Jeems 4 - WƖA TENIŊ

La to Wɩa harɩŋ koo la to dʋnɩa nɩaa harɩŋ?

¹ Bɛɛ nɛ tɩɩ ma yie gʋraa yuo dɔŋɔ? Ʋ lɩɩ ma wʋchɛɛlɛ-la sɩɩ walɩmɛma nɛ.

² Ma cho dɩ ma kɛŋ kɩaa aŋ bɩ baa na, ŋɩɩ nɛ tɩɩ maa chɛ dɩ ma kpʋ dɔŋɔ aŋ laa. Ma yie hɩhɩɛnɛ kɩalɩŋ aŋ bɩ wuo na. Ŋɩɩ nɛ tɩɩ ma gʋraa yuo dɔŋɔ ŋɩɩ. Wɩɩ-la sɩ tɩɩ ma bɩ kɩalɩŋ ma sɩɩ chɛ kɛnɛ nɛ ŋ-la: Ma bɩ Wɩa sʋl dɩ ʋ joŋo pɩma.

³ Bʋa dɔŋɔ ma lɛ ma yie sɛnɛ sʋlʋ a chɩchɛ kɩaa. Ama ma yie kɛŋ tʋɔbɩɩŋ bɔŋŋɔɔ nɛ a sʋl dɩ ma kaa ŋaa ma tɩtɩa tʋɔtɔrɛ wɩaa. Ŋɩɩ nɛ tɩɩ ma bɩ na.

⁴ Ma nagɛ haala bɩra sɩ bɩ ʋ bala niiŋ ka to nɛ. Ma bɩ jɩŋ arɩ nɩɩ-la kala sɩ joŋ ʋ nyuŋ kala hɛ dʋnɩa kɩaa lɛ ŋaa Wɩa dʋndɔŋ nɛɛ? Wʋtɩtɩɩ, nɩɩ-la kala sɩ joŋ ʋ nyuŋ hɛ dʋnɩa kɩaa lɛ bɩrɩmɛ Wɩa dʋndɔŋ nɛ.

⁵ Ma bɩɩna wɩalɩŋ ba sɩ daga Wɩa teniŋ tʋɔŋ bɩ bʋbʋɔŋ kɛnɛɛ? Ba ŋmʋnsa arɩ ʋ Dɩŋ-zɔmʋŋ ʋ sɩ joŋo hɛ la lɛ chaasa kɛŋ hadɔrʋŋ nɛ woruŋ.

⁶ Ama Wɩa fá la nenige nɛ woruŋ a pɩpɛ la lɛ dɩ la joŋ la tɩtɩa kala a pʋ. Ŋɩɩ nɛ tɩɩ ba ŋmʋnsɛ Wɩa teniŋ tʋɔŋ arɩ Wɩa vɩa nɩalɩŋ sɩɩ bigisi ba tɩtɩa lɛ nɛ aŋ pɩpɛ nɩalɩŋ sɩ kɛŋ ba tɩtɩa muuri lɛ.

⁷ Ŋɩɩ wɩaa, má joŋ ma tɩtɩa a hɛ Wɩa nɩsɩŋ lɛ. Má joŋ harɩŋ yɩa Sɩtaanɩ, ʋ jaŋ fá lɛl.

⁸ Má sʋrɩsa mʋ kpagɛ Wɩa, ʋ ma jaŋ kʋ kpagɛma. Má sɔŋ ma nɩsaa lɩɩsɛ wʋbɔŋŋɔɔ ŋaanɩŋ lɛ, a pʋllɛ ma tʋɔŋ, a bɩra sɩ́ tʋɔbɩɩŋ lɔrʋnʋŋ bɩɩnʋ, bɛɛ wɩaa ma kɛŋ tʋɔbɩɩnaa balɩa balɩa nɛ.

⁹ Má leŋ dɩ ma tʋɔŋ chei. Máa yel, aa ŋmoo niiŋ. Má leŋ dɩ ma tʋɔtɔrʋŋ bɩrɩmɛ tʋɔ-cheeŋ.

¹⁰ Má kɛŋ ma tɩtɩa muuri Wɩa sɩpaaŋ. Dɩ ma nɛ ŋaa ŋɩɩ, ʋ jaŋ kɛmma je.

Má pɔ ma sɩ́ ma dɔnsʋŋ tɩŋŋaa wɩaa laa jɩŋ

¹¹ Mɩ naambiiri, má sɩ́ ma dɔnsʋŋ tɩŋŋaa yɩrɩŋ chei. Nɩɩ-la kala sɩ chei ʋ dɔŋɔ tɩɩna yɩrɩŋ koo a bʋl ʋ teeŋ ma arɩ ʋ cheye nɛ, ʋ naga tɩɩna ma bʋl wʋbɔŋ nɛ a tɩgɛ wɩalɩŋ Wɩa sɩ leŋe ba ŋmʋnsa bil dɩ nɩaa tuto lɛ. Dɩ nʋʋ nɛ bʋla arɩ wɩalɩŋ bɩ zɔŋ, ʋ ma bɩra bɩ wɩalɩŋ to. Ʋ mɩɩra joŋ ʋ tɩtɩa arɩ ʋ yʋga nɛ a kɩɩ wɩalɩŋ Wɩa sɩ leŋe ba ŋmʋnsa bil.

¹² Wɩa dʋndʋŋa nɛ kɛŋ doluŋ dɩ ʋ bil wɩaa pɩ nɩaa dɩ ba tuto. Ʋ dʋndʋŋa ma nɛ jaŋ wuo dii nɩaa sarɩya. Ʋ nɛ jaŋ wuo laaba ta, ʋ nɛ jaŋ bɩra wuo joŋ cheeriŋ pɩba a ŋaa dɩ ba sʋʋ. Kʋbɛɛ nɛ ka ma ma, dɩ ma dii ma dɔnsʋŋ tɩŋŋaa sarɩya?

Má sɩ́ ma tɩtɩa lɛ bibigisu

¹³ Bee na, ma nɩalɩŋ sɩ yie bʋl arɩ maachie ma jaŋ mʋ taŋ deeŋ a yallɛ bayalɩŋ a yi jɩna a na nyʋʋrʋŋ, ma paala bɩ chiemiŋ wɩaa jɩŋ.

¹⁴ Ma paala bɩ jɩŋ ma chie sɩ jaŋ nagɛ ŋɩɩ. Ma mɩɩsɩŋ nagɛ bʋrʋŋ sɩ yie tɔ nɛ chʋchʋɔŋ, ka mʋapɩlɩɩ wɩa pɔsɛ ʋ lɛl.

¹⁵ Ʋ fa maga dɩ ma bʋl arɩ Wɩa nɛ sɛyɛ dɩ ma kɛŋ mɩɩsɩŋ, ma jaŋ ŋaa wɩɩŋ deeŋ koo deeŋ.

¹⁶ Ama ma haa ŋmoo ma bɔyɛ lɛ nɛ aa dagɛ ma tɩtɩa. Ʋ ŋɩɩ ŋaa wʋbɔŋ nɛ.

¹⁷ Dɩ nʋʋ nɛ jɩŋ wʋzɔmʋŋ sɩ maga dɩ ʋ ŋaa, ka ʋ vɩa dɩ ʋ ŋaa wɩɩ-la, ŋɩɩ ŋaa wʋbɔŋ nɛ.