋnɩa kuoroo kʋŋkala bɩ laa dii nʋʋkala ma tuo dʋnɩa lɛ a laa dii, arɩ dʋndɔŋŋɔɔ jaŋ wuo to Jerusalɛm boi-baalaa jʋʋ.

¹³ Ama ŋɩɩ ŋaa nɛ, a tɩŋ Wɩa wʋlaabʋllaa arɩ Wɩɩsʋllɩ sɩpaalaaraa sɩ ŋaa wʋbɔŋŋɔɔ wɩaa, ba kpʋ tʋɔpʋl tɩmma-la sɩ hɛ Jerusalɛm lɛ nɛ.

¹⁴ Lɛɛlɛ, ba gɔllɔɔ laarɛ womporunuŋ lɛ nɛ, a nagɛ nyʋlɩmaa. Ba kpʋ nɩaa a kɛŋ disiniŋ nɛ, nʋʋkala bɩra bɩ chɛ dɩ ʋ digiba.

¹⁵ Nɩaa yie bʋl ba lɛ, “Má sʋrɩsa lɩɩ, ma kɛŋ disiniŋ nɛ. Má sʋrɩsa mʋ, má sʋrɩsa lɩɩ. Má sɩ́ la digu.” Dɩ ba nɛ fá mʋ guoli tinteyee nɩaa tʋɔŋ a gɔllɔɔ baarɛ, nɩalɩŋ ma yie bʋl, “Ba bɩ daha wuo hɔŋ.”

¹⁶ La TƖƖNA tɩtɩa nɛ kɛmba pɩsɛ, ʋ bɩra bɩ ba nyuŋ ka beŋ. Ʋ bɩra bɩ nɩalɩŋ sɩ kpʋ pʋsʋŋ pʋpʋ ka zil, ʋ sɩpaa tuo nɩhɩasɩŋ lɛ.

¹⁷ La bee chɩchɛ nʋʋ nɛ dɩ ʋ kʋ pɛ la lɛ a lɔl, La sɩ sagɛ dɩɩ-leŋee nyuŋ a bee chɩchɛ tintee-la nɩaa dɩ ba pɛ la lɛ, ba bɩ jaŋ wuo laala ta.

¹⁸ Nɩaa ka densi la nɛ, la bɩra bɩ la womporunuŋ lɛ wuo vɛŋ. La dɩdɛrɩŋ kpaga nɛ, la tapʋlaa dɛrɛ nɛ, la dɛrɩŋ yie nɛ.

¹⁹ Nɩalɩŋ sɩ kiree to la harɩŋ naachɛɛŋ lɩma a kɩɩ kachuuŋ sɩɩ fil. Ba kirila baarɛ peelee nyuŋ nɛ, a faa gbɛrɛla tintee-hɩlɩŋ lɛ.

²⁰ Kuoru-la La TƖƖNA sɩ lɩɩsa ŋaa la mɩɩsɩŋ nɛ, ka ba bɛrɛ kɛnʋ. La fa bɩɩna ʋ daanyʋɔsʋŋ lɛ, la jaŋ wuo hɔŋ tinteyee nɩaa tʋɔŋ.

²¹ Ma nɩalɩŋ sɩ hɛ Ɛdɔm arɩ ma nɩalɩŋ sɩ hɔŋ Uzi tinteeŋ lɛ maa jʋɔsʋ nɛ arɩ tʋɔtɔrʋŋ. Ama hɛɛ-la jaŋ jʋʋ ma ma, dɩ ma bugi, ba jaŋ wuri ma kɩaa aŋ ka yarɩ-biree.

²² Zaayɔŋ nɩaa, Wɩa dɔgɩsɛma dɛrɛ nɛ. Wɩa bɩra bɩ jaŋ leŋ dɩ ma hɛ yoŋ-baga lɛ a dieni. Ama ma nɩalɩŋ sɩ hɛ Ɛdɔm lɛ, ʋ jaŋ dɔgɩsɛma a tɩŋ ma wʋbɔŋŋɔɔ wɩaa, a leŋ dɩ nʋʋkala na ma bɔnsʋŋ.