Jeems 1 - WƖA TENIŊ

¹ Mɩ-na Jeems sɩ ŋaa Wɩa arɩ La Tɩɩna Yesu Kirisito tɩntɩnna, mɩɩ chʋɔlɛ ma Juu tɩŋŋaa kala sɩ laa Yesu wɩaa dii a pɩsa hɛ nɩalɩŋ sɩ bɩ Juu tɩŋŋaa ŋaa tʋɔŋ.

Wɩa laa diiniŋ arɩ wʋjɩmɩŋ wɩaa

² Mɩ naambiiriŋ, dɩ wʋdoho-na kala nɛ jʋʋma, má leŋ dɩ ʋ ŋaa ma tʋɔtɔrʋ,

³ bɛɛ wɩaa dɩ ma nɩɩ na hɛɛŋ wɩɩ lɛ aŋ ha laa Wɩa dii, ŋɩɩ lɛ nɛ ma jaŋ kɛŋ kanyalɩma.

⁴ Má kɛŋ nyalɩma wɩɩkala lɛ a mʋ dɛrɛ, ŋɩɩ nɛ ma jaŋ waa dɛrɛ Wɩa wɩaa lɛ a sɩ́ wʋzɔŋŋɔɔ lɛ nyaa.

⁵ Dɩ ma kʋŋkala nɛ bɩ wʋjɩmɩŋ kɛnɛ, ʋ sʋl Wɩa dɩ ʋ pʋ wʋjɩmɩŋ. Wɩa kɛŋ zile, ʋ yie joŋ wʋjɩmɩŋ pɩ nʋʋkala sɩ sʋlʋ nɛ, ʋ bɩ nʋʋkala vɩa ta.

⁶ Ama dɩ ŋ nɛ sʋl Wɩa dɩ ʋ pɩŋ kʋŋ, laa dii arɩ ʋ jaŋ ŋaa wɩɩ-la pɩŋ. Sɩ́ tʋɔbɩɩnaa balɩa kɛŋ arɩ ʋ jaŋ ŋaa koo ʋ bɩ ŋaa. Nɩɩ-la kala sɩ sʋl Wɩa chɩchɛ kʋŋ aŋ kɛŋ tʋɔbɩɩnaa balɩa, ʋ nagɛ mʋgʋ-balɩŋ lɩɩ-peliŋ nɛ, ʋ yie mʋ sɩpaaŋ aŋ bɩra kʋkɔ harɩŋ.

^7-8 Nɩɩ-la kala sɩ kɛŋ tʋɔbɩɩnaa balɩa a bɩ wʋbala lɛ chɩna wɩɩkala ʋ sɩɩ ŋaa lɛ, ʋ tɩɩna sɩ́ yɩɛlʋ arɩ La Tɩɩna Wɩa jaŋ joŋ kʋŋkala pʋ.

Nɩalɩŋ sɩ ŋaa summoo arɩ nɩalɩŋ sɩ kɛŋ kɩaa wɩaa

⁹ Nɩɩ-la sɩ bɩ lee kɛnɛ dʋnɩa lɛ nɩalɩŋ sɩ laa Yesu wɩaa dii tʋɔŋ, ʋ leŋ dɩ ʋ tʋɔŋ tɔrɛ arɩ Wɩa sɩ pʋ dɩchɩnɩŋ.

¹⁰ Nɩɩ-la ma sɩ ŋaa kɩaa tɩɩna nɩalɩŋ sɩ laa Yesu wɩaa dii tʋɔŋ, ʋ leŋ dɩ ʋ ma tʋɔŋ tɔrɛ arɩ Wɩa sɩ kɛnʋ kaa muuri. Ʋ bɩ jaŋ dieni aŋ sʋʋ, a nagɛ tɩa sɩ yie fɩɩlɛ ʋ bɩ dieni aŋ yuori ŋɩɩ,

¹¹ bɛɛ wɩaa, wɩa yie pɔsɛ, leriŋ faasa lɩŋ, wulumuŋ ŋaa yaŋ-la hɩl ʋ fɩɩlaa yuori. Ʋ zɔmʋŋ lɛl. Nɩɩ-la sɩ kɛŋ kɩaa ma nagɛ ŋɩɩ nɛ. Ʋ ha jaŋ tɩtɩŋ ʋ tɩntɩŋŋaa aŋ sʋʋ kagɛ.

¹² Wɩa jaŋ pɛ nɩɩ-la wɩɩŋ sɩ jʋa lɛ, aŋ ka ʋ wuo nyalɩmɛ a chɩŋ. Ʋ sɩ wuo nyalɩmɛ ŋɩɩ, Wɩa jaŋ joŋ mɩɩsɩ-la sɩ bɩ dɛrɛ a timu, mɩɩsɩ-la ʋ sɩ sɩ ʋ jaŋ joŋo pɩ nɩalɩŋ kala sɩ chou.

Ŋɩɩ la sɩ jaŋ ŋaa dɩ wɩɩ nɛ jʋʋla

¹³ Dɩ nʋʋkala nɛ jʋʋ wɩɩ, ʋ bɩ maga dɩ tɩɩna bʋl arɩ Wɩa nɛ magɩsʋ. Nʋʋkala bɩ Wɩa wuo nyɩsɛ dɩ ʋ ŋaa wʋbɔŋ, ʋ tɩtɩa ma bɩ nʋʋkala ka nyɩsɛ dɩ ʋ ŋaa wʋbɔŋ.

