JEMBIEE 2 - WƖA TENIŊ

La TƖƖNA dɔgɩsɛ Jerusalɛm nɩaa

¹ La TƖƖNA sɩ na baanɩŋ, ʋ joŋ birimiŋ nɛ a tɔ Zaayɔŋ kala. Ʋ yigi Iziral tɩŋŋaa tʋla lo tinteeŋ nɛ ʋ birisi. Tapʋlɩɩ-la ʋ sɩ na baanɩŋ, ʋ bɩ liise yi ʋ tɩtɩa dɩɩ-balɩŋ lɛ.

² La TƖƖNA bɩ ba nenige fá aŋ chei lere-la kala Iziral tɩŋŋaa sɩɩ jʋʋ. Ʋ sɩ na baanɩŋ, ʋ yigi ʋ yigi Juda nɩaa dɩ-duoruŋ lo nɛ. Ʋ kɛŋ ba tinteeŋ arɩ ba sɩpaalaaraa muuri nɛ, a leŋ ba dii hɩɩsɩŋ.

³ Ʋ sɩ faasa na baanɩŋ, ʋ leŋe Iziral tɩŋŋaa doluŋ kala dɛrɛ nɛ. Ʋ lɩɩsɛ ʋ naduo-la ba lɛ nɛ, bʋa-la lɛ ba dʋndɔmɔ sɩ kpaga. Ʋ sii chɩŋ Jekɔb doho nɩaa lɛ a nagɛ nyiŋgeliŋ nɛ a joŋ kʋŋkala sɩ gollu a dii.

⁴ Ʋ bɩrɩmɛ ʋ dʋndɔŋ nɛ a lɛrɛ ʋ toŋ hɛ a kɛŋ ʋ nadiiŋ ŋaa siri. Ʋ nagɛ dʋndɔŋ nɛ a kpʋ nɩalɩŋ kala sɩ su sɩɩŋ. Ʋ baanɩŋ sie a nagɛ nyiniŋ nɛ a joŋ Jerusalɛm dii.

⁵ La Tɩɩna nagɛ dʋndɔŋ nɛ a chei Iziral. Ʋ chei ba kuoru dɩɩsɩŋ kala nɛ arɩ ba dɩ-duoruŋ. Ʋ leŋe Juda nɩaa yele arɩ nii-ŋmobo yʋgɛ nɛ.

⁶ Wɩa chei ʋ dɩɩ-balɩŋ a nagɛ ba sɩ kɛŋ lɩga churi nɛ, ʋ chei lee-la ba sɩ yie hilimi ʋ yɩrɩŋ lɛ nɛ. La TƖƖNA leŋe Zaayɔŋ nɩaa yʋ ba gbielee tapʋlaa arɩ chɛ-wiesie-la wɩaa nɛ. Ʋ baanɩŋ sɩ faasa sii, ʋ vɩa kuoro arɩ ʋ Wɩɩsʋllɩ sɩpaalaaraa kala nɛ.

⁷ La TƖƖNA vɩa ʋ koruŋ ta nɛ a leŋ ʋ dɩɩ-balɩŋ ma ta. Ʋ joŋ Jerusalɛm kɛrɩsɩŋ hɛ ʋ dʋndɔŋŋɔɔ nɩsɩŋ lɛ nɛ ba yige lo, aŋ jʋʋ ŋɩŋaa laalɩyuori diiri goŋ La TƖƖNA dɩɩ-balɩŋ tʋɔŋ a nagɛ gbiele tapʋlʋŋ.

⁸ La TƖƖNA chaasa ŋaa siri dɩ ʋ yigi kɛrɛ-la sɩ golli Zaayɔŋ lo nɛ. Ʋ kɛŋ nɩsɩŋ tɩɛnɛ nɛ a nagɛ ŋmɛŋ-la ba sɩ kaa magɩsɛ leriŋ, ʋ bɩ ʋ nɩsɩŋ lɩɩsa leriŋ cheyiŋ lɛ. Ʋ leŋe vaŋkumba arɩ kɛrɩsɩŋ kala yel nɛ a yʋɔla dɛrɛ.

⁹ Zaayɔŋ boi-baalaa tele nɛ hagɩla tɔ, ba daadoloo bori a chei. Ba kɛŋ ʋ kuoro arɩ ʋ sɩpaalaaraa mʋ yoŋ-baga nɛ, ba guoli tinteyee nɩaa tʋɔŋ. Ba bɩra bɩ wɩalɩŋ ba sɩ ŋmʋnsa bil dɩ ba tuto ka dagɛ. Wɩa wʋlaabʋlla-la sɩ hɛ ʋ lɛ bɩra bɩ wɩaa ka na arɩ duosoo tʋɔŋ La TƖƖNA teeŋ.

¹⁰ Zaayɔŋ nɩhɩasɩŋ hɔŋ tinteeŋ nɛ a bɩ ba niiŋ wuo suri, a ŋaa kʋŋkɔlʋŋ bʋgɛ ba nyusuŋ a laalɛ tʋɔ-chei gɛnnɩŋ. Jerusalɛm hatoloo kɛŋ nyusuŋ gʋrɛ nɛ.

¹¹ Mɩ yele, mɩ sɩaa bɩra bɩ na, mɩ tʋɔŋ kala chei. Mɩ kala nɛ bɛsɩmɛ arɩ tʋɔ-cheeŋ a tɩŋ ba sɩ chei mɩ nɩaa wɩaa. Hambiisiŋ arɩ bii-mulluŋ yiege nɛ a pɩŋ tabal-la womporunuŋ lɛ.

