JEMBIEE 1 - WƖA TENIŊ

Hɛɛ-la Jerusalɛm nɩaa sɩ na

¹ Bee na Jerusalɛm tabal-la sɩ pɩŋ jikpeeŋ ŋɩɩ, taŋ-la nɩaa fa sɩ suo, ʋ mɩɩra nagɛ yo-haal nɛ. Ʋ fa ŋaa ta-zɔŋ nɛ tinteyee tʋɔŋ. Tinteyee tʋɔŋ, ʋ nɛ fa yʋga, ʋ nɛ lɛɛlɛ bɩrɩmɛ yoŋ ŋɩɩ.

² Ʋ chaasa yel nɛ tɩtaŋɩŋ, ʋ chaŋkpaŋŋaa kala ŋaa sɩlɩɩrɩŋ. Ʋ hɩɩlaa kala tʋɔŋ nʋʋkala tuo dɩ ʋ nyagɛ ʋ bɔyɛ. Ʋ tanlɔsʋŋ kala joŋu yallɛ nɛ, ba mɩɩra ŋaa ʋ dʋndɔmɔ nɛ.

³ Ba chaasa dɔgɩsɛ Juda nɩaa nɛ ba tɩma na hɛɛŋ woruŋ, ŋɩɩ harɩŋ ba kɛmba mʋ yoŋ-baga. Ba mʋ guoli tinteyee nɩaa tʋɔŋ, ba bɩ dɩ-wiesii na. Nɩalɩŋ kala sɩ kire to ba harɩŋ kɛsɛba nɛ, ba bɩ lee-kala kɛnɛ dɩ ba to mʋ.

⁴ Zaayɔŋ wombiee ka yel nɛ, bɛɛ wɩaa nʋʋkala bɩ ba to kʋkɔ ʋ gbielee leriŋ. Ʋ boi-baalaa kala pɩŋ hoi nɛ. Wɩɩsʋllɩ sɩpaalaaraa huhuuni, hatolie-la sɩ hɛ ʋ lɛ tʋɔŋ faasa chei nɛ, Zaayɔŋ kala ŋaa hɛɩ.

⁵ Ʋ dʋndɔŋŋɔɔ nɛ mɩɩra kɛŋ doluŋ ʋ nyuŋ, ʋ dʋndɔŋŋɔɔ wiese nɛ. La TƖƖNA nɛ ŋaa ʋ tʋɔŋ faasa chei a tɩŋ ʋ wʋbɔŋŋɔɔ sɩ yʋga wɩaa. Ba yuo dii Zaayɔŋ nɛ a kɛsɛ ʋ biiriŋ mʋ yoŋ-baga, ba dʋndɔŋŋɔɔ diiba nɛ.

⁶ Zaayɔŋ nɩaa tʋla kala lɩa nɛ. Ba sɩpaalaaraa nagɛ aamɩŋ sɩ bɩ yaŋ na dɩ ʋ dii nɛ. Ba doluŋ dɛrɛ nɛ ba fá nɩalɩŋ sɩɩ kiriba sɩpaaŋ.

⁷ Tapʋlɩa-la wɩaa sɩ jʋʋba ba gɔllɔ bɩbaarɛ, Jerusalɛm nɩaa liise yi ba dʋa-la kala wɩaa nɛ, kɩalɩŋ ba sɩ kɛnɛ faafaa-la. Ʋ nɩaa sɩ jʋʋ ba dʋndɔŋŋɔɔ nɩsɩŋ, nʋʋ tuo dɩ ʋ pɛ ba lɛ. Ʋ dʋndɔŋŋɔɔ benu nɛ aŋ mɔŋ ʋ sɩ cheye lɛ.

⁸ Jerusalɛm nɩaa ŋaa wʋbɔŋŋɔɔ kɩŋkɛŋ nɛ, ŋɩɩ leŋ ʋ kɛŋ disiniŋ. Nɩalɩŋ kala fa sɩɩ zilu mɩɩra kɛnʋ gbigbesi nɛ, bɛɛ wɩaa ba na ʋ bʋbʋɔŋ kala nɛ. Ʋ tɩtɩa hʋʋnɛ aŋ gʋrɛ nyuŋ.

⁹ Ʋ disiŋ-la mɛrɛ ʋ lɛ kieli nɛ, ʋ fa bɩ ʋ chie wɩaa bɩɩna. Ʋ sɩ tele ŋɩɩ kperi, ka nʋʋkala tuo dɩ ʋ nyagɛ ʋ bɔyɛ. “Mɩ Tɩɩna, bee na mɩ sɩɩ na hɛɛŋ ŋɩɩ, bɛɛ wɩaa mɩ dʋndɔmɔ yuo diimi nɛ.”

¹⁰ Jerusalɛm dʋndɔmɔ kɛŋ ʋ dʋa kala laa nɛ. Ʋ na dɩ tinteye-la nɩaa sɩɩ kpaarɛ vʋɩyaa jʋʋ Wɩa dɩɩ-bal-la sɩ hɛ ʋ lɛ tʋɔŋ, nɩalɩŋ fa sɩɩ kɩsɛ dɩ ba jʋʋ lee-la ŋ nɩaa sɩɩ hilimu.

¹¹ Ʋ nɩaa kala ka huunu nɛ a chɩchɛ kɩaa dɩ ba dii. Ba joŋ ba dʋa kala a lenni kʋdiilee nɛ, dɩ ŋɩɩ leŋ dɩ ba kɛŋ mɩɩsɩŋ. “La TƖƖNA, bee na mɩ wɩɩŋ a kaa bɩɩna na, bɛɛ wɩaa ba bee gʋʋnɛmɛ nɛ.