¹⁴ Ama tʋɔbɩɩŋ bɔmɔ-la sɩ hɛ nʋʋ tʋɔŋ nɛ yie nyɩsʋ ʋ ŋɩŋaa wʋbɔŋŋɔɔ. Tʋɔbɩɩŋ-bɔmɔ-la nɛ yie kɛnʋ yeŋŋi.

¹⁵ Dɩ ʋ nɛ sɛyɛ dɩ ʋ to tʋɔbɩɩŋ bɔmɔ-la lɛ, ba yie leŋ ʋ ŋɩŋaa wʋbɔŋŋɔɔ. Dɩ wʋbɔmɔ-la nɛ kʋ yʋgɛ ba yie ŋaa nɩɩ-la sʋʋ.

¹⁶ Mɩ naambii-kpɩanaba, má sɩ́ ma tɩtɩa nyɩsʋ.

¹⁷ Kʋzɔŋ-na kala lɩɩ Wɩa teeŋ nɛ. Ʋ nɛ ta kɩalɩŋ kala sɩ hɛ wɩa-nyuŋ lɛ a chaanɛ. Ama dɩ ba nɛ jʋa, birimiŋ yie hɛ nɩmɛ. Wɩa tɩtɩa bɩ ŋɩɩ naga. Ʋ bɩ bɩrɩmɛ.

¹⁸ Ʋ tʋɔtɔrʋŋ lɛ nɛ ʋ laa sɩpaaŋ bʋl ʋ niiŋ wɩaa sɩ ŋaa wʋtɩtɩɩ a pɩla dɩ la wuo tutoba, a ŋaa ʋ bii-bumbumba kɩalɩŋ kala ʋ sɩ ŋaa tʋɔŋ.

Wɩa wɩaa jegiliŋ arɩ ba kaa tɩmɩŋ

¹⁹ Mɩ naambii-kpɩanaba, ma jɩŋ wɩɩŋ deeŋ: Nʋʋkala maga dɩ ʋ kɛŋ dɩgɩlɩŋ-jegilee, aŋ sɩ́ chele bʋbʋl wɩaa, a sɩ́ baanɩŋ ma lɩma lɩma nɩna,

²⁰ bɛɛ wɩaa nɩɩ-la sɩɩ na baanɩŋ bɩ jaŋ wuo ŋaa wʋzɔmɔ-la Wɩa sɩɩ chɛ.

²¹ Ŋɩɩ wɩaa, má lɩɩsɛ ma tɩtɩa wʋbɔŋ wʋŋaalaa lɛ a vɩa wʋbɔmɔ-la kala sɩ gollima. Má kɛŋ ma tɩtɩa muuri Wɩa sɩpaaŋ a sɛɩ Wɩa niiŋ wɩalɩŋ ʋ sɩ dagɛma, wɩalɩŋ sɩ jaŋ wuo laama ta.

²² Ʋ maga dɩ ma ŋɩŋaa wɩalɩŋ Wɩa sɩ sɩ ma ŋɩŋaa nɛ. Ʋ bɩ maga dɩ ma nɩnɩɩ wɩalɩŋ dʋndʋŋ. Dɩ ma nɩ́ɩ nɩɩ wɩalɩŋ aŋ bɩbaa ŋaa, maa nyɩsɛ ma tɩtɩa nɛ.

²³ Dɩ nʋʋkala nɛ nɩɩ wɩalɩŋ aŋ bɩbaa ŋaa, ʋ nagɛ nɩa sɩ joŋ beenantɩrɛ a bee na ʋ nagɩsɩŋ nɛ,

²⁴ ʋ yie beŋ a na ʋ tɩtɩa beenantɩrɛ-la tʋɔŋ, ama dɩ ʋ nɛ sʋrɩsa lɩɩ, ʋ guu yʋ ŋɩɩ ʋ sɩ naga.

²⁵ Ama nɩɩ-la sɩ joŋ ʋ sɩaa hɛ Wɩa wombii-la sɩ chaasa zɔŋ a laa nɩaa tɩta lɛ, a fɩɛsɛ sɩɩŋ tutou, a bɩ wɩalɩŋ ʋ sɩ nɩa yʋa aŋ kɛmba tɩtɩŋ, Wɩa jaŋ pɛ ʋ lɛ wɩalɩŋ kala ʋ sɩɩ ŋaa lɛ.

²⁶ Dɩ nʋʋ nɛ joŋ ʋ tɩtɩa arɩ ʋʋ to Wɩa nɛ, aŋ bɩ ʋ tɩtɩa kɛnɛ arɩ wɩalɩŋ ʋ sɩɩ bʋl lɛ, ʋʋ nyɩsɛ ʋ tɩtɩa nɛ. Ʋ Wɩɩ-chʋɔlʋŋ ŋaa pɛɩ nɛ.

²⁷ La Nyɩmma Wɩa wombiiŋ tonuŋ ʋ sɩ daga arɩ ʋ ŋaa wombii-tɩtɩɩ nɛ ŋ-la: Má pɩpɛ biisinsiŋ arɩ yo-haala-la sɩɩ na hɛɛŋ lɛ, aŋ lɩɩsɛ ma tɩtɩa dʋnɩa nɩaa wʋŋaalaa sɩ jaŋ leŋ dɩ ma kɛŋ disiniŋ lɛ.