¹² Ba yie yele pɩɛsɛ ba naamba, “Nɩɩ nɛ kʋdiilee arɩ lɩɩŋ hɛ?” Ba yiege pɩŋ tabalɩŋ womporunuŋ lɛ nɛ a nagɛ baalaa sɩ bolimo. Baa sʋʋ nɛ ba naamba nɩsaa lɛ.

¹³ Jerusalɛm nɩaa, wʋbɛɛ nɛ mɩ jaŋ wuo bʋla pɩma? Bɛɛ kʋŋ nɛ mɩ jaŋ kɛmma kaa magɩsɛ? Ɛɛ nɛ mɩ jaŋ ŋaa nyagɛ ma bɔyɛ dɩ ma tʋɔŋ pɩŋ dɩ-bala? Ma naawɩɩlɩŋ luŋie a nagɛ mʋga nɛ. Kʋbɛɛ nɛ jaŋ wuo vaarɛma?

¹⁴ Wɩalɩŋ ma Wɩa wʋlaabʋllaa sɩ na arɩ duosoo tʋɔŋ, ŋaa wʋnyɩɛrɩŋ nɛ a bɩ bʋbʋɔ kala kɛnɛ. Ba bɩ leŋe ma jɩŋ dɩ ma ŋaa wʋbɔŋŋɔɔ, dɩ ŋɩɩ fa leŋ dɩ ma sɩ́ yoŋ-baga mʋ. Wɩalɩŋ ba sɩ bʋla pɩma ŋaa wʋnyɩɛrɩŋ nɛ a kɛmma yeŋŋi.

¹⁵ Nɩalɩŋ kala sɩ kielima bɩbal mɔŋ a bʋl, vaha. Ba yie sieri ma lɛ aŋ kɛŋ ba nyusuŋ chugisi ma Jerusalɛm nɩaa wɩaa aŋ pɩɛsɛ, “Tabalɩŋ deeŋ dee ba fa kaa yɩrɛ taŋ-la sɩ chaasa zɔŋ kɩŋkɛŋ a ŋaa dʋnɩa nɩaa kala tʋɔtɔrʋ lee ŋɩɩ?”

¹⁶ Ma dʋndɔŋŋɔɔ kala chaasa suri ba niiree nɛ a sii chɩŋ ma lɛ. Ba sieri ma lɛ nɛ a mɔmɔ chuchuri nyɩlaa a bʋl, “La chei Jerusalɛm nɛ. Tapʋlʋŋ deeŋ nɛ la faa gbɛrɛ ŋɩɩ, la saa naʋ nɛ.”

¹⁷ La TƖƖNA ŋaa wɩɩ-la ʋ sɩ bɩɩna dɩ ʋ ŋaa nɛ. Ʋ leŋe wɩɩ-la ʋ sɩ bʋla kʋ ŋaa nɛ, wɩɩ-la ʋ sɩ bʋla faafaa kala. Ʋ cheyiŋ nɛ Jerusalɛm a bɩ ŋ nɩaa nenige fá. Ʋ leŋe ŋ nɩaa dʋndɔŋŋɔɔ jʋɔsɛ ma nyuŋ nɛ. Ʋ leŋe ba laa doluŋ nɛ.

¹⁸ Jerusalɛm, leŋ dɩ ŋ kɛrɩsɩŋ ŋmoo niiŋ a pɩ la TƖƖNA a nagɛ nɩaa sɩɩ yel. Leŋ dɩ ma sɩlɩɩrɩŋ pɛllɛ a nagɛ fuoŋ wɩɩhɛyɛ arɩ tɩtaŋɩŋ kala. Má sɩ́ wiesu, a sɩ́ leŋe dɩ ma sɩaa ma wiesi.

¹⁹ Má sii, a ŋmoo niiŋ tɩtaŋɩŋ. Má joŋ ma tʋɔŋ wɩaa kala bil La TƖƖNA sɩpaaŋ. Má kɛŋ nɩsaa je ʋ teeŋ, a sʋlʋ a tɩŋ ma biiriŋ mɩɩsɩŋ wɩaa. Nɩalɩŋ losuŋ sɩ kpʋa ba yiege pɩŋ womporii kala loŋgoruŋ lɛ.

²⁰ La TƖƖNA, beŋ mɩ wɩɩŋ a na: Kʋbɛɛ nɛ ŋ ha ŋaa ʋ na hɛɛŋ ŋ-la? Haalaa kɛsɛ ba biiriŋ didii, biiri-la ba sɩ dɩɛsa. Ba kpʋkpʋ ŋ Wɩɩsʋllɩ sɩpaalaaraa arɩ ŋ wʋlaabʋllaa ŋ dɩɩ-balɩŋ lɛ.

²¹ Hambiisiŋ arɩ nɩhɩasɩŋ pɩna hɛ dɔŋɔ kʋŋkɔlʋŋ lɛ womporunuŋ nyuŋ. Dʋndɔŋŋɔɔ kpʋ mɩ bapʋɔsaa arɩ mɩ hatoloo bil nɛ. Tapʋlɩɩ-la ŋ sɩ na baanɩŋ nɛ ŋ kpʋba a bɩ ba nenige fá.

²² Ŋ yɩrɛ mɩ dʋndɔŋŋɔɔ hɛ mɩ lɛ a nagɛ ba sɩ yie yɩrɛ nɩaa ba kɔ gbiele nɛ, a leŋ ba joŋ fawʋllʋŋ hɛ mɩ lɛ sɛmɛ kala. Tapʋlɩɩ-la ŋ-na La TƖƖNA sɩ na baanɩŋ, nʋʋkala bɩ foro fá, nʋʋkala bɩ ka. Hambiisi-la mɩ sɩ dɩɛsa a beŋ ba nyuŋ woruŋ, mɩ dʋndɔŋŋɔɔ kpʋ ba kala nɛ.