¹² Ʋ bɩ wɩɩ ŋaa ma nɩalɩŋ kala sɩ to lee-la bɩbal teeŋ? Má bee gollo na. Nʋʋ tuo ʋ hɛɛŋ nagɛ hɛɛ-la mɩ sɩɩ na, kʋ-la La TƖƖNA sɩ joŋo hɛ mɩ lɛ, tapʋlɩɩ-la ʋ baanɩŋ sɩ faasa sii.

¹³ Ʋ leŋe nyiniŋ lɩɩ wɩa-nyuŋ dɩ-bolii nɛ, a kʋ tuu jʋʋ mɩ haŋgbelee. Ʋ hɛ bɛrɛ́ a kɛmmɛ nɛ a kɛmmɛ mʋ harɩŋ. Ʋ vɩamɛ ta nɛ, mɩ nɩna hɛɛŋ tapʋlɩɩ kala.

¹⁴ Ʋ vɔɔ mɩ wʋbɔŋŋɔɔ mɛrɛ daaŋ lɛ nɛ. Ʋ pɩɩnɛba hɛ dɔŋɔ a nagɛ ŋmɛnɩŋ nɛ. Ba nɛ ʋ joŋo hɛ mɩ baŋŋaa, mɩ bɩra bɩ dol kala kɛnɛ. La TƖƖNA jommi hɛ nɩalɩŋ sɩ dolie kɩɩmɛ nɩsɩŋ lɛ nɛ.

¹⁵ La TƖƖNA vɩa mɩ laalɩyuori duori-la kala nɛ. Ʋ yɩrɛ laalɩyuoroo a hɛ mɩ lɛ nɛ, dɩ ba kpʋ mɩ bapʋɔsaa kala. La TƖƖNA nʋɔsɛ Juda nɩaa a nagɛ ŋɩɩ ba sɩɩ chagɛ girep nɛnɛɛ sɩnɩŋ nɛ.

¹⁶ Ŋɩɩ nɛ tɩɩ mɩ yel, mɩ sɩaa kala pɩpɛllɛ sɩlɩɩrɩŋ. Nʋʋkala bɩ kpaga dɩ ʋ nyagɛ mɩ bɔyɛ, nʋʋ ma tuo dɩ ʋ ŋaa dɩ mɩ tʋɔŋ pɩŋ dɩ-bala. Mɩ biiriŋ bɩra bɩ kʋŋ kɛnɛ, bɛɛ wɩaa mɩ dʋndɔŋŋɔɔ yuo diiba nɛ.”

¹⁷ Zaayɔŋ kɛŋ ʋ nɩsaa tɩɛnɛ nɛ a chɩchɛ dɩ ba pɛ ʋ lɛ, ama nʋʋ tuo dɩ ʋ nyagɛ ʋ bɔyɛ. La TƖƖNA bʋla tɩgɛ Iziral lɛ, arɩ tinteye-la sɩ kpagʋ jaŋ kʋ ŋaa ʋ dʋndɔmɔ. Jerusalɛm mɩɩra ŋaa disiŋ kʋŋ nɛ ba tʋɔŋ.

¹⁸ La TƖƖNA ŋaa tʋɔpʋl Tɩɩna nɛ, ka mɩ pɛ vɩa wɩalɩŋ ʋ sɩ daga. Nʋʋkala jegili mɩ teeŋ, má bee na hɛɛ-la mɩ sɩɩ na. Mɩ bapʋɔsaa arɩ mɩ hatoloo kala nɛ ba kɛsɛ mʋ yoŋ-baga.

¹⁹ Mɩ yɩrɛ mɩ sɩŋŋaa, ka ba vɩa dɩ ba pɛ mɩ lɛ. Mɩ Wɩɩsʋllɩ sɩpaalaaraa arɩ mɩ nɩhɩasɩŋ, sʋba nɛ tabal-la lɛ bʋa-la lɛ ba sɩ gɔllɔɔ chɛ kʋdiilee dɩ ba dii a kɛŋ mɩɩsɩŋ.

²⁰ “La TƖƖNA, na ŋɩɩ mɩ tʋɔŋ sɩ faasa chei, hɛɛŋ chaasa jʋʋmɛ nɛ. Mɩ tʋɔbɩɩnaa wʋwalɩmɛmɛ, bɛɛ wɩaa mɩ vɩa ŋ niiŋ a mʋ kieli nɛ. Ba kpʋ mɩ nɩaa jeeŋ harɩŋ nɛ, dɩa tʋɔŋ-na paala nagɛ lɛlɛɛ-jaŋ nɛ.

²¹ Nɩaa nɩɩ mɩ huuno nɛ, ama nʋʋ tuo dɩ ʋ nyagɛ mɩ bɔyɛ. Mɩ dʋndɔŋŋɔɔ kala nɩɩ mɩ tʋɔ-cheeŋ wɩaa nɛ, a jʋjʋɔsɛ wɩɩ-la ŋ sɩ ŋaa lɛ. Leŋ dɩ tapʋlɩɩ-la wɩaa ŋ sɩ heele bʋl yi, dɩ ba ma na hɛɛŋ arɩ mɩ sɩ na ŋɩɩ.

²² Bee na wʋbɔmɔ-la ba sɩ ŋaa, a leŋ dɩ ba na hɛɛŋ woruŋ arɩ ŋ sɩ leŋe mɩ na hɛɛŋ a tɩŋ mɩ wʋbɔŋŋɔɔ wɩaa. Mɩ huuno yʋgɛ nɛ mɩ daagaa kala viisi.”