HOSIA 8 - WƖA TENIŊ

La TƖƖNA bʋl Iziral tɩŋŋaa teeŋ a tɩŋ ba sɩɩ to vʋɩyaa

¹ La TƖƖNA sɩ, “Má ŋmʋʋ banyile, dʋndɔŋŋɔɔ nagɛ kachuuŋ nɛ aa zaarɛ mɩ-na ma TƖƖNA dɩa nyuŋ, bɛɛ wɩaa mɩ nɩaa chei nii-la sɩ hɛ mɩ dɩ ba pɛgɛ nɛ, a vɩa wombii-la ma mɩ sɩ bile dɩ ba tuto.

² Iziral tɩŋŋaa ŋmoo niiŋ pɩmɛ a bʋl, ‘La Wɩa, la jɩmɩŋ nɛ.’

³ Ama Iziral tɩŋŋaa vɩa wɩalɩŋ sɩ zɔmɔ nɛ, ba dʋndɔŋŋɔɔ jaŋ kire to ba harɩŋ.

⁴ Ba bil kuoroo nɛ, ka mɩ jɩma tuo, a lɩɩsɛ sɩpaalaaraa ma, ka mɩ dee bɩ ŋɩɩ daga. Ba kɛŋ hɔpʋla arɩ sɛlɩmɛ nɛ libi tɔŋŋɔɔ a pɩ ba tɩtɩa, sɩ jaŋ cheiba.

⁵ Samarɩa tɩmma, má joŋ tɔŋ-la ma sɩ libe ʋ nagɛ nɛ-bie a yuo ta. Mɩ baanɩŋ ka sii ma nyuŋ nɛ. Ɛɛ nɛ ʋ jaŋ dieni magɛ ka dɩ ma leŋ disiniŋ ŋaanɩŋ?

⁶ Iziral tɩŋŋaa gɔgɔ nɛ ŋaa tɔmʋŋ deeŋ sɩ nagɛ nɛ-bel-pɔrʋŋ, ʋ bɩ Wɩa ŋaa. Ma tɔŋ-la sɩ nagɛ nɛ-bel-pɔrʋŋ, ba jaŋ yɛrʋ muno muno.

⁷ Kɩalɩŋ ŋ sɩ duo ba nɛ ŋ jaŋ kʋma yʋgɛ, dɩ mɩɩŋ nɛ bɩ lʋla ʋ bɩ bɩɩ. Dɩ ʋ nɛ fa paala hɛ biee ma, nʋhʋɔraa nɛ jaŋ joŋo dii.

⁸ Iziral kala cheye nɛ, ʋ hɛ tinteyee tʋɔŋ nɛ a nagɛ kʋtɔɔ nʋʋkala sɩ bɩ chɛ.

⁹ Ʋ gɔllɔɔ baarɛ ʋ dʋndʋŋa nɛ a nagɛ kaku-werigiŋ, a mʋ Asiiria tinteeŋ. Efirem joŋ ʋ tɩtɩa yalla pɩ ʋ hɩɩlaba nɛ.

¹⁰ Ba joŋ ba tɩtɩa yallɛ a hɛ tinteyee nɩaa tʋɔŋ ma nɛ, ama lɛɛlɛ mɩ jaŋ kɛmba kʋ hɛ dɔŋɔ lɛ. Kuori-duo jaŋ nyagɛba bil dɩ hɛɛŋ jʋʋba, dɩ ba kala jagɛ.

¹¹ Efirem saa wʋbɔŋŋɔɔ joŋo chɛnɩŋ Wɩɩsʋlʋŋ korunuŋ yʋgɛ ma nɛ, ama ba mɩɩra kɛŋ korunuŋ deemba bɩrɩmɛ lee ba sɩɩ ŋaa wʋbɔŋŋɔɔ nɛ.

¹² Mɩ ŋmʋnsɛ mɩ wombie-la mɩ sɩ bile dɩ ba tuto wɩaa yʋgɛ nɛ a pɩba, ama ba mɩɩra jomba a nagɛ ba ha bɩ ba na aŋ ka.

¹³ Ba yie kpʋ pʋsʋŋ a ŋaa Wɩɩsʋlʋŋ pɩmɛ, aŋ joŋ nammɩa-la chaŋ, ama mɩ-na ba TƖƖNA tʋɔŋ bɩ ba Wɩɩsʋlʋŋ-la nyuŋ tɔrɔ. Lɛɛlɛ mɩ jaŋ liise yi ba nɩbɔŋ wɩalɩŋ lɛ a dɔgɩsɛba a tɩŋ ba wʋbɔŋŋɔɔ wɩaa. Ba jaŋ mɩɩra mʋ Ijipiti tinteeŋ.

¹⁴ Iziral tɩŋŋaa saa kuoru dɩɩsɩŋ nɛ, Juda nɩaa ma saa kɛrɩsɩŋ golli tabalaa yʋgɛ. Ama ba yʋ mɩ-na Nɩɩ-la sɩ ŋaaba wɩaa nɛ, ŋɩɩ wɩaa mɩ jaŋ joŋ nyiniŋ hɛ tabala-la lɛ, dɩ ʋ joŋ ba dɩ-duoruŋ dii.”